ದಾವಣಗೆರೆ, ನ.14- ದೇಶ ನಿರ್ಮಾಣದಲ್ಲಿ ಕಾಂಗ್ರೆಸ್ ಪಕ್ಷ ಮಹತ್ವದ ಪಾತ್ರ ವಹಿಸಿದ್ದು, ಇದಕ್ಕೆ ಬುನಾದಿ ಹಾಕಿದವರು ಪಂಡಿತ್ ಜವಾಹರ್ ಲಾಲ್ ನೆಹರು ಎಂದು ಹಿರಿಯ ಶಾಸಕ ಡಾ. ಶಾಮನೂರು ಶಿವಶಂಕರಪ್ಪ ತಿಳಿಸಿದರು.
ನಗರದ 9ನೇ ವಾರ್ಡ್‍ನಲ್ಲಿ ಇಂದು ಹಮ್ಮಿಕೊಂಡಿದ್ದ ವಿವಿಧ ಅಭಿವೃದ್ದಿ ಕಾಮಗಾರಿಗಳಿಗೆ ಭೂಮಿ ಪೂಜೆ ನೆರವೇರಿಸಿ ಮಾತನಾಡಿದ ಅವರು ಕಾಂಗ್ರೆಸ್ ಪಕ್ಷ ದೇಶಕ್ಕೆ ದೊಡ್ಡ ಕೊಡುಗೆ ನೀಡಿದೆ ಎಂದರು.
ಇಂದು ಸಹ ಕಾಂಗ್ರೆಸ್ ಪಕ್ಷ ಅಭಿವೃದ್ಧಿ ಮಂತ್ರ ಪಠಿಸಲಿದೆ. ಆದರೆ ಬಿಜೆಪಿಯಂತೆ ನಾವು ಎಲ್ಲೂ ಬೆಂಕಿ ಹಚ್ಚುವಂತಹ ಕೆಲಸ ಮಾಡುವು ದಿಲ್ಲ ಎಂದ ಅವರು, ಈ ಹಿಂದೆ ನಗರಕ್ಕೆ ರಾಜ್ಯ ಸರ್ಕಾರದ ಅನುದಾನ ಮಾತ್ರ ಲಭಿಸುತ್ತಿತ್ತು. ಆದರೆ ಇಂದು ಕೇಂದ್ರ ಸರ್ಕಾರದ ಅನುದಾನ ವನ್ನೂ ನಾವು ತರುತ್ತಿದ್ದೇವೆ ಎಂದರು. ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ಅನುದಾನವನ್ನು ಸಮರ್ಪಕವಾಗಿ ಬಳಸಿಕೊಂಡು ನಗರವನ್ನು ಇನ್ನಷ್ಟು ಅಭಿವೃದ್ದಿ ಮಾಡಲಾಗುವುದು ಎಂದರು.
ಈ ಸಂದರ್ಭದಲ್ಲಿ ಪಾಲಿಕೆ ಮೇಯರ್‌ ಕೆ.ಚಮನ್‍ಸಾಬ್, ಉಪ ಮೇಯರ್‌ ಸೋಗಿ ಶಾಂತಕುಮಾರ್, ಆಯುಕ್ತೆ ಶ್ರೀಮತಿ ರೇಣುಕಾ, ಸದಸ್ಯರುಗಳಾದ ಜಾಕೀರ್ ಅಲಿ, ಎ.ಬಿ. ರಹೀಂ, ಕಬೀರ್ ಖಾನ್, ಬೀಡಾ ಮಹಬೂಬ್ ಬಾಷಾ, ಲಾಲ್ ದಾ, ಬಾಲಿದಾ, ಇಂಜಿನಿಯರ್ ಪ್ರೀತಂ, ಅನೀಫ್ ಮೇಸ್ತ್ರಿ, ಅನ್ವರ್ ಸಾಬ್, ಇಮ್ರಾನ್, ಆದಿಲ್ ಬಾಷಾ, ಶರ್ಫುಲ್ಲಾ, ಅಮ್ಜದ್, ಮರ್ದನ್, ಇಸ್ಮಾಯಿಲ್ ಸಾಬ್, ಘನಿಸಾಬ್, ಅಸ್ಗರ್, ಕಲೀಲ್, ನೂರಿ ಅಪ್ತಾಬ್, ಹಜರತ್ ಅಲಿ ಮತ್ತಿತರರಿದ್ದರು.