•  ಗಣಹೋಮದೊಂದಿಗೆ ಸಂಸತ್ ಉದ್ಘಾಟನೆ
•  ರಾಜದಂಡಕ್ಕೆ ದೀರ್ಘದಂಡ ಪ್ರಣಾಮ
• ವೇದ ಘೋಷಗಳೊಂದಿಗೆ `ನಮೋ’ ಸಂಸತ್ ಪ್ರವೇಶ

 

ಕಟ್ಟಡಕ್ಕೆ ದೇಶದ ಹಲವೆಡೆಯ ಸಾಮಗ್ರಿಗಳ ಬಳಕೆ

ನವದೆಹಲಿ, ಮೇ 28 – ನೂತನ ಸಂಸತ್ ಭವನದ ನಿರ್ಮಾಣಕ್ಕೆ ಅಗತ್ಯ ವಾದ ಸಾಮಗ್ರಿಗಳನ್ನು ದೇಶದ ವಿವಿಧ ಭಾಗಗಳಿಂದ ತರಿಸಿದ್ದು ವಿಶೇಷವಾಗಿದೆ.

ಮಹಾರಾಷ್ಟ್ರ, ರಾಜಸ್ಥಾನ, ದಮನ್ ಮತ್ತು ಡಿಯು, ಮಧ್ಯ ಪ್ರದೇಶ, ಉತ್ತರ ಪ್ರದೇಶ, ಗುಜರಾತ್‌ ಮತ್ತಿತರೆ ಕಡೆಗಳಿಂದ ನಿರ್ಮಾಣಕ್ಕೆ ಅಗತ್ಯ ಸಾಮಗ್ರಿಗಳನ್ನು ತರಿಸಲಾಗಿದೆ. ಹೀಗಾಗಿ ಕಟ್ಟಡವು `ಏಕ್ ಭಾರತ್ ಶ್ರೇಷ್ಠ ಭಾರತದ’ ಪ್ರತೀಕವಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ಭವನಕ್ಕೆ ಅಗತ್ಯವಾದ ತೇಗದ ಮರ ವನ್ನು ಮಹಾರಾಷ್ಟ್ರದ ನಾಗಪುರದಿಂದ ತರಿಸಲಾಗಿದೆ. ಶಿಲೆಗಳನ್ನು ರಾಜಸ್ಥಾನದ ಸರ್ಮಥುರಾದಿಂದ ತರಲಾಗಿದೆ. ಹಸಿರು ಕಲ್ಲುಗಳನ್ನು ರಾಜಸ್ಥಾನದ ಉದಯಪುರದಿಂದ, ಕೆಂಪು ಕಲ್ಲುಗಳನ್ನು ಅಜ್ಮೀರ ಹಾಗೂ ಬಿಳಿ ಕಲ್ಲುಗಳನ್ನು ಅಂಬಾಜಿಗಳಿಂದ ತರಿಸಲಾಗಿದೆ.

ತಾರಿಸಿಗೆ ಅಗತ್ಯವಾದ ಉಕ್ಕನ್ನು ಕೇಂದ್ರಾಡಳಿತ ಪ್ರದೇಶವಾದ ಡಮನ್ ಮತ್ತು ಡಿಯುದಿಂದ ತರಿಸಲಾಗಿದೆ. ಪೀಠೋಪಕಣಗಳನ್ನು ಮುಂಬೈನಿಂದ ತರಿಸಲಾಗಿದೆ. ಕಲ್ಲಿನ ಜಾಲಿ ಕೆಲಸವನ್ನು ರಾಜಸ್ಥಾನದ ರಾಜನಗರ ಹಾಗೂ ಉತ್ತರ ಪ್ರದೇಶದ ನೋಯ್ಡಾದಲ್ಲಿ ನೆರವೇರಿಸಲಾಗಿದೆ.

ಅಶೋಕ ಸ್ತಂಭದ ನಿರ್ಮಾಣಕ್ಕೆ ಅಗತ್ಯವಾದ ಸಾಮಗ್ರಿಗಳನ್ನು ಮಹಾ ರಾಷ್ಟ್ರ ಹಾಗೂ ರಾಜಸ್ಥಾನಗಳಿಂದ ತರಿಸ ಲಾಗಿದೆ. ಲೋಕಸಭೆ ಹಾಗೂ ರಾಜ್ಯಸಭೆ ಗಳ ಛೇಂಬರ್‌ಗಳ ಹೊರ ಭಾಗದಲ್ಲಿ ಅಳವಡಿಸಲಾಗಿರುವ ಬೃಹತ್ ಅಶೋಕ ಚಕ್ರವನ್ನು ಮಧ್ಯ ಪ್ರದೇಶದ ಇಂದೋರ್‌ನಲ್ಲಿ ರೂಪಿಸಲಾಗಿದೆ.

