ಪ್ಯಾಲಿಯೇಟಿವ್ ಕೇರ್ ತಂತ್ರಜ್ಞಾನ
ಪ್ಯಾಲಿಯೇಟಿವ್ ಕೇರ್ ಎಂಬುದು ಮಾರಣಾಂತಿಕ ರೋಗ ಅಥವಾ ದೀರ್ಘಕಾಲದ ಕಾಯಿಲೆಗಳಿಂದ ಬಳಲುತ್ತಿರುವ ರೋಗಿಗಳಿಗೆ, ಅವರ ನೋವನ್ನು ಕಡಿಮೆ ಮಾಡುವುದು ಮತ್ತು ಜೀವನದ ಗುಣಮಟ್ಟವನ್ನು ಸುಧಾರಿಸಲು ನೀಡುವ ಆರೈಕೆಯಾಗಿದೆ. ಇದರ ಉದ್ದೇಶ ಕೇವಲ ರೋಗ ನಿರೋಧನೆಯಲ್ಲ, ಆದರೆ ಶಾರೀರಿಕ, ಮಾನಸಿಕ, ಸಾಮಾಜಿಕ ಮತ್ತು ಅಧ್ಯಾತ್ಮಿಕ ಬೆಂಬಲವನ್ನು ಒದಗಿಸುವುದು.
ಪ್ಯಾಲಿಯೇಟಿವ್ ಕೇರ್‌ನ ಅಗತ್ಯತೆಗಳು:
ನೋವು ಮತ್ತು ತೊಂದರೆ ನಿವಾರಣೆ: ತೀವ್ರ ಕ್ಯಾನ್ಸರ್, ಹೃದಯ ಸಂಬಂಧಿ ರೋಗಗಳು, ಅಥವಾ ಶ್ವಾಸಕೋಶದ ಸಮಸ್ಯೆಗಳಿಂದಾಗಿ ರೋಗಿಯು ನೋವು ಮತ್ತು ತೊಂದರೆ ಅನುಭವಿಸುತ್ತಾರೆ. ಔಷಧಿ ಮತ್ತು ಚಿಕಿತ್ಸೆಯ ಮೂಲಕ ಈ ನೋವನ್ನು ಕಡಿಮೆ ಮಾಡುವುದು ಪ್ಯಾಲಿಯೇಟಿವ್ ಕೇರ್‌ನ ಪ್ರಮುಖ ಕಾರ್ಯವಾಗಿದೆ.
ಜೀವನದ ಗುಣಮಟ್ಟ ಸುಧಾರಣೆ: ರೋಗಿಯ ತೊಂದರೆಗಳನ್ನು ಕಡಿಮೆ ಮಾಡುವ ಮೂಲಕ ಅವರು ಶಾಂತ ಮತ್ತು ಸಮಾಧಾನಕರ ಜೀವನ ನಡೆಸಲು ಸಹಾಯ ಮಾಡುವುದು. ದಿನನಿತ್ಯದ ಚಟುವಟಿಕೆಗಳಲ್ಲಿ ಭಾಗವಹಿಸಲು ಶಕ್ತಿಗೊಳಿಸುವುದು.
ದೀರ್ಘ ಕಾಲದ ಕಾಯಿಲೆಗಳ ನಿರ್ವಹಣೆ: ಪಾರ್ಕಿನ್ಸನ್ಸ್, ಡಿಮೆನ್ಸಿಯಾ, ಹೃದಯ ಅಸಮರ್ಥತೆ, ಮತ್ತು ಡಯಾಬಿಟೀಸ್ ಹೀಗೆ ದೀರ್ಘಕಾಲದ ಕಾಯಿಲೆಗಳಲ್ಲಿಯೂ ಈ ಆರೈಕೆಯ ಅಗತ್ಯವಿದೆ. ರೋಗಿಯ ಶಾರೀರಿಕ ಮತ್ತು ಮನೋವೈಜ್ಞಾನಿಕ ತೊಂದರೆಗಳನ್ನು ನಿರ್ವಹಿಸಲು ಇದು ಸಹಾಯಕ.
ಅಧ್ಯಾತ್ಮಿಕ ಮತ್ತು ಮಾನಸಿಕ ಬೆಂಬಲ : ರೋಗಿಯು ಬದುಕಿನ ತಿರುವುಗಳನ್ನು ಮತ್ತು ಮರಣದ ಭಯವನ್ನು ಎದುರಿಸಲು ಬೆಂಬಲ ನೀಡುವುದು. ಸಮಾಲೋಚನೆ ಮತ್ತು ಧ್ಯಾನದ ಮೂಲಕ ಮನಶ್ಯಾಂತಿ ಒದಗಿಸುವುದು.
