ಮರಳು ಬ್ಲಾಕ್ ಹರಾಜಿಗೆ ಶೀಘ್ರ ಟೆಂಡರ್: ಎಸ್ಸೆಸ್ಸೆಂ

ಜಿಲ್ಲೆಯಲ್ಲಿ ಹೊಸದಾಗಿ ಟೆಂಡರ್ ಪ್ರಕ್ರಿಯೆ ಮುಗಿಯದ ಕಾರಣ ಮರಳಿಗೆ ಸಮಸ್ಯೆಯಾಗಿದ್ದು ಇದರ ನಿವಾರಣೆಗಾಗಿ ಶೀಘ್ರದಲ್ಲಿ ಟೆಂಡರ್ ಕರೆದು ಗುರುತಿಸಲಾದ 24 ಬ್ಲಾಕ್‍ಗಳಲ್ಲಿ ಮರಳು ಎತ್ತಲು ಅವಕಾಶ ಕಲ್ಪಿಸಲಾಗುತ್ತದೆ ಎಂದು ಸಚಿವ ಎಸ್.ಎಸ್.ಮಲ್ಲಿಕಾರ್ಜುನ್ ತಿಳಿಸಿದರು. 

ಜಿಲ್ಲೆಯಲ್ಲಿ ಮರಳು ಬ್ಲಾಕ್‍ಗಳನ್ನು ಹರಾಜು ಮಾಡದ ಕಾರಣ ಶಿವಮೊಗ್ಗದಿಂದ ಮರಳು ತರಿಸಿಕೊಳ್ಳ ಬೇಕಾಗಿದೆ ಮತ್ತು ಇಲ್ಲಿ ಕಾಳಸಂತೆಯಲ್ಲಿ ಮರಳು ಸಾಗಣೆ ಮಾಡ ಲಾಗುತ್ತದೆ. ಇದರಿಂದ ಬಡವರು, ಮಧ್ಯಮ ವರ್ಗದವರು ಮನೆ ಕಟ್ಟಿಕೊಳ್ಳಲು ಸಮಸ್ಯೆಯಾಗಿದೆ ಎಂದು ಶಾಸಕ ಡಿ.ಜಿ.ಶಾಂತನಗೌಡ ಸಭೆಯಲ್ಲಿ ಪ್ರಸ್ತಾಪಿಸಿದರು.ಈ ವೇಳೆ ಗಣಿ ಮತ್ತು ಭೂ ವಿಜ್ಞಾನ ಸಚಿವರ ಖಾತೆಗೆ ಬರುವುದರಿಂದ ಶೀಘ್ರವಾಗಿ ಟೆಂಡರ್ ಕರೆಯಬೇಕೆಂ ದಾಗ ಸಚಿವರು ಅಲ್ಪಾವಧಿ ಟೆಂಡರ್ ಕರೆದು ಗುರುತಿಸಲಾದ ಮರಳು ಬ್ಲಾಕ್‍ಗಳನ್ನು ಹರಾಜು ಮಾಡುವ ಮೂಲಕ ಜಿಲ್ಲೆಯ ಜನರಿಗೆ ಮರಳು ಸಿಗುವಂತೆ ಕ್ರಮವಹಿಸಲು ಜಿಲ್ಲಾಧಿಕಾರಿಗೆ ತಿಳಿಸಿದರು. 

ಮೊಟ್ಟೆ ವಿತರಣೆ ವಿಡಿಯೋ ಮಾಡಲು ಸೂಚನೆ

ಶಾಲೆಗಳಲ್ಲಿ ಪ್ರತಿ ಮಗುವಿಗೆ ವಾರಕ್ಕೆ 6 ಮೊಟ್ಟೆ ವಿತರಿಸಬೇಕು. ಆದರೆ ಹರ್ಲಿಪುರ ಗ್ರಾಮದಲ್ಲಿ ವಾರಕ್ಕೆ 2 ಮೊಟ್ಟೆ ಮಾತ್ರ ವಿತರಿಸಲಾಗುತ್ತಿದೆ ಎಂದು ಶಾಸಕ ಕೆ.ಎಸ್. ಬಸವಂತಪ್ಪ ಸಭೆಯಲ್ಲಿ ಪ್ರಸ್ತಾಪಿಸಿದರು.

