ಮೇಷ ರಾಶಿ :
(ಚೂ.ಚೇ.ಚೋ.ಲ.ಲಿ.ಉ.ಲೇ.ಲೊ.ಅ.)
ಆದಾಯವು ಹೆಚ್ಚಿನ ಮಟ್ಟದಲ್ಲಿರದಿದ್ದರೂ ನಿಮ್ಮ ನಿರೀಕ್ಷೆಯ ಮಟ್ಟವನ್ನು ಮುಟ್ಟಲಿದೆ, ಹೊರಗಿನಿಂದ ಬರಬಹುದಾದ ಎಲ್ಲಾ ರೀತಿಯ ಸವಲತ್ತುಗಳನ್ನು ಪಡೆಯುವಿರಿ, ಗುಂಪು ಜಗಳಗಳಲ್ಲಿ ನಿಮ್ಮ ಪ್ರವೇಶ ಬೇಡ. ಇಲ್ಲವಾದಲ್ಲಿ ವೃಥಾ ಕೋರ್ಟು-ಕಛೇರಿಯೆಂದು ಅಲೆಯ ಬೇಕಾದೀತು, ಹೊಸದಾಗಿ ಆರಂಭಿಸಿರುವ ವ್ಯವಹಾರದಲ್ಲಿ ಲಾಭಾಂಶ ಕ್ರಮೇಣ ಹೆಚ್ಚಲಿದೆ, ಸಂಗಾತಿ ಯಿಂದ ನಿರೀಕ್ಷಿತ ಬೆಂಬಲ ಸಿಗಲಿದೆ, ವೈಯಕ್ತಿಕ ಆರೋಗ್ಯವನ್ನು ಕಡೆಗಣಿಸ ಬೇಡಿ, ಸಾಧು-ಸಜ್ಜನರ ಸೇವಾವಕಾಶ ದೊರೆಯಲಿದೆ, ಸಾಧ್ಯವಿದ್ದಲ್ಲಿ ಅನ್ನದಾನ ಮಾಡಿ. ಮಂಗಳ-ಗುರು-ಶುಕ್ರ-ಶುಭ ದಿನಗಳು.
ವೃಷಭ ರಾಶಿ :
(ಇ.ಉ.ಎ.ಒ.ವ.ವಿ.ವು.ವೆ.ವೋ)
ನಿಮಗೆ ನಿಮ್ಮ ವೈಯಕ್ತಿಕ ವಿಚಾರಗಳಿಗಿಂತ ಬೇರೆಯವರ ಆಂತರಿಕ ವಿಚಾರದಲ್ಲೇ ಆಸಕ್ತಿ ಜಾಸ್ತಿ. ಇದರಿಂದ ಅಪಮಾನಕ್ಕೊಳಗಾಗುವ ಸಂಭವವಿದೆ, ವಿಷಯಾಧಾರಿತ ವಿಚಾರಗಳಿಗೆ ಸಾಮಾಜಿಕ ಬೆಂಬಲ ದೊರೆಯುವುದು, ರಾಜಕಾರಣಿಗಳು ತಮ್ಮ ಹಿಂಬಾಲಕರ ಮೇಲೆ ಹೆಚ್ಚಿನ ನಿಗಾವಹಿಸುವುದು ಮೇಲು, ಇಲ್ಲವಾದಲ್ಲಿ ಜನ ವಿಶ್ವಾಸವನ್ನು ಕಳೆದು ಕೊಳ್ಳಬೇಕಾದೀತು, ರೈತಾಪಿ ಜನರಿಗೆ ಕೃಷಿಯಿಂದ ಹೆಚ್ಚಿನ ಲಾಭವಾಗಲಿದೆ, ಹಾವು ಮೊದಲಾದ ವಿಷ-ಜಂತುಗಳೊಂದಿಗೆ ಸರಸವಾಡುವುದು ಅಪಾಯಕರ, ಬಾಕಿ ಹಣ ವಸೂಲಾಗಲಿದೆ. ಗಣೇಶನನ್ನು ಆರಾಧಿಸಿ. ಗುರು-ಶುಕ್ರ-ಶನಿ-ಶುಭ ದಿನಗಳು.
ಮಿಥುನ ರಾಶಿ :
(ಕ.ಕಿ.ಕು.ಘ, ಔ, ಚ.ಕೆ.ಕೋ.ಹ.)
