ಮಹಾನಗರ ಪಾಲಿಕೆ ಸಾಮಾನ್ಯ ಸಭೆಯಲ್ಲಿ ವಾರ್ಡ್ ಸಮಸ್ಯೆಗಳ ಅನಾವರಣ
ದಾವಣಗೆರೆ, ಅ.31- ಸುಮಾರು ಏಳು ತಿಂಗಳ ನಂತರ ನಡೆದ ಮಹಾನಗರ ಪಾಲಿಕೆ ಸಾಮಾನ್ಯ ಸಭೆಯಲ್ಲಿ ನೀರು, ಕಸ, ಬೀದಿ ನಾಯಿ, ಪೌರ ಕಾರ್ಮಿಕರ ಸಮಸ್ಯೆ, ಕಂದಾಯ ವಿಭಾಗದಲ್ಲಿ ಲಂಚಾವತಾರ ಹೀಗೆ ಅನೇಕ ವಿಷಯಗಳ ಕುರಿತು ಚರ್ಚೆಗಳು ನಡೆದವು. ಪಾಲಿಕೆ ಸದಸ್ಯರು ಪಕ್ಷಭೇದ ಮರೆತು ತಮ್ಮ ವಾರ್ಡುಗಳಲ್ಲಿನ ಸಮಸ್ಯೆಗಳನ್ನು ಅನಾವರಣಗೊಳಿಸಿದರು.
ಇದರ ಬೆನ್ನಲ್ಲೇ ಶಿವಪಾರ್ವತಿ ಬಡಾವಣೆ ಹಾಗೂ ಖಾಸಗಿ ಬಸ್ ನಿಲ್ದಾಣದ ಹೆಸರಿನ ವಿಷಯ ಕುರಿತು ಎರಡೂ ಪಕ್ಷದ ಸದಸ್ಯರು ಪರಸ್ಪರ ವಾಗ್ವಾದ ನಡೆಸಿದರು. ತಮ್ಮದೇ ಪಕ್ಷದ ಮುಖಂಡರ ಹೆಸರುಗಳಿಗೆ ಪಟ್ಟು ಹಿಡಿದು ಕುಳಿತ ಘಟನೆಯೂ ನಡೆಯಿತು.
ಬಿ.ಹೆಚ್. ವಿನಾಯಕ ಅವರ ಅಧ್ಯಕ್ಷತೆಯಲ್ಲಿ ಮಂಗಳವಾರ ನಡೆದ ಸಾಮಾನ್ಯ ಸಭೆ ಕಾಂಗ್ರೆಸ್ ಹಾಗೂ ಬಿಜೆಪಿ ಸದಸ್ಯರ ಮಾತಿನ ಕಾಳಗದಿಂದಲೇ ಆರಂಭವಾಯಿತು. 11 ಗಂಟೆಗೆ ಸಭೆ ನಿಗದಿಯಾಗಿತ್ತು. ಆಯುಕ್ತರು ಹಾಗೂ ಅಧಿಕಾರಿಗಳು ಸಮಯಕ್ಕೆ ಸರಿಯಾಗಿ ಆಗಮಿಸಿದ್ದರು. ನಂತರ ಬಿಜೆಪಿ ಸದಸ್ಯರು ಹೆಚ್ಚಿನ ಸಂಖ್ಯೆಯಲ್ಲಿ, ಕಾಂಗ್ರೆಸ್ ಸದಸ್ಯರು ಕಡಿಮೆ ಸಂಖ್ಯೆಯಲ್ಲಿ ಆಗಮಿಸಿದರು.
ಕೋರಂ ಕೊರತೆಯ ಮಾತುಗಳು ಕೇಳಿ ಬಂದವು. ಪಾಲಿಕೆ ವಿಪಕ್ಷ ನಾಯಕ ಕೆ.ಪ್ರಸನ್ನಕುಮಾರ್, ಸಭೆಗೆ ಸಮಯಕ್ಕೆ ಸರಿಯಾಗಿ ಬಾರದ ಸದಸ್ಯರ ವಿರುದ್ಧ ಅಸಮಾಧಾನಗೊಂಡು, ತಡವಾಗಿ ಬರುವವರಿಗೆ ಅವಕಾಶ ನೀಡಬೇಡಿ ಎಂದಾಗ, ಕಾಂಗ್ರೆಸ್ ಸದಸ್ಯರು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದರು. ಮಾತಿನ ಚಕಮಕಿಯ ನಡುವೆಯೇ ಕೋರಂ ಕೊರತೆ ನೀಗಿ 11.40ಕ್ಕೆ ಸಭೆ ಆರಂಭವಾಯಿತು.
