ಸೋಲಿಗೆ ಜಿಲ್ಲಾಧ್ಯಕ್ಷರು, ರಾಜ್ಯಾಧ್ಯಕ್ಷರನ್ನು ಕೇಳಿ…

ದಾವಣಗೆರೆ ಲೋಕಸಭಾ ಕ್ಷೇತ್ರದಲ್ಲಿ ಬಿಜೆಪಿ ಸೋಲಿಗೆ ಕಾರಣ ಏನು ಎಂಬ ಬಗ್ಗೆ ಪಕ್ಷದ ಜಿಲ್ಲಾಧ್ಯಕ್ಷರು ಹಾಗೂ ರಾಜ್ಯಾಧ್ಯಕ್ಷರನ್ನೇ ಕೇಳುವಂತೆ ಬಿಜೆಪಿ ವರಿಷ್ಠ ನಾಯಕ ಹಾಗೂ ಕೇಂದ್ರ ಗೃಹ ಸಚಿವ ಅಮಿತ್ ಷಾ ಅವರಿಗೆ ತಿಳಿಸಿರುವುದಾಗಿ ಮಾಜಿ ಸಂಸದ ಜಿ.ಎಂ. ಸಿದ್ದೇಶ್ವರ ಹೇಳಿದರು.

ಇತ್ತೀಚೆಗೆ ಅಮಿತ್ ಷಾ ಅವರನ್ನು ಭೇಟಿ ಮಾಡಿದಾಗ, ಸೋಲಿಗೆ ಕಾರಣ ಏನು ಎಂದು ನನ್ನನ್ನು ಕೇಳಿದ್ದರು. ಆಗ ಜಿಲ್ಲಾಧ್ಯಕ್ಷರು ಹಾಗೂ ರಾಜ್ಯಾಧ್ಯಕ್ಷರನ್ನೇ ಕೇಳುವಂತೆ ತಿಳಿಸಿದ್ದೆ ಎಂದು ಸಿದ್ದೇಶ್ವರ ತಿಳಿಸಿದರು.

ಸೋಲಿನ ಕಾರಣದಿಂದ ಯಾವುದೇ ಬೇಸರವಾಗಿಲ್ಲ. ಸೋಲಿನ ನಂತರ ಧರ್ಮಸ್ಥಳದ ಕ್ಷೇಮವನಕ್ಕೆ ತೆರಳಿ `ಬಾಡಿಯನ್ನು ಓರಾಯಿಲ್’ ಮಾಡಿಸಿಕೊಂಡು ಆರಾಮಾಗಿದ್ದೇನೆ ಎಂದವರು ಪ್ರಶ್ನೆಯೊಂದಕ್ಕೆ ಉತ್ತರಿಸಿದರು.

ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ. ವಿಜಯೇಂದ್ರ ಹಾಗೂ ಬಿ.ಎಸ್. ಯಡಿಯೂರಪ್ಪ ಅವರೇ ಗಾಯತ್ರಿ ಸಿದ್ದೇಶ್ವರ ಸೋಲಿಗೆ ಕಾರಣ ಎಂದು ಶಾಸಕ ಬಿ.ಪಿ. ಹರೀಶ್ ಹೇಳಿದ್ದರು. ಈ ಹೇಳಿಕೆ ಸಮರ್ಥಿಸುತ್ತೀರಾ? ಎಂಬ ಪ್ರಶ್ನೆಗೆ ಉತ್ತರಿಸಿದ ಸಿದ್ದೇಶ್ವರ, ಅವರಿಗೆ ಕೆಲ ವಿಷಯಗಳು ಗೊತ್ತಿರುವ ಕಾರಣ ಹೇಳಿರಬಹುದು. ನನಗೇನೂ ಗೊತ್ತಿಲ್ಲ ಎಂದರು.

ಚುನಾವಣಾ ಸೋಲಿಗೆ ಸಂಬಂಧಿಸಿದಂತೆ ಶಾಸಕ ಹರೀಶ್ ಮೂಲಕ ನಾನು ಯಾವುದೇ ಹೇಳಿಕೆ ಕೊಡಿಸಿಲ್ಲ. ಹಾಗೇನಾದರೂ ಹೇಳುವುದಿದ್ದರೆ ನಾನು ನೇರವಾಗೇ ಹೇಳುತ್ತೇನೆ ಎಂದೂ ಅವರು ತಿಳಿಸಿದರು.

