ಮಠದ ಹೆಸರಲ್ಲಿ ನಡೆಸಲಾಗುತ್ತಿದ್ದ ರಿಯಲ್ ಎಸ್ಟೇಟ್ ದಂಧೆ ತಡೆದಿದ್ದಕ್ಕೆ ತಮ್ಮ ಹಾಗೂ ಮಠದ ವಿರುದ್ಧ ಆರೋಪ

ಸಮಾಜದವರು ತಪ್ಪಿತಸ್ಥರ ಬಗ್ಗಿಸಿ 

ತಪ್ಪು ಮಾಡುತ್ತಾ ಮಠ, ಸಮಾಜ ಹಾಗೂ ತಮ್ಮ ತೇಜೋವಧೆ ಮಾಡುತ್ತಿರುವವರನ್ನು ಕೋರ್ಟ್‌ನಲ್ಲಿ ಬಗ್ಗಿಸುತ್ತೇವೆ. ಸಮಾಜದಲ್ಲಿ ಇಂಥವರನ್ನು ಬಗ್ಗಿಸುವ ಜವಾಬ್ದಾರಿ ಸಮಾಜದ್ದಾಗಿದೆ. ಇಂಥವರು ಮಾಡಿರುವ ಆರೋಪಗಳಿಗೆ ದಾಖಲೆ ನೀಡುವಂತೆ ಅವರನ್ನು ಪ್ರಶ್ನಿಸಬೇಕು. ಆದರೆ, ನಿಮ್ಮ ಕೃತ್ಯ ಕಾನೂನು ವಿರುದ್ಧ ಆಗಬಾರದು ಎಂದು ತರಳಬಾಳು ಜಗದ್ಗುರು ಡಾ. ಶಿವಮೂರ್ತಿ ಶಿವಾಚಾರ್ಯ ಶ್ರೀಗಳು ಸಾಧು ಸದ್ಧರ್ಮ ಸಮಾಜದವರಿಗೆ ಹೇಳಿದ್ದಾರೆ.

ಕುತ್ತಿಗೆ ಹಿಡಿದು ದೂಡಿರುತ್ತಿದ್ದೆ…

ತರಳಬಾಳು ಜಗದ್ಗುರು ಡಾ. ಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿ ವಿರುದ್ಧ ಪ್ರಕರಣ ದಾಖಲಿಸಿರುವ ಎಸ್.ಎಸ್.ಪಾಟೀಲ್‌ ಅವರು ಸಾಣೇಹಳ್ಳಿ ಶಾಖಾ ಮಠದ ಸಮಾರಂಭದಲ್ಲಿ ಭಾಗವಹಿಸಲು ಮತ್ತು ಸಾಣೇಹಳ್ಳಿ ಶ್ರೀಗಳಾದ ಡಾ. ಪಂಡಿತಾರಾಧ್ಯ ಶಿವಾಚಾರ್ಯ ಸ್ವಾಮೀಜಿ ಅವರಿಗೆ ಸನ್ಮಾನಿಸಲು ಬಿಟ್ಟಿದ್ದು, ಸಿರಿಗೆರೆ ಹಾಗೂ ಸಾಣೇಹಳ್ಳಿ ಮಠಗಳ ನಡುವೆ ಅಪಪ್ರಚಾರ ಮಾಡಲು ಕೆಲವರಿಗೆ ಅವಕಾಶ ಕೊಟ್ಟಂತಾಗಿದೆ ಎಂದು ಸಭೆಯಲ್ಲಿದ್ದ ರುದ್ರನಗೌಡ ಪಾಟೀಲ್  ಹೇಳಿದರು.

ಈ ವಿಷಯದ ಬಗ್ಗೆ ಆಂತರಿಕವಾಗಿ ನಿರ್ಧರಿಸಲು ಮಠದಿಂದ ಸಮಿತಿ ರಚಿಸಲಾಗಿದೆ. ಸಮಿತಿ ಸೂಕ್ತ ವಿಷಯವನ್ನು ಸಂಬಂಧಿಸಿದವರಿಗೆ ತಿಳಿಸಲಿದೆ. ಇಲ್ಲಿ ಆ ವಿಷಯ ಬೇಡ ಎಂದು ಭಕ್ತರಿಗೆ ತಿಳಿಸಲಾಯಿತು.

