ವಿಕಾಸ ತರಂಗಿಣಿ : ಸತ್ಯನಾರಾಯಣ ಮೂರ್ತಿ ಅವರು ತಮ್ಮದೇ ಆದ ಮತ್ತೊಂದು ಸೇವಾ ಸಂಸ್ಥೆ ವಿಕಾಸ ತರಂಗಿಣಿ ಆಶ್ರಯದಲ್ಲಿ ದಾನಿಗಳ ಸಹಕಾರ ಪಡೆದು ಪ್ರತಿ ವರ್ಷ ಬೇಸಿಗೆ ಸಂದರ್ಭದಲ್ಲಿ ಒಂದೂವರೆ ತಿಂಗಳ ಕಾಲ ಪ್ರತಿದಿನವೂ ಮಹಾನಗರ ಪಾಲಿಕೆ ಕಾರ್ಯಾಲಯದ ಮುಂದಿನ ಪಿ.ಬಿ. ರಸ್ತೆ ಬದಿಯಲ್ಲಿ ಸಾರ್ವಜನಿಕರಿಗೆ ಉಚಿತವಾಗಿ ಮಜ್ಜಿಗೆ ವಿತರಿಸುತ್ತಿದ್ದಾರೆ.

ವಿಕಾಸ ತರಂಗಿಣಿಯ ಈ ಸೇವಾ ಕಾರ್ಯವು ಕಳೆದ 24 ವರ್ಷಗಳಿಂದ ನಡೆಯುತ್ತಿದ್ದು, ಸಾರ್ವಜನಿಕ ಉಚಿತ ಮಜ್ಜಿಗೆ ವಿತರಣೆಯ ಸೇವೆಯು ಮುಂದಿನ ವರ್ಷದಲ್ಲಿ 25 ವರ್ಷಗಳ ರಜತ ಮಹೋತ್ಸವದ ಸಂಭ್ರಮದಲ್ಲಿದೆ.

ಈ ವರ್ಷವೂ ಮಜ್ಜಿಗೆ ವಿತರಣೆ ಕಾರ್ಯಕ್ಕೆ ಸಿದ್ಧತೆ ನಡೆಸುವ ವೇಳೆಗೆ ಮಹಾಮಾರಿ ಕೊರೊನಾ ವೈರಸ್ ಸೋಂಕು ಜಗತ್ತಿನಾದ್ಯಂತ ಹರಡಿದ ಪರಿಣಾಮ ದೇಶವು ಸುದೀರ್ಘ ಕಾಲ ಜನತಾ ಕರ್ಫ್ಯೂನಲ್ಲಿರಬೇಕಾಯಿತು.  ಕಾರಣ, ಈ ಅವಕಾಶವನ್ನು ಸದ್ಬಳಕೆ ಮಾಡಿಕೊಳ್ಳುವ ನಿಟ್ಟಿನಲ್ಲಿ ಮಜ್ಜಿಗೆ ವಿತರಣೆ ಬದಲಾಗಿ ಸಂಕಷ್ಟಕ್ಕೊಳಗಾದವರಿಗೆ ಆಹಾರ ಪೂರೈಸಲು ಯೋಜನೆ ರೂಪಿಸಿ, ಅದರಂತೆ ಕಾರ್ಯೋನ್ನುಖರಾಗಿರುವುದಾಗಿ ಸತ್ಯನಾರಾಯಣ ಮೂರ್ತಿ ವಿವರಿಸಿದ್ದಾರೆ.

ಸ್ಫೂರ್ತಿ ಸೇವಾ ಟ್ರಸ್ಟ್  : 1990 – 2000 ರ ದಶಕದಲ್ಲಿ ರಾಜಕೀಯ ಪಕ್ಷವೊಂದರಲ್ಲಿ ಸಕ್ರಿಯರಾಗಿದ್ದ ಬಿ.ಸತ್ಯನಾರಾಯಣ ಮೂರ್ತಿ ರೆಡ್ಡಿ ಅವರು ತಮ್ಮ ತತ್ವ – ಸಿದ್ಧಾಂತಗಳಿಗೆ ಪಕ್ಷದಲ್ಲಿ ಮನ್ನಣೆ ಸಿಗದ ಕಾರಣ ಬೇಸರಗೊಂಡು ಆ ಪಕ್ಷದಿಂದ ದೂರ ಉಳಿದರು. ತಮ್ಮ ಕೈಲಾದಷ್ಟು ಸಾಮಾಜಿಕ ಸೇವೆ ಮಾಡಬೇಕೆಂಬ ತುಡಿತವೇ ಸ್ಫೂರ್ತಿ ಸೇವಾ ಟ್ರಸ್ಟ್ ಸ್ಥಾಪನೆಗೆ ಕಾರಣವಾಯಿತು. 

