ದಾವಣಗೆರೆ, ಡಿ. 5 – ಕುರುಬ ಸಮಾಜ ಈಗಾಗಲೇ ಎಸ್‌ಟಿಯಲ್ಲಿದೆ. ಕೊಡಗು ಸೇರಿದಂತೆ ಕೆಲ ಜಿಲ್ಲೆಗಳಲ್ಲಿ ಸಮುದಾಯ ದವರು ಪಡೆಯುತ್ತಿರುವ ಮೀಸಲಾತಿಯನ್ನು ಇಡೀ ರಾಜ್ಯಕ್ಕೆ ವಿಸ್ತರಿಸುವಂತೆ ಪಾದಯಾತ್ರೆ ನಡೆಸುವುದಾಗಿ ಕಾಗಿನೆಲೆಯ ಕನಕ ಪೀಠದ ಜಗದ್ಗುರು ಶ್ರೀ ನಿರಂಜನಾ ನಂದಪುರಿ ಸ್ವಾಮೀಜಿ ತಿಳಿಸಿದ್ದಾರೆ.
ಜಿಲ್ಲಾ ಕುರುಬರ ವಿದ್ಯಾವರ್ಧಕ ಸಂಘದ ವತಿಯಿಂದ ನಗರದ ಶ್ರೀ ಬೀರೇಶ್ವರ ಭವನದಲ್ಲಿ ಆಯೋಜಿಸ ಲಾಗಿದ್ದ ಕುರುಬರ ಎಸ್‌ಟಿ ಮೀಸಲಾತಿ ಹೋರಾಟದ ಪೂರ್ವ ಭಾವಿ ಸಭೆಯ ಸಾನ್ನಿಧ್ಯ ವಹಿಸಿ ಅವರು ಮಾತನಾಡುತ್ತಿದ್ದರು. ಕೊಡಗು ಕುರುಬರು ಈಗಾಗಲೇ ಎಸ್‌ಟಿ ಪಟ್ಟಿಯಲ್ಲಿ ದ್ದಾರೆ. ಬೀದರ್, ಕಲಬುರಗಿ ಹಾಗೂ ಯಾದಗಿರಿಗಳಲ್ಲಿ ಕುರುಬರೇ ಆಗಿರುವ ಗೊಂಡ – ರಾಜಗೊಂಡ ಮುಂತಾದವರು ಮೀಸಲಾತಿ ಪಡೆಯುತ್ತಿದ್ದಾರೆ. ಅದನ್ನೇ ಇಡೀ ರಾಜ್ಯಕ್ಕೆ ವಿಸ್ತರಿಸು ವಂತೆ ನಾವು ಕೇಳುತ್ತಿದ್ದೇವೆ ಎಂದರು. ಈ ಮೀಸಲಾತಿಗಾಗಿ ಬರುವ ಜನವರಿ 15ರಿಂದ ಕಾಗಿನೆಲೆಯಿಂದ ಬೆಂಗಳೂರಿಗೆ ಪಾದಯಾತ್ರೆಯನ್ನು ಕೈಗೊಳ್ಳುತ್ತೇವೆ. ಇದರ ಆಯೋಜನೆಗಾಗಿ ಪೂರ್ವಭಾವಿ ಸಭೆಗಳನ್ನು ನಡೆಸುತ್ತಿರುವುದಾಗಿ ಶ್ರೀಗಳು ತಿಳಿಸಿದರು.
