ಕಡ್ಡಾಯವಾಗಿ ನೋಂದಣಿ ಸ್ಥಗಿತವಾಗಿಲ್ಲ. ನೂತನ ಕಾಯ್ದೆ ಕುರಿತು ಕೇಂದ್ರ ಇಲಾಖೆಯಿಂದ ಸ್ಪಷ್ಟನೆ ಕೇಳುತ್ತಿದ್ದೇವಷ್ಟೇ.
– ವೀಣಾ ಆರ್.ಎಲ್., ಉಪ ನೋಂದಣಾಧಿಕಾರಿ
ಆಧಾರ್ ತಿದ್ದುಪಡಿ, ಇ-ಸ್ವತ್ತು ವಿಳಂಬ, ಇದೀಗ ನೋಂದಣಿ ಸ್ಥಗಿತ: ಜನತೆ ಹೈರಾಣ
ದಾವಣಗೆರೆ: ರಾಜ್ಯಾದ್ಯಂತ ಉಪನೋಂದಣಾಧಿಕಾರಿ ಕಚೇರಿಗಳಲ್ಲಿ ಆಸ್ತಿ ಸೇರಿದಂತೆ ಎಲ್ಲ ರೀತಿಯ ದಸ್ತಾವೇಜುಗಳ ನೋಂದಣಿ ಸ್ಥಗಿತಗೊಳಿಸಿರುವ ಹಿನ್ನೆಲೆಯಲ್ಲಿ ಸದಾ ಜನರಿಂದ ತುಂಬಿರುತ್ತಿದ್ದ ದಾವಣಗೆರೆ ಪಿ.ಬಿ. ರಸ್ತೆಯಲ್ಲಿರುವ ಉಪ ನೋಂದಣಾಧಿಕಾರಿ ಕಚೇರಿಯೂ ಬಣಗುಡುತ್ತಿದೆ.
`ನೋಂದಣಿ ಕಾಯ್ದೆ 1908ರಲ್ಲಿ 22ಬಿ ಹೊಸ ಸೆಕ್ಷನ್ ಪರಿಚಯಿಸುವುದರಿಂದ ಕೇಂದ್ರ ಕಚೇರಿಯಿಂದ ಸರಿಯಾದ ನಿರ್ದೇಶ ನಗಳು ಬರುವವರೆಗೂ ದಸ್ತಾವೇಜುಗಳ ಪರಿಶೀಲನೆಯನ್ನು ಅನಿರ್ದಿಷ್ಟಾವಧಿ ವರೆಗೆ ಮುಂದೂಡುತ್ತಿದ್ದೇವೆ’ ಎಂದು ನೋಂದಣಾಧಿಕಾರಿ ಕಚೇರಿಯಲ್ಲಿ ಚಿಕ್ಕದಾಗಿ ಬೋರ್ಡ್ ಹಾಕಲಾಗಿದೆ.
ಕಳೆದ ಶುಕ್ರವಾರ ಹಾಗೂ ಶನಿವಾರ ಅರ್ಜಿ ಸಲ್ಲಿಸಿದ್ದ ಆಸ್ತಿಗಳು ಮಾತ್ರ ಸೋಮವಾರ ನೋಂದಣಿಯಾಗಿದೆ.
ಪ್ರತಿ ದಿನ 100 ರಿಂದ 130 ನೋಂದಣಿಗಳು ನಡೆಯುತ್ತಿದ್ದ ಈ ಕಚೇರಿಯು, ಬೆಳಿಗ್ಗೆಯಿಂದಲೇ ಆಸ್ತಿ ಕೊಳ್ಳುವವರು ಹಾಗೂ ಕೊಡುವವರಿಂದ ತುಂಬಿಕೊಂಡಿರುತ್ತಿತ್ತು. ಆದರೆ ನೋಂದಣಿ ಸ್ಥಗಿತ ವಿಷಯ ತಿಳಿದಿದ್ದರಿಂದ ಯಾರೂ ಇತ್ತ ಸುಳಿದಿಲ್ಲ. ಸದಾ ಬ್ಯುಸಿಯಾಗಿರುತ್ತಿದ್ದ ಕಚೇರಿ ಸಿಬ್ಬದಿಗಳು, ಪತ್ರ ಬರಹಗಾರು ಇಂದು ಯಾವುದೇ ಒತ್ತಡವಿಲ್ಲದೆ ತಮ್ಮ ಅಳಿದುಳಿದ ಕಾರ್ಯಗಳಲ್ಲಿ ಮಗ್ನರಾಗಿದ್ದರು.
