ದಾವಣಗೆರೆ, ನ. 24- ಎಲ್ಲಾ ವರ್ಗದ ಜನತೆಯನ್ನೂ ಸೇರಿಸಿಕೊಂಡು `ಸಬ್ ಕಾ ಸಾತ್, ಸಬ್ ಕಾ ವಿಕಾಸ್’ ಪರಿಕಲ್ಪನೆಯಡಿ ಪಕ್ಷವನ್ನೂ ಬೆಳೆಸುವ ನಿಟ್ಟಿನಲ್ಲಿ ರಾಜ್ಯಾದ್ಯಂತ ಪ್ರಕೋಷ್ಠಗಳನ್ನು ರಚಿಸಲಾಗುತ್ತಿದೆ ಎಂದು ಬಿಜೆಪಿ ರಾಜ್ಯ ಘಟಕದ ಅಧ್ಯಕ್ಷ ನಳಿನ್ ಕುಮಾರ್ ಕಟೀಲ್ ಹೇಳಿದರು.
ನಗರದ ಹೊರ ವಲಯದಲ್ಲಿರುವ ಅಪೂರ್ವ ರೆಸಾರ್ಟ್‌ನಲ್ಲಿ ಮಂಗಳವಾರ ರಾಜ್ಯ ಪ್ರಕೋಷ್ಠಗಳ ಸಂಚಾಲಕರು ಹಾಗೂ ಸಹ ಸಂಚಾಲಕರ ಸಭೆಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.
ವೈದ್ಯರು, ಶಿಕ್ಷಕರು, ಉದ್ಯಮಶೀಲರು, ವ್ಯಾಪಾರಿಗಳು, ವಕೀಲರು ಹೀಗೆ 20 ಪ್ರಕೋಷ್ಠಗಳ ಘೋಷಣೆಯಾಗಿದೆ. ಈ ಸಂಖ್ಯೆ ಇನ್ನೂ ಹೆಚ್ಚಾಗಲಿದೆ. ಭಾರತೀಯ ಜನತಾ ಪಕ್ಷವು ಕೆಳ ಹಂತದವರೆಗೂ ತಲುಪಲು ಮನೆ-ಮನೆಗಳಲ್ಲಿ ಪಕ್ಷದ ವಿಚಾರಧಾರೆಗಳನ್ನು ಗಟ್ಟಿಯಾಗಿಸಲು ಪ್ರಕೋಷ್ಠಗಳ ರಚನೆ ಅಗತ್ಯವಿದೆ ಎಂದು ಅವರು ಪ್ರತಿಪಾದಿಸಿದರು.
ಆತ್ಮನಿರ್ಬರ್ ಭಾರತ್ ಪರಿಕಲ್ಪನೆಯಡಿ ಎಲ್ಲಾ ಕ್ಷೇತ್ರಗಳಲ್ಲೂ ಉದ್ಯಮ ಶೀಲತೆ ಬೆಳೆಸುವ ಮೂಲಕ ಉದ್ಯೋಗ ಸೃಷ್ಟಿಸುವ ಕಾರ್ಯಗಳನ್ನು ಮಾಡಲು ಪ್ರಕೋಷ್ಠಗಳ ರಚನಾ ಸಭೆಗಳನ್ನು ಇದೇ ಪ್ರಥಮ ಬಾರಿಗೆ ದಾವಣಗೆರೆಯಲ್ಲಿ ಆರಂಭಿಸಲಾಗುತ್ತಿದೆ ಎಂದು ಹೇಳಿದರು.
ಬಿಜೆಪಿ ಅಧಿಕಾರಕ್ಕಾಗಿ ಸೃಷ್ಟಿಯಾದ ಪಕ್ಷವಲ್ಲ. ಪರಿವರ್ತನೆಯ ಗುರಿ ರಾಷ್ಟ್ರಧರ್ಮ ವನ್ನು ಪಕ್ಷದ ಕಾರ್ಯಕರ್ತರು ಹೊಂದಿದ್ದಾರೆ. ರಾಜಕಾರಣಿಗೆ ರಾಜಕಾರಣ ಹಾಗೂ ಸಮಾಜ ಸೇವಾ ಮನೋಭಾವ ಎರಡೂ ಇರಬೇಕು. ಸಮಾಜದ ಸಂಕಷ್ಟಗಳಿಗೆ ಧ್ವನಿಯಾಗದವ ಉತ್ತಮ ರಾಜಕಾರಣಿಯಲ್ಲ. ಹಾಗಾಗಿ ಸಮಾಜ ಸೇವೆಯ ಮೂಲಕ ರಾಜಕಾರಣ ನಮ್ಮ ಪಕ್ಷದ ಚಿಂತನೆಯಾಗಿದೆ ಎಂದರು.