ಈ ಸಂದರ್ಭದಲ್ಲಿ ಮಾತನಾಡಿದ ತರಳಬಾಳು ಜಗದ್ಗುರು ಡಾ. ಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿ, ಸ್ವಾಮಿಗಳು ನ್ಯಾಯವಾಗಿ ಅವರನ್ನು ಹತ್ತಿರ ಬಿಟ್ಟುಕೊಳ್ಳಬಾರದು. ನನ್ನ ಹತ್ತಿರ ಬಂದಿದ್ದರೆ ಕುತ್ತಿಗೆ ಹಿಡಿದು ಹೊರ ದೂಡುತ್ತಿದ್ದೆವು. ಈಗ ಎಲ್ಲಿ ತಪ್ಪಾಗಿದೆಯೋ ಅಲ್ಲಿ ಕ್ರಮ ತೆಗೆದುಕೊಳ್ಳುತ್ತೇವೆ. ಈ ಸಭೆಯಲ್ಲಿ ವಿಷಯದ ಪ್ರಸ್ತಾಪ ಬೇಡ ಎಂದು ಚರ್ಚೆಗೆ ತೆರೆ ಎಳೆದರು.

ದೊಡ್ಡ ಗುರುಗಳ ಉಗ್ರ ಸ್ವಭಾವ ತಾಳಿದ್ದೇವೆ

ಸಿರಿಗೆರೆ, ನ. 19 – ಸಿರಿಗೆರೆಯ ಹಿರಿಯ ಶ್ರೀಗಳಾದ ಗುರುಶಾಂತೇಶ್ವರ ಸ್ವಾಮೀಜಿ ಅವರು ಶಾಂತ ಸ್ವಭಾವದವರು. ಅವರ ಶಾಂತ ಸ್ವಭಾವ ಇದುವರೆಗೂ ಮೈಗೂಡಿಸಿಕೊಂಡು ಬಂದಿದ್ದೆವು. ಈ ಪರಿಸ್ಥಿತಿಯಲ್ಲಿ ಶಾಂತ ಸ್ವಭಾವ ಕೆಲಸಕ್ಕೆ ಬರುವುದಿಲ್ಲ. ಈಗ ದೊಡ್ಡ ಗುರುಗಳು (ಲಿಂ. ಶ್ರೀ ಶಿವಕುಮಾರ ಶಿವಾಚಾರ್ಯ ಸ್ವಾಮೀಜಿ) ಅವರ ಉಗ್ರ ಸ್ವಭಾವ ಸ್ವೀಕರಿಸಿದ್ದೇವೆ ಎಂದು ಡಾ. ಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿ ಹೇಳಿದ್ದಾರೆ.

ನಾವೀಗ ದೊಡ್ಡ ಗುರುಗಳ ಸ್ವಭಾವವನ್ನು ಕಾರ್ಯರೂಪಕ್ಕೆ ತರಲು ತಾಳಿದ್ದೇವೆ. ಇದನ್ನು ಚಿತಾವಣೆ ಎಂದು ಭಾವಿಸಬಾರದು, ಇದು ಜಾಗೃತಿ ಎಂದು ಶ್ರೀಗಳು ಹೇಳಿದರು.

ವೃಥಾ ಆರೋಪ ಮಾಡುವುದು ದ್ರೋಹ ಹಾಗೂ ಪಾಪದ ಕೃತ್ಯ ಎಂದ ಶ್ರೀಗಳು, ಸಮಾಜದ ಗೌರವಕ್ಕಾಗಿ ಕೆಲ ವಿಷಯಗಳನ್ನು ಇದುವರೆಗೂ ವಿಷಕಂಠನ ರೀತಿಯಲ್ಲಿ ನುಂಗಿಕೊಂಡು ಬಂದಿದ್ದೆ. ಆದರೆ, ಈಗ ಆ ವಿಷಯಗಳನ್ನು ಸಮಾಜಕ್ಕೆ ವಿಶೇಷವಾಗಿ ಯುವಕರಿಗೆ ತಿಳಿಸುವ ಸಂದರ್ಭ ಬಂದಿದೆ. ಯುವಕರಿಗೆ ಮಠದ ಹಿನ್ನೆಲೆ ತಿಳಿಸುವುದು ತಮ್ಮ ಉದ್ದೇಶ ಎಂದವರು ಹೇಳಿದರು.