ಹೋರಾಟಕ್ಕೆ ಆಹ್ವಾನ ನೀಡಲು ಇದೇನು ಮದುವೆಯಲ್ಲ, ಸಮಾಜದಿಂದ ಲಾಭ ಪಡೆದವರು ಬರಬೇಕು
– ಶ್ರೀ ಈಶ್ವರಾನಂದಪುರಿ ಸ್ವಾಮೀಜಿ
ಕುರುಬ ಸಮಾಜದಿಂದ ಲಾಭ ಪಡೆದ ಎಲ್ಲ ರಾಜಕೀಯ ನಾಯಕರು ಎಸ್‌ಟಿ ಹೋರಾಟದಲ್ಲಿ ಭಾಗಿಯಾಗಬೇಕು ಎಂದು ಹೇಳಿರುವ ಹೊಸದುರ್ಗ ಕನಕ ಪೀಠದ ಶ್ರೀ ಈಶ್ವರಾನಂದಪುರಿ ಸ್ವಾಮೀಜಿ, ಹೋರಾಟದಲ್ಲಿ ಭಾಗಿಯಾಗಿ ಎಂದು ಆಹ್ವಾನಿಸಲು ಇದೇನು ಮದುವೆಯಲ್ಲ ಎಂದಿದ್ದಾರೆ.
ಈ ಹೋರಾಟದ ಹಿಂದೆ ಯಾವ ವ್ಯಕ್ತಿಯ ಕೈವಾಡವೂ ಇಲ್ಲ. ಬಹಳ ವರ್ಷಗಳಿಂದ ಹೋರಾಟ ನಡೆದಿದೆ. ಈ ಹೋರಾಟದಲ್ಲಿ ಪಕ್ಷಭೇದ ಹಾಗೂ ಆಂತರಿಕ ಭಿನ್ನಾಭಿಪ್ರಾಯ ಮಾಡಿದರೆ ಕುರುಬ ಸಮಾಜಕ್ಕೆ ಅನ್ಯಾಯ ಮಾಡಿದಂತೆ ಎಂದು ಹೇಳಿದ್ದಾರೆ.
ವ್ಯಕ್ತಿ ಹಿತಕ್ಕಿಂತ ಸಮುದಾಯದ ಹಿತ ಮುಖ್ಯ. ಶೇ.40ರಷ್ಟು ಕುರುಬರು ಕಾಡಿನಲ್ಲಿದ್ದು, ಅವರು ಆರ್ಥಿಕವಾಗಿ – ಸಾಮಾಜಿಕವಾಗಿ ಕಷ್ಟದ ಪರಿಸ್ಥಿತಿ ಎದುರಿಸುತ್ತಿದ್ದಾರೆ. ಅವರ ಮಕ್ಕಳ ಹಕ್ಕಿಗಾಗಿ ಬೀದಿಗಿಳಿದು ಹೋರಾಟ ಮಾಡಬೇಕಿದೆ ಎಂದು ತಿಳಿಸಿದ್ದಾರೆ.
ಈ ಹೋರಾಟ ಕಾಗಿನೆಲೆ ಮಠದಿಂದ ನಡೆದಿದೆ. ಬರುವ ಜನವರಿ 15ರ ಸಂಕ್ರಾಂತಿಯಿಂದ ಆರಂಭವಾಗುವ ಬೆಂಗಳೂರುವರೆಗಿನ ಪಾದಯಾತ್ರೆಯಲ್ಲಿ ಹತ್ತು ಲಕ್ಷ ಜನ ಸೇರಿಸುವ ಗುರಿ ಇದೆ. ಬೇಡಿಕೆ ಈಡೇರದೇ ಇದ್ದರೆ ದೆಹಲಿಗೂ ತೆರಳುತ್ತೇವೆ ಎಂದು ಶ್ರೀಗಳು ಹೇಳಿದ್ದಾರೆ.
