ಪೌರಾಯುಕ್ತರನ್ನು ತರಾಟೆಗೆ ತೆಗೆದುಕೊಂಡ ಶಾಸಕ ಹರೀಶ್

ಹರಿಹರ, ನ.11- ಬಿಜೆಪಿ ಶಾಸಕ ಬಿ.ಪಿ.ಹರೀಶ್, ನಗರಸಭೆ ಪೌರಾಯುಕ್ತರನ್ನು ಏಕವಚನದಲ್ಲಿ ನಿಂದಿಸಿದ ಘಟನೆ ನಡೆಯಿತು.

ಸೋಮವಾರ ಬೆಳಿಗ್ಗೆ 11 ಕ್ಕೆ ನಿಗದಿಯಾಗಿದ್ದ ‘ದುಡಾ’ ಶಾಖಾ ಕಚೇರಿ ಉದ್ಘಾಟನೆ  ಕಾರ್ಯಕ್ರಮಕ್ಕೆ ಶಾಸಕ ಬಿ.ಪಿ.ಹರೀಶ್ ಅವರನ್ನು ನಗರಸಭೆ ಪೌರಾಯುಕ್ತರು ಶಿಷ್ಟಾಚಾರದ ಪ್ರಕಾರ ಆಹ್ವಾನ ನೀಡಿರಲಿಲ್ಲ. ಇದರಿಂದ ಕುಪಿತಗೊಂಡ ಶಾಸಕರು, ಕಾರ್ಯಕ್ರಮದ ಸ್ಥಳಕ್ಕೆ ಆಗಮಿಸಿ, ಅಧಿಕಾರಿಗಳ ವಿರುದ್ಧ ತೀವ್ರ ಅಸಮಾಧಾನ ಹೊರಹಾಕಿದರು. ಪೌರಾಯುಕ್ತರನ್ನು ಏಕವಚನದಲ್ಲಿ ತರಾಟೆಗೆ ತೆಗೆದುಕೊಂಡರು.

`ಸಾಹುಕಾರನನ್ನು (ಸಚಿವ ಎಸ್.ಎಸ್. ಮಲ್ಲಿಕಾರ್ಜುನ್) ಮೆಚ್ಚಿಸಿಕೊಂಡರೆ ಆಯ್ತು. ಪ್ರತಿಯೊಂದಕ್ಕೂ ಅಧ್ಯಕ್ಷರು ಫೋನ್ ಮಾಡ್ತಾರೆ. ನೀನೇನು ಮಾಡಿದ್ದೀಯಾ? ಮುಚ್ಕಂಡಿರು. ಮಾಡಬಾರ್ದು ಮಾಡಿ ಸರಿಯಾಗಿ ಮಾತಾಡು ಅಂತೀಯಾ? ಸರ್ಕಾರಿ ಅಧಿಕಾರಿಯಾಗಿ ನೀನು ತಿಳಿದುಕೋಬೇಕು ಏನು ಮಾಡಬೇಕು ಅಂತ.  ಅವರ ಸೇವೆ ಮಾಡೋಕೆ ಬಂದೀಯಾ ಇಲ್ಲಿಗೆ? ಏನು ಆ ಕಡೆ ನೋಡ್ತೀಯಾ? ನಾಚಿಕೆ ಆಗಬೇಕು ಇವನಿಗೆ,  ಥೂ ಮುಖ ತೋರಿಸಬೇಡ ಹೋಗು ಆಕಡೆ…’  ಎಂದು ಶಾಸಕ ಹರೀಶ್ ಪೌರಾಯುಕ್ತರ ಮೇಲೆ ಕಿಡಿಕಾರಿದರು.