ಕಳೆದ 15 ವರ್ಷಗಳ ಹಿಂದೆ ಉದಯವಾದ ಸ್ಫೂರ್ತಿ ಸೇವಾ ಟ್ರಸ್ಟ್ ಅನ್ನು ನಾಡಿನ ಪ್ರಮುಖ ಧಾರ್ಮಿಕ ಕ್ಷೇತ್ರಗಳಲ್ಲೊಂದಾದ ತುಮಕೂರಿನ ಶ್ರೀ ಸಿದ್ದಗಂಗಾ ಮಠದ ಹಿರಿಯ ಶ್ರೀಗಳಾದ ಲಿಂ. ಶ್ರೀ ಶಿವಕುಮಾರ ಸ್ವಾಮೀಜಿ ತಮ್ಮ ಅಮೃತ ಹಸ್ತದಿಂದ ಉದ್ಘಾಟಿಸಿದ್ದರು. 

ವಿವಿಧ ಛತ್ರಗಳಲ್ಲಿ ನಡೆಯುವ ಹಲವು ಕಾರ್ಯಕ್ರಮಗಳ ಸಂದರ್ಭಗಳಲ್ಲಿ ಊಟ ಉಳಿದಿದೆ ಎಂಬ ವಿಷಯ ತಿಳಿದೊಡನೆ ಸ್ಥಳಕ್ಕೆ ತೆರಳಿ, ಆ ಊಟವನ್ನು ವಾಹನದಲ್ಲಿ ಹೊತ್ತು ವೃದ್ಧಾಶ್ರಮ, ಅನಾಥಾ ಶ್ರಮ, ಅಂಧ ಮಕ್ಕಳ ಶಾಲೆ, ಅಂಗವಿಕಲರ ಶಾಲೆಗಳಲ್ಲದೇ, ಕೂಲಿ ಕಾರ್ಮಿಕರು ಮತ್ತು ಅಗತ್ಯತೆಯು ಳ್ಳವರಿಗೆ ವಿತರಿಸುವ ಕಾರ್ಯವನ್ನು ಮಾಡಲಾಗುತ್ತಿದೆ.

ಪ್ರತಿದಿನ ನಡೆಯುವ ಈ ಸೇವಾ ಕಾರ್ಯ ಕುರಿತಂತೆ ದಾಖಲೆ ಪುಸ್ತಕ ಮಾಡಲಾಗಿದ್ದು, ಆ ಪ್ರಕಾರ ಪ್ರತಿ ವರ್ಷ ಸರಾಸರಿ ಸುಮಾರು ಒಂದು ಲಕ್ಷ ಜನರಿಗಾಗುವಷ್ಟು ಊಟ ಛತ್ರಗಳಲ್ಲಿ ಉಳಿಯುತ್ತಿದ್ದು, ಅದನ್ನು ಅಗತ್ಯತೆಯುಳ್ಳವರಿಗೆ ಪೂರೈಸುವ ಕಾರ್ಯ ಮಾಡುತ್ತಿರುವುದರಿಂದ ತಾವು ತಮ್ಮ ಜೀವನದಲ್ಲಿ ಸಂತೃಪ್ತಿ ಕಂಡಿರುವುದಾಗಿ ಸತ್ಯನಾರಾಯಣ ಮೂರ್ತಿ  ಹರ್ಷ ವ್ಯಕ್ತಪಡಿಸಿದ್ದಾರೆ.

ಈ ಕಾರ್ಯಕ್ಕಾಗಿಯೇ ಸ್ವಂತ ವಾಹನ ಖರೀದಿಸಿ, ಅದಕ್ಕೆ ಚಾಲಕ ಮತ್ತು ನಿರ್ವಾಹಕರನ್ನು ಇಡಲಾಗಿದೆ. ಇದಕ್ಕೆಲ್ಲಾ ತಗುಲಬಹುದಾದ ವೆಚ್ಚವನ್ನು ಸತ್ಯನಾರಾಯಣ ಮೂರ್ತಿ ಅವರೇ ನಿರ್ವಹಿಸುತ್ತಾರೆ. ಸ್ಫೂರ್ತಿ ಸೇವಾ ಟ್ರಸ್ಟ್ ಹೀಗೆ ಅರ್ಥಪೂರ್ಣ ಸೇವೆ ಮಾಡುವುದರ ಮೂಲಕ ಸಮಾಜದಲ್ಲಿ ಪ್ರಶಂಸೆಗೊಳಗಾಗಿದೆ.