ಸಿದ್ದರಾಮಯ್ಯ ಅನುಮತಿ ನಂತರವೇ ಹೋರಾಟ, ಆರ್ಎಸ್ಎಸ್ ಮಧ್ಯ ಪ್ರವೇಶವಾಗಿಲ್ಲ
– ಶ್ರೀ ನಿರಂಜನಾನಂದಪುರಿ ಸ್ವಾಮೀಜಿ
ದಾವಣಗೆರೆ, ಡಿ. 5 – ಕುರುಬ ಸಮುದಾಯಕ್ಕೆ ಎಸ್‌ಟಿ ಸ್ಥಾನ ನೀಡಬೇಕೆಂಬ ಹೋರಾಟಕ್ಕೆ ತಮ್ಮನ್ನು ಆಹ್ವಾನಿಸಿಲ್ಲ ಎಂದು ಕಾಂಗ್ರೆಸ್ ನಾಯಕ ಸಿದ್ದರಾಮಯ್ಯ ಹೇಳಿರುವುದನ್ನು ತಳ್ಳಿ ಹಾಕಿರುವ ಕನಕ ಗುರು ಪೀಠದ ಜಗದ್ಗುರು ಶ್ರೀ ನಿರಂಜನಾನಂದಪುರಿ ಸ್ವಾಮೀಜಿ, ಅವರ ಅನುಮತಿ ಹಾಗೂ ಅಭಿಮತ ಪಡೆದ ನಂತರವೇ ಹೋರಾಟ ಆರಂಭಿಸಲಾಗಿದೆ ಎಂದಿದ್ದಾರೆ.
ಪತ್ರಕರ್ತರೊಂದಿಗೆ ಮಾತನಾಡುತ್ತಿದ್ದ ಅವರು, ಎಸ್‌ಟಿ ಹೋರಾಟಕ್ಕೆ ಸಂಬಂಧಿಸಿದಂತೆ ಮೊದಲು ಚರ್ಚಿಸಿದ್ದೇ ಸಿದ್ದರಾಮಯ್ಯ ಜೊತೆ. ಅವರ ಮನೆಗೆ ತೆರಳಿ ಎರಡು ತಾಸು ಚರ್ಚಿಸಿ, ಅನುಮತಿ ಹಾಗೂ ಅಭಿಮತ ಪಡೆದ ನಂತರವೇ ಬಿಜೆಪಿ ನಾಯಕ ಹಾಗೂ ಸಚಿವ ಈಶ್ವರಪ್ಪ ಬಳಿಗೆ ತೆರಳಿದ್ದೆವು ಎಂದು ಶ್ರೀಗಳು ಹೇಳಿದ್ದಾರೆ.
ಎಸ್‌ಟಿ ಹೋರಾಟದ ಹಿಂದೆ ಆರ್ಎಸ್ಎಸ್ ಕೈವಾಡ ಇದೆ ಎಂದು ಸಿದ್ದರಾಮಯ್ಯ ಹೇಳಿರುವುದನ್ನು ತಳ್ಳಿ ಹಾಕಿದ ಶ್ರೀಗಳು, ಬಿ.ಎಲ್. ಸಂತೋಷ್ ಅವರನ್ನು ಬಿಜೆಪಿ ಪ್ರಧಾನ ಕಾರ್ಯದರ್ಶಿ ಎಂದು ಭೇಟಿ ಮಾಡಿದ್ದೇವೆಯೇ ವಿನಃ ಆರ್ಎಸ್ಎಸ್ ನಾಯಕ ಎಂದಲ್ಲ. ಎಸ್.ಟಿ. ಮೀಸಲಾತಿ ಕೊಡುವ ಬಗ್ಗೆ ಯಾರೇ ಹೇಳಿದರೂ ಅವರ ಜೊತೆ ಮಾತನಾಡುತ್ತೇವೆ ಎಂದು ಹೇಳಿದರು.
ಸಿದ್ದರಾಮಯ್ಯ ಅಹಿಂದ ಹಾಗೂ ಕುರುಬ ಸಮುದಾಯದ ನಾಯಕರು. ಎಸ್.ಟಿ. ಹೋರಾಟ ಸಮಿತಿಯಂತಹ ನೂರು ಸಂಘಟನೆಗಳು ಹುಟ್ಟಿದರೂ ಅವರ ವರ್ಚಸ್ಸಿಗೆ ಕುಂದಾಗದು ಎಂದು ಇದೇ ವೇಳೆ ಶ್ರೀಗಳು ತಿಳಿಸಿದರು.