ಸಮಸ್ಯೆಗಳ ಕುರಿತ ಚರ್ಚೆಗಾಗಿ 1 ಗಂಟೆ ಶೂನ್ಯ ಅವಧಿ ನೀಡಲಾಗಿತ್ತಾದರೂ, 2 ಗಂಟೆವರೆಗೂ ಚರ್ಚೆಗಳು ನಡೆದವು. ನಂತರವೇ ನಡಾವಳಿಕೆ ಪ್ರಕಾರ ಚರ್ಚೆಗಳು ಆರಂಭವಾದವು.
19ನೇ ವಾರ್ಡ್ ಸದಸ್ಯ ಶಿವ ಪ್ರಕಾಶ್ ಆರ್.ಎಲ್., ನಮ್ಮ ಗಮನಕ್ಕೆ ತಾರದೆಯೇ ರೈಲ್ವೇ ಗೇಟ್ ಬಳಿ ರಸ್ತೆ ನಿರ್ಮಾಣಕ್ಕೆ ಮುಂದಾಗಿರುವುದಕ್ಕೆ ಆಕ್ಷೇಪಿಸಿದರು. ಸಾರ್ವಜನಿಕರ ಒತ್ತಾಯಕ್ಕೆ ನಿರ್ಣಯಕ್ಕೆ ಬರಲಾಗಿದೆ. ಇನ್ನೂ ಅಪ್ರೂವಲ್ ಮಾಡಿಲ್ಲ. ಸಭೆಯಲ್ಲಿ ಬೇಡ ಎಂದರೆ ಪ್ರಸ್ತಾವನೆ ಕೈ ಬಿಡುವುದಾಗಿ ಆಯುಕ್ತೆ ರೇಣುಕಾ ಹೇಳಿದರು. ವಾರ್ಡ್‌ನಲ್ಲಿ ಶೌಚಾಲಯ ನಿರ್ಮಾಣ ಮಾಡಿದ ಕಾಮಗಾರಿಗೆ ಹಣ ಬಿಡಗಡೆ ಮಾಡಿಲ್ಲ ಎಂದು ಸದಸ್ಯ ಶಿವಪ್ರಕಾಶ್ ದೂರಿದರು.
ಗಾಳಿ, ಬೆಳಕು ಇಲ್ಲದ ಸಭೆ
ಸಭೆ ನಡೆಯುವ ಸಭಾಂಗಣದಲ್ಲಿ ಗಾಳಿ, ಬೆಳಕಿನ ವ್ಯವಸ್ಥೆ ಸರಿಯಾಗಿ ಕಲ್ಪಿಸಿಲ್ಲ, ಮೈಕ್ ಸರಿಯಿಲ್ಲ ಎಂದು ಸದಸ್ಯ ಅಬ್ದುಲ್ ಲತೀಫ್ ಏರು ದನಿಯಲ್ಲಿ ಅಧಿಕಾರಿಗಳನ್ನು ತರಾಟೆಗೆ ತೆಗೆದುಕೊಂಡರು.
ದನಿಗೂಡಿಸಿದ ಎಸ್.ಟಿ. ವೀರೇಶ್, ಒಂದು ದಿನ ಮೊದಲೇ ಎಲ್ಲವನ್ನೂ ಪರೀಕ್ಷಿಸಬೇಕಿತ್ತು. ಅಧಿಕಾರಿಗಳ ವೈಫಲ್ಯ ಎದ್ದು ಕಾಣುತ್ತಿದೆ ಎಂದರು. ನಿರ್ವಹಣೆ ಪರಿಷತ್ ಕಾರ್ಯದರ್ಶಿ ಕೆಲಸವಾಗಿದ್ದು, ಶೀಘ್ರವೇ ಸರಿಪಡಿಸುವುದಾಗಿ ಆಯುಕ್ತೆ ರೇಣುಕಾ ಹೇಳಿದರು. ಎಸಿ ಕಾರ್ಯ ನಿರ್ವಹಿಸುತ್ತಿರಲಿಲ್ಲ. ಒಂದೊಂದೇ ಫ್ಯಾನ್‌ಗಳನ್ನು ಹೊರಗಡೆಯಿಂದ ತಂದು ಇಡಲಾಗುತ್ತಿತ್ತು. ಮಧ್ಯಾಹ್ನ ಊಟದ ರುಚಿ ಬಗ್ಗೆಯೂ ಕೆಲ ಸದಸ್ಯರು ಅಸಮಾಧಾನಗೊಂಡರು.