ವಾರದಲ್ಲಿ 2ದಿನ ರಾಜ್ಯ ಸರ್ಕಾರ ಹಾಗೂ 4 ದಿನ ಅಜೀಂ ಪ್ರೇಮ್‌ಜೀ ಫೌಂಡೇಷನ್‌ ವತಿಯಿಂದ ಸೇರಿ ಒಟ್ಟು 6 ಮೊಟ್ಟೆಗಳನ್ನು ವಿತರಿಸಲಾಗುತ್ತದೆ ಎಂದು ಶಿಕ್ಷಣ ಇಲಾಖೆ ಅಧಿಕಾರಿಗಳು ತಿಳಿಸಿದರು.

ಪ್ರತಿ ದಿನ ಮೊಟ್ಟೆ ವಿತರಿಸುವುದನ್ನು ವೀಡಿಯೋ ಮಾಡಿ ಅಪ್‌ಲೋಡ್ ಮಾಡಲು ಕ್ರಮ ಕೈಗೊಳ್ಳುವಂತೆ ಸಚಿವರು ಅಧಿಕಾರಿಗಳಿಗೆ ಸೂಚಿಸಿದರು.

ಶೇ.80ರಷ್ಟು ಅನಧಿಕೃತ ಹೋರ್ಡಿಂಗ್ಸ್‌ 

ಜಿಲ್ಲೆಯಲ್ಲಿ ಅಳವಡಿಸಲಾಗಿರುವ ಶೇ.80ರಷ್ಟು ಹೋರ್ಡಿಂಗ್ಸ್‌ ಅಕ್ರಮವಾಗಿವೆ. ಈ ಕುರಿತು ಕಳೆದ ಎರಡು ತಿಂಗಳನಿಂದ ಮಾಹಿತಿ ಕೇಳಿದರೂ ನೀಡಲಿಲ್ಲ ಎಂದು ಹರಿಹರ ಶಾಸಕ ಬಿ.ಪಿ. ಹರೀಶ್ ಪಿಡಬ್ಲ್ಯೂಡಿ ಇಲಾಖೆ ಇಂಜಿನಿಯರ್‌ಗೆ ತರಾಟೆಗೆ ತೆಗೆದುಕೊಂಡರು.

ಹರಿಹರದಲ್ಲಿಯೇ 186  ಹೋರ್ಡಿಂಗ್‌ಗಳಿವೆ. ನೀವು ಜಿಲ್ಲೆಯಲ್ಲಿ 200 ಹೋರ್ಡಿಂಗ್ಸ್ ಇರುವುದಾಗಿ ಮಾಹಿತಿ ನೀಡಿದ್ದೀರಿ ಎಂದು ಕಿಡಿಕಾರಿದರು.

ಈ ವಿಷಯದಲ್ಲಿ ಹತ್ತಿಪ್ಪತ್ತು ವರ್ಷಗಳಿಂದ ದುಡಿದುಕೊಂಡಿದ್ದಾರೆ. ಆದರೆ ಕಳೆದ 6 ತಿಂಗಳಿನಿಂದ ಬಂಡವಾಳ ಹಾಕಿದ ಬಡವರಿಗೆ ಈಗ ತೊಂದರೆಯಾಗಿದೆ. ಅನಧಿಕೃತ ಹೋರ್ಡಿಂಗ್ಸ್‌ಗಳಿಂದ ಸ್ಥಳೀಯ ಸಂಸ್ಥೆಗಳ ಆದಾಯಕ್ಕೂ ವಂಚನೆಯಾಗುತ್ತದೆ ಎಂದರು. ಸಮರ್ಪಕ ಮಾಹಿತಿಯನ್ನು ಶಾಸಕರಿಗೆ ನೀಡುವಂತೆ ಸಚಿವ ಮಲ್ಲಿಕಾರ್ಜುನ್ ಅಧಿಕಾರಿಗೆ ಸೂಚಿಸಿದರು.

