ಮಠದ ಕಾರ್ಯನಿರ್ವಹಣೆ ಬಗ್ಗೆ ಅಸಮಾಧಾನ ಪ್ರಶ್ನಿಸುವ ಭಕ್ತರ ಮೇಲೆ ಕೇಸ್ ಎಂದು ಆಕ್ಷೇಪ

ರಾಣೇಬೆನ್ನೂರಿನಲ್ಲಿರುವ ಇಂಜಿನಿಯರಿಂಗ್ ಕಾಲೇಜು ಹಾಗೂ ದಾವಣಗೆರೆ ಯಲ್ಲಿರುವ ಮಠದ ವಸತಿ ಶಾಲೆ ಸೇರಿದಂತೆ ಹಲವಾರು ಶಿಕ್ಷಣ ಸಂಸ್ಥೆಗಳು ಮುಚ್ಚಿವೆ. ಹಲವಾರು ಶಿಕ್ಷಣ ಸಂಸ್ಥೆಗಳು ಸ್ಥಗಿತಗೊಂಡಿವೆ. ಹಲವು ಕಲ್ಯಾಣ ಮಂಟಪಗಳು ದುಸ್ಥಿತಿಯಲ್ಲಿವೆ ಎಂದು ಸಭೆಯಲ್ಲಿ ಮಾತನಾಡಿದ ಹಲವರು ಬೇಸರ ವ್ಯಕ್ತಪಡಿಸಿದರು.

ಉತ್ತರಾಧಿಕಾರಿ ನೇಮಕಕ್ಕೆ ಸಂಬಂಧಿಸಿದಂತೆ ಮಾತನಾಡಲು ಹಲವು ಬಾರಿ ಮುಖಂಡರು ತೆರಳಿದರೂ ತರಳಬಾಳು ಜಗದ್ಗುರು ಶ್ರೀ ಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿ ಅವರು ಸ್ಪಷ್ಟವಾದ ಪ್ರತಿಕ್ರಿಯೆ ನೀಡಿಲ್ಲ. ಈ ಬಗ್ಗೆ ಮಾತನಾಡಿದವರಿಗೆ ಮಠದ ಬಾಗಿಲು ಮುಚ್ಚುತ್ತಿದೆ. ಸಮಾಜಕ್ಕಾಗಿ ಪ್ರಾಮಾಣಿಕವಾಗಿ ಅಭಿಪ್ರಾಯ ತಿಳಿಸುವವರನ್ನೂ ದೂರವಿಡಲಾಗುತ್ತಿದೆ ಎಂದು ಆಕ್ಷೇಪಿಸಿದರು.

ವಾಟ್ಸ್‌ಆಪ್‌ಗಳಲ್ಲಿ ಮಠದ ವಿಷಯಗಳ ಬಗ್ಗೆ ನಡೆಯುತ್ತಿರುವ ಚರ್ಚೆಗಳ ಕಾರಣದಿಂದಾಗಿ, ಇತರೆ ಸಮಾಜಗಳ ಎದುರು ಗೌರವಕ್ಕೆ ಕುಂದಾಗುತ್ತಿದೆ.

ತರಳಬಾಳು ಜಗದ್ಗುರು ಹಾಗೂ ಸಾಣೇಹಳ್ಳಿ ಶ್ರೀಗಳನ್ನು ಸಮಾಜ ತನ್ನ ಎರಡು ಕಣ್ಣು ಎಂದು ಭಾವಿಸಿದೆ. ಆದರೆ, ಉಭಯ ಶ್ರೀಗಳ ನಡುವೆ ವೈಮನಸ್ಸು ಉಂಟಾಗಿದೆ. ಇದು ಸಮಾಜದ ಎಲ್ಲರಿಗೂ ಬೇಸರ ತಂದಿದೆ ಎಂದು ತಿಳಿಸಲಾಯಿತು.