ಬಡಾವಣೆ-ಬಸ್ ನಿಲ್ದಾಣದ ಹೆಸರಿಗೆ ಜಟಾಪಟಿ
ಶಿವ ಪಾರ್ವತಿ ಬಡಾವಣೆಗೆ ಜಿ.ಮಲ್ಲಿಕಾರ್ಜುನಪ್ಪ ಹೆಸರಿಡುವ ಕುರಿತು ಪುನರ್ ಪರಿಶೀಲಿಸಲು ಸರ್ಕಾರಕ್ಕೆ ಪತ್ರ ಬರೆಯುವಂತೆ ಎ.ನಾಗರಾಜ್ ಹೇಳಿದಾಗ, ವಿಪಕ್ಷ ನಾಯಕ ಪ್ರಸನ್ನಕುಮಾರ್, ಎಸ್.ಟಿ. ವೀರೇಶ್ ಸೇರಿದಂತೆ ಬಿಜೆಪಿ ಸದಸ್ಯರು ತೀವ್ರ ವಿರೋಧ ವ್ಯಕ್ತಪಡಿಸಿದರು.
ಈಗಾಗಲೇ ಹೆಸರಿಡಲು ಸರ್ಕಾರದಿಂದ ಅನುಮೋದನೆಗೊಂಡಿದೆ. ಎಲ್ಲವೂ ನಿಯಮ ಪ್ರಕಾರವೇ ನಡೆದಿದೆ. ಆದ್ದರಿಂದ ಈ ಬಗ್ಗೆ ಚರ್ಚೆ ಅಪ್ರಸ್ತುತ ಎಂದರು. ಸಾರ್ವಜನಿಕರಿಂದ ಆಕ್ಷೇಪ ವ್ಯಕ್ತವಾದ ಹಿನ್ನೆಲೆಯಲ್ಲಿ ಪುನರ್ ಪರಿಶೀಲಿಸುವಂತೆ ನಾಗರಾಜ್ ಹೇಳಿದಾಗ, ನೀವು ಯಾವುದಕ್ಕೆ ಯಾರ ಹೆಸರು ನಾಮಕರಣ ಮಾಡಿದ್ದೀರಿ ಎಲ್ಲವನ್ನೂ ಪರಿಶೀಲನೆಗೆ ಕಳುಹಿಸೋಣ ಎಂದು ವೀರೇಶ್ ಹೇಳಿದರು. ಅನಧಿಕೃತವಾಗಿ ಹೆಸರಿಟ್ಟರೆ ಎಲ್ಲದನ್ನೂ ತೆಗೆಯಲಿ. ಅದಕ್ಕೆ ನನ್ನ ಸಹಮತ ಇದೆ ಎಂದು ನಾಗರಾಜ್ ಹೇಳಿದರು. ಈ ಕುರಿತು ಪರ-ವಿರೋಧದ ಚರ್ಚೆಗಳೂ ನಡೆದವು. ಪಾಲಿಕೆಯ ಸಭಾಂಗಣಕ್ಕೆ ಶಾಮನೂರು ಶಿವಶಂಕರಪ್ಪ ಹೆಸರಿಟ್ಟ ಕುರಿತು 1 ತಾಸಿನೊಳಗೆ ದಾಖಲೆ ನೀಡುವಂತೆ ಎಸ್.ಟಿ. ವೀರೇಶ್ ಪಟ್ಟು ಹಿಡಿದರು.
ಖಾಸಗಿ ಬಸ್ ನಿಲ್ದಾಣಕ್ಕೆ ಶಾಮನೂರು ಶಿವಶಂಕರಪ್ಪ ಹೆಸರಿಟ್ಟ ಬಗ್ಗೆಯೂ ಚರ್ಚೆ ನಡೆದು, ಕಾಂಗ್ರೆಸ್-ಬಿಜೆಪಿ ಸದಸ್ಯರು ಪರಸ್ಪರ ವಾಗ್ವಾದ ನಡೆಸಿದರು. ಕೌನ್ಸಿಲ್ ಸಭೆಯಲ್ಲಿ ತೀರ್ಮಾನಿಸಿ ಯೇ ಹೆಸರಿಡಲಾಗಿದೆ ಎಂದು ನಾಗಾಜ್ ಹೇಳಿ ದರೆ, ಈ ಕುರಿತು ಸರ್ಕಾರದ ಆದೇಶವಿದೆಯೇ? ಎಂದು ಪ್ರಸನ್ನಕುಮಾರ್ ಪ್ರಶ್ನಿಸಿದರು.
