ಹರಪನಹಳ್ಳಿ, ಫೆ.28- ತಾಲ್ಲೂಕಿನ ಹಾರಕನಾಳು ಗ್ರಾಮ ಪಂಚಾಯ್ತಿ ಚುನಾವಣೆ ಫಲಿತಾಂಶಕ್ಕಾಗಿ ಬೆಳಿಗ್ಗೆಯಿಂದ ತಹಶೀಲ್ದಾರರ ಕಚೇರಿ ಬಳಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಅಭ್ಯರ್ಥಿಗಳು ಕಾದು ಕುಳಿತ್ತಿದ್ದರು. ಸಂಜೆ ಯವರೆಗೂ ಮತ ಎಣಿಕೆ ಕಾರ್ಯ ಜರುಗಿತು.
ಪಟ್ಟಣದ ತಾಲ್ಲೂಕು ಮಿನಿ ವಿಧಾನಸೌಧದ ಸಭಾಂಗಣದಲ್ಲಿ ಮಂಗಳವಾರ ಮತ ಎಣಿಕೆ ಕಾರ್ಯ ನಡೆದಿದ್ದು, ಒಟ್ಟು ಮೂರು ಕೊಠಡಿ ಗಳಲ್ಲಿ ಮತ ಎಣಿಕೆಯನ್ನು ಮಾಡಲಾಯಿತು.
ಚುನಾವಣೆಗೂ ಮುನ್ನ ಹಾರಕನಾಳು ಗ್ರಾಮದ 3 ಸ್ಥಾನಗಳ ಪೈಕಿ 1 ಸ್ಥಾನವಾದ ಪ.ಜಾತಿ(ಮ) ವರ್ಗದಿಂದ ದುರ್ಗಮ್ಮ ಅವಿರೋಧವಾಗಿ ಆಯ್ಕೆಯಾಗಿದ್ದರು. ಇನ್ನು ಉಳಿದಂತೆ 21 ಸ್ಥಾನಗಳಿಗೆ ಫೆ.25ರಂದು ಚುನಾವಣೆ ನಡೆದಿದ್ದು, ಇಂದು ಮತ ಎಣಿಕೆ ಕಾರ್ಯ ಜರುಗಿತು.
ಆರಂಭದಲ್ಲಿ ಈಶಾಪುರ ಗ್ರಾಮದ 1 ಸ್ಥಾನಕ್ಕೆ ಮತ ಎಣಿಕೆ ನಡೆದಿದ್ದು, ಪೂಜಾರ ಮಂಜುನಾಥ 5 ಮತಗಳ ಅಂತರದಿಂದ ಗೆದ್ದು ನಗೆ ಬೀರಿದರು. ಹಾರಕನಾಳು ಕ್ಷೇತ್ರದ 1 ರಲ್ಲಿ ಬಸವರಾಜಪ್ಪ ಹೊನ್ನಪ್ಪ 280 ಮತ ಪಡೆದು ಜಯ ಗಳಿಸಿದರೆ, ರೇಣುಕವ್ವ ಹಾಗೂ ಬಡಿಗೇರ ರತ್ನಮ್ಮ ಇವರು 262 ಸಮ ಮತಗಳನ್ನು ಪಡೆದಿದ್ದು, ಚುನಾವಣಾಧಿಕಾರಿಗಳು ಅಂತಿಮವಾಗಿ ಲಾಟರಿ ಮೂಲಕ ಬಡಿಗೇರ ರತ್ನಮ್ಮ ಆಯ್ಕೆಯಾಗಿದ್ದಾರೆ ಎಂದು ಘೋಷಣೆ ಮಾಡಿದರು.
ಹಾರಕನಾಳು ಕ್ಷೇತ್ರ 2ರಲ್ಲಿ ಮೂರು ಸ್ಥಾನಗಳಿಗೆ ಮೀಸಲಿದ್ದು, ಇದರಲ್ಲಿ ಸಾಮಾನ್ಯ ಮಹಿಳೆ ಶಾಂತಮ್ಮ ಕರಿಯಪ್ಪ ಹಾವನೂರು 318, ಸಾಮಾನ್ಯದಲ್ಲಿ ಮಹಾಂತೇಶ್ 343 ವಿಜಯ ಸಾಧಿಸಿದರೆ, ಪ.ಜಾತಿ ಮಹಿಳೆ ಕೆ.ದುರುಗಮ್ಮ ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ.
