ಘಟಿಕೋತ್ಸವದ ದಿನದಂದೇ ಕುಲಪತಿ ಹಲಸೆಗೆ ಕೊರೊನಾ

ವಿ.ವಿ. ಕುಲಪತಿ ಪ್ರೊ. ಎಸ್.ವಿ. ಹಲಸೆ ಅವರು ಘಟಿಕೋತ್ಸವದ ದಿನವೇ ಕೊರೊನಾ ಸೋಂಕಿಗೆ ಒಳಗಾಗಿದ್ದಾರೆ.

ಕೊನೆ ಕ್ಷಣದವರೆಗೂ ಅವರು ಘಟಿಕೋತ್ಸವ ಸಿದ್ಧತೆಯಲ್ಲಿ ಭಾಗಿಯಾ ಗಿದ್ದರು. ಮಂಗಳವಾರವಷ್ಟೇ ಪತ್ರಿಕಾ ಗೋಷ್ಠಿಯಲ್ಲಿ ಘಟಿಕೋತ್ಸವದ ವಿವರ ಗಳನ್ನು ಹಂಚಿಕೊಂಡಿದ್ದರು. ಆದರೆ, ಬುಧವಾರ ಬೆಳಿಗ್ಗೆ ಅವರಿಗೆ ಕೊರೊನಾ ಸೋಂಕಿರುವುದು ಕಂಡು ಬಂದಿದೆ.

ಹಲಸೆ ಆನ್‌ಲೈನ್ ಮೂಲಕವೇ ಘಟಿಕೋತ್ಸವದ ಸ್ವಾಗತ ಭಾಷಣ ಮಾಡಿದರು. ಆನ್‌ಲೈನ್ ಮೂಲಕ ಭಾಷಣ ಮಾಡಿದ ಕುರಿತು ಪತ್ರಕರ್ತರು ದೂರವಾಣಿಯಲ್ಲಿ ಸಂಪರ್ಕಿಸಿದಾಗ ಅವರು, ಕೊರೊನಾ ಸೋಂಕು ದೃಢಪಟ್ಟ ಕಾರಣದಿಂದಾಗಿ ಸಮಾರಂಭದಿಂದ ದೂರವಿರಬೇಕಾಯಿತು ಎಂದು ಸ್ಪಷ್ಟಪಡಿಸಿದರು.

ಘಟಿಕೋತ್ಸವದ ಮುಖ್ಯ ಅತಿಥಿಯಾದ ಇಸ್ರೋ ಮಾಜಿ ಅಧ್ಯಕ್ಷ ಎ.ಎಸ್. ಕಿರಣ್ ಕುಮಾರ್ ಅವರೂ ಸಹ ಆನ್‌ಲೈನ್ ಮೂಲಕವೇ ತಮ್ಮ ಭಾಷಣ ಮಾಡಿದರು.

ಘಟಿಕೋತ್ಸವಕ್ಕೆ ರಾಜ್ಯಪಾಲ ವಜುಭಾಯಿ ರುಡಾಭಾಯಿ ವಾಲಾ, ಉಪ ಮುಖ್ಯಮಂತ್ರಿ ಹಾಗೂ ಉನ್ನತ ಶಿಕ್ಷಣ ಸಚಿವ ಡಾ. ಸಿ.ಎನ್. ಅಶ್ವತ್ಥನಾರಾಣ ಹಾಗೂ ಗೌರವ ಡಾಕ್ಟರೇಟ್‌ಗೆ ಭಾಜನರಾಗಿದ್ದ ಕಲಬುರಗಿಯ ಶರಣಬಸವೇಶ್ವರ ಅಪ್ಪ ಶೈಕ್ಷಣಿಕ ಸಂಸ್ಥೆಗಳ ಅಧ್ಯಕ್ಷರಾದ ದಾಕ್ಷಾಯಣಿ ಅಪ್ಪ ಅವರು ಗೈರಾಗಿದ್ದರು.

