ಕೇಕ್ ಕತ್ತರಿಸಿ ಸಂಭ್ರಮ, ದೇವಸ್ಥಾನಗಳಿಗೆ ತೆರಳಿ ದರ್ಶನ ಪಡೆದ ಭಕ್ತರು, ಕುಡಿದು ದಣಿದ ಯುವಕರು

ದಾವಣಗೆರೆ, ಜ.1- ರಾತ್ರಿ 12 ಗಂಟೆಯಾಗುತ್ತಲೇ ಪಟಾಕಿಗಳು ಆಕಾಶದಲ್ಲಿ ಚಿತ್ತಾರ ಮೂಡಿಸಿದವು. ಯುವಕರು ಕೇಕೆ ಹಾಕಿದರು. ಹ್ಯಾಪಿ ನ್ಯೂ ಇಯರ್ ಎಂದು ಕೂಗಿದರು. ಸಂಭ್ರಮಿಸುತ್ತಾ ಹೊಸ ವರ್ಷವನ್ನು ಸ್ವಾಗತಿಸಿದರು.

ನಗರದಲ್ಲಿ ಹೊಸ ವರ್ಷಕ್ಕೆ ಯುವಕ-ಯುವತಿಯರಿಂದ ಸಂಭ್ರಮದ ಸ್ವಾಗತ ಸಿಕ್ಕಿತು. ಪ್ರತಿಷ್ಠಿತ ಹೋಟೆಲ್‌ಗಳಲ್ಲಿ ನೆರೆದಿದ್ದವರು ಸಂಗೀತ, ಹಾಡು, ನೃತ್ಯಗಳ ಮೂಲಕ ಸಂಭ್ರಮಿಸಿದರು. ಯುವಕರು ಬೈಕ್‌ಗಳಲ್ಲಿ ಕೇಕೇ ಹಾಕುತ್ತಾ ರಸ್ತೆಗಳಲ್ಲಿ ತಿರುಗಾಡಿದರು.

ಖಾಸಗಿ ಹೋಟೆಲ್​ಗಳಲ್ಲಿ ಆಯೋಜನೆ ಮಾಡಿದ್ದ ಇವೆಂಟ್​ಗಳಲ್ಲಿ ಯುವ ಜನತೆ ಭಾಗಿಯಾಗಿ ಹಾಡುಗಳಿಗೆ ಕುಣಿದು ಕುಪ್ಪಳಿಸಿ ದರು. ಯುವಕರಿಗಿಂತ ನಾವೇನು ಕಮ್ಮಿ ಇಲ್ಲ ಎಂಬಂತೆ ಯುವತಿಯರು ಸ್ಟೆಪ್​ ಹಾಕಿದರು. ಇವೆಂಟ್​​ಗಳಲ್ಲಿ ಯುವತಿಯರಿಗೆ, ಮಹಿಳೆಯರಿಗೆ ಬೌನ್ಸರ್​ಗಳು ವಿಶೇಷ ಭದ್ರತೆ ಒದಗಿಸಿದ್ದರು.

ಮನೆಗಳಲ್ಲಿ ಕೇಕ್ ಕತ್ತರಿಸಿ ಸಂಭ್ರಮಿಸಲು ಕೇಕ್‌ಗಳಿಗೆ ಬೇಡಿಕೆ ಹೆಚ್ಚಾಗಿತ್ತು. ಬುಧವಾರ ತಡರಾತ್ರಿಯವರೆಗೂ ಬೇಕರಿಗಳಲ್ಲಿ ಕೇಕ್ ಬಿಕರಿಯಾ ಯಿತು. ಗುರುವಾರವೂ ಸಂಘ-ಸಂಸ್ಥೆ ಗಳು, ಕಚೇರಿಗಳಲ್ಲಿ ಕೇಕ್ ಕತ್ತರಿಸಿ ಸಂಭ್ರಮಿಸಲಾಯಿತು.

ಮಧ್ಯಾಹ್ನ ಹಾಗೂ ರಾತ್ರಿಯೂ ಊಟದ ಹೋಟೆಲ್‌ಗಳು, ಅದರಲ್ಲೂ ನಾರ್ಥ್ ಇಂಡಿ ಯನ್ ಹೋಟೆಲ್‌ಗಳು ಭರ್ತಿಯಾಗಿ ದ್ದವು. ಹೆದ್ದಾರಿ ಪಕ್ಕದ ಬಾರ್ ಅಂಡ್ ರೆಸ್ಟೋರೆಂಟ್‌ ಗಳೂ ಭರ್ತಿಯಾಗಿದ್ದವು. ಹೋಟೆಲ್-ರೆಸ್ಟೋರೆಂಟ್‌ಗಳಲ್ಲಿ ಮದ್ಯಕ್ಕೆ ಹೆಚ್ಚು ದರ ನೀಡಲೊಪ್ಪದ ಯುವಕರು, ಖಾಲಿ ನಿವೇಶನ, ದೊಡ್ಡ ಮೈದಾನಗಳಲ್ಲಿ ಪಾರ್ಟಿ ಮಾಡಿದರು. ಹೋಲ್‌ಸೇಲ್ ಅಂಗಡಿಗಳಲ್ಲಿ ಮದ್ಯ ಖರೀದಿಸಿ ನಾಲ್ಕಾರು ಜನ ಗುಂಪು ಕೂಡಿ ಕುಡಿದು, ಕೇಕೆ ಹಾಕುತ್ತಿದ್ದರು. ಸನಿಹದಲ್ಲೇ ಇದ್ದ ಮನೆಗಳಿಗೆ ಇದು ಕಿರಿ ಕಿರಿಯಾಗುತ್ತಿತ್ತು.

ಬೆಳಿಗ್ಗೆ ದೇವಸ್ಥಾನಗಳಲ್ಲಿ ಜನ ಜಂಗುಳಿ ಇತ್ತು. ಹೊಸ ವರ್ಷದ ಮೊದಲ ದಿನ ದೇವರ ದರ್ಶನಕ್ಕೆ ಜನರು ತೆರಳುತ್ತಿದ್ದುದು ಸಾಮಾನ್ಯವಾಗಿತ್ತು.