ಕನ್ನನಾಯಕನಹಳ್ಳಿ ಗ್ರಾಮದಲ್ಲಿ 2 ಸ್ಥಾನಗಳ ಪೈಕಿ ಪ.ಜಾತಿ ಮಹಿಳಾ ಸ್ಥಾನದ ಅಭ್ಯರ್ಥಿ ಭಾಗ್ಯ ಅಶೋಕ ಅವಿರೋಧವಾಗಿ ಆಯ್ಕೆಯಾಗಿದ್ದರು. ಉಳಿದ ಸ್ಥಾನಕ್ಕೆ ನಡೆದ ಮತ ಎಣಿಕೆಯಲ್ಲಿ ದುಗ್ಯನಾಯ್ಕ 319 ಮತ ಪಡೆದು ಜಯ ಸಾಧಿಸಿದ್ದಾರೆ.
ಹುಲಿಕಟ್ಟಿಯ ಮೂರು ಸ್ಥಾನಗಳಿಗೆ 11 ಜನ ಅಭ್ಯರ್ಥಿಗಳು ಸ್ಪರ್ಧಿಸಿದ್ದು, ಇದರಲ್ಲಿ ಪ.ಜಾತಿ ವರ್ಗದಲ್ಲಿ ಅಕ್ಷತಾರವರು 316 ಮತ ಪಡೆದಿದ್ದರೆ, ಸಾಮಾನ್ಯ ಮಹಿಳಾ ವರ್ಗದಲ್ಲಿ ಬಿ.ಬಿ.ಫಾತಿಮಾ 467 ಮತ ಪಡೆದು ಜಯ ಸಾಧಿಸಿದರೆ, ಮತ್ತೊಂದು ಸಾಮಾನ್ಯ ಮಹಿಳಾ ವರ್ಗದಲ್ಲಿ ರಾಭಿಯಾಭೀ 417 ಮತಗಳನ್ನು ಪಡೆದು ವಿಜಯಶಾಲಿಯಗಿದ್ದಾರೆ.
ಚನ್ನಹಳ್ಳಿ ಗ್ರಾಮದಲ್ಲಿ 4 ಸ್ಥಾನಗಳಿಗೆ 9ಜನ ಅಭ್ಯರ್ಥಿಗಳು ಸ್ಪರ್ಧಿಸಿದ್ದು, ಇದರಲ್ಲಿ ಎಸ್‍ಸಿ ಮಹಿಳೆ ಧನಿಬಾಯಿ 834 ಮತ ಪಡೆದಿದ್ದಾರೆ. ಎಸ್.ಸಿ.ಮಹಿಳೆ ಸಿ.ದೇವಿ ಬಾಯಿ 560 ಮತಗಳು, ಎಸ್‍ಸಿ ಸಾಮಾನ್ಯ ಪಿ.ಶಿವನಾಯ್ಕ 700 ಮತಗಳು ಹಾಗೂ ಎಸ್.ಸಿ.ಸಾಮಾನ್ಯ ಶಾರದಬಾಯಿಯವರಿಗೆ 488 ಮತಗಳನ್ನು ಪಡೆಯುವ ಮೂಲಕ ಗೆಲುವು ಸಾಧಿಸಿದ್ದಾರೆ.
ಹುಲಿಕಟ್ಟಿ-1 ಹಾಗೂ ಮೇಗಳತಾಂಡ ಗ್ರಾಮದ ಮತ ಎಣಿಕೆ ಕಾರ್ಯ ಸಂಜೆಯವರೆಗೂ ಮುಂದುವರೆದಿತ್ತು.
ಉಪವಿಭಾಗಾಧಿಕಾರಿ ಟಿ.ವಿ.ಪ್ರಕಾಶ್, ಎಣಿಕೆ ಕೊಠಡಿಗೆ ಬೇಟಿ ನೀಡಿದ್ದರು. ತಹಶೀಲ್ದಾರ್ ಶಿವಕುಮಾರ ಬಿರಾದಾರ, ಚುನಾವಣಾಧಿಕಾರಿಗಳಾದ ರವಿಕುಮಾರ್, ಅರವಿಂದ್, ಪಿಎಸ್‍ಐ ಶಾಂತಮೂರ್ತಿ ಹಾಗೂ ಕಂದಾಯ ಇಲಾಖೆ ಅಧಿಕಾರಿಗಳು ಮತ ಎಣಿಕೆ ಕಾರ್ಯದಲ್ಲಿ ತೊಡಗಿದ್ದರು.