ಸಮಸ್ಯೆ ಯಾವುದೇ ಇರಲಿ ಅದನ್ನು ತಾಳ್ಮೆಯಿಂದ ಬಗೆ ಹರಿಸುವುದರಲ್ಲೇ ನಿಮ್ಮ ಜಾಣತನವಡಗಿದೆ, ವೈಯಕ್ತಿಕ ಸಾಮರ್ಥ್ಯದ ಬಗ್ಗೆ ಜನರು ಮೆಚ್ಚುಗೆ ವ್ಯಕ್ತಪಡಿಸುವರು. ಅತಿಯಾದ ತಿರುಗಾಟ ಅಥವಾ ಅನಿಯಮಿತ ಭೋಜನದಿಂದಾಗಿ ಆರೋಗ್ಯದ ಮೇಲೆ ಅಡ್ಡ ಪರಿಣಾಮ ಬೀರಲಿದೆ, ಸಂಗೀತಗಾರರಿಗೆ ಉತ್ತಮ ಅವಕಾಶ ದೊರೆತು ಸಂಪಾದನೆ ಹೆಚ್ಚಲಿದೆ ಬುದ್ಧಿಜೀವಿಗಳಿಗೆ ವೈಯಕ್ತಿಕ ಬದುಕಿನಲ್ಲಿ ಅನೇಕ ಸವಾಲುಗಳು ಎದುರಾಗಲಿವೆ. ಮಹಿಳೆಯರ ಅಭಿವೃದ್ಧಿಗೆ ಅನೇಕಾವಕಾಶಗಳು ತಾವಾಗಿಯೇ ಹುಡುಕಿಕೊಂಡು ಬರಲಿವೆ. ಆದಾಯ ಏನೇ ಇದ್ದರೂ ದೈನಂದಿನ ಜೀವನಕ್ಕೇನೂ ತೊಂದರೆಯಿಲ್ಲ. ಸೋಮ-ಬುಧ-ಗುರು-ಶುಭ ದಿನಗಳು.
ಕರ್ಕಾಟಕ ರಾಶಿ :
(ಹಿ.ಹು.ಹೆ.ಹೂ.ಡ.ಡಿ.ಡು.ಡೆ.ಡೋ)
ಸಾಮರ್ಥ್ಯಕ್ಕೆ ತಕ್ಕಂತೆ ಜವಾಬ್ದಾರಿ ವಹಿಸಿಕೊಳ್ಳುವುದರಲ್ಲೇ ನಿಮ್ಮ ಜಾಣತನವಡಗಿದೆ, ದುಷ್ಚಟಗಳಿಂದ ದೂರವಿರುವುದು ಎಲ್ಲಾ ರೀತಿಯಿಂದಲೂ ಉತ್ತಮ ನಿರ್ಧಾರವಾಗಲಿದೆ, ವಾರದ ಆರಂಭವು ಲಾಭ ದಾಯಕವಾಗಿ ಕಾಣಲಿದೆ. ನಿರೀಕ್ಷಿತ ಆದಾಯ ಸಂತಸ ತರಲಿದೆ. ಆದರೆ ಮಡದಿ-ಮಕ್ಕಳ ಇತಿಮಿತಿಯಿಲ್ಲದ ಬಯಕೆಗಳಿಂದಾಗಿ ಪಟ್ಟ ಶ್ರಮ ವ್ಯರ್ಥವಾಗಬಹುದು. ಸೇವಾಸಕ್ತರಿಗೆ ಸಾಮಾಜಿಕ ಬೆಂಬಲ ದೊರೆಯಲಿದೆ, ಚರ ಅಥವಾ ಸ್ಥಿರಾಸ್ತಿಕೊಳ್ಳಲು ಇದು ಉತ್ತಮ ಸಮಯವಾಗಿದೆ. ಮತ್ತೊಬ್ಬರ ವೈಯಕ್ತಿಕ ವಿಚಾರದಲ್ಲಿ ನಿಮ್ಮ ಪ್ರವೇಶ ಬೇಡ ಇಲ್ಲವಾದಲ್ಲಿ ಧನ -ಮಾನ- ಹಾನಿಯಾದೀತು. ಭಾನು-ಸೋಮ-ಬುಧ-ಶುಭ ದಿನಗಳು.