ಮಹಾನಗರ ಪಾಲಿಕೆಯಿಂದ ಇ-ಸ್ವತ್ತು ವಿಳಂಬದಿಂದ ನೋಂದಣಿಗೆ ಹಿನ್ನಡೆ ?
ದಾವಣಗೆರೆ ಮಹಾನಗರ ಪಾಲಿಕೆ ವ್ಯಾಪ್ತಿಯಲ್ಲಿ 1.75 ಲಕ್ಷ ಸ್ವತ್ತುಗಳಿದ್ದು, ಈ ಪೈಕಿ ಇಲ್ಲಿಯವರೆಗೆ 45 ಸಾವಿರ ಆಸ್ತಿಗಳನ್ನು ಡಿಜಿಟಲೀಕರಣ ಮಾಡಲಾಗಿದೆ.
ಪಾಲಿಕೆಯಲ್ಲಿ ಇ–ಸ್ವತ್ತು ಕೊಟ್ಟ ನಂತರವೇ ಸಬ್‌ ರೆಜಿಸ್ಟ್ರಾರ್‌ ಕಚೇರಿಯಲ್ಲಿ ನೋಂದಣಿ ಮಾಡಲಾಗುತ್ತಿದೆ. ಆದರೆ ಇ-ಸ್ವತ್ತು ಕಡ್ಡಾಯ ಹಾಗೂ ವಿಳಂಬದ ಕಾರಣ ಶೇ.30ರಷ್ಟು ನೋಂದಣಿ ಕಾರ್ಯ ಕುಸಿತ ಕಂಡಿದೆ ಎಂದು ಸ್ವತಃ ಪತ್ರ ಬರಹಗಾರರೇ ಹೇಳುತ್ತಿದ್ದಾರೆ.
ಸರ್ವರ್ ಸಮಸ್ಯೆ ಹಾಗೂ ಸರಿಯಾದ ದಾಖಲೆಗಳಿಲ್ಲ ಎಂಬ ನೆಪ ಮುಂದಿಟ್ಟು ಕೊಂಡು ಕೆಲವು ಅಧಿಕಾರಿಗಳು ಇ–ಸ್ವತ್ತು ಕೊಡಲು, ಲಂಚಕ್ಕಾಗಿ ಒತ್ತಾಯಿಸುತ್ತಿರುವ ಆರೋಪ ಬಲವಾಗಿಯೇ ಕೇಳಿಬಂದಿದೆ.
ಇ–ಸ್ವತ್ತು ಮಾಡಲು ಅರ್ಜಿ ಸಲ್ಲಿಸಿದರೆ ಹತ್ತಿಪ್ಪತ್ತು ದಾಖಲೆಗಳನ್ನು ಕೇಳುತ್ತಾರೆ. ಹತ್ತಾರು ಬಾರಿ ಓಡಾಡಿಸುತ್ತಾರೆ. ಇದರಿಂದ ಸಾಕಾಗಿ ಹೋಗಿದೆ. `ಕೊಡಬೇಕಾದ್ದು ಕೊಟ್ಟರೆ ಒಂದೆರಡು ದಿನಗಳಲ್ಲಿಯೇ ಇ-ಸ್ವತ್ತು ಮಾಡಲಾಗುತ್ತದೆ.’ ಇಲ್ಲದಿದ್ದರೆ ತಿಂಗಳುಗಟ್ಟಲೆಯಾದರೂ ಕೊಡುತ್ತಿಲ್ಲ ಎನ್ನುವುದು ಸಾರ್ವಜನಿಕರ ಆರೋಪ.
ಇತ್ತೀಚೆಗಷ್ಟೇ ನಡೆದ ಮಹಾನಗರ ಪಾಲಿಕೆ ಸಾಮಾನ್ಯ ಸಭೆಯಲ್ಲಿ ಸದಸ್ಯರು ಪಕ್ಷಾತೀತವಾಗಿ ಇ-ಸ್ವತ್ತು ನೀಡಲು ವಿಳಂಬ ಮಾಡುತ್ತಿರುವ ಕ್ರಮಕ್ಕೆ ತೀವ್ರ ಆಕ್ರೋಶ ವ್ಯಕ್ತಪಡಿಸಿದರು. ಅಲ್ಲದೇ, ಶೀಘ್ರ ಇ-ಸ್ವತ್ತು ನೀಡಲು ಕ್ರಮ ಕೈಗೊಳ್ಳುವಂತೆಯೂ ಆಗ್ರಹಿಸಿದರು.