24 ದಿನಗಳಲ್ಲಿ 340 ಕಿ.ಮೀ. ಪಾದಯಾತ್ರೆ
ಎಸ್.ಟಿ. ಬೇಡಿಕೆ ಈಡೇರಿಕೆಯ ಹೋರಾಟವನ್ನು ಜನಾಂದೋಲನವಾಗಿ ಪರಿವರ್ತಿಸಲು ಜನವರಿ 15ರ ಸಂಕ್ರಾಂತಿಯಿಂದ 24 ದಿನಗಳ ಕಾಲ ಕಾಗಿನೆಲೆಯಿಂದ ಬೆಂಗಳೂರಿಗೆ 340 ಕಿ.ಮೀ. ದೂರದ ಪಾದಯಾತ್ರೆಯನ್ನು ಕಾಗಿನೆಲೆಯ ಕನಕ ಗುರುಪೀಠದ ಜಗದ್ಗುರು ಶ್ರೀ ನಿರಂಜನಾನಂದಪುರಿ ಸ್ವಾಮೀಜಿ ಕೈಗೊಳ್ಳಲಿದ್ದಾರೆ.
ಪಾದಯಾತ್ರೆ ಬೆಂಗಳೂರು ತಲುಪಲಿರುವ ಫೆಬ್ರವರಿ 7ರಂದು ಹತ್ತು ಲಕ್ಷಕ್ಕೂ ಹೆಚ್ಚು ಜನರನ್ನು ಒಗ್ಗೂಡಿಸಿ ರಾಜ್ಯ ಮಟ್ಟದ ಬೃಹತ್ ಸಮಾವೇಶ ನಡೆಸಲಾಗುವುದು ಎಂದು ಶ್ರೀ ನಿರಂಜನಾನಂದಪುರಿ ಸ್ವಾಮೀಜಿ ತಿಳಿಸಿದ್ದಾರೆ.
ಈ ಪಾದಯಾತ್ರೆಯ ಮಾರ್ಗದಲ್ಲಿ ಬರುವ ಹಾವೇರಿ, ದಾವಣಗೆರೆ, ತುಮಕೂರು, ಬೆಂಗಳೂರು ಗ್ರಾಮಾಂತರ ಜಿಲ್ಲೆಗಳ ಕುರುಬ ಸಮುದಾಯದವರಷ್ಟೇ ಅಲ್ಲದೇ ಇಡೀ ರಾಜ್ಯದ ಕುರುಬ ಸಮುದಾಯದವರು ಪಾದಯಾತ್ರೆಯಲ್ಲಿ ಭಾಗಿಯಾಗಲಿದ್ದಾರೆ ಎಂದು ಶ್ರೀಗಳು ಹೇಳಿದ್ದಾರೆ.
ಕಲಬುರಗಿ, ಯಾದಗಿರಿ ಹಾಗೂ ಬೀದರ್‌ಗಳಲ್ಲಿ ಕುರುಬ ಸಮುದಾಯದವರಿಗೆ ಈಗಾಗಲೇ ಎಸ್‌ಟಿ ಮೀಸಲಾತಿ ದೊರೆಯುತ್ತಿದೆ. ಜನಾಂದೋಲನ ನಡೆದಲ್ಲಿ ಅಖಂಡ ಕರ್ನಾಟಕದ ಕುರುಬರಿಗೆ ಈ ಸೌಲಭ್ಯ ಸಿಗಲಿದೆ ಎಂದವರು ಹೇಳಿದರು.