ಸಿಂಹ ರಾಶಿ :
(ಮ.ಮಿ.ಮು.ಮೋ.ವೆ.ಟ.ಟಿ.ಟು.ಟೆ)
ನಿಮ್ಮ ಹಲವು ಕಾಲಗಳ ಬೇಡಿಕೆಯೊಂದು ಇಷ್ಟರಲ್ಲೇ ನೆರವೇರಲಿದೆ, ಬಂಧು ಬಾಂಧವರಿಗೆ ನಿಷ್ಠೂರದ ಮಾತುಗಳನ್ನಾಡಿ ವೈರತ್ವವನ್ನು ಕಟ್ಟಿಕೊಳ್ಳ ಬೇಡಿ. ಆರ್ಥಿಕ ಸಮಸ್ಯೆಗಳು ಕಾಲ ಕ್ರಮೇಣ ಬಗೆ ಹರಿಯಲಿವೆ. ಮಕ್ಕಳ ನಡಾವಳಿಯಲ್ಲಿ ಕಂಡುಬರಲಿರುವ ಬದಲಾವಣೆ ತುಸು ನೆಮ್ಮದಿ ತರಲಿದೆ ಒಳ್ಳೆಯ ಕೆಲಸಗಳಿಗೆ ಯಾವತ್ತೂ ಜನರ ಬೆಂಬಲವಿದೆ ಬೆನ್ನು ಹಾಗು ಸೊಂಟನೋವು ನಿಮ್ಮನ್ನು ತೀವ್ರವಾಗಿ ಬಾಧಿಸಬಹುದು. ಸೂಕ್ತತಜ್ಞರ ಸಲಹೆ ಪಡೆಯುವುದು ಮೇಲು ವಿದ್ಯಾರ್ಥಿಗಳು ಅಧ್ಯಯನದಲ್ಲಿ ಯಶಸ್ವಿಯಾಗುವರು ಅವಿವಾಹಿತರಿಗೆ ಕಂಕಣಬಲ ಕೂಡಿಬರಲಿದೆ. ಭಾನು-ಬುಧ-ಗುರು-ಶುಭ ದಿನಗಳು.
ಕನ್ಯಾ ರಾಶಿ :
(ಟೋ.ಪ.ಪಿ.ಪು.ಷ.ಣ.ಠ.ಪೆ.ಪೋ)
ಮಗನ ಉದ್ಯೋಗದಲ್ಲಿ ಅನಿಶ್ಚಿತತೆ ಕಾಡಲಿದ್ದು, ಇದನ್ನು ಗಂಭೀರವಾಗಿ ಪರಿಗಣಿಸುವುದು ಮೇಲು, ಮಹಿಳೆಯರು ನಡೆಸುವ ವ್ಯವಹಾರದಲ್ಲಿ ಸಾಧಾರಣ ಲಾಭವಾಗಲಿದೆ. ವಿದೇಶಕ್ಕೆ ಹೋಗಬೇಕೆಂಬ ವಿದ್ಯಾರ್ಥಿಗಳ ಅಭಿಲಾಷೆಗೆ ದಾಖಲಾತಿ ಹಾಗೂ ತಾಂತ್ರಿಕ ತೊಂದರೆಗಳು ಎದುರಾಗಲಿವೆ. ಪಾರಂಪರಿಕ ವ್ಯವಹಾರದಲ್ಲಿ ಮುಂದುವರೆಯುವುದು ಮೇಲು. ತೀರ್ಥಯಾತ್ರೆ ಮಾಡುವ ಸದಾವಕಾಶವನ್ನು ಕಳೆದುಕೊಳ್ಳಬೇಡಿ. ಬುಧ-ಗುರು-ಶನಿ-ಶುಭ ದಿನಗಳು.
ತುಲಾ ರಾಶಿ :
(ರ.ರಿ.ರು.ರೆ.ರೊ.ತ.ತಿ.ತು.ತೆ.)
