ದಾವಣಗೆರೆ, ಸೆ. 25 – ನಗರದ ವಿಜಯನಗರ ಕ್ರೆಡಿಟ್ ಕೋ-ಆಪ್. ಸೊಸೈಟಿ 2023-24ನೇ ಸಾಲಿನಲ್ಲಿ 39,37,252.60 ರೂ. ಲಾಭ ಗಳಿಸಿ ವರ್ಷದಿಂದ ವರ್ಷಕ್ಕೆ ಅಭಿವೃದ್ದಿ ಪಥದಲ್ಲಿ ಮುನ್ನಡೆಯುತ್ತಿದೆ ಎಂದು ಸೊಸೈಟಿ ಅಧ್ಯಕ್ಷ ಜೆ.ಚೆಲುವಪ್ಪ ಸಂತಸ ವ್ಯಕ್ತಪಡಿಸಿದರು.

ಶ್ರೀ ಕೃಷ್ಣ ಭವಾನಿ ಸಭಾ ಭವನದಲ್ಲಿ ನಡೆದ ವಾರ್ಷಿಕ ಮಹಾಸಭೆಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು. 

ಪ್ರಸಕ್ತ ಸಾಲಿನಲ್ಲಿ 3858 ಸದಸ್ಯರು ಇದ್ದು, ಸೊಸೈಟಿಯು ರೂ. 1,23,61,000  ಷೇರು ಬಂಡವಾಳ ಹೊಂದಿದೆ.  ರೂ. 26.85 ಕೋಟಿ ಠೇವಣಿ ಇದ್ದು, ರೂ.20.89 ಕೋಟಿ ಸಾಲ ನೀಡಲಾಗಿದೆ. 30.41 ಕೋಟಿ ದುಡಿಯುವ ಬಂಡವಾಳವಿದ್ದು 8.15 ಕೋಟಿಗಳಷ್ಟು ವಿವಿಧ ಕಡೆ ಹೂಡಿಕೆಗಳನ್ನು ಮಾಡಲಾಗಿದೆ. 

ಮರಣ ಹೊಂದಿದ ಸಂಘದ ಸದಸ್ಯರ ಅಂತ್ಯಕ್ರಿಯೆಗೆ ನೆರವಾಗುವ ಉದ್ದೇಶದಿಂದ ಮೃತರ ವಾರಸುದಾರರಿಗೆ 4000 ರೂ. ಗಳನ್ನು ವಿತರಿಸಲಾಗುತ್ತಿದೆ. ಶಸ್ತ್ರಚಿಕಿತ್ಸೆಗೆ ಒಳಗಾದ ಸಂಘದ ಸದಸ್ಯರು ಅಗತ್ಯ ದಾಖಲೆ ನೀಡಿದಲ್ಲಿ, ಸಹಾಯ ಧನ ನೀಡಲು ತೀರ್ಮಾನಿಸಲಾಗಿದೆ ಎಂದರು. 

ಸಾರ್ವಜನಿಕರಿಗೆ ಅನುಕೂಲವಾಗುವಂತೆ ಇ-ಸ್ಟಾಂಪಿಂಗ್ ವ್ಯವಸ್ಥೆ, ಸಂಘದಿಂದ ಸಾಲ ಪಡೆದ ಸದಸ್ಯರುಗಳಿಗೆ ರೂ. 50,000 ಗಳ ವಿಮೆ ಮಾಡಿಸಲಾಗುತ್ತಿದೆ. ಸಂಘದ ಸಂಪೂರ್ಣ ವ್ಯವಹಾರವನ್ನು ಗಣಕೀಕೃತ ಗೊಳಿಸಲಾಗಿದೆ. 

ಈ ಬಾರಿ ಷೇರುದಾರರಿಗೆ ಶೇ.12 ಡಿವಿಡೆಂಡ್ ನೀಡಲು ನಿರ್ಧರಿಸಲಾಗಿದೆ. ಸಂಘದ ಕಛೇರಿಗೆ ನಿವೇಶನ ಅಥವಾ ಸ್ವಂತ ಕಟ್ಟಡದ ಗುರಿ ಹೊಂದಲಾಗಿದೆ ಎಂದು ಹೇಳಿದರು. ಇತ್ತಿಚೆಗೆ ನಿಧನರಾದ ಸಂಘದ ಉಪಾಧ್ಯಕ್ಷರಾಗಿದ್ದ ಎಂ.ಜಿ. ಮೋಹನ್‌ ಅವರಿಗೆ ಶ್ರದ್ಧಾಂಜಲಿ ಸಲ್ಲಿಸಲಾಯಿತು.

ಈ ಸಂದರ್ಭದಲ್ಲಿ ನಿರ್ದೇಶಕರುಗಳಾದ ಜೆ.ಕೆ.ಶಿವಾನಂದ, ಹೆಚ್.ಬಿ.ಗೋಣಪ್ಪ, ಬಿ.ರಮೇಶ್ (ಪಿ.ಜೆ.), ವಿ.ಮಂಜುನಾಥ, ರಮೇಶ್.ಬಿ., ಎನ್.ನಿಂಗಪ್ಪ, ಶ್ರೀಮತಿ ಹೆಚ್.ಸಿ.ವಾಣಿ, ಶ್ರೀಮತಿ ಸುನಂದ, ಡಿ.ಬಿ.ಚಂದ್ರಪ್ಪ, ವಿಶೇಷ ಆಹ್ವಾನಿತರಾದ ಎಸ್‍. ರವಿಸ್ವಾಮಿ, ಶ್ರೀಮತಿ ವಂದನಾ, ಕಾರ್ಯದರ್ಶಿ ದಯಾ ನಂದ ದೊಡ್ಡಮನಿ ಇತರರು ಉಪಸ್ಥಿತರಿದ್ದರು.