ರಾಜ್ಯದ ಹೃದಯ ಭಾಗ ದಾವಣಗೆರೆ ದಿನೇ ದಿನೇ ಬೆಳೆಯುತ್ತಿದೆ. ನಗರದ ಸುತ್ತ ಮುತ್ತಲಿನ ಪ್ರದೇಶಗಳು ಸೈಟುಗಳಾಗಿ ಮಾರ್ಪಾಡುಗುತ್ತಿವೆ. ನಿವೇಶನ, ಮನೆ ಕೊಡು-ಕೊಳ್ಳುವಿಕೆ ನಿತ್ಯವೂ ಹೆಚ್ಚಾಗಿರುತ್ತದೆ. ಇದರಿಂದ ಸರ್ಕಾರಕ್ಕೆ ನೋಂದಣಿ ಶುಲ್ಕ, ಸ್ಟ್ಯಾಂಪ್‌ ತೆರಿಗೆ ರೂಪದಲ್ಲಿ ಕೋಟ್ಯಾಂತರ ರೂಪಾಯಿ ಹಣ ಸಂದಾಯವಾಗುತ್ತಿತ್ತು. ಆದರೆ ಈ ಆಸ್ತಿ ವಿಳಂಬದಿಂದಾಗಿ ವಹಿವಾಟು ಕುಂಠಿತಗೊಂಡಿದ್ದರಿಂದ ಆದಾಯಕ್ಕೂ ಕತ್ತರಿ ಬಿದ್ದಂತಾಗಿದೆ.
ಪ್ರತಿ ದಿನ ಪಾಲಿಕೆಯ ಮೂರು ವಲಯಗಳಿಂದ ಇ-ಸ್ವತ್ತಿಗಾಗಿ 80ಕ್ಕೂ ಹೆಚ್ಚು ಅರ್ಜಿಗಳು ಬರುತ್ತಿವೆ. ಈ ಸ್ವತ್ತು ಬೇಕಾದರೆ ಪ್ರಸಕ್ತ ವರ್ಷದ ಕಂದಾಯ ಕಟ್ಟಿರಬೇಕು. ತೆರಿಗೆ ನವೀಕರಣಗೊಂಡ ನಂತರವೇ ಇ-ಸ್ವತ್ತು ಕೊಡಬೇಕು. ತೆರಿಗೆ ನವೀಕರಣ ನಾಲ್ಕು ಅಧಿಕಾರಿಗಳ ಲಾಗಿನ್‌ ಮೂಲಕ ಪ್ರಕ್ರಿಯೆ ಮಾಡಬೇಕಾಗುತ್ತದೆ. ಇದನ್ನು ಸರಳೀಕರಮ ಮಾಡಬೇಕೆಂಬ ಒತ್ತಾಯ ಕೇಳಿ ಬರುತ್ತಿದ್ದು, ಇದಕ್ಕಾಗಿ ಪತ್ರ ಬರೆಯಲಾಗಿದೆ ಎಂದು ಉಪ ಆಯುಕ್ತರಾದ ಎಸ್. ಲಕ್ಷ್ಮೀ ಹೇಳಿದರು.
ಕಳೆದೊಂದು ತಿಂಗಳಿಂದ ನೋಂದಣಿಗೆ ಇ-ಸ್ವತ್ತು ಕಡ್ಡಾಯ ಮಾಡಿರುವುದು ಉತ್ತಮ ಕಾರ್ಯ. ಇ ಸ್ವತ್ತು ವಿಳಂಬ ಹಾಗೂ ಹತ್ತು ವರ್ಷಗಳ ಹಳೆಯ ಆಧಾರ್ ಕಾರ್ಡ್‌ ನವೀಕರಣದ ಸಮಸ್ಯೆಯಿಂದಾಗಿ ನೋಂದಣಿಗೆ ಸ್ವಲ್ಪ ಮಟ್ಟಿನ ಹಿನ್ನಡೆಯಾಗಿದೆ ಎಂದು ಉಪ ನೋಂದಣಾಧಿಕಾರಿ ವೀಣಾ ಆರ್.ಎಲ್. ಹೇಳಿದರು.