ತರಳಬಾಳು ಜಗದ್ಗುರು ಶಿಕ್ಷಣ ಸಂಸ್ಥೆಯ ಕಾರ್ಯದರ್ಶಿಯಾಗಿದ್ದ ಎಸ್. ಸಿದ್ದಯ್ಯ ಅವರ ಮೇಲೆ ಆರೋಪ ಹೊರಿಸಿ ಮಠದಿಂದ ದೂರ ಮಾಡಲಾಗಿದೆ. ಮಠದ ಕಾರ್ಯನಿರ್ವಹಣೆ ಪ್ರಶ್ನಿಸುವ ಭಕ್ತರ ವಿರುದ್ಧ ಪ್ರಕರಣ ದಾಖಲಿಸಲಾಗುತ್ತಿದೆ.  ಸಾಧು ಸದ್ಧರ್ಮ ವೀರಶೈವ ಸಂಘವನ್ನು ದುರ್ಬಲಗೊಳಿಸಲಾಗಿದೆ. ಅದರ ಸದಸ್ಯರು ಕಾಲವಾದ ನಂತರ ಹೊಸ ಸದಸ್ಯರ ನೇಮಕ ಪ್ರಕ್ರಿಯೆ ಸಮರ್ಪಕವಾಗಿಲ್ಲ.  ಸಂಘಕ್ಕೆ ಹೊಸ ಪದಾಧಿಕಾರಿಗಳನ್ನು ನೇಮಿಸಬೇಕು ಎಂದೂ ಒತ್ತಾಯಿಸಲಾಯಿತು.

ಮಠದ ಒಳಿತಿಗಾಗಿ ಇಂದು ಸಭೆ ಕರೆಯಲಾಗಿದೆ. ಆದರೆ, ಈ ಸಭೆ ಅಸಂತುಷ್ಟ ರಾಜಕಾರಣಿಗಳ ಸಭೆ ಎಂಬ ರೀತಿಯಲ್ಲಿ ಸಾಧು ಸದ್ಧರ್ಮ ವೀರಶೈವ ಸಂಘದ ಅಧ್ಯಕ್ಷ ಹೆಚ್.ಆರ್. ಬಸವರಾಜಪ್ಪ ಆಕ್ಷೇಪಿಸಿ ಪತ್ರ ಬರೆದಿದ್ದಾರೆ. ಈ ಸಭೆಗೆ ಯಾರೂ ಹೋಗಬಾರದು ಎಂದು ತಡೆಯುವ ಪ್ರಯತ್ನ ಮಾಡಿದ್ದಾರೆ. ಸಮಾಜದ ಅಧ್ಯಕ್ಷರು ನೇಮಕಗೊಂಡವರೇ ಹೊರತು ಆಯ್ಕೆಯಾದವರಲ್ಲ ಎಂದೂ ಸಭೆಯಲ್ಲಿ ಅಭಿಪ್ರಾಯ ವ್ಯಕ್ತಪಡಿಸಲಾಯಿತು.

ನಿಯೋಗದಲ್ಲಿ ರಾಜಣ್ಣ ಬೇಡ‍!

ತರಳಬಾಳು ಜಗದ್ಗುರುಗಳನ್ನು ಭೇಟಿ ಮಾಡುವ ನಿಯೋಗಕ್ಕೆ ಉದ್ಯಮಿ ಅಣಬೇರು ರಾಜಣ್ಣ ಬೇಡ ಎಂದು ಶಾಸಕ ಶಾಮನೂರು ಶಿವಶಂಕರಪ್ಪ ಹೇಳಿದರು.

ನಾನೂ ಹಾಗೂ ಮೂರ್ನಾಲ್ಕು ಜನ ನಿಯೋಗದಲ್ಲಿ ತೆರಳುತ್ತೇವೆ ಎಂದು ಶಿವಶಂಕರಪ್ಪ ಹೇಳಿದರು. 

ನಿಯೋಗದಲ್ಲಿ ನಾನು ಬೇಡವಾ? ಎಂದು ರಾಜಣ್ಣ ಪ್ರಶ್ನಿಸಿದರು. ಆಗ ಶಿವಶಂಕರಪ್ಪನವರು, ನೀನು ಬೇಡ. ನಿನಗೂ-ಅವರಿಗೂ ಆಗುವುದಿಲ್ಲ ಎಂದರು.

