ಮಲೇಬೆನ್ನೂರು, ಅ.3- ಸಿಡಿಲು ಬಡಿದು 8 ಮೇಕೆಗಳು ಸಾವನ್ನಪ್ಪಿರುವ ಘಟನೆ ಗುರುವಾರ ಸಾಯಂಕಾಲ ಕಡರನಾಯ್ಕನಹಳ್ಳಿ ಗ್ರಾಮದ ಬಳಿ ಹೊಲದಲ್ಲಿ ನಡೆದಿದೆ. ಘಟನೆಯಲ್ಲಿ 3 ಮೇಕೆಗಳ ಕಣ್ಣುಗಳಿಗೆ ಹಾನಿಯಾಗಿ ನಿತ್ರಾಣ ಸ್ಥಿತಿಯಲ್ಲಿವೆ ಎನ್ನಲಾಗಿದೆ.  ಘಟನೆ ವೇಳೆ ಮೇಕೆ ಮೇಯಿಸುತ್ತಿದ್ದ ಗ್ರಾಮದ ಮರಿಯಪ್ಪ ಎಂಬಾತನ ಕಾಲಿಗೆ ಝಳ ತಾಕಿದ್ದು ಆತ ಗಾಬರಿಗೊಂಡಿದ್ದಾನೆ.

ಒಟ್ಟು 15 ಮೇಕೆಗಳನ್ನು ಸಾಕಿದ್ದ ಮರಿಯಪ್ಪ ಈ ಘಟನೆಯಿಂದಾಗಿ ತೀವ್ರ ಆಘಾತಕ್ಕೊಳಗಾಗಿದ್ದಾನೆ. ಗುರುವಾರ ಸಾಯಂಕಾಲ ಗುಡುಗು, ಸಿಡಿಲು ಸಹಿತ ಮಳೆ ಸುರಿದಾಗ ಈ ಘಟನೆ ನಡೆದಿದೆ. 

 ವಿಷಯ ತಿಳಿದ ತಕ್ಷಣ ಕೆ.ಎನ್. ಹಳ್ಳಿ ಗ್ರಾಮಸ್ಥರು ಸ್ಥಳಕ್ಕೆ ತೆರಳಿ ಮರಿಯಪ್ಪನನ್ನು ಆಸ್ಪತ್ರೆಗೆ ಕರೆತಂದಿದ್ದಾರೆ. ಕಂದಾಯ ನಿರೀಕ್ಷಕ ಆನಂದ್ ಮತ್ತು ಗ್ರಾ ಪಂ ಪಿಡಿಓ ಆವರು ಸ್ಥಳಕ್ಕೆ ಭೇಟಿ ಪರಿಶೀಲಿಸಿದರು.