ಕಳೆದೊಂದು ವರ್ಷದಲ್ಲಿ ಪಾಲಿಕೆ ವ್ಯಾಪ್ತಿಯಲ್ಲಿ 45 ಸಾವಿರ ಆಸ್ತಿಗಳನ್ನು ಡಿಜಿಟಲೀಕರಣ ಮಾಡಲಾಗಿದೆ. ಇ-ಸ್ವತ್ತು ಕೊಡಲು ಸರ್ವರ್ ಸಮಸ್ಯೆ ಇರುತ್ತದೆ. ಅಲ್ಲದೆ, ಅರ್ಜಿದಾರರು ಪ್ರಸಕ್ತ ವರ್ಷದ ತೆರಿಗೆ ನವೀಕರಣ ಮಾಡಿರಬೇಕು. ಕಟ್ಟಡ ಪರವಾನಗಿ, ಲೇ ಔಟ್ ಅಪ್ರೂವಲ್, ಇಸಿ ಸೇರಿದಂತೆ ಇತರೆ ದಾಖಲೆಗಳನ್ನು ಕೊಡಬೇಕು. ಸಮರ್ಪಕ ದಾಖಲೆಗಳನ್ನು ಕೊಡದ ಕಾರಣ ಕೆಲವರಿಗೆ ಇ ಸ್ವತ್ತು ಸಿಗುವುದಿಲ್ಲ. ಅಲ್ಲದೆ ಹೆಚ್ಚಾಗಿ ಅರ್ಜಿಗಳು ಬರುತ್ತಿರುವುದೂ ಸಹ ವಿಳಂಬಕ್ಕೆ ಕಾರಣವಾಗಿದೆ.
– ರೇಣುಕಾ, ಆಯುಕ್ತರು, ಮಹಾನಗರ ಪಾಲಿಕೆ.
ಪಾಲಿಕೆಯಿಂದ ಇ-ಸ್ವತ್ತು ನೀಡಲು ಅನಗತ್ಯವಾಗಿ ವಿಳಂಬ ಮಾಡಲಾಗುತ್ತಿದೆ. ಈ ಹಿಂದಿನ ಪಾಲಿಕೆ ಸಾಮಾನ್ಯ ಸಭೆಯಲ್ಲಿ 42 ದಿನಗಳಲ್ಲಿ ಇ-ಸ್ವತ್ತು ಕೊಡಿಸಲು ಕ್ರಮ ಕೈಗೊಳ್ಳುವುದಾಗಿ ಆಯುಕ್ತರು ಭರವಸೆ ನೀಡಿದ್ದರು. ಆದರೆ ಇತ್ತೀಚೆಗೆ ನಡೆದ ಸಭೆಯಲ್ಲಿ ಸಕಾಲದಲ್ಲಿ 7 ದಿನ ಕಾಲಾವಕಾಶವಿದೆ ಎನ್ನುತ್ತಿದ್ದಾರೆ. ಜನರ ತುರ್ತು ಅಗತ್ಯತೆಗಳನ್ನು ಪಾಲಿಕೆ ಸಿಬ್ಬಂದಿಗಳು ದುರುಪಯೋಗ ಪಡಿಸಿಕೊಂಡು ಸಾರ್ವಜನಿಕರಿಂದ ಸಾವಿರಾರು ರೂಪಾಯಿ ಹಣ ವಸೂಲಿ ಮಾಡುತ್ತಿದ್ದಾರೆಯ
– ಎಸ್.ಟಿ. ವೀರೇಶ್, ಮಾಜಿ ಮೇಯರ್, ಮಹಾನಗರ ಪಾಲಿಕೆ.
ಆಸ್ತಿ ಖರೀದಿ ಹಾಗೂ ಮಾರಾಟದಲ್ಲಿ ಮೋಸ, ವಂಚನೆಯಾಗದಂತೆ ತಡೆಗಟ್ಟಲು ರಾಜ್ಯ ಸರ್ಕಾರ ಇ–ಖಾತೆ ಕಡ್ಡಾಯ ಮಾಡಿತ್ತಾದರೂ, ಸರ್ವರ್ ಸಮಸ್ಯೆ, ಸಮರ್ಪಕ ದಾಖಲೆ ನೀಡದೇ ಇರುವುದು ಸೇರಿದಂತೆ ಹಲವು ಕಾರಣಗಳಿಂದಾಗಿ ಇ-ಖಾತೆ ಪಡೆಯಲು ಜನರು ಹರಸಾಹಸ ಪಡುತ್ತಿದ್ದರು. ಮಹಾನಗರ ಪಾಲಿಕೆಯಲ್ಲಿ ಸಾವಿರಾರು ರೂಪಾಯಿ ಹಣ ಕೊಟ್ಟು ಇ ಖಾತೆ ತರಬೇಕಿದೆ ಎಂಬ ಆರೋಪವೂ ಕೇಳಿ ಬಂದಿತ್ತು.