ಹರ್ಕಂಡು ಬಹಳ ದಿನ ಆಯಿತು: ಎಸ್ಸೆಸ್

ತರಳಬಾಳು ಜಗದ್ಗುರು ಶ್ರೀ ಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿ ಹಾಗೂ ಸಾಣೇಹಳ್ಳಿ ಶಾಖಾಮಠದ ಶ್ರೀ ಪಂಡಿತಾರಾಧ್ಯ ಶಿವಾಚಾರ್ಯ ಸ್ವಾಮೀಜಿ ಅವರ ನಡುವೆ ಒಡಕಾಗಿದೆ. ಅವರು ಇರಲಿ, ಇವರು ಬೇಡ ಎನ್ನುವುದು ಸರಿಯಲ್ಲ. ಇಬ್ಬರೂ ಉತ್ತರಾಧಿಕಾರಿ ನೇಮಿಸಲಿ ಎಂದು ಶಾಸಕ ಶಾಮನೂರು ಶಿವಶಂಕರಪ್ಪ ಹೇಳಿದರು.

`ಇಬ್ಬರೂ ಹರ್ಕಂಡು ಬಹಳ ದಿನ ಆಯಿತು. ಎರಡೂ ಕಡೆಯೂ ಮರಿ ಮಾಡಿ, ಇಬ್ಬರೂ ಹೊರ ಹೋಗುವುದು ಒಳ್ಳೆಯದು’ ಎಂದರು.

ಈ ನಡುವೆ ಸಭೆಯಲ್ಲಿದ್ದವರೊಬ್ಬರು ಹರಳಕಟ್ಟ ಮಠದ ಶ್ರೀ ಪ್ರಕಾಶ ಸ್ವಾಮೀಜಿ ಅವರೂ ಹೊರ ಹೋಗಲಿ ಎಂದರು. ಆಗ ಶಿವಶಂಕರಪ್ಪನವರು, ಅವರಿಗೆ ಸ್ವಾಮೀಜಿ ಆಗುವುದೇ ಇಷ್ಟವಿರಲಿಲ್ಲ ಎಂದು ಮುಗುಳ್ನಗುತ್ತಾ ಹೇಳಿದರು.

ಸಭೆಯ ನಿರ್ಣಯಗಳು

ತರಳಬಾಳು ಜಗದ್ಗುರು ಶ್ರೀ ಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿ ಹಾಗೂ ಸಾಣೇಹಳ್ಳಿ ಶಾಖಾ ಮಠದ ಶ್ರೀ ಪಂಡಿತಾರಾಧ್ಯ ಸ್ವಾಮೀಜಿ ನಿವೃತ್ತಿ ಘೋಷಿಸಿಕೊಂಡು ಉತ್ತರಾಧಿಕಾರಿ ಆಯ್ಕೆ ಮಾಡಬೇಕು

ಸಾಧು ಸದ್ಧರ್ಮ ವೀರಶೈವ ಸಂಘವು ಸ್ಥಗಿತಗೊಂಡಿದ್ದು, ಹೊಸದಾಗಿ ಅಧ್ಯಕ್ಷರು ಹಾಗೂ ಪದಾಧಿಕಾರಿಗಳನ್ನು ಆಯ್ಕೆ ಮಾಡಬೇಕು

ತರಳಬಾಳು ಜಗದ್ಗುರು ಶ್ರೀ ಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿ ಅವರು ಏಕವ್ಯಕ್ತಿ ಡೀಡ್ ರದ್ದುಗೊಳಿಸಿ, ಹಿರಿಯ ಜಗದ್ಗುರು ಲಿಂ. ಶ್ರೀ ಶಿವಕುಮಾರ ಶಿವಾಚಾರ್ಯ ಸ್ವಾಮೀಜಿ ಅವರ ಬೈಲಾ ಯಥಾವತ್ತಾಗಿ ಜಾರಿಗೆ ತರಬೇಕು

ಸಾಹಿತ್ಯಿಕವಾಗಿ, ಸಾಂಸ್ಕೃತಿಕವಾಗಿ, ಆರ್ಥಿಕವಾಗಿ, ಧಾರ್ಮಿಕವಾಗಿ ತನ್ನದೇ ಆದ ಛಾಪು ಮೂಡಿಸಿರುವ ತರಳಬಾಳು ಮಠವನ್ನು ಹಾಳು ಮಾಡಲು ಬಿಡಲಾಗದು.