ಯಾರಿಗಾದರೂ ಕೌಟುಂಬಿಕ ಸಮಸ್ಯೆ ಎದುರಾದಾಗ ಅಂತರಂಗಿಕವಾಗಿ ಮಾತನಾಡಿ ಬಗೆಹರಿಸಿಕೊಳ್ಳುತ್ತಾರೆಯೇ ಹೊರತು, ವಾಟ್ಸಾಪ್ – ಇಲ್ಲವೇ ಮಾಧ್ಯಮಗಳ ಮೂಲಕ ಮನೆಯ ಸಮಸ್ಯೆಗಳನ್ನು ಹರಿಬಿಡುವುದಿಲ್ಲ. ಹಾಗೆಯೇ ಸಮಾಜದ ಸಮಸ್ಯೆ ಇದ್ದಾಗ ಅಂತರಂಗಿಕವಾಗಿ ಬಗೆಹರಿಸಿಕೊಳ್ಳಬಹುದಿತ್ತು ಎಂದು ಶ್ರೀಗಳು ಹೇಳಿದರು.

ಆರೋಪ ಮಾಡಿದವರೇ ಸಭೆಗೆ ಬಂದಿಲ್ಲ

ನ್ಯಾಯಾಲಯಗಳಲ್ಲಿ ಸಾಮಾನ್ಯವಾಗಿ ಆರೋಪ ಮಾಡಿದವರು ಹಾಜರಾಗುತ್ತಾರೆ, ಆರೋಪಿಗಳು ಗೈರಾಗುತ್ತಾರೆ. ಆದರೆ, ಸಿರಿಗೆರೆ ಮಠದಲ್ಲಿ ಕರೆದ ಸಭೆಗೆ ಆರೋಪಕ್ಕೆ ಗುರಿಯಾದ ನಾವು ಹಾಗೂ ಸಮಾಜದವರು ಬಂದಿದ್ದೇವೆ. ಆರೋಪ ಮಾಡಿದವರೇ ಬಂದಿಲ್ಲ ಎಂದು ಡಾ. ಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿ ಹೇಳಿದ್ದಾರೆ. ಆರೋಪ ಮಾಡಿದವರ ಹೆಸರಿಗೆ ಸಾಧು ಸದ್ಧರ್ಮ ಸಮಾಜದಿಂದ ರಿಜಿಸ್ಟರ್ಡ್ ನೋಟಿಸ್ ಕಳಿಸಲಾಗಿತ್ತು. ಮಾಡಿರುವ ಆರೋಪಗಳಿಗೆ ಇಂದಿನ ಸಭೆಗೆ ಬಂದು ಸಾಕ್ಷಿ ಒದಗಿಸುವಂತೆ ತಿಳಿಸಲಾಗಿತ್ತು. ಆದರೆ, ಅವರಾರೂ ಬಂದಿಲ್ಲ, ಆರೋಪಗಳಿಗೆ ಸಾಕ್ಷಿಗಳನ್ನೂ ಕೊಟ್ಟಿಲ್ಲ ಎಂದರು.

ಎಲ್ಲರ ಹೆಸರಲ್ಲೂ ಜಮೀನಿದೆ

ಮಠದ ಜಮೀನನ್ನು ತಮ್ಮ ಹೆಸರಿಗೆ ಮಾಡಿಕೊಳ್ಳಲಾ ಗಿದೆ ಎಂಬ ಆರೋಪವನ್ನು ತಳ್ಳಿ ಹಾಕಿರುವ ಸಿರಿಗೆರೆ ಜಗದ್ಗುರು ಡಾ. ಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿ, ಮಠದ ಹೆಸರಿಗೆ ನೇರವಾಗಿ ಜಮೀನು ಪಡೆಯಲು ವಿಳಂಬವಾಗಿ ತೊಡಕುಗಳು ಉಂಟಾಗುತ್ತವೆ. ಹೀಗಾಗಿ ವ್ಯಕ್ತಿಗಳ ಹೆಸರಿಗೆ ಜಮೀನು ಖರೀದಿಸಿ ನಂತರ ಮಠಕ್ಕೆ ಪಡೆಯಲಾಗುತ್ತದೆ ಎಂದು ಹೇಳಿದ್ದಾರೆ.