ಈ ಸಂದರ್ಭದಲ್ಲಿ ಮಾತನಾಡಿದ ಎಸ್‌ಟಿ ಹೋರಾಟ ಸಮಿತಿ ರಾಜ್ಯ ಉಪಾಧ್ಯಕ್ಷ ಬಿ.ಎಂ. ಸತೀಶ್, ನಾಯಕ ಹಾಗೂ ಕುರುಬ ಸಮುದಾಯಗಳನ್ನು ಶೈಕ್ಷಣಿಕ ಸೌಲಭ್ಯಕ್ಕಾಗಿ ಎಸ್.ಟಿ.ಗೆ 1984ರಲ್ಲೇ ಸೇರ್ಪಡೆ ಮಾಡಲಾಗಿತ್ತು. ನಾಯಕ ಸಮುದಾಯದವರು ಹೋರಾಟದಿಂದ ಎಸ್.ಟಿ.ಯಲ್ಲೇ ಮುಂದುವರೆದರು. ಆದರೆ, ಆ ಸಂದರ್ಭದಲ್ಲಿ ಕುರುಬರು ಹೋರಾಟ ನಡೆಸದ ಹಾಗೂ ಕನಕ ಗುರುಪೀಠ ಆ ಸಂದರ್ಭದಲ್ಲಿ ಇರದಿದ್ದ ಕಾರಣ ಸೌಲಭ್ಯ ಸಿಗಲಿಲ್ಲ ಎಂದು ವಿಷಾದಿಸಿದರು.
ದೂಡಾ ಅಧ್ಯಕ್ಷ ರಾಜನಹಳ್ಳಿ ಶಿವಕುಮಾರ್ ಮಾತನಾಡಿ, ಕಾಗಿನೆಲೆ ಶ್ರೀಗಳ ಪಾದಯಾತ್ರೆ ರಾಜ್ಯದಲ್ಲೇ ಹೆಸರು ಮಾಡಲಿದ್ದು, ಸಂಘಟನೆ ಸಹಕಾರಿಯಾಗಲಿದೆ. ಎಸ್‌ಟಿ ಹೋರಾಟ ರಾಜ್ಯದಲ್ಲಿ ಸಂಚಲನ ಮೂಡಿಸಿದೆ. ಪಾದಯಾತ್ರೆ ನಗರಕ್ಕೆ ಬಂದಾಗ ಹಬ್ಬದ ವಾತಾವರಣ ಮೂಡಿಸಬೇಕು ಎಂದು ಕರೆ ನೀಡಿದರು.
ಸಮಾಜದ ಮುಖಂಡರಾದ ಮಂಜುನಾಥ್, ಜಿ.ಪಂ. ಸದಸ್ಯ ಜೆ.ಸಿ.ಲಿಂಗಪ್ಪ, ಬಿ.ಹೆಚ್. ಪರಶುರಾಮ್, ಕುಣಿಬೆಳಕೆರೆ ದೇವೇಂದ್ರಪ್ಪ, ರಾಜು, ಕುಂಬಳೂರು ವಿರೂಪಾಕ್ಷಪ್ಪ ಮತ್ತಿತರರು ಮಾತನಾಡಿ, ಶ್ರೀಗಳ ನೇತೃತ್ವದ ಪಾದಯಾತ್ರೆ ಯಶಸ್ವಿಗೆ ಸಂಪೂರ್ಣ ಬೆಂಬಲ ನೀಡುವುದಾಗಿ ತಿಳಿಸಿದರು.
ವೇದಿಕೆಯ ಮೇಲೆ ಸಮಾಜದ ಮುಖಂಡರಾದ ಸುನಂದಮ್ಮ ಪರಶುರಾಮಪ್ಪ, ಕುಂದೂರು ವಿರೂಪಾಕ್ಷಪ್ಪ, ಗೋಣೆಪ್ಪ, ಬಿ.ಟಿ. ರಮೇಶ್, ಡಿ.ಹೆಚ್. ಪರಶುರಾಮಪ್ಪ, ಗುರುನಾಥ, ಚನ್ನಪ್ಪ, ಹರಪನಹಳ್ಳಿ ಜಿ.ಪಂ. ಕ್ಷೇತ್ರದ ಸದಸ್ಯ ಬಿ.ಹೆಚ್. ಪರಶುರಾಮಪ್ಪ ಮತ್ತಿತರರು ಉಪಸ್ಥಿತರಿದ್ದರು.