ಇಂದು ಕರೆಯಲಾಗಿದ್ದ ಸಭೆಗೆ ನಾನು ಹೋಗಬಾರದು ಎಂದು ಹೊರಗಿನವರೂ ಹೇಳಿದ್ದರೂ, ನನ್ನ ಮನೆಯವರೂ ಹೇಳಿದ್ದರು. ಗುರುಗಳ ಮಾತಿನಂತೆ ಮೊದಲಿನಿಂದಲೂ ನಡೆದುಕೊಂಡು ಬಂದಿದ್ದೇವೆ. ಆದರೆ, ಈಗ ಸಮಾಜದ ಹಿತದೃಷ್ಟಿಯಿಂದ ಈ ಸಭೆ ನಡೆಸಬೇಕಾಗಿದೆ.

– ಶಾಸಕ ಶಾಮನೂರು ಶಿವಶಂಕರಪ್ಪ

ಗುರು ಹಾಗೂ ಶಿಷ್ಯರು ಪರಸ್ಪರರ ಮೇಲೆ ಅಂಜಿ ನಡೆಯಬೇಕು ಎಂಬ ತತ್ವದ ಮೇಲೆ ತರಳಬಾಳು ಮಠ ನಡೆದುಕೊಂಡು ಬಂದಿತ್ತು. ಆದರೆ, ಈಗ ಶಿಷ್ಯರ ಮೇಲೆ ಪ್ರಕರಣಗಳನ್ನು ದಾಖಲಿಸುವ ಮೂಲಕ ಗುರುಗಳು ಅಂಜಿಸುತ್ತಿದ್ದಾರೆ. ವಾಟ್ಸ್‌ಆಪ್‌ನಲ್ಲಿ ಮೆಸೇಜ್ ಕಳಿಸುವವರನ್ನು ಅಂಜಿಸಿ ಮುಷ್ಠಿಯಲ್ಲಿಟ್ಟುಕೊಳ್ಳಲಾಗದು.

– ಮಾಜಿ ಸಚಿವ ಬಿ.ಸಿ. ಪಾಟೀಲ್‌

ಮಠಕ್ಕೆ ಹಠಾತ್ತನೆ ಯಾರನ್ನೋ ಉತ್ತರಾಧಿಕಾರಿ ನೇಮಿಸ ಲಾಗದು. ಮಠ ನಿರ್ವಹಿಸಲು ಅಗತ್ಯ ಶಿಕ್ಷಣ ಹಾಗೂ ಕಾರ್ಯನಿರ್ವಹಣೆ ಕಲಿಸಬೇಕು. ಇದೆಲ್ಲ ಒಂದೇ ದಿನದಲ್ಲಿ ಸಾಧ್ಯವಾಗದು. ಉತ್ತರಾಧಿಕಾರಿ ನೇಮಕ ಜಗದ್ಗುರುಗಳ ಮಾರ್ಗದರ್ಶನದಲ್ಲೇ ಆಗಬೇಕು. ಆದರೆ, ಅವರು ತಮ್ಮ ಮನಸ್ಸಿನಲ್ಲಿ ಏನಿದೆ ಎಂಬುದನ್ನಾದರೂ ಹೇಳುತ್ತಿಲ್ಲ.

– ಮಾಜಿ ಶಾಸಕ ವಡ್ನಾಳ್‌ ರಾಜಣ್ಣ

ಸಾಧು ಸದ್ಧರ್ಮ ವೀರಶೈವ ಸಂಘದಲ್ಲಿ 50 ವರ್ಷಗಳಿಂದ ಸದಸ್ಯನಾಗಿದ್ದೇನೆ. ಗುರುಗಳು ಅವರಿಗೆ ಬೇಕಾದವರನ್ನು ನೇಮಿಸಿಕೊಂಡು, ನಾಲ್ಕು ಗೋಡೆಗಳ ನಡುವೆ ಸಮಾಜದ ಅಧ್ಯಕ್ಷರನ್ನು ನೇಮಿಸಿಕೊಳ್ಳುತ್ತಿದ್ದಾರೆ. ಇದು ತಪ್ಪು. 

– ಉದ್ಯಮಿ ಅಣಬೇರು ರಾಜಣ್ಣ