ಕೈಗಾರಿಕೋದ್ಯಮಿಗಳ ಸಭೆಯಲ್ಲಿ ವಿಶ್ವೇಶ್ವರಯ್ಯ ತಾಂತ್ರಿಕ ವಿ.ವಿ. ಕುಲಪತಿ ಡಾ. ಎಸ್. ವಿದ್ಯಾಶಂಕರ್
ದಾವಣಗೆರೆ, ನ. 17 – ಕೈಗಾರಿಕೆಗಳ ಸಹಭಾಗಿತ್ವದಿಂದ ಕುಶಲ ಇಂಜಿನಿಯರ್‌ಗಳನ್ನು ರೂಪಿಸಲು ಸಾಧ್ಯ. ಹೀಗಾಗಿ ಇನ್ಫೋಸಿಸ್‌ನಂತಹ ದೈತ್ಯ ಕಂಪನಿಗಳಿಂದ ಹಿಡಿದು, ದಾವಣಗೆರೆ ಹಂತದ ಮಧ್ಯಮ ಹಾಗೂ ಸಣ್ಣ ಉದ್ಯಮಗಳವರೆಗೆ ಕೈಗಾರಿಕಾ ಸಹಭಾಗಿತ್ವಕ್ಕೆ ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯ ಕ್ರಮ ತೆಗೆದುಕೊಳ್ಳುತ್ತಿದೆ ಎಂದು ವಿ.ವಿ. ಕುಲಪತಿ ಡಾ. ಎಸ್. ವಿದ್ಯಾಶಂಕರ್ ತಿಳಿಸಿದರು.
ವಿ.ಟಿ.ಯು., ವಿಶ್ವೇಶ್ವರಯ್ಯ ಸಂಶೋಧನಾ ಹಾಗೂ ಆವಿಷ್ಕಾರ ಪ್ರತಿಷ್ಠಾನ ಹಾಗೂ ಯು.ಬಿ.ಡಿ.ಟಿ. ಕಾಲೇಜುಗಳ ಸಂಯುಕ್ತಾಶ್ರಯದಲ್ಲಿ ಆಯೋಜಿಸಲಾಗಿದ್ದ ಮಧ್ಯ ಕರ್ನಾಟಕ ಕೈಗಾರಿಕೋದ್ಯಮಿಗಳ ಸಭೆಯನ್ನು ಆನ್‌ಲೈನ್‌ ನಲ್ಲಿ ಉದ್ಘಾಟಿಸಿ ಅವರು ಮಾತನಾಡಿದರು.
ಎಲ್‌ ಅಂಡ್‌ ಟಿ, ಟಿ.ಸಿ.ಎಸ್. ಹಾಗೂ ಇನ್ಪೋಸಿಸ್‌ ಸೇರಿದಂತೆ 50 ಬೃಹತ್ ಕಂಪನಿಗಳ ಜೊತೆ ಈಗಾಗಲೇ ವಿ.ಟಿ.ಯು. ಒಪ್ಪಂದ ಮಾಡಿಕೊಂಡಿದೆ. 3,500 ಇಂಜಿನಿಯರಿಂಗ್ ವಿದ್ಯಾರ್ಥಿಗಳು ಈ ಸಹಭಾಗಿತ್ವದ ಮೂಲಕ ಹಾನರ್ಸ್ ಹಾಗೂ ಮೈನರ್ಸ್ ಪ್ರಮಾಣ ಪತ್ರ ಪಡೆಯುತ್ತಿದ್ದಾರೆ ಎಂದವರು ಹೇಳಿದರು.
ಬೆಳಿಗ್ಗೆ ತರಗತಿ, ಮಧ್ಯಾಹ್ನ ಕೈಗಾರಿಕಾ ಕಲಿಕೆ
ಕಾಲೇಜಿನ ಕೋಣೆಯೊಳಗೆ ಸೀಮಿತವಾಗಿ ಇಂಜಿನಿಯರಿಂಗ್ ಕಲಿಯುವ ಕಾಲ ಈಗ ಮುಗಿದಿದೆ. ಬೆಳಿಗ್ಗೆ ತರಗತಿಯಲ್ಲಿ ಕಲಿತರೆ, ಮಧ್ಯಾಹ್ನ ಕೈಗಾರಿಕೆಗಳಲ್ಲಿ ಪ್ರಾಯೋಗಿಕ ಕಲಿಕೆ ನಡೆಯಬೇಕಿದೆ. ಇದಕ್ಕಾಗಿ ದಾವಣಗೆರೆಯಲ್ಲಿರುವ ಸ್ಥಳೀಯ ಉದ್ಯಮಗಳ ಜೊತೆ ಕೈ ಜೋಡಿಸಲು ಕ್ರಮಗಳನ್ನು ತೆಗೆದುಕೊಳ್ಳಲಾಗುವುದು ಎಂದು ವಿಶ್ವೇಶ್ವರಯ್ಯ ತಾಂತ್ರಿಕ ವಿ.ವಿ. ರಿಜಿಸ್ಟ್ರಾರ್ ಡಾ. ಬಿ.ಇ. ರಂಗಸ್ವಾಮಿ ಹೇಳಿದರು. ಕೈಗಾರಿಕೆಗಳು ಕಾಲೇಜುಗಳ ವ್ಯಾಸಂಗದಲ್ಲಿ ಮಹತ್ವದ ಪಾತ್ರ ವಹಿಸಲು ಅವಕಾಶವಿದೆ. ಕೈಗಾರಿಕಾ ವಲಯದವರು ವಿದ್ಯಾರ್ಥಿಗಳಿಗೆ ಮಾರ್ಗದರ್ಶನ, ಕೌಶಲ್ಯ ಒದಗಿಸುವಿಕೆ ಹಾಗೂ ಬೋಧನೆಯಲ್ಲೂ ಭಾಗಿಯಾಗಬಹುದು ಎಂದು ಹೇಳಿದರು.