20 ಕೋಟಿ ರೂ. ಹಗರಣ: ಗೋಣೆಪ್ಪ ಆರೋಪ ಅಧಿಕಾರಿಗಳ ವರ್ತನೆಗೆ ಸದಸ್ಯರ ಆಕ್ರೋಶ
ಆಶ್ರಯ ಯೋಜನೆಯಲ್ಲಿ 20 ಕೋಟಿ ರೂ.ಗೂ ಹೆಚ್ಚು ಅವ್ಯವಹಾರ ನಡೆದಿದೆ. ಇದರಲ್ಲಿ ಭಾಗಿಯಾದವರ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಸದಸ್ಯ ಎಲ್.ಡಿ. ಗೋಣೆಪ್ಪ ಒತ್ತಾಯಿಸಿದರು. 6ನೇ ವಾರ್ಡ್ ಎಸ್.ಎಂ. ಕೃಷ್ಣ ನಗರದಲ್ಲಿ ಸರ್ವೇ ನಂ.135ರಲ್ಲಿ 7 ಜನರಿಗೆ ಆಶ್ರಯ ಮನೆ ನಿರ್ಮಾಣಕ್ಕೆ ಅಧಿಕಾರಿ ಗೋವಿಂದನಾಯ್ಕ ಪತ್ರ ಕೊಟ್ಟಿದ್ದಾರೆ. ಇದರಲ್ಲಿ ಆಯುಕ್ತರು ಹಾಗೂ ಶಾಸಕರ ಸಹಿಯೂ ಇದೆ. ಖಾತೆ ಮಾಡಿ ಖಾತಾ ಎಕ್ಸ್‌ಟ್ರಾಕ್ಟ್ ಸಹ ಕೊಡಲಾಗಿದೆ. ಇದೀಗ ಫಲಾನುಭವಿಗಳು ಮನೆ ನಿರ್ಮಿಸಲು ಹೋದಾಗ ಅಲ್ಲಿ ಜಾಗವೇ ಇಲ್ಲ ಎಂದು ಹೇಳಿದರು.
ಇದೇ ರೀತಿ ಗೋವಿಂದನಾಯ್ಕ ಅವರು ಅವ್ಯವಹಾರ ನಡೆಸಿದ್ದಾರೆ. ಪಾಲಿಕೆಯಿಂದ ಅವರ ಮೇಲೆ ಯಾವ ಕ್ರಮವನ್ನೂ ತೆಗೆದುಕೊಂಡಿಲ್ಲ ಎಂದರು. ಸದಸ್ಯ ಅಜಯ್ ಕುಮಾರ್, ಸಿಎ ಸೈಟ್‌ಗಳಿಗೂ ಇ ಸ್ವತ್ತು ಕೊಡಲಾಗಿದೆ. ಇ-ಸ್ವತ್ತು ಕೊಟ್ಟವರ ಮೇಲೆ ಕ್ರಮ ತೆಗೆದುಕೊಳ್ಳಬೇಕು ಎಂದರು.
ಪಾಲಿಕೆ ಸದಸ್ಯರು, ಆಯುಕ್ತರು ಬದಲಾಗುತ್ತಾರೆ. ಆದರೆ ಇಲ್ಲಿನ ಅಧಿಕಾರಿಗಳು ಮಾತ್ರ ಎಷ್ಟು ವರ್ಷಗಳಾದರೂ ಬದಲಾಗುವುದಿಲ್ಲ. ಕೂಡಲೇ ಎರಡು, ಮೂರು ವರ್ಷಗಳಿಗೊಮ್ಮೆ ಅಧಿಕಾರಿಗಳನ್ನು ಬದಲಿಸಿ. ಇಲ್ಲದಿದ್ದರೆ ಅವರ ಉದ್ಧಟತನ ಹೆಚ್ಚಾಗುತ್ತದೆ ಎಂದು ಆಗ್ರಹಿಸಿದರು.
