ಧ.ರಾ.ಮ. ವಿಜ್ಞಾನ ಪದವಿ ಕಾಲೇಜಿನ ಕಾರ್ಯಕ್ರಮದಲ್ಲಿ ಡಾ. ಜಿ. ಮಾನವೇಂದ್ರ 

ದಾವಣಗೆರೆ, ಜು. 3- ಸುರಕ್ಷತೆಯ ಕಾಳಜಿ ಮತ್ತು ಶೇಖರಣಾ ಬೇಡಿಕೆಗಳನ್ನು ಪೂರೈಸಲು ಸೌರ ಮತ್ತು ಪವನ ಶಕ್ತಿಯ ದಕ್ಷತೆಯನ್ನು ಸುಧಾರಿಸುವ ಪ್ರಾಮುಖ್ಯತೆಯಿಂದಾಗಿ ಬ್ಯಾಟರಿ ತಂತ್ರಜ್ಞಾನದಲ್ಲಿ ನವೀನ  ಸಂಶೋಧನೆಯ ತುರ್ತು ಅಗತ್ಯವಿದೆ ಎಂದು ಬಿಐಇಟಿ ಕಾಲೇಜಿನ ಮೆಕ್ಯಾನಿಕಲ್ ಇಂಜಿನಿಯರಿಂಗ್ ವಿಭಾಗದ ಮುಖ್ಯಸ್ಥ ಡಾ. ಜಿ. ಮಾನವೇಂದ್ರ ಹೇಳಿದರು.

ನಗರದ ಧ.ರಾ.ಮ. ವಿಜ್ಞಾನ ಪದವಿ ಕಾಲೇಜಿನಲ್ಲಿ `ಪ್ರಸ್ತುತ ಹಾಗೂ ಮುಂದಿನ ಪೀಳಿಗೆಯ ಬ್ಯಾಟರಿ ಮತ್ತು ಇಂಧನ ಕೋಶಗಳು’ ಕುರಿತ ಒಂದು ದಿನದ ಅಂತರರಾಷ್ಟ್ರೀಯ ಮಟ್ಟದ ವಿಚಾರ ಸಂಕಿರಣ ಉದ್ಘಾಟಿಸಿ ಅವರು ಮಾತನಾಡಿದರು.

ಗ್ರಿಡ್ ಸ್ಥಿರೀಕರಣದಲ್ಲಿ ಬ್ಯಾಟರಿಗಳ ನಿರ್ಣಾ ಯಕ ಪಾತ್ರ ಮತ್ತು ಪರಿಸರ ಸ್ನೇಹಿ ಶಕ್ತಿಗಾಗಿ ಹೈಡ್ರೋಜನ್ ಇಂಧನ ಕೋಶಗಳ ಸಂಭಾವ್ಯತೆ ಯನ್ನು ಅವರು ಒತ್ತಿ ಹೇಳಿದರು. ಈ ಪ್ರದೇಶಗಳಲ್ಲಿ ಸುಧಾರಿತ ಪರಿಹಾರಗಳನ್ನು ಅಭಿವೃದ್ಧಿಪಡಿಸಲು ಸಂಶೋಧಕರನ್ನು ಒತ್ತಾಯಿಸಿದರು.

ಬಿಐಇಟಿ ಕೌಶಲ್ಯ ಅಭಿವೃದ್ಧಿ ಕೇಂದ್ರದ ಡೀನ್ ಡಾ. ಎ.ಎಸ್. ಶರಣ್ ಅವರು ಬ್ಯಾಟರಿಗಳು ಮತ್ತು ಇಂಧನ ಕೋಶಗಳ ಕುರಿತ ಮಾತುಗಳಲ್ಲಿ ಜಾಗತಿಕ ಸಮಸ್ಯೆಗಳನ್ನು ಪ್ರಸ್ತಾಪಿಸಿದರು.

ಪ್ರಾಚೀನ ಭಾರತೀಯ ಕೊಡುಗೆಗಳು ಮತ್ತು ಶಕ್ತಿಯ ಶೇಖರಣೆಯಲ್ಲಿ ಐತಿಹಾಸಿಕ ಬೆಳವಣಿಗೆಗಳ ಬಗ್ಗೆ ಬೆಳಕು ಚೆಲ್ಲಿದ ಅವರು, ಲೀಥಿಯಂ -ಐಯಾನ್ ಬ್ಯಾಟರಿಗಳ ಬೆಳವಣಿಗೆ ಮತ್ತು ಇಂಧನ ಕೋಶಗಳಲ್ಲಿನ ಪ್ರಗತಿಗಳಂತಹ ಪ್ರಸ್ತುತ ಪ್ರವೃತ್ತಿಗಳಿಗೆ ಒತ್ತು ನೀಡಿ, ನಮ್ಮ ಶಕ್ತಿಯ ಭವಿಷ್ಯವನ್ನು ರೂಪಿಸುವಲ್ಲಿ ತಂತ್ರಜ್ಞಾನಗಳ ಪಾತ್ರ ಪ್ರಮುಖವಾದುದು ಎಂದರು.

ಸುಸ್ಥಿರತೆ, ದಕ್ಷತೆ ಮತ್ತು ನವೀಕರಿಸಬಹುದಾದ ವಸ್ತುಗಳೊಂದಿಗೆ ಏಕೀಕರಣದ ಬಗ್ಗೆ ನಿರಂತರ ಸಂಶೋಧನೆಯ ಅವಶ್ಯವಿದೆ ಎಂದು ಕರೆ ನೀಡಿದರು.

ಸಂಪನ್ಮೂಲ ವ್ಯಕ್ತಿಗಳಾದ ಪುಣೆಯ ಎನ್‌ಸಿಎಲ್ ವಿಜ್ಞಾನಿ ಡಾ. ಜಿ.ಪಿ. ನಾಯ್ಕ್, ರಿಪಬ್ಲಿಕ್ ಕೋರಿಯಾ ವಿಜ್ಞಾನಿ ಡಾ. ಮಹೇಶ್ ಇಟಗಿ ಅವರು  ಮುಂದಿನ ಪೀಳಿಗೆಯ ಬ್ಯಾಟರಿ ಹಾಗೂ ಇಂಧನ ಕೋಶಗಳ ಅವಶ್ಯಕತೆಗಳ ಬಗ್ಗೆ ಅರ್ಥಪೂರ್ಣವಾಗಿ ವಿಷಯ ಮಂಡಿಸಿದರು.

ಧ.ರಾ.ಮ. ವಿಜ್ಞಾನ ಪದವಿ ಕಾಲೇಜಿನ ಪ್ರಾಂಶುಪಾಲರಾದ ಎಂ.ಸಿ. ರೂಪಶ್ರೀ ಅಧ್ಯಕ್ಷತೆ ವಹಿಸಿ ಮಾತನಾಡಿದರು. ರಸಾಯನಶಾಸ್ತ್ರ ವಿಭಾಗದ ಮುಖ್ಯಸ್ಥ ಡಾ. ಬಿ.ಸಿ. ವಸಂತಕುಮಾರ್ ಸೇರಿದಂತೆ, ಇತರರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.