ಕೊವಿಡ್ ಭ್ರಷ್ಟಾಚಾರ ನಡೆದಿದ್ದರೆ ತನಿಖೆ ಮಾಡಿಸಲಿ

ಕೊವಿಡ್ ಸಮಯದಲ್ಲಿ ನಡೆಸಲಾದ ಖರೀದಿ ಗಳಲ್ಲಿ ಭ್ರಷ್ಟಾಚಾರ ನಡೆದಿದೆ ಎಂದು ಜಿಲ್ಲಾ ಉಸ್ತು ವಾರಿ ಸಚಿವ ಎಸ್.ಎಸ್. ಮಲ್ಲಿಕಾರ್ಜುನ್ ಅವರು ಆರೋಪಿಸಿದ್ದಾರೆ. ಈಗ ಅವರದೇ ಸರ್ಕಾರ ಇದೆ. ಭ್ರಷ್ಟಾ ಚಾರ ನಡೆದಿದ್ದರೆ ತನಿಖೆ ನಡೆಸಲಿ ಎಂದು ಮಾಜಿ ಸಂಸದ ಜಿ.ಎಂ. ಸಿದ್ದೇಶ್ವರ ಸವಾಲು ಹಾಕಿದರು.

ನೂತನ ಸಂಸದರು ಹೊಸ ಕಾಮಗಾರಿ ತಂದಿಲ್ಲ

ಅಶೋಕ ಟಾಕೀಸ್ ಬಳಿಯ ರೈಲ್ವೆ ಕ್ರಾಸಿಂಗ್‌ಗೆ ಅಂಡರ್‌ಪಾಸ್ ಹಾಗೂ ಪಾದಚಾರಿ ಮಾರ್ಗ, ಚಿಂದೋಡಿ ಲೀಲ ಸಭಾಭವನದ ಬಳಿ ಫ್ಲೈಓವರ್, ಮರಿಯಮ್ಮನಹಳ್ಳಿ ಹೆದ್ದಾರಿ, ದಾವಣಗೆರೆ – ಚನ್ನಗಿರಿ ಹೆದ್ದಾರಿ ಹಾಗೂ ಜಿಲ್ಲಾ ಕ್ರೀಡಾಂಗಣಕ್ಕೆ ಸಿಂಥಟಿಕ್ ಟ್ರ್ಯಾಕ್ ಕಾಮಗಾರಿಗಳು ತಮ್ಮ ಅವಧಿಯಲ್ಲೇ ಮಂಜೂರಾಗಿದ್ದವು ಎಂದು ಮಾಜಿ ಸಂಸದ ಸಿದ್ದೇಶ್ವರ ಹೇಳಿದರು.

ನೂತನ ಸಂಸದರು ಯಾವುದೇ ಹೊಸ ಕಾಮಗಾರಿಯನ್ನು ಮಂಜೂರು ಮಾಡಿಸಿಕೊಂಡಿಲ್ಲ. ನನ್ನ ಅವಧಿಯಲ್ಲೇ ಮಂಜೂರಾಗಿದ್ದ ಕಾಮಗಾರಿಗಳ ಚುರುಕುಗೊಳಿಸಲು ಕೇಂದ್ರ ಸಚಿವರನ್ನು ಭೇಟಿ ಮಾಡಿ ಮನವಿ ಸಲ್ಲಿಸಿದ್ದೇನೆ ಎಂದರು.

ಎಲ್ಲ ನಗರಾಭಿವೃದ್ಧಿ ಪ್ರಾಧಿಕಾರಗಳ ತನಿಖೆಯಾಗಲಿ

ಮುಡಾ ರೀತಿಯಲ್ಲೇ ಹಲವು ನಗರಾಭಿವೃದ್ಧಿ ಪ್ರಾಧಿಕಾರಗಳಲ್ಲಿ ಅಕ್ರಮಗಳಾಗಿರುವ ಆರೋಪಗಳಿವೆ. ಈ ಎಲ್ಲದರ ಬಗ್ಗೆ ನಿವೃತ್ತ ನ್ಯಾಯಮೂರ್ತಿಗಳ ನೇತೃತ್ವದಲ್ಲಿ ತನಿಖೆ ಆಗಬೇಕು ಎಂದು ಮಾಜಿ ಸಂಸದ ಜಿ.ಎಂ. ಸಿದ್ದೇಶ್ವರ ಆಗ್ರಹಿಸಿದ್ದಾರೆ.

ಬಿಜೆಪಿ ಅವಧಿಯಲ್ಲೂ ಅಕ್ರಮಗಳಾಗಿವೆ ಎಂದು ಆರೋಪಿಸಲಾಗುತ್ತಿದ್ದೆ. ಯಾರೇ ತಪ್ಪು ಮಾಡಿದರೂ ತನಿಖೆಯಾಗಿ ಶಿಕ್ಷೆಯಾಗಬೇಕು ಎಂದು ಸಿದ್ದೇಶ್ವರ  ಹೇಳಿದರು.