ಎ.ನಾಗರಾಜ್ ಮಾತನಾಡಿ, ಪಾಲಿಕೆ ಅಧಿಕಾರಿಗಳ ಮೇಲೆ ಲೋಕಾಯುಕ್ತ ದಾಳಿ ನಡೆಯುತ್ತಿದೆ ಎಂದರೆ ಅದು ದಾವಣಗೆರೆಗೇ ಅವಮಾನ. ಅಂತಹ ಅಧಿಕಾರಿಗಳ ಮೇಲೆ ಏನು ಕ್ರಮ ಕೈಗೊಂಡಿದ್ದೀರಿ? ಎಂದು ಆಯುಕ್ತರನ್ನು ಪ್ರಶ್ನಿಸಿದರು. ಕಳೆದ ಎರಡ್ಮೂರು ವರ್ಷಗಳಿಂದ ನಕಲಿಯಾಗಿ ಸ್ವತ್ತುಗಳನ್ನು ಕೊಡಲಾಗಿದೆ ಎಂದಾಗ, ವಿಪಕ್ಷ ನಾಯಕ ಪ್ರಸನ್ನ ಕುಮಾರ್ ಆಕ್ಷೇಪಿಸಿದರು.
ರೆವಿನ್ಯೂ ಇನ್‌ಸ್ಪೆಕ್ಟರ್ ತಿಮ್ಮರಾಜು ಸದಸ್ಯರ ಬಗ್ಗೆ ಕೇವಲವಾಗಿ ಮಾತನಾಡುತ್ತಾರೆ ಎಂದು ಆರೋಪಿಸಿದಾಗ, ಮತ್ತೋರ್ವ ಸದಸ್ಯ ಬಿ.ಜಿ. ಅಜಯ್ ಕುಮಾರ್, ಅವರ ಮೇಲೆ ಕ್ರಮ ತೆಗೆದುಕೊಳ್ಳುವ ಅಧಿಕಾರಿ ಆಯುಕ್ತರಿಗಿದ್ದು, ಕ್ರಮಕ್ಕೆ ಆಗ್ರಹಿಸಿದರು. 5 ವರ್ಷ ಮೇಲ್ಪಟ್ಟು ಕಾರ್ಯನಿರ್ವಹಿಸುತ್ತಿರುವ ಅಧಿಕಾರಿಗಳನ್ನು ವರ್ಗಾವಣೆ ಮಾಡುವಂತೆ ಸರ್ಕಾರಕ್ಕೆ ಪತ್ರ ಬರೆಯುವಂತೆ ಮೇಯರ್ ಅವರಿಗೆ ಮನವಿ ಮಾಡಿದರು.
ಪೌರ ಕಾರ್ಮಿಕರ ನೇಮಕಕ್ಕೆ ಬೇಕು 10 ಕೋಟಿ
ನಗರದಲ್ಲಿ 740 ಜನರಿಗೆ ಒಬ್ಬರು ಪೌರ ಕಾರ್ಮಿಕರನ್ನು ನೇಮಿಸಿಕೊಳ್ಳಬಹುದು. ಈ ವರ್ಷ 50 ಜನರು ನಿವೃತ್ತಿ ಹೊಂದಿದ್ದಾರೆ. ಪ್ರಸ್ತುತ 450 ಜನ ಕಾರ್ಮಿಕರಿದ್ದಾರೆ. 300 ಜನರ ನೇಮಕಕ್ಕೆ ಜಿಲ್ಲಾಧಿಕಾರಿಗಳಿಂದ ಅನುಮತಿ ಪಡೆದು ಟೆಂಡರ್ ಕರೆಯಬೇಕಿದೆ ಎಂದು ಆಯುಕ್ತರಾದ ರೇಣುಕಾ ಹೇಳಿದರು. ಪೌರ ಕಾರ್ಮಿಕರಿಗೆ ವಿಶೇಷ ಭತ್ಯೆ ಸೇರಿ ಮಾಸಿಕ ಕನಿಷ್ಟ 22 ಸಾವಿರ ರೂ. ಪಾವತಿಸಬೇಕಾಗುತ್ತದೆ. ಕನಿಷ್ಟ 10 ಕೋಟಿ ರೂ. ಬೇಕಾಗುತ್ತದೆ ಪಾಲಿಕೆಯ ಆರ್ಥಿಕ ಸ್ಥಿತಿ-ಗತಿ ನೋಡಿ ನೇಮಿಸಿಕೊಳ್ಳಬೇಕಾಗುತ್ತದೆ ಎಂದರು. ಮೇಯರ್ ವಿನಾಯಕ್, 300 ಜನರನ್ನು ನೇಮಿಸಿಕೊಳ್ಳುವಂತೆ ಸೂಚಿಸಿದರು.