ಕೊರೊನಾ ಹಿನ್ನೆಲೆಯಲ್ಲಿ ಪದಕ ಹಾಗೂ ರಾಂಕ್ ವಿಜೇತರು ಸೇರಿದಂತೆ ಸೀಮಿತವಾಗಿ ಘಟಿಕೋತ್ಸವಕ್ಕೆ ಆಹ್ವಾನ ನೀಡಲಾಗಿತ್ತು. ಹೀಗಾಗಿ ವಾಡಿಕೆಗಿಂತ ವಿದ್ಯಾರ್ಥಿಗಳ ಸಂಖ್ಯೆ ಸಾಕಷ್ಟು ಕಡಿಮೆ ಇತ್ತು.

ಮೊದಲ ರಾಂಕ್, ಮೂರು ಪದಕ, ಓದಿಗೆ ವಿದಾಯ

ಬಳ್ಳಾರಿ ಜಿಲ್ಲೆಯ ಹರಪನಹಳ್ಳಿ ತಾಲ್ಲೂಕಿನ ಜಂಬುಲಿಂಗನಹಳ್ಳಿಯ ಜಿ.ವಿ. ಅಕ್ಷತ, ಬಿ.ಎ.ನಲ್ಲಿ ಮೊದಲ ರಾಂಕ್ ಗಳಿಸಿ ಮೂರು ಪದಕ ಪಡೆದಿದ್ದರೂ ಓದಿಗೆ ವಿದಾಯ ಹೇಳಲು ನಿರ್ಧರಿಸಿದ್ದಾರೆ.

ದಾವಣಗೆರೆಯ ಎಂ.ಎಸ್.ಬಿ. ಕಾಲೇಜಿನಲ್ಲಿ ವ್ಯಾಸಂಗ ಮಾಡಿದ್ದ ಅಕ್ಷತ, ಖಾಸಗಿ ಬಸ್ ಚಾಲಕ ವೆಂಕಟೇಶ್ ಹಾಗೂ ಅಂಗನವಾಡಿ ಶಿಕ್ಷಕಿ ವಿಜಯಲಕ್ಷ್ಮಿ ಪುತ್ರಿ. 

ನಾಲ್ಕು ಮಕ್ಕಳಲ್ಲಿ ಮೊದಲನೆಯವಳೇ ನಾನು ಎಂದಿರುವ ಅಕ್ಷತ, ಕೆಎಎಸ್ ಪರೀಕ್ಷೆಯ ಗುರಿ ತಮಗಿದೆ. ಪ್ರಸಕ್ತ ಸ್ಪರ್ಧಾತ್ಮಕ ಪರೀಕ್ಷೆಯ ಸಿದ್ಧತೆಯಲ್ಲಿರುವುದಾಗಿ ತಿಳಿಸಿದ್ದಾರೆ.

ಮನೆಯ ಪರಿಸ್ಥಿತಿಯ ಹಿನ್ನೆಲೆಯಲ್ಲಿ ಕೆಲಸಕ್ಕೆ ಹೋಗಲು ನಿರ್ಧರಿಸಿರುವುದಾಗಿ ಇಂಗಿತ ವ್ಯಕ್ತಪಡಿಸಿರುವ ಅವರು, ಮುಂದಿನ ಓದಿಗಾಗಿ ಬೇರೆ ಯಾರ ನೆರವಿನ ಅಪೇಕ್ಷೆಯೂ ತಮಗಿಲ್ಲ ಎಂದು ಸ್ವಾಭಿಮಾನದಿಂದ ಹೇಳಿದ್ದಾರೆ.