ಎಸ್ಸೆಸ್ಸೆಲ್ಸಿ: 2,000 ವಿದ್ಯಾರ್ಥಿಗಳು ಗೈರು-ಫಲಿತಾಂಶ ಹೆಚ್ಚಳದ ನಿರೀಕ್ಷೆ ಹುಸಿ ಸಾಧ್ಯತೆ

ಜಿಲ್ಲೆಯಲ್ಲಿ ಅನುದಾನಿತ ಶಾಲೆಗಳಲ್ಲಿ ಎಸ್ಸೆಸ್ಸೆಲ್ಸಿಗೆ ನೋಂದಣಿಯಾಗಿರುವ 2 ಸಾವಿರ ಮಕ್ಕಳು ಇಲ್ಲಿಯವರೆಗೂ ಗೈರು ಹಾಜರಾಗಿದ್ದಾರೆ. ಹೀಗಾಗಿ ಎಸ್ಸೆಸ್ಸೆಲ್ಸಿ ಫಲಿತಾಂಶದಲ್ಲಿ ರಾಜ್ಯಮಟ್ಟದಲ್ಲಿ ಏರಿಕೆ ಕಾಣುವುದು ಕಷ್ಟ ಎಂದು ಜಿಲ್ಲಾಧಿಕಾರಿ ಗಂಗಾಧರಸ್ವಾಮಿ ಹೇಳಿದರು.

ಕಳೆದ ಬಾರಿ ಫಲಿತಾಂಶದಲ್ಲಿ ಕುಸಿತ ಕಂಡ ಹಿನ್ನೆಲೆಯಲ್ಲಿ ಸಿಇಒ  ಜೊತೆಗೂಡಿ ಮುಖ್ಯೋಪಾಧ್ಯಾಯರ ಸಭೆಗಳನ್ನು ನಡೆಸಿದ್ದೇವೆ. ಬೆಳಿಗ್ಗೆ 5 ಗಂಟೆಗೆ ಮಕ್ಕಳಿಗೂ ಟ್ಯೂಷನ್ ಮಾಡಲು ಹಾಗೂ ಸಂಜೆ ಪಾಠಗಳಿಗೆ ಮತ್ತು ಮಕ್ಕಳು ಹಿಂದುಳಿದ ವಿಷಯ ಗುರುತಿಸಿ ಒತ್ತು ನೀಡುವಂತೆ ಕ್ರಮ ಕೈಗೊಳ್ಳಲಾಗಿದೆ ಎಂದು ಜಿಲ್ಲಾಧಿಕಾರಿ ಮಾಹಿತಿ ನೀಡಿದರು. ಈ ಬಾರಿಯ ಕನಿಷ್ಟ 15ನೇ ಸ್ಥಾನದ ಬಳಿಯಾದರೂ ಬನ್ನಿ ಎಂದು ಶಾಸಕ ಹರೀಶ್ ಹೇಳಿದರೆ, ಒಂದಂಕಿ ಸ್ಥಾನಕ್ಕೆ ಬರುವಂತೆ ಹೇಳಿ ಎಂದು ಸಚಿವ ಎಸ್ಸೆಸ್ಸೆಂ ಶಾಸಕರಿಗೆ ನಗುತ್ತಲೇ ಹೇಳಿದರು.

ಕನ್ನಡಕ್ಕೆ ಆದ್ಯತೆ ನೀಡಿ: ಎ.ಬಿ.ಆರ್.

ಅನೇಕ ಇಲಾಖೆಗಳು ಸಭೆಗೆ ಇಂಗ್ಲಿಷ್‌ನಲ್ಲಿ ಮಾಹಿತಿ ನೀಡಿದ್ದು, ಕನ್ನಡಕ್ಕೆ ಆದ್ಯತೆ ನೀಡಬೇಕು ಎಂದು ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಸದಸ್ಯ ಎ.ಬಿ. ರಾಮಚಂದ್ರಪ್ಪ ಒತ್ತಾಯಿಸಿದರು. ಮುಂದಿನ ದಿನಗಳಲ್ಲಿ ಕನ್ನಡದಲ್ಲಿಯೇ ವರದಿ ತರಿಸಲು ಕ್ರಮ ಕೈಗೊಳ್ಳುವಂತೆ ಜಿ.ಪಂ. ಸಿಸಿಒ ಭರವಸೆ ನೀಡಿದರು.

ಮರಣೋತ್ತರ ಪರೀಕ್ಷೆಯ ವರದಿಯನ್ನೂ ಕನ್ನಡದಲ್ಲಿಯೇ ನೀಡಲು ಕ್ರಮ ಕೈಗೊಳ್ಳಬೇಕು ಎಂದು ರಾಮಚಂದ್ರಪ್ಪ, ವೈದ್ಯಾಧಿಕಾರಿಗಳಿಗೆ ಹೇಳಿದಾಗ, ಎರಡೂ ಭಾಷೆಯಲ್ಲಿ ನೀಡುವಂತೆ ಸಚಿವರು ಸೂಚಿಸಿದರು.