ಗಾಯತ್ರಿ ಸಿದ್ದೇಶ್ವರ ಆಸ್ತಿ ಮೌಲ್ಯ 32.84 ಕೋಟಿ ರೂ.

ಬಿಜೆಪಿ ಅಭ್ಯರ್ಥಿ ಯಾಗಿ ಗಾಯತ್ರಿ ಸಿದ್ದೇಶ್ವರ ಅವರು ನಾಮಪತ್ರ ಸಲ್ಲಿಸಿ ದ್ದು, ಅವರ ಆಸ್ತಿಗಳ ಒಟ್ಟು ಮೌಲ್ಯ 32.84 ಕೋಟಿ ರೂ. ಆಗಿದೆ. ಗಾಯತ್ರಿ ಅವರು 6.11 ಕೋಟಿ ರೂ.ಗಳ ಚರಾಸ್ತಿ ಹಾಗೂ 26.73 ಕೋಟಿ ರೂ. ಮೌಲ್ಯದ ಸ್ಥಿರಾಸ್ತಿ ಹೊಂದಿದ್ದಾರೆ.

ಬ್ಯಾಂಕ್ ಇತ್ಯಾದಿಗಳಲ್ಲಿ 48.44 ಲಕ್ಷ ರೂ.ಗಳ ಠೇವಣಿ, 51.48 ಲಕ್ಷ ರೂ.ಗಳ ಬಾಂಡ್‌ ಇತ್ಯಾದಿ, 22.34 ಲಕ್ಷ ರೂ.ಗಳ ಹೂಡಿಕೆ, 2.09 ಕೋಟಿ ರೂ.ಗಳ ವೈಯಕ್ತಿಕ ಸಾಲ ನೀಡಿದ್ದಾರೆ ಮತ್ತು 2.38 ಕೋಟಿ ರೂ.ಗಳ ಆಭರಣಗಳನ್ನು ಹೊಂದಿದ್ದಾರೆ.

14.70 ಲಕ್ಷ ರೂ.ಗಳ ಕೃಷಿ ಜಮೀನು, 5.08 ಕೋಟಿ ರೂ. ಮೌಲ್ಯದ ಕೃಷಿಯೇತರ ಜಮೀನು, 21.50 ಕೋಟಿ ರೂ. ಮೌಲ್ಯದ ವಾಣಿಜ್ಯ ಕಟ್ಟಡಗಳನ್ನು ಹೊಂದಿದ್ದಾರೆ. 5.89 ಲಕ್ಷ ರೂ.ಗಳ ಸಾಲವನ್ನೂ ಹೊಂದಿದ್ದಾರೆ.

ಅವರು ಶಿವಮೊಗ್ಗದ ಕಸ್ತೂರಬಾ ಬಾಲಕಿಯರ ಪಿ.ಯು. ಕಾಲೇಜಿನಲ್ಲಿ ವ್ಯಾಸಂಗ ಮಾಡಿದ್ದಾರೆ.

ಹಿಂದೂ ಅವಿಭಕ್ತ ಕುಟುಂಬದಡಿ ತಮ್ಮ ಪತಿಯೊಂದಿಗೆ ಜಂಟಿಯಾಗಿ 8.33 ಕೋಟಿ ರೂ. ಮೌಲ್ಯದ ಆಸ್ತಿಯನ್ನೂ ಹೊಂದಿದ್ದಾರೆ. ಇದರಲ್ಲಿ 4.87 ಕೋಟಿ ರೂ. ಚರಾಸ್ತಿ ಹಾಗೂ 3.46 ಕೋಟಿ ರೂ. ಸ್ಥಿರಾಸ್ತಿಯಾಗಿದೆ.

ಅವರ ಪತಿ ಸಂಸದ ಜಿ.ಎಂ. ಸಿದ್ದೇಶ್ವರ ಅವರ ಆಸ್ತಿ ಮೌಲ್ಯ 26.62 ಕೋಟಿ ರೂ. ಆಗಿದೆ. ಅವರು 9.88 ಕೋಟಿ ರೂ. ಮೌಲ್ಯದ ಚರಾಸ್ತಿ ಹಾಗೂ 16.74 ಕೋಟಿ ರೂ.ಗಳ ಸ್ಥಿರಾಸ್ತಿ ಹೊಂದಿದ್ದಾರೆ. 1 ಕೋಟಿ ರೂ. ಮೌಲ್ಯದ ಸಾಲವನ್ನೂ ಹೊಂದಿದ್ದಾರೆ.

ಪಾಲಿಕೆ ಸದಸ್ಯರು ಹೋಗಿದ್ದಾರೆ, ಮತದಾರರು ನಮ್ಮೊಂದಿಗಿದ್ದಾರೆ

ಜಗಳೂರಿನ ಮಾಜಿ ಶಾಸಕ ಗುರುಸಿದ್ದನಗೌಡ ಹಾಗೂ ಅವರ ಪುತ್ರ ಡಾ. ಟಿ.ಜಿ. ರವಿಕುಮಾರ್ ಅವರು ಬಿಜೆಪಿ ತೊರೆದಿರುವುದಕ್ಕೆ ಹೆಚ್ಚು ಪ್ರಾಮುಖ್ಯತೆ ನೀಡದ ಸಂಸದ ಜಿ.ಎಂ.ಸಿದ್ದೇಶ್ವರ, ಅವರು ನನ್ನ ಬಿಟ್ಟು ಹನ್ನೆರಡು ವರ್ಷಗಳೇ ಆಗಿವೆ ಎಂದಿದ್ದಾರೆ.

ನಾಲ್ವರು ಪಾಲಿಕೆ ಸದಸ್ಯರು ಕಾಂಗ್ರೆಸ್ ಸೇರಿರುವ ಬಗ್ಗೆ ಪ್ರತಿಕ್ರಿಯಿಸಿದ ಅವರು, ಪಾಲಿಕೆ ಸದಸ್ಯರು ಮಾತ್ರ ಹೋಗಿದ್ದಾರೆ. ಮತದಾರರು ಹೋಗುವುದಿಲ್ಲ. ಅವರ ಪಕ್ಷಾಂತರದಿಂದ ಜನ ಅಸಮಾಧಾನಗೊಂಡಿದ್ದಾರೆ. ಇನ್ನೂ ಹೆಚ್ಚು ಮತಗಳು ಬಿಜೆಪಿಗೆ ಸಿಗಲಿವೆ ಎಂದು ಸಿದ್ದೇಶ್ವರ ಹೇಳಿದರು.