ವಿಜ್ಞಾನಿಯಿಂದ ಐಎಎಸ್‌ವರೆಗೆ ಪದಕ ವಿಜೇತರ ಕನಸು

ದಾವಣಗೆರೆ, ಸೆ. 30 – ವಿಜ್ಞಾನಿ ಯಾಗುವ ಕನಸು, ಉದ್ಯಮಿ ಯಾಗುವ ಲೆಕ್ಕಾಚಾರ, ಐಎಎಸ್ ಮಹತ್ವಾಕಾಂಕ್ಷೆ, ಉದ್ಯೋಗಿಯಾಗಿ ಮನೆಗೆ ನೆರವಾಗುವ ತವಕ, ಆದರ್ಶ ಶಿಕ್ಷಕಿಯಾಗುವ ಆಶಯ… ಹೀಗೆ ಹತ್ತು ಹಲವು ದಾರಿಗಳಲ್ಲಿ ಸಾಗುವ ಬಯಕೆಗಳನ್ನು ವ್ಯಕ್ತಪಡಿಸಿದವರು ದಾವಣಗೆರೆ ವಿಶ್ವವಿದ್ಯಾನಿಲಯದ ರಾಂಕ್ ವಿಜೇತರು. ಮೈಕ್ರೋಬಯಾಲಜಿಯಲ್ಲಿ ಎಂ.ಎಸ್.ಸಿ. ಮೊದಲಿಗರಾಗಿರುವ ಎಂ.ಬಿ. ಪೊನ್ನಣ್ಣ ಅವರು ಬೆಂಗಳೂರಿನ ಅಂತೋರ್ನ್ ಬಯೋ ಸೈನ್ಸ್ ಕಂಪನಿಯಲ್ಲಿ ಕಿರಿಯ ವಿಜ್ಞಾನಿಯಾಗಿ ಕಾರ್ಯ ನಿರ್ವಹಿಸುತ್ತಿ ದ್ದಾರೆ. ನನ್ನ ತಂದೆ ಬೋಪಣ್ಣ ಕಾಫಿ ಪ್ಲಾಂಟೇಷನ್ ವ್ಯವಸ್ಥಾಪಕ. ಸ್ವಂತದ್ದು 15 ಎಕರೆ ಜಮೀನಿದೆ. ವಿಜ್ಞಾನಿಯಾಗಿ ಸಾಧನೆ ಮಾಡಿ ಸ್ವಂತ ಕಾಲ ಮೇಲೆ ನಿಲ್ಲಬೇಕು ಎಂಬುದು ನನ್ನ ಚಿಕ್ಕಂದಿನ ಕನಸು ಎಂದವರು ತಿಳಿಸಿದ್ದಾರೆ.

ಮಂಡ್ಯದ ಬನಹಳ್ಳಿ ಗ್ರಾಮದ ಬಿ.ಎಸ್. ಅನಿಲ್ ಕುಮಾರ್, ಎಂ.ಬಿ.ಎ.ದಲ್ಲಿ ಪದಕ ಪಡೆದಿದ್ದಾರೆ. ಕೃಷಿ ಹಿನ್ನೆಲೆಯ ಕುಮಾರ್, ತನಗೆ ಬಡತನವೇ ಸ್ಫೂರ್ತಿಯಾಗಿತ್ತು ಎಂದಿದ್ದಾರೆ.

ಪುಸ್ತಕಗಳನ್ನು ಉರು ಹೊಡೆದು ಉತ್ತರಿಸುವುದೆಂದರೆ ಅಲರ್ಜಿ. ಸ್ವಂತಿಕೆಯ ಉತ್ತರ ಬರೆಯುವುದನ್ನು ಪಿ.ಯು. ನಂತರದಿಂದ ಅಭ್ಯಾಸ ಮಾಡಿಕೊಂಡಿದ್ದೆ. ಈ ಅಭ್ಯಾಸ ಬಿ.ಕಾಂನಲ್ಲಿ ಹಿನ್ನಡೆಗೆ ಕಾರಣವಾಗಿತ್ತು. ಆದರೂ, ಸ್ವಂತಿಕೆಯ ಉತ್ತರಗಳಿಂದ ಉನ್ನತ ಹಂತದಲ್ಲಿ ಸಾಧನೆ ಮಾಡಿರುವುದು ಸಾರ್ಥಕತೆಯ ಭಾವ ತಂದಿದೆ. ಈಗ ನಾನು ಐಎಎಸ್ ಪರೀಕ್ಷೆಯ ಸಿದ್ಧತೆಯಲ್ಲಿದ್ದೇನೆ ಎಂದಿದ್ದಾರೆ.