ತಿಳಿಯದಿರುವ ವಿಷಯಗಳನ್ನು ತಿಳಿದವರಂತೆ ಮಾತನಾಡುವ ನಿಮ್ಮ ಧೈರ್ಯವನ್ನು ಮೆಚ್ಚಬೇಕಾದದ್ದೇ. ನೀವು ಮಾಡಿರುವ ಸಾಮಾಜಿಕ ಕೆಲಸ, ಕಾರ್ಯಗಳಲ್ಲಿ ಮೆಚ್ಚುಗೆ ಮಾತಿಗಿಂತ ದೋಷಾರೋಪಣೆಯೇ ಹೆಚ್ಚು ಕೇಳಿ ಬರಲಿದೆ, ಹಾಗೆಂದ ಮಾತ್ರಕ್ಕೆ ಚಿಂತೆಬೇಡ. ಕೌಟುಂಬಿಕ ವಿಷಯದಲ್ಲಿ ಸಿಹಿ-ಕಹಿಗಳ ಮಿಶ್ರಣ ಸಹಜ. ಆತ್ಮೀಯರೊಬ್ಬರ ಅನಾರೋಗ್ಯದ ಚಿಂತೆ ನಿಮ್ಮನ್ನು ಕಾಡಲಿದೆ, ಖರ್ಚು ವೆಚ್ಚಗಳ ಮೇಲೆ ಹಿಡಿತ ಸಾಧಿಸದೇ ಹೋದಲ್ಲಿ ಉಳಿತಾಯದ ಗಂಟು ಕರಗಬಹುದು, ಆಸ್ತಿ ಖರೀದಿಗೆ ಮುನ್ನ ಆರ್ಥಿಕ ವ್ಯವಸ್ಥೆ ಮಾಡಿಕೊಳ್ಳುವುದು ಉತ್ತಮ, ಗುರುಗಳನ್ನು ವಿಶೇಷವಾಗಿ ಆರಾಧಿಸಿರಿ. ಸೋಮ-ಶುಕ್ರ-ಶನಿ-ಶುಭ ದಿನಗಳು.
ವೃಶ್ಚಿಕ ರಾಶಿ :
(ತೊ.ನ.ನಿ.ನು.ನೆ.ನೋ.ಯ.ಯಿ.ಯು.)
ಅತಿಯಾದ ಶ್ರಮದಿಂದಾಗಿ ದೈಹಿಕವಾಗಿ ಕುಗ್ಗಿದಂತೆ ಕಂಡು ಬಂದರೂ ಬೌದ್ಧಿಕವಾಗಿ ಕೆಲಸ ಕಾರ್ಯಗಳನ್ನು ಮಾಡುವ ಛಾತಿ ನಿಮ್ಮಲ್ಲಿದೆ, ಅನಿರೀಕ್ಷಿತ ಖರ್ಚು-ವೆಚ್ಚಗಳಿಂದಾಗಿ ಆರ್ಥಿಕ ಪರಿಸ್ಥಿತಿ ಏರುಪೇರಾದರೂ ಚಿಂತೆಬೇಡ. ಶಸ್ತ್ರಚಿಕಿತ್ಸೆ ಮಟ್ಟಕ್ಕೆ ಹೋಗಿದ್ದ ಆರೋಗ್ಯ ಸಮಸ್ಯೆಯು ಮಾತ್ರೆಗಳ ಸೇವನೆ ಮಾತ್ರದಿಂದಲೇ ನಿಯಂತ್ರಣಕ್ಕೆ ಬರಲಿದೆ, ಇದು ನಿಮ್ಮ ಅದೃಷ್ಟವೇ ಸರಿ. ವಿದೇಶದಲ್ಲಿ ಓದಬೇಕೆಂಬ ವಿದ್ಯಾರ್ಥಿಗಳ ಹಂಬಲಕ್ಕೆ ಸರ್ಕಾರವು ಸಹಾಯ ಹಸ್ತ ಚಾಚಲಿದೆ, ಯುವಕರು ಕೃಷಿ ಕಾರ್ಯದಲ್ಲಿ ಹೆಚ್ಚಿನ ಆಸಕ್ತಿ ತೋರುವರು. ಯುವಜನರು ತಮಗೆ ಬಂದೊದಗಿದ ಸದವಕಾಶವನ್ನು ತಾವಾಗಿಯೇ ಕೈ ಚೆಲ್ಲುವರು ಅನ್ನದಾನ ಮಾಡಿ. ಸೋಮ-ಮಂಗಳ-ಗುರು-ಶುಭ ದಿನಗಳು.
ಧನು ರಾಶಿ :
(ಯೆ.ಯೋ. ಬ.ಬಿ.ಬು.ಧ.ಫ.ಡ.ಬೆ.)