ಕುಟುಂಬಕ್ಕೆ ಬೆಂಬಲ: ರೋಗಿಯ ಆರೋಗ್ಯ ಸ್ಥಿತಿಯಿಂದ ಕುಟುಂಬ ಸದಸ್ಯರು ಮಾನಸಿಕ ಒತ್ತಡಕ್ಕೆ ಒಳಗಾಗುತ್ತಾರೆ. ಪ್ಯಾಲಿಯೇಟಿವ್ ಕೇರ್ ಅವರಿಗೂ ಮಾರ್ಗದರ್ಶನ, ಧೈರ್ಯ ಮತ್ತು ಸಾಮಾಜಿಕ ಬೆಂಬಲ ಒದಗಿಸುತ್ತದೆ.
ಉದಾಹರಣೆಯ ಮೂಲಕ ಪ್ಯಾಲಿಯೇ
ಟಿವ್ ಕೇರ್‌ನ ಮಹತ್ವ: ರೋಗಿಯ ಆರೈಕೆ:
ಒಂದು ಕ್ಯಾನ್ಸರ್ ರೋಗಿಯು ಕೊನೆಯ ಹಂತದಲ್ಲಿ ತೀವ್ರ ನೋವನ್ನು ಅನುಭವಿಸುತ್ತಿದ್ದರೆ, ಪೇನ್‌ಕಿಲರ್ ಮತ್ತು ಆಮ್ಲಜನಕ ಚಿಕಿತ್ಸೆಯಿಂದ ಈ ನೋವನ್ನು ಕಡಿಮೆ ಮಾಡಬಹುದು.
ಕುಟುಂಬದ ಬೆಂಬಲ: ರೋಗಿಯ ಪತ್ನಿ ಅಥವಾ ಮಕ್ಕಳು ಅವರು ಅನುಭವಿಸುತ್ತಿರುವ ಕಷ್ಟವನ್ನು ಹೇಗೆ ನಿರ್ವಹಿಸಬೇಕೆಂಬುದರ ಕುರಿತು ಮನೋವೈಜ್ಞಾನಿಕ ಸಮಾಲೋಚನೆ.
ಮರಣದ ಶಾಂತಿ: ಅಂತಿಮ ಹಂತದಲ್ಲಿ, ಧಾರ್ಮಿಕ ಅಥವಾ ಅಧ್ಯಾತ್ಮಿಕ ಚಟುವಟಿಕೆಗಳ ಮೂಲಕ ರೋಗಿಯ ಮನಸ್ಸಿಗೆ ಶಾಂತಿಯನ್ನು ನೀಡುವುದು.
ಪ್ಯಾಲಿಯೇಟಿವ್ ಕೇರ್‌ದ ಅಡಚಣೆಗಳು: ಸಾರ್ವಜನಿಕರ ಅರಿವು ಕೊರತೆಯಿಂದ ಈ ಸೇವೆ ಎಲ್ಲರಿಗೂ ತಲುಪುತ್ತಿಲ್ಲ. ಆರೋಗ್ಯಸೇವಾ ವ್ಯವಸ್ಥೆಯಲ್ಲಿ ಇದಕ್ಕೆ ಆದ್ಯತೆ ಕಡಿಮೆ. ಗ್ರಾಮೀಣ ಪ್ರದೇಶಗಳಲ್ಲಿ ಈ ಸೇವೆಗಳ ಅಭಾವ.
ಪ್ಯಾಲಿಯೇಟಿವ್ ಕೇರ್‌ದ ಅಗತ್ಯತೆ: ಪ್ಯಾಲಿಯೇಟಿವ್ ಕೇರ್ ಸೇವೆಗಳು ಆರೋಗ್ಯ ಸೇವಾ ವ್ಯವಸ್ಥೆಯ ಅತ್ಯವಶ್ಯಕ ಅಂಗವಾಗಬೇಕು. ಸಾರ್ವಜನಿಕರಿಗೆ ಇದರ ಮಹತ್ವ ತಿಳಿಸಲು ಜಾಗೃತಿ ಅಭಿಯಾನಗಳು ಬೇಕು. ಪ್ಯಾಲಿಯೇಟಿವ್ ಕೇರ್ ಮನಸು ಮತ್ತು ದೇಹ ಎರಡಕ್ಕೂ ಶಾಂತಿಯನ್ನು ತರುತ್ತದೆ. ಇದು ಕೇವಲ ಆರೋಗ್ಯ ಸೇವೆಯಲ್ಲ, ಅದು ರೋಗಿಯ ಮತ್ತು ಕುಟುಂಬದ ನೋವು, ಕಷ್ಟ ಮತ್ತು ಭಯವನ್ನು ನಿವಾರಿಸಿ, ಮಾನವೀಯ ಜೀವನದ ಮೌಲ್ಯವನ್ನು ಹೆಚ್ಚಿಸುತ್ತದೆ.
– ಡಾ|| ಶಿಲ್ಪ ಶ್ರೀ ಎ.ಎಂ.,ಪ್ಯಾಲಿಯೇಟಿವ್ ಕೇರ್ ತಜ್ಞರು ಪ್ರಾಧ್ಯಾಪಕರು, ಅನಸ್ತೇಸಿಯಾ ವಿಭಾಗ, ಜ.ಜ.ಮು. ಮೆಡಿಕಲ್ ಕಾಲೇಜು, ದಾವಣಗೆರೆ.