ಎರಡು ವರ್ಷ ಉತ್ಕಟತೆಯಿಂದ ಅಧ್ಯಯನ ಮಾಡಿದ್ದಕ್ಕೆ ಎಂ.ಎಸ್‌ಸಿಯ ಆಹಾರ ತಂತ್ರಜ್ಞಾನ ವಿಭಾಗದಲ್ಲಿ ಮೊದಲ ಸ್ಥಾನ ಪಡೆಯಲು ಸಾಧ್ಯವಾಗಿದೆ ಎಂದು ಹೇಳುವ ಎಸ್.ಎಂ. ಲೇಖನ, ಮುಂದಿನ ದಿನಗಳಲ್ಲಿ ಸ್ವಂತ ಉದ್ಯಮ ಆರಂಭಿಸುತ್ತೇನೆ ಎಂದು ತಮ್ಮ ಕನಸು ಹಂಚಿಕೊಂಡಿದ್ದಾರೆ.

ಬೆಂಗಳೂರಿನ ಕೆಎಸ್‌ಆರ್‌ಟಿಸಿ ನಿವೃತ್ತ ನೌಕರ ಮೃತ್ಯುಂಜಯ ಪುತ್ರಿಯಾಗಿರುವ ಇವರು, ಆಹಾರ ಸಂಸ್ಕರಣಾ ಘಟಕಕ್ಕೆ ಪೂರಕವಾಗಿ ಈ ಅಧ್ಯಯನ ಮಾಡಿದ್ದೇನೆ. ಮಹಿಳೆಯರೂ ಉದ್ಯಮಿಗಳಾಗಬಹುದು, ಮೇಕ್ ಇನ್ ಇಂಡಿಯಾ ಅಭಿಯಾನದ ಭಾಗವಾಗಬಹುದು. ಬಯೋಕಾನ್ ಮುಖ್ಯಸ್ಥೆ ಕಿರಣ್ ಮಜುಮ್ದಾರ್ ಅಂಥವರು ತಮಗೆ ಸ್ಫೂರ್ತಿ ಎಂದು ತಿಳಿಸಿದ್ದಾರೆ.

ಮೊದಲು ಬಿಎಸ್‌ಸಿ ಓದಿ ನಂತರ ಎಂ.ಬಿ.ಎ.ಗೆ ಜಿಗಿದರೂ ಹ್ಯೂಮನ್ ರಿಸೋರ್ಸ್‌ ವಿಭಾಗದಲ್ಲಿ ಮೊದಲ ರಾಂಕ್ ಪಡೆದ ಹೆಗ್ಗಳಿಕೆ ಕೆ.ಎನ್. ಅಕ್ಷತ ಅವರದ್ದು.

ಬಳ್ಳಾರಿ ಜಿಲ್ಲೆಯ ಕೋಗಳಿಯ ರೈತ ಕುಟುಂಬದ ಹಿನ್ನೆಲೆಯ ಅಕ್ಷತ, ಮೊದಲ ಬಿಎಸ್‌ಸಿ ಮಾಡಿ, ನಂತರದಲ್ಲಿ ಎಂ.ಬಿ.ಎ.ಗೆ ಸೇರಿದ್ದರು. ಮೊದಲ ಎರಡು ಸೆಮಿಸ್ಟರ್‌ಗಳಲ್ಲಿ ಕಷ್ಟವಾಯಿತು. ಮೂರನೇ ಸೆಮಿಸ್ಟರ್‌ನಿಂದ ವಿಷಯ ಹಿಡಿತಕ್ಕೆ ಸಿಕ್ಕಿತು ಎಂದವರು ಹೇಳಿದ್ದಾರೆ.

ಪತ್ರಿಕೋದ್ಯಮ ಎಂ.ಎ.ದಲ್ಲಿ ಮೊದಲ ರಾಂಕ್ ಗಳಿಸಿರುವ ಕೆ.ಎಂ. ನಂದಿನಿ ಅವರು, ಮುಂದಿನ ದಿನಗಳಲ್ಲಿ ನಾಗರಿಕ ಸೇವಾ ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿ ಜನ ಸೇವೆ ಮಾಡುವ ಗುರಿ ಹೊಂದಿರುವುದಾಗಿ ತಿಳಿಸಿದ್ದಾರೆ.