ಈ ಬಗ್ಗೆ ವಿವರ ನೀಡಿರುವ ಅವರು, ತಾವೊಬ್ಬರಷ್ಟೇ ಅಲ್ಲದೇ, ಮಾಜಿ ಕಾರ್ಯದರ್ಶಿ ಎಸ್. ಸಿದ್ದಯ್ಯ, ಸಾಣೇಹಳ್ಳಿ ಶ್ರೀ ಪಂಡಿತಾರಾಧ್ಯ ಸ್ವಾಮೀಜಿ ಸೇರಿ ಹಲವರ ಹೆಸರಿಗೆ ಮಠದ ಜಮೀನಿದೆ. ಯಾರ ಹೆಸರಿಗೆ ಜಮೀನು ಮಾಡಿದರೂ ಕಬಳಿಸಿದ ಕೆಟ್ಟ ಶಿಷ್ಯರು ಇದುವರೆಗೂ ಇಲ್ಲ ಎಂದವರು ಹೇಳಿದರು.

ಮಠದ ಹೆಸರಿನಲ್ಲಿ ಇರುವ ಜಾಗ ಸಾವಿರಾರು ಎಕರೆಯಷ್ಟಾಗಿದೆ ಎಂದು ಶ್ರೀಗಳು ಸಭೆಗೆ ಪಿ.ಪಿ.ಟಿ. ತೆರೆಯ ಮೂಲಕ ವಿವರ ನೀಡಿದರು. ಅದರ ಪ್ರಕಾರ ಶ್ರೀ ತರಳಬಾಳು ಜಗದ್ಗುರು ಬೃಹನ್ಮಠದ ಹೆಸರಿನಲ್ಲಿ 609 ಎಕರೆ ಜಮೀನಿದೆ. ಡಾ. ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮೀಜಿಯವರ ಹೆಸರಿನಲ್ಲಿ 335 ಎಕರೆ, ಎಸ್. ಸಿದ್ದಯ್ಯ ಹೆಸರಿನಲ್ಲಿ 69 ಎಕರೆ, ಎಸ್.ಟಿ.ಜೆ. ಬೃಹನ್ಮಠದ ಕಾರ್ಯದರ್ಶಿ ಹೆಸರಿನಲ್ಲಿ 67 ಎಕರೆ, ಶ್ರೀ ಪಂಡಿತಾರಾಧ್ಯ ಸ್ವಾಮೀಜಿ ಹೆಸರಿನಲ್ಲಿ 45 ಎಕರೆ, ತರಳಬಾಳು ಸೌಹಾರ್ದ ಸಹಕಾರ ಕೈಗಾರಿಕೆ ಎಸ್ಟೇಟ್ ಲಿ., ಬೆಂಗಳೂರು ಹೆಸರಿನಲ್ಲಿ 16 ಎಕರೆ, ಶ್ರೀ ಮಲ್ಲಿಕಾರ್ಜುನ ಶಿವಾಚಾರ್ಯ ಸ್ವಾಮೀಜಿ ಹೆಸರಿನಲ್ಲಿ 14 ಎಕರೆ, ಶ್ರೀ ತರಳಬಾಳು ಜಗದ್ಗುರು ಎಜುಕೇಷನ್ ಸೊಸೈಟಿ ಹೆಸರಿನಲ್ಲಿ 7 ಎಕರೆ, ಉಜ್ಜಿನಿ ಜಮೀನು 6 ಎಕರೆ, ಶ್ರೀ ಶಿವಕುಮಾರ ಶಿವಾಚಾರ್ಯ ಮಹಾಸ್ವಾಮೀಜಿ ಹೆಸರಿನಲ್ಲಿ 3 ಎಕರೆ, ಹೆಚ್.ಜಿ. ರೇವಣ್ಣ ಹೆಸರಿನಲ್ಲಿ 1 ಹಾಗೂ ವಿಶ್ವೇಶ್ವರ ಶರ್ಮ ಹೆಸರಿನಲ್ಲಿ 1 ಎಕರೆ ಜಮೀನಿದೆ.