ಕೈಗಾರಿಕೆ – ಕಾಲೇಜುಗಳ ನಡುವೆ `ಸಂಬಂಧಿ ಸಹಕಾರ’
ಬೆಳಗಾವಿ ವಿಶ್ವವಿದ್ಯಾಲಯದಲ್ಲಿರುವ ಕ್ಯಾಂಪಸ್‌ ಈಗ ನವೋದ್ಯಮಗಳ ಕೇಂದ್ರವಾಗಿದೆ. ಇಲ್ಲಿ 30 ನವೋದ್ಯಮಗಳು ತಲೆ ಎತ್ತಿವೆ ಎಂದು ವಿಶ್ವೇಶ್ವರಯ್ಯ ತಾಂತ್ರಿಕ ವಿ.ವಿ. ರಿಜಿಸ್ಟ್ರಾರ್ ಡಾ. ಬಿ.ಇ. ರಂಗಸ್ವಾಮಿ ತಿಳಿಸಿದರು.
ಕಾಲೇಜು ಹಾಗೂ ಕೈಗಾರಿಕೆಗಳೆರಡೂ ಸಂಬಂಧಿಗಳಂತೆ ಜೊತೆಯಾಗಿ 24/7 ಕಾರ್ಯನಿರ್ವಹಿಸಬೇಕು. ಆಗ ಮಾತ್ರ ದೇಶಕ್ಕೆ ಅಗತ್ಯವಾದ ಕೌಶಲ್ಯಯುತ ಹಾಗೂ ಉದ್ಯಮಶೀಲತೆಯ ಇಂಜಿನಿಯರ್‌ಗಳನ್ನು ಒದಗಿಸಲು ಸಾಧ್ಯ ಎಂದವರು ಅಭಿಪ್ರಾಯ ಪಟ್ಟರು.
ಯು.ಬಿ.ಡಿ.ಟಿ.ಯಲ್ಲಿ 10 ಕೋಟಿ ರೂ. ವೆಚ್ಚದಲ್ಲಿ ಕೌಶಲ್ಯ ಕೇಂದ್ರ ಸ್ಥಾಪಿಸಲಾಗಿದೆ. ತಳಕಲ್‌ನಲ್ಲಿ ದೇಶದಲ್ಲೇ ಅತಿ ದೊಡ್ಡ ಕೌಶಲ್ಯ ಕೇಂದ್ರ ಸ್ಥಾಪನೆಯಾಗುತ್ತಿದೆ. ಇಂತಹ ಕೇಂದ್ರಗಳ ಬಳಕೆಗಾಗಿ ವಿ.ವಿ. ಜೊತೆ ಒಪ್ಪಂದ ಮಾಡಿಕೊಳ್ಳಬೇಕು ಎಂದವರು ಕರೆ ನೀಡಿದರು.
ಅದೇ ರೀತಿ ದಾವಣಗೆರೆ ಹಂತದಲ್ಲೂ ಕೈಗಾರಿಕೆಗಳ ಜೊತೆ ಸಹಭಾಗಿತ್ವ ಮಾಡಿಕೊಳ್ಳಲಾಗುವುದು. ದೇಶದ ಶೇ.60ರಷ್ಟು ಕೈಗಾರಿಕಾ ಉತ್ಪನ್ನಗಳು ಸಣ್ಣ ಹಾಗೂ ಮಧ್ಯಮ ಗಾತ್ರದ ಉದ್ಯಮಗಳಿಂದ ಬರುತ್ತಿದೆ. ಹೀಗಾಗಿ ಪ್ರತಿ ಜಿಲ್ಲೆಯಲ್ಲೂ ಉದ್ಯಮಗಳ ಜೊತೆ ಸಂವಾದ ನಡೆಸಲಾಗುತ್ತಿದೆ ಎಂದು ವಿದ್ಯಾಶಂಕರ್ ಹೇಳಿದರು.