ಕನ್ನಡ ಎಂ.ಎ.ದಲ್ಲಿ ನಾಲ್ಕು ಪದಕ ಪಡೆದ ನಗರದ ನಿಟುವಳ್ಳಿಯ ಕೆ.ವಿ. ವಿನಯವತಿ ಮಾತನಾಡಿ, ರಾಂಕ್ ಬರುವ ನಿರೀಕ್ಷೆ ಇತ್ತು. ಆದರೆ, ನಾಲ್ಕು ಪದಕ ಸಿಗುವುದು ಸಂತೋಷ ತಂದಿದೆ. ಮುಂದೆ ಜನಪದ ಸಾಹಿತ್ಯವನ್ನು ಲಿಖಿತ ರೂಪಕ್ಕೆ ತರುವ ಹಾಗೂ ಪಿ.ಹೆಚ್.ಡಿ. ಮಾಡುವ ಉದ್ದೇಶವಿದೆ ಎಂದರು.

ಗಂಡ್‌ ಮಕ್ಳೂ ಸ್ಟ್ರಾಂಗು, ಆದರೂ…

ಕಲಿಕೆಯ ಸಾಮರ್ಥ್ಯದಲ್ಲಿ ಹೆಣ್ಣು ಮಕ್ಕಳಂತೆ ಗಂಡು ಮಕ್ಕಳೂ ಸಮರ್ಥರಿದ್ದಾರೆ. ಆದರೆ, ಸಾಮ ರ್ಥ್ಯದ ಪೂರ್ಣ ಬಳಕೆ ಮಾಡಿಕೊಳ್ಳದೇ ಕಲಿಕೆ ಯಲ್ಲಿ ಹಿಂದೆ ಬೀಳುತ್ತಿದ್ದಾರೆ ಎಂಬ ಅಭಿಪ್ರಾಯ ರಾಂಕ್ ವಿಜೇತ ವಿದ್ಯಾರ್ಥಿಗಳಿಂದ ಕೇಳಿ ಬಂತು.

ಗಂಡು ಮಕ್ಕಳ ಕಲಿಕಾ ಸಾಮರ್ಥ್ಯ ಹೆಣ್ಣು ಮಕ್ಕಳಿಗಿಂತ ಕಡಿಮೆ ಇಲ್ಲ ಎಂಬುದು ವೈಜ್ಞಾನಿಕ ವಾಗಿಯೇ ಸಾಬೀತಾಗಿದೆ. ಆದರೆ, ಅದನ್ನು ಸರಿಯಾಗಿ ಬಳಸಿಕೊಳ್ಳುತ್ತಿಲ್ಲ ಎಂದು ಎಂ.ಎಸ್.ಸಿ. ಮೈಕ್ರೋಬಯಾಲಜಿಯಲ್ಲಿ ಮೊದಲಿಗರಾಗಿರುವ ಎಂ.ಬಿ. ಪೊನ್ನಣ್ಣ ತಿಳಿಸಿದ್ದಾರೆ.

ಮೈಕ್ರೋಬಯಾಲಜಿಯಲ್ಲಿ  ಸದಾ ವಿದ್ಯಾರ್ಥಿನಿಯರೇ ಮೊದಲಿಗರು. ಮೊದಲ ಬಾರಿಗೆ ಹುಡುಗನೊಬ್ಬನಿಗೆ ಮೊದಲ ಸ್ಥಾನ ಒದಗಿ ಸಿದ ಸಾಧನೆ ತನ್ನದು ಎಂದು ಪೊನ್ನಣ್ಣ ಹೇಳಿದ್ದಾರೆ.

ಓದಿನ ಬಗ್ಗೆ ಗಂಭೀರತೆಯ ಕೊರತೆ ಇರುವುದು ವಿದ್ಯಾರ್ಥಿಗಳಲ್ಲಿ ಕಂಡು ಬರುತ್ತದೆ ಎಂದು ಎಂ.ಎಸ್‌ಸಿ ಭೌತಶಾಸ್ತ್ರದಲ್ಲಿ ಮೊದಲ ರಾಂಕ್ ಪಡೆದ ಮೊಹಮ್ಮದ್ ಜಬೀವುಲ್ಲಾ ಹೇಳಿದ್ದಾರೆ. ತಮ್ಮ ಕ್ಲಾಸ್‌ನಲ್ಲೂ ಹುಡುಗಿಯರ ಸಂಖ್ಯೆ ಹುಡುಗರಿಗಿಂತ ಎರಡು ಪಟ್ಟು ಹೆಚ್ಚಿತ್ತು. ಆದರೆ, ಬಿಎಸ್‌ಸಿಯಲ್ಲಿ ಮೂರನೇ ರಾಂಕ್‌ನಲ್ಲಿದ್ದ ನಾನು, ಮೊದಲ ರಾಂಕ್ ಪಡೆಯಬೇಕೆಂಬ ಛಲದಿಂದ ಓದಿದ್ದು ಮೊದಲ ಸ್ಥಾನಕ್ಕೆ ಸಹಕಾರಿಯಾಯಿತು ಎನ್ನುತ್ತಾರೆ.