ಹಕ್ಕುಪತ್ರ ಏಕೆ ವಿತರಿಸಿಲ್ಲ: ಕೆ.ಎಂ. ವೀರೇಶ್
33ನೇ ವಾರ್ಡ್ ಸದಸ್ಯ ಕೆ.ಎಂ. ವೀರೇಶ್ ಮಾತನಾಡುತ್ತಾ, ನನ್ನ ವಾರ್ಡ್‌ನಲ್ಲಿ ನಿವೇಶನಗಳ ಹಕ್ಕುಪತ್ರ ಅನುಮೋದನೆಗೊಂಡಿದ್ದರೂ ವಿತರಿಸುತ್ತಿಲ್ಲ ಎಂದು ದಾಖಲೆ ಸಹಿತ ಆರೋಪಿಸಿದರು.
ನಿವಾಸಿಗಳು ನಿತ್ಯವೂ ಮನೆ ಬಾಗಿಲಿಗೆ ಬರುತ್ತಿದ್ದಾರೆ. ಉತ್ತರಿಸುವುದೇ ಕಷ್ಟವಾಗಿದೆ ಎಂದರು. ಹಕ್ಕುಪತ್ರ ನೀಡದಿರಲು ಕಾರಣ ಕೇಳಿದರೆ ಮೇಯರ್ ಹಾಗೂ ಆಯುಕ್ತರು ಉತ್ತರಿಸುತ್ತಿಲ್ಲ. ಲೋಕಾಯುಕ್ತರಿಂದ ನೋಟೀಸ್ ಏನಾದರೂ ಬಂದಿದ್ದರೆ ತೋರಿಸಿ ಎಂದು ವೀರೇಶ್ ಸಭೆಯಲ್ಲಿ ಹೇಳಿದರು.
ಮಾರ್ಚ್‌ನಲ್ಲಿಯೇ ಅನುಮೋದನೆಗೊಂಡು ಹಕ್ಕುಪತ್ರ ಬಂದಿದ್ದರೂ ಏಕೆ ವಿತರಣೆಯಾಗಿಲ್ಲ? ಎಂದು ಪ್ರಸನ್ನಕುಮಾರ್ ಪ್ರಶ್ನಿಸಿದರು.
ಹಕ್ಕುಪತ್ರ ವಿತರಣೆಯಲ್ಲಿ ಭ್ರಷ್ಟಾಚಾರ ನಡೆದಿದೆ ಎಂದು ಲೋಕಾಯುಕ್ತರಿಗೆ ದೂರು ಹೋಗಿದ್ದ ಹಿನ್ನೆಲೆಯಲ್ಲಿ ಅವರ ಸೂಚನೆ ಮೇರೆಗೆ ಹಕ್ಕು ಪತ್ರ ವಿತರಿಸುತ್ತಿಲ್ಲ ಎಂದರು. ಪಾಲಿಕೆ ವ್ಯಾಪ್ತಿಯ ಸಾರ್ವಜನಿಕ ಉದ್ಯಾನವನ ಹಾಗೂ ರಸ್ತೆಯಲ್ಲಿ 2009ಕ್ಕಿಂತ ಮುಂಚೆ ನಿರ್ಮಿತವಾದ ದೇವಸ್ಥಾನಗಳನ್ನು ಅಧಿಕೃತಗೊಳಿಸಲು ಪ್ರಸ್ತಾವನೆ ಸಲ್ಲಿಸಲಾಗಿತ್ತು. ಆದರೆ ಚರ್ಚ್ ಹಾಗೂ ಮಸೀದಿಗಳ ಬಗ್ಗೆ ಏಕೆ ಪ್ರಸ್ತಾಪಿಸಿಲ್ಲ ? ಎಂದು ಕೆ.ಎಂ. ವೀರೇಶ್ ಇದೇ ವೇಳೆ ಪ್ರಶ್ನಿಸಿದರು.