ಪ್ರತಿಯೊಂದು ಕೈಗಾರಿಕೆಯೂ ತನ್ನದೇ ಆದ ಅಗತ್ಯ ಹೊಂದಿರುತ್ತದೆ. ಪ್ರತಿ ಕೈಗಾರಿಕೆಗಾಗಿ ಪ್ರತ್ಯೇಕ ಬೋಧನೆ ಮಾಡಲಾಗದು. ಹೀಗಾಗಿ ಕೈಗಾರಿಕಾ ಸಹಭಾಗಿತ್ವದ ಮೂಲಕ, ಉದ್ಯಮಗಳ ಅಗತ್ಯ ರೀತಿಯ ಇಂಜಿನಿಯರ್‌ಗಳನ್ನು ರೂಪಿಸಲು ಸಾಧ್ಯ ಎಂದವರು ಹೇಳಿದರು.
ಬೆಳಗಾವಿಯ ವಿ.ವಿ. ಕ್ಯಾಂಪಸ್‌ನಲ್ಲಿ 2 ಲಕ್ಷ ಚದರಡಿ ಪ್ರದೇಶದಲ್ಲಿ ಯಾಂತ್ರಿಕ ಘಟಕವನ್ನು ತೆರೆಯಲಾಗಿದೆ. ಇಲ್ಲಿ ಕೈಗಾರಿಕೆಗಳಿಗೆ ಅಗತ್ಯ ಪರಿಹಾರ ನೀಡಲಾಗುತ್ತಿದೆ. ಕೆಲ ಉತ್ಪನ್ನಗಳು ಹೊರಗಡೆಗಿಂತ ಕಡಿಮೆ ವೆಚ್ಚದಲ್ಲಿ ರೂಪು ಗೊಳ್ಳುತ್ತಿವೆ. ಕೈಗಾರಿಕೆಗಳು ಕೈ ಜೋಡಿಸಿದರೆ, ದಾವಣಗೆರೆಯಲ್ಲೂ ಇಂತಹ ಕೇಂದ್ರದ ಸ್ಥಾಪನೆ ಸಾಧ್ಯ ಎಂದು ವಿದ್ಯಾಶಂಕರ್ ಹೇಳಿದರು. ಯುಬಿಡಿಟಿ ಪ್ರಾಂಶುಪಾಲ ಡಾ. ಡಿ.ಪಿ. ನಾಗರಾಜಪ್ಪ ಸಭೆಯ ಅಧ್ಯಕ್ಷತೆ ವಹಿಸಿದ್ದರು. ವೇದಿಕೆಯ ಮೇಲೆ ವಿಶ್ವೇಶ್ವರಯ್ಯ ತಾಂತ್ರಿಕ ವಿ.ವಿ. ರಿಜಿಸ್ಟ್ರಾರ್ ಡಾ. ಬಿ.ಇ. ರಂಗಸ್ವಾಮಿ, ಮಾಲಿನ್ಯ ನಿಯಂತ್ರಣ ಮಂಡಳಿ ಪ್ರಾದೇಶಿಕ ಅಧಿಕಾರಿ ಡಾ. ಹೆಚ್. ಲಕ್ಷ್ಮಿಕಾಂತ್, ಜಿಲ್ಲಾ ಕೈಗಾರಿಕಾ ಕೇಂದ್ರದ ಜಂಟಿ ನಿರ್ದೇಶಕ ರಾಜೇಂದ್ರ ನಾಮದೇವ್ ಕದಮ್, ವಿಶ್ವವಿದ್ಯಾಲಯದ ಸಂಶೋಧನಾ ವಲಯದ ಮುಖ್ಯಸ್ಥ ಸಂತೋಷ ಇಟ್ಟಣಗಿ ಮತ್ತಿತರರು ಉಪಸ್ಥಿತರಿದ್ದರು.
ರೇಖಾ ಪದಕಿ ಪ್ರಾರ್ಥಿಸಿದರು. ಡಾ.ಟಿ.ಡಿ. ವಿಷ್ಣುಮೂರ್ತಿ ಸ್ವಾಗತಿಸಿದರು. ಕಾರ್ಯಕ್ರಮದ ಸಂಚಾಲಕ ಡಾ. ಶೇಖರಪ್ಪ ಬಿ. ಮಲ್ಲೂರ್ ಹಾಗೂ ಡಾ. ರೇಶ್ಮಾ ಶೆಟ್ಟಿ ನಿರೂಪಿಸಿದರು. ಡಾ. ಮಲ್ಲಿಕಾರ್ಜುನ ಎಸ್. ಹೊಳಿ ವಂದಿಸಿದರು.