ದಾವಣಗೆರೆ, ಏ.7- ಸಾಮಾಜಿಕ ಕಳಕಳಿ, ಸಮಾಜದಲ್ಲಿ ಇನ್ನೂ ಬೇರೂರಿರುವ ಅಸ್ಪೃಶ್ಯತೆ, ಮೌಢ್ಯತೆ, ಪರಿಸರ ಸಂರಕ್ಷಣೆ, ಭ್ರಷ್ಟಾಚಾರ, ಮಹಿಳಾ ದೌರ್ಜನ್ಯ, ಸರ್ಕಾರಿ ಯಂತ್ರಗಳಲ್ಲಿನ ಲೋಪದೋಷಗಳನ್ನು ಎತ್ತಿ ಹಿಡಿದು ಸರ್ಕಾರಿ ಆಡಳಿತ ಎಚ್ಚರಿಕೆ ಮೂಡಿಸುವ ನಿಟ್ಟಿನಲ್ಲಿ ನೈರ್ಮಲ್ಯ, ಸ್ವಚ್ಚತೆ, ಆರೋಗ್ಯ, ಶೈಕ್ಷಣಿಕ ಅರಿವು, ಗ್ರಾಮೀಣ ಪ್ರದೇಶದ ಜನರ ಪಂಚಾಯಿತಿ ಜನಾಧಿಕಾರ, ಜನಾಂದೋಲನ ಇನ್ನಿತರೆ ಹತ್ತು ಹಲವು ಪ್ರಗತಿಪರ ಜಾಗೃತಿ ಮೂಡಿಸುವ ಜಾಥಾ, ಬೀದಿನಾಟಕ ಪ್ರದರ್ಶನದ ಮೂಲಕ ಸಾಮಾಜಿಕ ಬದುಕಿನ ಅನಾವರಣ, ಇನ್ನಿತರೆ ಕಾರ್ಯಕ್ರಮಗಳನ್ನು ಸಂಘಟಿಸಿ, ಜಿಲ್ಲೆಯ, ರಾಜ್ಯದ ಮನೆ ಮಾತಾಗಿರುವ ಇಪ್ಟಾ ಭಾರತೀಯ ಜನಕಲಾ ಸಮಿತಿ ಕಲಾವಿದರು ತಮ್ಮ ಜನಪ್ರಿಯ ಬೆಳದಿಂಗಳಲ್ಲಿ ಇಪ್ಟಾ ಕಾರ್ಯಕ್ರಮವನ್ನು ನಗರದ ಆವರಗೆರೆಯ ಗೌಡ್ರ ಶರಣಪ್ಪ ವೃತ್ತದಲ್ಲಿ  ಜಾಗೃತಿ ಹಾಡುಗಳನ್ನು ಪ್ರಸ್ತುತಪಡಿಸಿ ತಿಂಗಳ ಹುಣ್ಣಿಮೆಯ ಗೋಧೂಳಿ ಸಂಜೆಗೆ ಮೆರುಗು ನೀಡಿದರು.

ಇಪ್ಟಾ ಜಿಲ್ಲಾ ಅಧ್ಯಕ್ಷ ಐರಣಿ ಚಂದ್ರುರವರ ನೇತೃತ್ವದಲ್ಲಿ ನಡೆದ ಈ ಬೆಳದಿಂಗಳಲ್ಲಿ ಇಪ್ಟಾ ಕಾರ್ಯಕ್ರಮದಲ್ಲಿ ಸ್ಥಳೀಯ ಯುವ ಮುಖಂಡ ಅರುಣ್ ಕುಮಾರ್, ರುದ್ರಮುನಿ, ಸೇರಿದಂತೆ ನೂರಾರು ಗ್ರಾಮಸ್ಥರು ಭಾಗವಹಿಸಿ ಇಪ್ಟಾ ಕಲಾತಂಡದ ಕಲಾವಿದರ ಹಾಡುಗಳ ಮೆಲುಕು ಹಾಕಿದರು.

ಆರಂಭದಲ್ಲಿ ಇಪ್ಟಾ ಸ್ವಾಗತ ಗೀತೆ ಹಾಡಿ ಮನುಷ್ಯರಾದ ನಾವುಗಳು ಮಾನವೀಯ ಮೌಲ್ಯಗಳ ಗುಣ ಅಳವಡಿಸಿಕೊಂಡು ಮಾನವರಾಗೋಣ…. ಈ ನಾಡನ್ನು ಕಟ್ಟಲು ಶ್ರಮಿಸೋಣ ಎಂಬ ಸಂದೇಶ ಸಾರುವ, ರೈತರ ಬವಣೆ ನೀಗಿಸುವ  ರೈತಪರ ಹಾಡುಗಳ ಹಾಡಿದರು.

ಕಾರ್ಯಕ್ರಮದಲ್ಲಿ ಶರಣಪ್ಪ ಶ್ಶಾಗಲೆ, ಮಹಾಂತೇಶ್, ಶ್ರೀನಿವಾಸ್, ಶೌಕತ್, ಗೌರವ ಸಲಹೆಗಾರ ಪುರಂದರ್ ಲೋಕಿಕೆರೆ, ಅಲಿ, ಖಾದರ್, ಹೂವಪ್ಪ, ಷಣ್ಮುಖ ಸ್ವಾಮಿ ಪಾಲ್ಗೊಂಡಿದ್ದರು.

ಇಪ್ಟಾ ಕಾರ್ಯದರ್ಶಿ ಬಾನಪ್ಪ ಸ್ವಾಗತಿಸಿ, ಕಲಾವಿದ ಖಾದರ್ ವಂದಿಸಿದರು.