ಪೂರ್ವ ನಿರ್ಧರಿತವಲ್ಲದ ಆಲೋಚನೆಗಳಿಂದಾಗಿ ಕೆಲವೊಮ್ಮೆ ವ್ಯಾಪಾರ, ವ್ಯವಹಾರಗಳಲ್ಲಿ ನಷ್ಟವುಂಟಾಗಬಹುದು, ಹಾಗೆಂದ ಮಾತ್ರಕ್ಕೆ ಚಿಂತೆಬೇಡ. ಕಾರ್ಮಿಕ ವರ್ಗದವರು ಉದ್ಯಮಿಗಳೊಂದಿಗೆ ಸಹಕರಿಸಿಕೊಂಡು ಹೋಗುವುದು ಉತ್ತಮ. ಮನೆಯಲ್ಲಿ ಹಿರಿಯರು ತೆಗೆದುಕೊಳ್ಳಬಹುದಾದ ಒಂದು ತಪ್ಪು ನಿರ್ಧಾರ ಇಡೀ ಕುಟುಂಬ ವ್ಯವಸ್ಥೆಯನ್ನೇ ಹಾಳು ಮಾಡಬಹುದು, ಕಡಿಮೆ ಆದಾಯ ದೈನಂದಿನ ಬದುಕಿಗೇನೂ ಧಕ್ಕೆ ಮಾಡಲಾರದು. ಅವಿವಾಹಿತರಿಗೆ ಕಂಕಣ ಬಲ ಕೂಡಿ ಬಂದರೂ ಮದುವೆ ಮಾತುಕತೆ ಮುಂದೆ ಹೋಗಲಿದೆ, ವಿದ್ಯಾರ್ಥಿಗಳಿಗೆ ಉತ್ತಮ ದಿನಗಳು. ಕ್ಷೇತ್ರ ಸಂದರ್ಶನ ಮಾಡಿ. ಬುಧ-ಗುರು-ಶನಿ-ಶುಭ ದಿನಗಳು.
ಮಕರ ರಾಶಿ :
(ಜೊ.ಜ.ಜಿ.ಜೆ.ಶಿ.ಶು.ಶೇ.ಶೋ.ಗ.ಗಿ)
ಮಿತಿ-ಮೀರಿದ ಅಪಥ್ಯ ಭೋಜನದಿಂದಾಗಿ ವೈಯಕ್ತಿಕ ಆರೋಗ್ಯದಲ್ಲಿ ತುಸು ವ್ಯತ್ಯಾಸ ವಾದೀತು, ಇದು ಅಲಕ್ಷೆ ಮಾಡುವ ವಿಷಯವಲ್ಲ ಎಂಬುದು ನೆನಪಿರಲಿ. ಯುವಕರು ಕೇವಲ ಹೆಚ್ಚಿನ ಆದಾಯವನ್ನು ಮಾತ್ರ ನಿರೀಕ್ಷಿಸದೇ ಅದಕ್ಕೆ ತಕ್ಕ ಶ್ರಮಕ್ಕೂ ಒತ್ತು ಕೊಡುವುದು ಅಷ್ಟೇ ಮುಖ್ಯವಾಗಲಿದೆ, ಹಿರಿಯರು ಕೊಡಲಿರುವ ಸಲಹೆ, ಸೂಚನೆಗಳು ಅನುಭದಿಂದ ಕೂಡಿರುತ್ತವೆ ಎಂಬುದು ನೆನಪಿರಲಿ, ಗೃಹಿಣಿಯರು ಆದಾಯಕ್ಕೆ ತಕ್ಕಂತೆ ಮನೆ ವಾರ್ತೆ ಮಾಡುವುದನ್ನು ಕಲಿಯುವುದು ಮೇಲು, ಹೆಚ್ಚುತ್ತಿರುವ ತಿರುಗಾಟಕ್ಕೊಂದು ಕಡಿವಾಣ ಹಾಕುವುದು ಮೇಲು, ಗುರುಗಳನ್ನು ಆರಾಧಿಸಿ, ಸೋಮ-ಗುರು-ಶನಿ-ಶುಭ ದಿನಗಳು.