ಮಾದರಿ ಮತ್ತು ಅರ್ಥಪೂರ್ಣ ಸಾಮಾಜಿಕ ಸೇವೆಯಲ್ಲಿ ಸತ್ಯನಾರಾಯಣ ಮೂರ್ತಿ ರೆಡ್ಡಿ : ಸಾಮಾಜಿಕ ಸೇವೆಯಲ್ಲಿ ಹಲವಾರು ವಿಧಗಳು. ಅವುಗಳಲ್ಲಿ ; ದುಡಿಮೆ ಮಾಡಿದ ಹಣದಲ್ಲಿ ಸ್ವಲ್ಪ ಭಾಗವನ್ನು ಸಮಾಜಕ್ಕೆ ದೇಣಿಗೆ ನೀಡುವುದು ಒಂದಾ ದರೆ, ದೇಣಿಗೆ ಕೊಡುವುದರ ಜೊತೆ – ಜೊತೆೆಗೆ ಸ್ವತಃ ತಾವೇ ಆ ಜವಾಬ್ಧಾರಿಯನ್ನು ಹೊತ್ತು ಸಂಬಂಧಪಟ್ಟವರಿಗೆ ಸಮರ್ಪಿಸುವುದು ಮತ್ತೊಂದು.

ಪ್ರಮುಖವಾದ ಈ ಎರಡೂ ಸೇವೆಗಳನ್ನು ಒಟ್ಟೊಟ್ಟಿಗೆ ಮಾಡುವ ಮೂಲಕ ಸಮಾಜ ಸೇವೆಗೆ ಅರ್ಥ ಕಲ್ಪಿಸುತ್ತಿರುವ ಕೆಲವೇ ಕೆಲವು ಸಮಾಜ ಸೇವಕರಲ್ಲಿ ಬಿ.ಸತ್ಯನಾರಾಯಣ ಮೂರ್ತಿ ರೆಡ್ಡಿ ಅವರೂ ಕೂಡಾ ಒಬ್ಬರು.

ಸರಳ – ಸಜ್ಜನಿಕೆಯ ಮತ್ತು ಅಪಾರ ದೈವ ಭಕ್ತರಾಗಿದ್ದಾರೆ. ಇವರನ್ನು ಕೇವಲ ಸತ್ಯನಾರಾಯಣ ರೆಡ್ಡಿ ಎಂದರೆ ಬಹುತೇಕರಿಗೆ ತಕ್ಷಣವೇ ಪರಿಚಯವಾಗಲಿಕ್ಕಿಲ್ಲ. ಅವರನ್ನು ಮಜ್ಜಿಗೆ ಅಥವಾ ಅನ್ನ ದಾಸೋಹಿ – ಅನ್ನ ಬ್ರಹ್ಮ ಸತ್ಯನಾರಾಯಣ ಮೂರ್ತಿ ರೆಡ್ಡಿ ಎಂದರೆ ದಾವಣಗೆರೆಯ ಸಾಕಷ್ಟು ಜನರು ಗುರುತಿಸಬಲ್ಲರು.

ಇವರು ತಾವು ಸ್ಥಾಪಿಸಿರುವ ಎರಡು ಸಾಮಾಜಿಕ ಸೇವಾ ಸಂಸ್ಥೆಗಳ ಪೈಕಿ `ವಿಕಾಸ ತರಂಗಿಣಿ’ ಯನ್ನು ಪ್ರತಿ ವರ್ಷ ಸಾರ್ವಜನಿಕರಿಗೆ ಉಚಿತ ಮಜ್ಜಿಗೆ ವಿತರಿಸಲು ಮತ್ತು `ಸ್ಫೂರ್ತಿ ಸೇವಾ ಟ್ರಸ್ಟ್’ ಅನ್ನು ಅಗತ್ಯತೆಯುಳ್ಳವರಿಗೆ
ಅನ್ನ ದಾಸೋಹ ಮಾಡಲು ಮೀಸಲಾಗಿಟ್ಟಿದ್ದಾರೆ. ಹೀಗಾಗಿ ಸಮಾಜ ಸೇವೆೆಗೆ ಮತ್ತೊಂದು ಹೆಸರೇ ಸತ್ಯನಾರಾಯಣ ರೆಡ್ಡಿ ಎಂದರೆ ಅತಿಶಯೋಕ್ತಿಯೇನಲ್ಲ.