`ಸಬ್ ಕಾ ಸಾತ್, ಸಬ್ ಕಾ ವಿಕಾಸ್’ ಪರಿಕಲ್ಪನೆಯಡಿ ಪಕ್ಷವನ್ನೂ ಬೆಳೆಸುವ ನಿಟ್ಟಿನಲ್ಲಿ ರಾಜ್ಯಾದ್ಯಂತ ಪ್ರಕೋಷ್ಠಗಳ ರಚನೆ
– ನಳಿನ್ ಕುಮಾರ್ ಕಟೀಲ್, ಬಿಜೆಪಿ ರಾಜ್ಯ ಘಟಕದ ಅಧ್ಯಕ್ಷ
ನಾಯಕತ್ವದ ಬದಲಾವಣೆ ಇಲ್ಲ
ದಾವಣಗೆರೆ, ನ. 24- ಸಂಪುಟ ವಿಸ್ತರಣೆ ಅಥವಾ ಪುನರ್ ರಚನೆ ಬಗ್ಗೆ ಗೊಂದಲಗಳಿಲ್ಲ. ನಾಯಕತ್ವದ ಬದಲಾವಣೆಯ ಚರ್ಚೆಯೇ ಇಲ್ಲ ಎಂದು ಬಿಜೆಪಿ ರಾಜ್ಯ ಘಟಕದ ಅಧ್ಯಕ್ಷ ನಳಿನ್ ಕುಮಾರ್ ಕಟೀಲ್ ಸ್ಪಷ್ಟಪಡಿಸಿದರು.
ಮಂಗಳವಾರ ಪತ್ರಕರ್ತರೊಂದಿಗೆ ಮಾತನಾಡಿದ ಅವರು,
ಮುಂದಿನ ಪೂರ್ಣ ಅವಧಿಯನ್ನು ಯಡಿಯೂರಪ್ಪ ನಿರ್ವಹಿಸಲಿದ್ದಾರೆ ಎಂದು ಹೇಳಿದರು. ಪುನರ್ ರಚನೆ ಬಗ್ಗೆ ಈಗಾಗಲೇ ಯಡಿಯೂರಪ್ಪ ನವರು ಕೇಂದ್ರದ ನಾಯಕರೊಂದಿಗೆ ಚರ್ಚಿಸಿದ್ದಾರೆ. ಪುನರ್ ರಚನೆ ಬಗ್ಗೆ ಕಾದು ನೋಡಿ ಎಂದ ಕಟೀಲ್, ವೀರಶೈವ ಅಭಿವೃದ್ಧಿ ನಿಗಮ ಸ್ಥಾಪ ನೆಗೆ ಹಾಗೂ ಅನುದಾನ ನೀಡಲು ಬೇಡಿಕೆ ಇತ್ತು. ಮುಖ್ಯಮಂತ್ರಿ ಗಳು ತೀರ್ಮಾನ ತೆಗೆದುಕೊಂಡಿದ್ದಾರೆ ಎಂದು ಪ್ರಶ್ನೆಯೊಂದಕ್ಕೆ ಉತ್ತರಿಸಿದರು.
ಗುರಿ, ದಾರಿ ಎರಡನ್ನೂ ಮರೆತ ಕಾಂಗ್ರೆಸ್
ಕಾಂಗ್ರೆಸ್ ಇಂದು ತನ್ನ ಗುರಿ ಹಾಗೂ ದಾರಿ ಎರಡನ್ನೂ ಮರೆತಿದೆ. ಆದರೆ ಬಿಜೆಪಿ ತಾನಿಟ್ಟ ಗುರಿಯ ದಾರಿಯಲ್ಲಿಯೇ ಸಾಗುತ್ತಿದೆ ಎಂದು ಬಿಜೆಪಿ ರಾಜ್ಯ ಘಟಕದ ಅಧ್ಯಕ್ಷ ನಳಿನ್ ಕುಮಾರ್ ಕಟೀಲ್ ಹೇಳಿದರು.