ಎಂ-ಸ್ಯಾಂಡ್ ಅನ್ನು ಹರಿಯಾಣದ ಚರ್ಖಿ ದಾದ್ರಿಯಿಂದ ತರಿಸಲಾಗಿದೆ. ಹಾರು ಬೂದಿಯ ಇಟ್ಟಿಗೆಗಳನ್ನು ಹರಿಯಾಣ ಮತ್ತು ಉತ್ತರ ಪ್ರದೇಶದಿಂದ ತರಿಸಲಾಗಿದೆ. ನೂತನ ಸಂಸತ್ ಭವನವನ್ನು 1,200 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಲಾಗಿದೆ. ಟಾಟಾ ಪ್ರಾಜೆಕ್ಟ್ಸ್ ಸಂಸ್ಥೆಯು ಕಟ್ಟಡ ನಿರ್ಮಾಣದ ಗುತ್ತಿಗೆ ಪಡೆದಿತ್ತು.

ನೂತನ ಸಂಸತ್ತಿನಲ್ಲಿ ಅಖಂಡ ಭಾರತ

ನವದೆಹಲಿ, ಮೇ 28 – ನೂತನ ಸಂಸತ್‌ನಲ್ಲಿ ಸಾಂಸ್ಕೃತಿಕ ಭಾರತದ ಭೂಪಟವನ್ನು ಬಿಂಬಿಸಲಾಗಿದೆ. ಸಾಂಸ್ಕೃತಿಕ ಭಾರತದಲ್ಲಿ ನೆರೆಹೊರೆಯ ದೇಶಗಳ ಭಾಗಗಳೂ ಸೇರಿವೆ. ಇದು ಸಾಮಾಜಿಕ ಜಾಲತಾಣಗಳಲ್ಲಿ ಅಖಂಡ ಭಾರತದ ಚರ್ಚೆಗೂ ಕಾರಣವಾಗಿದೆ.

ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರು ಉದ್ಘಾಟಿಸಿದ ಸಂಸತ್ ಭವನದಲ್ಲಿ ಸಾಂಸ್ಕೃತಿಕ ಭಾರತದ ಚಿತ್ರವನ್ನು ಗೋಡೆಯ ಮೇಲೆ ಕೆತ್ತಲಾಗಿದೆ. 

ಪುರಾತನ ಸಾಂಸ್ಕೃತಿಕ ಭಾರತದ ಈ ಚಿತ್ರದಲ್ಲಿ ಈಗಿನ ಆಫ್ಘಾನಿಸ್ತಾನ, ಪಾಕಿಸ್ತಾನ, ನೇಪಾಳ, ಶ್ರೀಲಂಕಾ ಹಾಗೂ ಬಾಂಗ್ಲಾ ದೇಶದ ಭಾಗಗಳೂ ಇವೆ. ರಾಜ್ಯ ಬಿಜೆಪಿಯು ಈ ಕಲಾಕೃತಿಯನ್ನು ಟ್ವಿಟ್ಟರ್ ಮೂಲಕ ಹಂಚಿಕೊಂಡಿದೆ. 

ಇದು ಟ್ವಿಟ್ಟರ್‌ನಲ್ಲಿ ಹಲವಾರು ರೀತಿಯ ಚರ್ಚೆಗಳಿಗೆ ಕಾರಣವಾಗಿದೆ. ಕೆಲವರು ಇದನ್ನು ಅಖಂಡ ಭಾರತದ ಚಿತ್ರ ಎಂದೂ ಬಣ್ಣಿಸಿದ್ದಾರೆ.

ಭಾರತ ಐತಿಹಾಸಿಕ ಕಾಲದಿಂದ ಯಾವ ರೀತಿಯ ಪ್ರಭಾವ ಬೀರಿತ್ತು ಎಂಬುದನ್ನು ಬಿಂಬಿಸಲಾಗಿದೆ ಎಂದು ನ್ಯಾಷನಲ್ ಗ್ಯಾಲರಿ ಆಫ್ ಮಾಡರ್ನ್ ಆರ್ಟ್‌ನ ಪ್ರಧಾನ ನಿರ್ದೇಶಕ ಅದ್ವೈತ ಗಡನಾಯಕ್ ಹೇಳಿದ್ದಾರೆ. ಗಡನಾಯಕ್ ಅವರು ನೂತನ ಸಂಸತ್ ಕಟ್ಟಡದಲ್ಲಿ ಕಲಾಕೃತಿಗಳ ಆಯ್ಕೆಯಲ್ಲಿ ಭಾಗಿಯಾಗಿದ್ದರು.

ಅಖಂಡ ಭಾರತ ಆರ್.ಎಸ್.ಎಸ್. ಪ್ರತಿಪಾದ ನೆಯಾಗಿದೆ. ಇದರಲ್ಲಿ ಆಪ್ಘಾನಿಸ್ತಾನ, ಪಾಕಿಸ್ತಾನ, ಬಾಂಗ್ಲಾದೇಶ, ಶ್ರೀಲಂಕಾ, ಮ್ಯಾನ್‌ಮಾರ್‌ ಹಾಗೂ ಥೈಲ್ಯಾಂಡ್‌ಗಳು ಸೇರಿವೆ. ಆದರೆ, ಅಖಂಡ ಭಾರತವು ರಾಜಕೀಯ ಪರಿಕಲ್ಪನೆಯಲ್ಲ. ಇದು ಸಾಂಸ್ಕೃತಿಕ ಪರಿಕಲ್ಪನೆಯಾಗಿದೆ ಎಂದು ಆರ್.ಎಸ್.ಎಸ್. ಈಗಾಗಲೇ ಸ್ಪಷ್ಟಪಡಿಸಿದೆ.