ಸ್ನಾತಕ ಪದವಿಯಲ್ಲಿ ಸ್ವರ್ಣ ಪದಕ ಪಡೆದ ಗಂಡು ಮಕ್ಕಳ ಸಂಖ್ಯೆ ಕೇವಲ ಒಂದಾದರೆ, ಹೆಣ್ಣು ಮಕ್ಕಳದು 8. ಸ್ನಾತಕೋತ್ತರದಲ್ಲಿ ಕೇವಲ ಐವರು ಗಂಡು ಮಕ್ಕಳು ಪದಕ ಪಡೆದರೆ, ಹೆಣ್ಣು ಮಕ್ಕಳು 19 ಪಡೆದಿದ್ದಾರೆ. ಇದು ಗಂಡು ಮಕ್ಕಳ ಸಾಗುವ ಹಾದಿ ದೂರ ಇರುವ ಜೊತೆಗೆ ಸವಾಲನ್ನೂ ತೋರಿಸುತ್ತಿದೆ. 

ಪದಕಗಳು ನನ್ನವಲ್ಲ ಎಂದ ಸಾಧಕಿ

ಬಿಎಡ್‌ನಲ್ಲಿ ಪ್ರಥಮ ರಾಂಕ್ ಪಡೆದು, ಎರಡು ಪದಕ ಗಳಿಸಿರುವ ಹರಿಹರದ ಶ್ರೀಶೈಲ ಶೈಕ್ಷಣಿಕ ಮಹಾವಿದ್ಯಾಲಯದ ಉಮಾಮಹೇಶ್ವರಿ ಆರ್. ಕೊಳ್ಳೇರ ಅವರು, ಈ ಪದಕಗಳು ತಮ್ಮವಲ್ಲ ಎಂದು ಸ್ಪಷ್ಟವಾಗಿ ಹೇಳಿದರು!

ಕಾರಣವೇನೆಂದರೆ ಅವರು ಪ್ಯಾರಾಮೆಡಿಕ್ ಆಗಲು ಬಯಸಿದ್ದರು. ರಾಣೇಬೆನ್ನೂರಿನ ಎಡಿಹಾಳಿನಲ್ಲಿ ಶಿಕ್ಷಕರಾಗಿರುವ ತಂದೆ ರಾಮಪ್ಪ ಮಗಳು ಶಿಕ್ಷಕಿಯಾಗಲಿ ಎಂದು ಬಲವಂತದಿಂದ ಬಿಎಡ್‌ಗೆ ಸೇರಿಸಿದರು.

ಇಷ್ಟವಿಲ್ಲದಿದ್ದರೂ ಕಷ್ಟಪಟ್ಟು ಓದಿ ಮೊದಲ ರಾಂಕ್ ಗಳಿಸಿದ ಪದಕಗಳನ್ನು ಕೈಯಲ್ಲಿಟ್ಟುಕೊಂಡಿದ್ದ ಉಮಾಮಹೇಶ್ವರಿ, ಇವು ನನ್ನವಲ್ಲ. ನನ್ನ ಅಪ್ಪನವು ಎಂದು ತಿಳಿಸಿದರು.

ಪ್ರಸಕ್ತ ಬಳ್ಳಾರಿ ಜಿಲ್ಲೆಯ ಹೊಳಲಿನಲ್ಲಿ ಶಿಕ್ಷಕಿಯಾಗಿರುವ ಅವರು, ಪ್ಯಾರಾಮೆಡಿಕ್ ಆಗದಿದ್ದರೂ ಆದರ್ಶ ಶಿಕ್ಷಕಿಯಾಗುತ್ತೇನೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.