ಇದಲ್ಲದೇ, ನೋದಣಿ ಮಾಡಿಸಿಕೊಳ್ಳು ವವರು 10 ವರ್ಷಗಳಿಂದ ಆಧಾರ್ ಕಾರ್ಡ್‌ ತಿದ್ದುಪಡಿ ಮಾಡದೇ ಇರುವುದೂ ಸಹ ನೋಂದಣಿ ವಿಳಂಬಕ್ಕೆ ಕಾರಣವಾಗಿತ್ತು. ಇದೀಗ ಮತ್ತೊಂದು ಕಾರಣಕ್ಕಾಗಿ ನೋಂದಣಿ ಕಾರ್ಯ ಸ್ಥಗಿತಗೊಂಡಿರುವುದು ಆಸ್ತಿ ಖರೀದಿಸುವ ಹಾಗೂ ಮಾರಾಟ ಮಾಡುವವರಿಗೆ ತಲೆ ನೋವಾಗಿ ಪರಿಣಮಿಸಿದೆ.
ಏಕೆ ನೋಂದಣಿ ಸ್ಥಗಿತ?: ರಾಜ್ಯದಲ್ಲಿ ಕೇಂದ್ರದ ನೋಂದಣಿ ಕಾಯಿದೆ-1908ಗೆ ತಿದ್ದುಪಡಿ ತರುವ ಕರ್ನಾಟಕ ನೋಂದಣಿ ತಿದ್ದುಪಡಿ ಕಾಯಿದೆ -2023ಕ್ಕೆ ರಾಷ್ಟ್ರಪತಿಗಳು ಕಳೆದ ಅ.8ರಂದು ರಂದು ಅಂಕಿತ ಹಾಕಿದ್ದು, ರಾಜ್ಯ ಸರ್ಕಾರ ಅ.19 ರಂದು ಅಧಿಕೃತ ರಾಜ್ಯ ಪತ್ರದಲ್ಲಿ ಪ್ರಕಟಿಸಿದೆ.
ಈ ತಿದ್ದುಪಡಿಯಿಂದ, ನಕಲಿ ದಾಖಲೆ ಆಧರಿಸಿ ಆಸ್ತಿ ದಸ್ತಾವೇಜು ನೋಂದಣಿ ಅಥವಾ ನಕಲಿ ದಸ್ತಾವೇಜು ಸೃಷ್ಟಿ ಮಾಡಿದರೆ ಜಿಲ್ಲಾ ನೋಂದಣಾಧಿಕಾರಿಗಳಿಗೆ ರದ್ದುಪಡಿಸಲು ಅಧಿಕಾರ ನೀಡಲಾಗಿದೆ. ಜತೆಗೆ ನಕಲಿ ದಾಖಲೆ ಆಧರಿಸಿ ನೋಂದಣಿ ಮಾಡಿದ ಉಪ ನೋಂದಣಾಧಿಕಾರಿಗಳಿಗೆ 3 ವರ್ಷದವರೆಗೆ ಜೈಲು ಶಿಕ್ಷೆಗೆ ಗುರಿಪಡಿಸಬಹುದು ಎಂದು ಹೇಳಲಾಗಿದೆ. ಹೀಗಾಗಿ ಉಪ ನೋಂದಣಾಧಿಕಾರಿಗಳು ರಾಜ್ಯಾದ್ಯಂತ ಸೋಮವಾರ ಬೆಳಗ್ಗೆಯಿಂದ ದಸ್ತಾವೇಜುಗಳ ಪರಿಶೀಲನೆ ಹಾಗೂ ನೋಂದಣಿಯನ್ನು ಸ್ಥಗಿತಗೊಳಿಸಿದ್ದಾರೆ.
– ಕೆ.ಎನ್. ಮಲ್ಲಿಕಾರ್ಜುನ ಮೂರ್ತಿ, [email protected]