ಉಮಾ ಪ್ರಕಾಶ್, ತಮ್ಮ ವಾರ್ಡ್‌ನ ಎರಡು ಕಾಮಗಾರಿ ರದ್ದು ಮಾಡಿದ್ದಕ್ಕೆ ಅಸಮಾಧಾನ ವ್ಯಕ್ತಪಡಿಸಿ, ಮರು ಟೆಂಡರ್‌ಗೆ ಎರಡು ವರ್ಷಗಳು ಬೇಕೇ? ಎಂದು ಪ್ರಶ್ನಿಸಿದರು. ಕೇವಲ 15 ಲಕ್ಷ ಅನುದಾನವನ್ನು ನನ್ನ ವಾರ್ಡ್‌ಗೆ ಕೊಡಲಾಗಿದೆ. ಯಾವ ಕೆಲಸವೂ ನಡೆಯದೇ ಜನರು ನಮ್ಮನ್ನು ಪ್ರಶ್ನಿಸುತ್ತಿದ್ದಾರೆ ಎಂದರು.
ಹಿರಿಯ ಸದಸ್ಯ ಚಮನ್ ಸಾಬ್, 50 ವರ್ಷಗಳ ಹಿಂದಿನ ಆಸ್ತಿಗಳನ್ನು ಇ-ಖಾತೆ ಮಾಡಿಸುವಾಗ ಏನಾದರೂ ದಾಖಲೆ ವ್ಯತ್ಯಾಸವಾಗಿದ್ದರೆ, ಲಕ್ಷಗಟ್ಟಲೆ ಲಂಚ ಕೇಳುತ್ತಾರೆ ಎಂದು ಆರೋಪಿಸಿದರು. ಕೆ.ಪ್ರಸನ್ನಕುಮಾರ್ ಮಾತನಾಡಿ, ಇ ಆಸ್ತಿ ಕುರಿತು ಜನರಲ್ಲಿ ಭಯ ತುಂಬಿದ್ದಾರೆ. 7 ದಿನದೊಳಗೆ ಇ-ಖಾತೆ ಮಾಡಿಕೊಡದಿದ್ರೆ ಕ್ರಮ ತೆಗೆದುಕೊಳ್ಳಿ ಎಂದರು. ಅರ್ಜಿ ನೀಡಿದಾಗ ಟಪಾಲು ವಿಭಾಗದಲ್ಲಿಯೇ ಎಲ್ಲಾ ದಾಖಲೆ ಪರಿಶೀಲಿಸಬೇಕು. ಮೂರ್ನಾಲ್ಕು ತಿಂಗಳು ಅಲೆದಾಡಿಸಬಾರದು ಎಂದು ನಾಗರಾಜ್ ಹೇಳಿದರು.
ಖಾಸಗಿ ಬಸ್ ನಿಲ್ದಾಣವನ್ನು ಸ್ಥಳಾಂತರಿಸುವ ಕುರಿತು ಪ್ರಸನ್ನಕುಮಾರ್ ಚರ್ಚಿಸಿದಾಗ, ಕಾಂಗ್ರೆಸ್ ಸದಸ್ಯರು ಬಸ್ ನಿಲ್ದಾಣ ಅವೈಜ್ಞಾನಿಕವಾಗಿದೆ ಎಂದರು. ಬಿಜೆಪಿ ಸದಸ್ಯರು 14 ಬಸ್ ನಿಲ್ಲಲು ಅವಕಾಶವಿದೆ. ಅವೈಜ್ಞಾನಿಕವಾಗಿಲ್ಲ ಎಂದು ಸಮರ್ಥಿಸಿಕೊಂಡರು.
ಸದಸ್ಯ ಶಿವಾನಂದ, ನೀರಿನ ಸಮಸ್ಯೆ ಹೆಚ್ಚಾಗುತ್ತಿದ್ದು, ಬಿ ಟೀಮ್ ರಚಿಸಿ ಸೂಕ್ತ ಮಾರ್ಗೋಪಾಯ ಕಂಡುಕೊಳ್ಳಬೇಕು. ಎಇಇ ತೀವ್ರ ನಿರ್ಲಕ್ಷ್ಯ ವಹಿಸುತ್ತಿದ್ದಾರೆ ಎಂದು ದೂರಿದರು. ಸದಸ್ಯ ಕೆ.ಎಂ. ವೀರೇಶ್, ಇಂಜಿನಿಯರ್ ಸೌಜನ್ಯದಿಂದ ವರ್ತಿಸುತ್ತಿಲ್ಲ. ಏನಾದರೂ ಪ್ರಶ್ನಿಸಿದರೆ ಹೊಡೆದಾಡಲು ಬರು ವಂತೆ ವರ್ತಿಸುತ್ತಾರೆ ಎಂದರು. ಸದಸ್ಯ ಎ.ನಾಗರಾಜ್, ಪಾಲಿ ಕೆಯ ಝೋನಲ್ ಆಫೀಸ್‌ಗಳಿಂದ ಸಾರ್ವಜನಿಕರಿಗೆ ಅನುಕೂ ಲವಾಗಿಲ್ಲ ಎಂದಾಗ, ಅಬ್ದುಲ್ ಲತೀಫ್ ದನಿಗೂಡಿಸಿದರು.