ದೀನ್ ದಯಾಳ್ ಉಪಾಧ್ಯಾಯರ ಕಟ್ಟ ಕಡೆ ವ್ಯಕ್ತಿಗೂ ನ್ಯಾಯ ಸಿಗಬೇಕೆಂಬ ಅಂತ್ಯೋದಯ ಪರಿಕಲ್ಪನೆ ಹಾಗೂ ಶಾಮ್ ಪ್ರಸಾದ್ ಮುಖರ್ಜಿಯವರ ಒಂದೇ ದೇಶ, ಒಂದೇ ಸಂವಿಧಾನ ಚಿಂತನೆಗಳು 74 ವರ್ಷಗಳ ಸುದೀರ್ಘ ರಾಜಕೀಯ ಪಯಣದ ನಂತರ ಈಡೇರಿವೆ.
ಬಿಜೆಪಿ ತನ್ನ ಗುರಿ ಹಾಗೂ ದಾರಿ ಮರೆತಿಲ್ಲ ಎಂಬುದಕ್ಕೆ ಇವೇ ಕಾರಣ ಎಂದು ಹೇಳಿದರು. ಕಾಂಗ್ರೆಸ್ ಅಧಿಕಾರ ಸಿಕ್ಕಾಗ ಭ್ರಷ್ಟಾಚಾರ ನಡೆಸಿತು. ರಾಷ್ಟ್ರ ಚಿಂತನೆ ಮರೆಯಿತು. ಕುಟುಂಬ ರಾಜಕಾರಣದಲ್ಲಿ ತಲ್ಲೀನರಾದರು. ಇದು ಪಕ್ಷಕ್ಕೆ ಮುಳುವಾಯಿತು. ಕೊನೆಗೆ ವಿರೋಧ ಪಕ್ಷವಾಗಿ ಕುಳಿತುಕೊಳ್ಳುವ ಅರ್ಹತೆಯನ್ನೂ ಕಳೆದುಕೊಂಡಿತು ಎಂದು ಕಟೀಲ್ ಕುಟುಕಿದರು.
ಲೈಟ್ ಕಂಬ ನಿಲ್ಸಿದ್ರೂ ಕಾಂಗ್ರೆಸ್ ಗೆಲ್ತಿದ್ದ ಸಮಯ ಬದಲಾಗಿದೆ
ಇಂದಿರಾಗಾಂಧಿಯವರ ಕಾಲಘಟ್ಟದಲ್ಲಿ `ಚುನಾವಣೆಗೆ ಕಾಂಗ್ರೆಸ್‌ನಿಂದ ಲೈಟ್ ಕಂಬ ನಿಲ್ಲಿಸಿದರೂ ಗೆಲ್ಲುತ್ತೆ’ ಎಂಬ ಮಾತುಗಳಿದ್ದವು. 90ರ ದಶಕದಲ್ಲಿ ಕಾಂಗ್ರೆಸ್‌ನಲ್ಲಿ 1,800 ಶಾಸಕರಿದ್ದರು. ಬಿಜೆಪಿ ಶಾಸಕರು 100 ಮಾತ್ರ. ಇಂದು ಬಿಜೆಪಿಯಿಂದ ಗೆದ್ದ ಶಾಸಕರ ಸಂಖ್ಯೆ 1,800. ಕಾಂಗ್ರೆಸ್ ಶಾಸಕರು 700 ಮಾತ್ರ. ಅಂದು 1,100 ಕಾಂಗ್ರೆಸ್ ಶಾಸಕರು ಹೆಚ್ಚಾಗಿದ್ದರು. ಇಂದು ಅಷ್ಟೇ ಸಂಖ್ಯೆಯ ಬಿಜೆಪಿ ಶಾಸಕರು ಹೆಚ್ಚಾಗಿದ್ದಾರೆ.
ವ್ಯಕ್ತಿಗಿಂತ ಪಕ್ಷವೇ ಶ್ರೇಷ್ಠ ಎಂಬ ಚಿಂತನೆ, ಸಂಘಟನಾತ್ಮಕ ಕಾರ್ಯಗಳಿಂದಾಗಿ ಬಿಜೆಪಿ ಇಂದು ಬೃಹತ್ ಪಕ್ಷವಾಗಿ ಬೆಳೆದಿದೆ ಎಂದು ನಳಿನ್ ಕುಮಾರ್ ಕಟೀಲ್ ಹೇಳಿದರು.