ಕುಂಭ ರಾಶಿ :
(ಗು.ಗೆ.ಗೊ.ಸ.ಸಿ.ಸು.ಸೆ.ಸೋ.ದ)
ಹಿಂದೆ ಹಿರಿಯರು ಮಾಡಿದ್ದ, ಮುಂದಾಲೋಚನಾಯುಕ್ತವಾಗಿದ್ದ ಕೆಲಸ ಕಾರ್ಯಗಳ ಫಲವನ್ನು ಈ ತಲೆ ಮಾರಿನವರು ಅನುಭವಿಸುವರು, ಪ್ರಾಯಕ್ಕೆ ಬಂದ ಮಕ್ಕಳು ಹಿರಿಯರೊಂದಿಗೆ ಹೇಗೆ ವರ್ತಿಸಬೇಕೆಂಬುದನ್ನು ದೊಡ್ಡವರು ಕಲಿಸಿ ಕೊಡುವುದು ಉತ್ತಮ ಸಂಸ್ಕಾರವಾಗಲಿದೆ. ಭೂಮಿ ವ್ಯವಹಾರವನ್ನು ನಡೆಸುವವರು ತುಸು ಮುನ್ನೆಚ್ಚರಿಕೆಯಿಂದಿರು ವುದು ಮೇಲು, ಕ್ರೀಡಾ ಪಟುಗಳಿಗೆ ಸರ್ಕಾರದಿಂದ ಹೆಚ್ಚಿನ ಸೌಲಭ್ಯಗಳು ಸಿಗಲಿವೆ. ಮನೆಯಲ್ಲಿ ಶುಭ ಕಾರ್ಯವೊಂದು ನಡೆಯುತ್ತಿರುವಾಗ ಯಾವುದೋ ಘಟಿಸಿ ಹೋಗಿದ್ದನ್ನೇ ನೆಪವಾಗಿಟ್ಟು ಕೊಂಡು ಬಂಧುಗಳು ವಾಗ್ವಾದ ನಡೆಸುವರು. ಗ್ರಂಥದಾನ ಮಾಡಿ, ಗುರು-ಶುಕ್ರ-ಶನಿ-ಶುಭ ದಿನಗಳು.
ಮೀನಾ ರಾಶಿ :
(ದಿ.ದು.ಖ.ಝ.ಥ.ದೆ.ದೋ.ಖ.ಚ.ಚಿ.)
ನಾವಿಕನೇ ದಾರಿ ತಪ್ಪಿದರೆ ದೋಣಿಯಲ್ಲಿ ಕುಳಿತವರ ಗತಿಯೇನು ಎಂಬಂತೆ ನಿಮ್ಮ ದ್ವಂದ್ವ ನಿರ್ಧಾರಗಳು ಕೌಟುಂಬಿಕ ವ್ಯವಸ್ಥೆಯನ್ನೇ ಹಾಳುಮಾಡಬಹುದು, ಆದಾಯ ಮಧ್ಯಮ ಗತಿಯಲ್ಲಿದ್ದರೂ, ದೈನಂದಿನ ಜೀವನಕ್ಕೇನೂ ತೊಂದರೆಯಿಲ್ಲ, ಸಂಗಾತಿಯ ಆರೋಗ್ಯದಲ್ಲಿ ಸುಧಾರಣೆ ಕಂಡುಬರಲಿದೆ, ಮಗಳ ವಿವಾಹಕ್ಕೆ ಬೇಕಾದ ಸಿದ್ಧತೆಗಳು ಭರದಿಂದ ಸಾಗಲಿವೆ, ಬರಬೇಕಾಗಿರುವ ಬಾಕಿ ಹಣಕ್ಕಾಗಿ ಪರರನ್ನು ಪೀಡಿಸುವುದರಿಂದ ಏನೂ ಪ್ರಯೋಜನವಿಲ್ಲ, ಪ್ರೇಮಿಗಳಲ್ಲಿ ಪರಸ್ಪರವುಂಟಾದ ಭಿನ್ನಾಭಿಪ್ರಾಯದಿಂದಾಗಿ ಸಂಬಂಧಗಳು ಹರಿದು ಹೋಗಲಿವೆ. ಗುರು-ಹಿರಿಯರನ್ನು ಗೌರವಿಸಿರಿ ಅನ್ನದಾನ ಮಾಡಿ. ಭಾನು-ಸೋಮ-ಗುರು-ಶುಭ ದಿನಗಳು.
ವಿಶೇಷ ದಿನಗಳು : ದಿನಾಂಕ: 9-10-2024 ನೇ ಬುಧವಾರ ಸರಸ್ವತೀ ಆಹ್ವಾನ ದಿನಾಂಕ:- 10-10-2024 ನೇ ಗುರುವಾರ ಸರಸ್ವತಿ ಪೂಜೆ, ದುರ್ಗಾಷ್ಟಮೀ. ದಿನಾಂಕ: 12-10-2024 ನೇ ಶುಕ್ರವಾರ ಮಹಾನವಮಿ ಆಯುಧ ಪೂಜೆ. ದಿನಾಂಕ:- 12-10-2024 ನೇ ಶನಿವಾರ ವಿಜಯದಶಮಿ ಶಮೀಪೂಜಾ, ಘಟವಿಸರ್ಜನೆ.
ಜಯತೀರ್ಥಾಚಾರ್ ವಡೇರ್
ದಾವಣಗೆರೆ.
ಫೋ. : 94486 66678