ಪಾಲಿಕೆಯಲ್ಲಿ ಮೇಯರ್ ಮಾತು ನಡೆಯುವುದಿಲ್ಲ. ಕಾಂಗ್ರೆಸ್ ಪರವಾದ ಕೆಲಸಗಳು ಮಾತ್ರ ಬೇಗ ಆಗುತ್ತವೆ ಎಂದು ಹೊರಗಿನಿಂದ ವರದಿಗಳು ಬರುತ್ತಿವೆ ಎಂದು ಅಜಯ್ ಕುಮಾರ್ ಹೇಳಿದಾಗ, ಎ.ನಾಗರಾಜ್ ಹಾಗೂ ಗಡಿಗುಡಾಳ್ ಮಂಜುನಾಥ್ ಆಕ್ಷೇಪಿಸಿದರು. ಸ್ಮಾರ್ಟ್ ಸಿಟಿಗೆ ನಾಮ ನಿರ್ದೇಶಿತ ಸದಸ್ಯರನ್ನು ನೇಮಿಸುವ ಕುರಿತು ಸುದೀರ್ಘ ಚರ್ಚೆ ನಡೆಯಿತು.
28 ಲಕ್ಷ ಬೆಸ್ಕಾಂ ಬಾಕಿ: ಬೆಸ್ಕಾಂ ನವರು 28 ಲಕ್ಷ ರೂ. ಪಾಲಿಕೆಗೆ ನೀಡಬೇಕಾದ ಬಾಕಿ ಉಳಿಸಿಕೊಂಡಿದ್ದಾರೆ. ನಾವು ವಿದ್ಯುತ್ ಬಿಲ್ ಕಟ್ಟುವುದು ತಡವಾದರೆ ದಂಡ ಹಾಕುತ್ತಾರೆ ಎಂದು ಆಯುಕ್ತೆ ರೇಣುಕಾ ಹೇಳಿದರು. ಮರದ ಕೊಂಬೆಗಳನ್ನು ಕಡಿದು ಸಾಗಿಸದ ಬೆಸ್ಕಾಂ ವಿರುದ್ಧ ಕ್ರಮ ತೆಗೆದುಕೊಳ್ಳುವ ಎಚ್ಚರಿಕೆ ನೀಡಲಾಯಿತು.
ಇಸ್ರೋಗೆ ಅಭಿನಂದನೆ: ಸಭೆಯ ಆರಂಭದಲ್ಲಿ ಚಂದ್ರಯಾನ-3ರ ಯಶಸ್ಸಿಗೆ ಕಾರಣರಾದ ಇಸ್ರೋ ಸಂಸ್ಥೆಯ ಅಧಿಕಾರಿ-ಸಿಬ್ಬಂದಿಗಳಿಗೆ ಪಾಲಿಕೆ ಸಾಮಾನ್ಯ ಸಭೆಯಲ್ಲಿ ಚಪ್ಪಾಳೆ ಮೂಲಕ ಅಭಿನಂದಿಸಿ, ಅಭಿನಂದನಾ ಪತ್ರವನ್ನು ಇಸ್ರೋ ಮುಖ್ಯಸ್ಥರಿಗೆ ಕಳುಹಿಸಲು ತೀರ್ಮಾನಿಸಲಾಯಿತು.
ಸಭೆಯಲ್ಲಿ ಉಪ ಮೇಯರ್ ಯಶೋಧ ಹೆಗ್ಗಪ್ಪ, ಸ್ಥಾಯಿ ಸಮಿತಿ ಸದಸ್ಯರು, ಸದಸ್ಯರು, ಅಧಿಕಾರಿಗಳು ಉಪಸ್ಥಿತರಿದ್ದರು.