ಜಗತ್ತೊಂದೇ ಭಾರತ ನಿರ್ಮಾಣಕ್ಕೆ ಎಲ್ಲರನ್ನೂ ಜೋಡಿಸಿಕೊಂಡು ಹೋಗ ಬೇಕಿದೆ. ಪ್ರಕೋಷ್ಠ ರಾಜಕಾರಣದ ಬಾಗಿಲು. ರಾಜ್ಯದಲ್ಲಿ ಈಗಾಗಲೇ 90 ಸಾವಿರ ಕಾರ್ಯಕರ್ತರಿಗೆ ಪ್ರಕೋಷ್ಠದ ಮೂಲಕ ಪಕ್ಷದ ಜವಾಬ್ದಾರಿಗಳು ದೊರೆತಿವೆ. ರಾಜ್ಯದ ಪ್ರಕೋಷ್ಠದ ಚಿಂತ ನೆಗೆ ರಾಷ್ಟ್ರೀಯ ಮಟ್ಟದಲ್ಲಿ ಮನ್ನಣೆ ದೊರತಿದೆ ಎಂದು ಹರ್ಷ ವ್ಯಕ್ತಪಡಿಸಿದ ಕಟೀಲ್, ಪ್ರಕೋಷ್ಠಗಳ ರಚನೆಯಿಂದ ಪಕ್ಷದ ಸಂಘಟನಾ ಶಕ್ತಿ ಮತ್ತಷ್ಟು ವೃದ್ಧಿಸಲಿದೆ ಎಂದು ಹೇಳಿದರು.
ಕಾರ್ಯಕ್ರಮ ಉದ್ಘಾಟಿಸಿದ ಸಂಸದ ಜಿ.ಎಂ. ಸಿದ್ದೇಶ್ವರ್, ಪ್ರಕೋಷ್ಠಗಳ ರಚನೆ ಮೂಲಕ ಮುಂದಿನ ದಿನಗಳಲ್ಲಿ ಸ್ಥಳೀಯ ಸಂಸ್ಥೆಗಳ ಚುನಾವಣೆ ಸೇರಿದಂತೆ ಎಲ್ಲಾ ಚುನಾವಣೆಗಳಲ್ಲೂ ಬಿಜೆಪಿ ಮತ್ತಷ್ಟು ಪ್ರಜ್ವಲಿಸಲು ಸಹಾಯಕವಾಗಲಿದೆ ಎಂದು ಹೇಳಿದರು.
ಶಾಸಕ ಎಸ್.ಎ. ರವೀಂದ್ರನಾಥ್, ಮುಂದಿನ ದಿನಗಳಲ್ಲಿ ರಾಜ್ಯದಲ್ಲಿ ಬಿಜೆಪಿಗೆ ಸ್ಪಷ್ಠ ಬಹುಮತ ಬರಲು ಪ್ರಕೋಷ್ಠಗಳು ಸಹಕಾರಿಯಾಗಲಿ ಎಂದು ಆಶಿಸಿದರು. ರಾಜ್ಯ ಪ್ರಕೋಷ್ಠಗಳ ಸಂಯೋಜಕ ಭಾನುಪ್ರಕಾಶ್ ಪ್ರಾಸ್ತಾವಿಕವಾಗಿ ಮಾತನಾಡಿದರು.
ಪಕ್ಷದ ಸಂಘಟನಾ ಪ್ರಧಾನ ಕಾರ್ಯದರ್ಶಿ ಅರುಣ್ ಕುಮಾರ್ ಜಿ., ಜಗಳೂರು ಶಾಸಕ ಎಸ್.ವಿ. ರಾಮಚಂದ್ರ, ಮಾಯಕೊಂಡ ಶಾಸಕ ಪ್ರೊ.ಲಿಂಗಣ್ಣ, ಚನ್ನಗಿರಿ ಶಾಸಕ ಮಾಡಾಳು ವಿರೂಪಾಕ್ಷಪ್ಪ, ಹೊನ್ನಾಳಿ ಶಾಸಕ ಎಂ.ಪಿ. ರೇಣುಕಾಚಾರ್ಯ, ಮಹಾನಗರ ಪಾಲಿಕೆ ಮೇಯರ್ ಬಿ.ಜಿ. ಅಜಯ್ ಕುಮಾರ್ ಉಪಸ್ಥಿತರಿದ್ದರು.
ಬಿಜೆಪಿ ಜಿಲ್ಲಾಧ್ಯಕ್ಷ ಎಸ್.ಎಂ. ವೀರೇಶ್ ಹನಗವಾಡಿ ಸ್ವಾಗತಿಸಿದರು. ಮಾಜಿ ಮುಖ್ಯ ಸಚೇತಕ ಡಾ.ಎ.ಹೆಚ್. ಶಿವಯೋಗಿಸ್ವಾಮಿ ನಿರೂಪಿಸಿದರು. ಸಹನಾ ಮಂಜುನಾಥ್ ವಂದೇ ಮಾತರಂ ಗೀತೆ ಹಾಡಿದರು.