ಉತ್ತರಾಧಿಕಾರಿ ಆಯ್ಕೆಗೆ ಸಮಿತಿ

ಬೈಲಾದ ಪ್ರಕಾರ ಉತ್ತರಾಧಿಕಾರಿ ಆಯ್ಕೆ ಶ್ರೀಗಳ ಘೋಷಣೆ

ಸಿರಿಗೆರೆ, ನ. 19 – ಸಾಧು ವೀರಶೈವ ಸಮಾಜದ ಸಮಿತಿ ಹಾಗೂ ತಾವು ಸೇರಿಕೊಂಡು ತರಳಬಾಳು ಮಠದ ಉತ್ತರಾಧಿಕಾರಿಯನ್ನು ಆಯ್ಕೆ ಮಾಡುವುದಾಗಿ ತರಳಬಾಳು ಜಗದ್ಗುರು ಡಾ. ಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿ ಘೋಷಿಸಿದ್ದಾರೆ.

ಸಿರಿಗೆರೆಯಲ್ಲಿ ಸಾಧು ಸದ್ಧರ್ಮ ವೀರಶೈವ ಸಂಘದ ವತಿಯಿಂದ ಕರೆಯಲಾಗಿದ್ದ ಸಮಾಜದ ಸಭೆಯ ಸಾನ್ನಿಧ್ಯ ವಹಿಸಿ ಮಾತನಾಡುತ್ತಿದ್ದ ಅವರು, ಮಠದ ಉತ್ತರಾಧಿಕಾರಿ ಆಯ್ಕೆಗೆ ಬೈಲಾ ಇದೆ. ಬೈಲಾದ ಅನ್ವಯವೇ ಕ್ರಮ ತೆಗೆದುಕೊಳ್ಳಲಾಗುವುದು ಎಂದು ಹೇಳಿದರು.

ಮಠದ ಉತ್ತರಾಧಿಕಾರಿಯನ್ನು ಶ್ರೀಗಳು ತಾವೇ ಆಯ್ಕೆ ಮಾಡಿಕೊಳ್ಳಬೇಕು ಎಂದು ಸಭೆಯಲ್ಲಿದ್ದ ಕೆಲ ಭಕ್ತರು ಮನವಿ ಮಾಡಿಕೊಂಡಿದ್ದನ್ನು ಒಪ್ಪದ ಶ್ರೀಗಳು, ಈಗಾಗಲೇ ತಮ್ಮದು ಏಕಚಕ್ರಾಧಿಪತ್ಯ ಎಂದು ಕೆಲವರು ಟೀಕಿಸುತ್ತಿದ್ದಾರೆ. ಹೀಗಾಗಿ ತಾವೇ ಉತ್ತರಾಧಿಕಾರಿಯನ್ನು ಆಯ್ಕೆ ಮಾಡುವುದಿಲ್ಲ. ಈ ಹಿಂದೆ ದೊಡ್ಡ ಗುರುಗಳು ಮಾಡಿದ ಹಾಗೆ ಸಮಿತಿ ರಚಿಸಬೇಕು ಎಂದರು. 2012ರಲ್ಲೇ ತಾವು ಪೀಠಾಧೀಶ ಸ್ಥಾನದಿಂದ ನಿವೃತ್ತಿ ಘೋಷಣೆ ಮಾಡಿರುವುದಾಗಿ ಕೆಲವರು ಸುಳ್ಳು ಸುದ್ದಿ ಹರಡಿದ್ದರು. ತಾವು ಆ ರೀತಿಯ ಯಾವುದೇ ಘೋಷಣೆ ಮಾಡಿಲ್ಲ. ಹಿರಿಯ ಜಗದ್ಗುರುಗಳಾದ ಲಿಂ. ಶಿವಕುಮಾರ ಶಿವಾಚಾರ್ಯ ಸ್ವಾಮೀಜಿ ಅವರು ತ್ಯಾಗಪತ್ರ ಘೋಷಣೆ ಮಾಡಿದ ನಂತರವೂ ಕೆಲ ಕಾರಣದಿಂದಾಗಿ ಮುಂದುವರೆಯಬೇಕಾಯಿತು. ಅಂತಹ ಪರಿಸ್ಥಿತಿ ಮತ್ತೆ ಬರಬಾರದು ಎಂದು ತಾವು ತ್ಯಾಗಪತ್ರ ಪ್ರಕಟಿಸಿಲ್ಲ ಎಂದು ಶ್ರೀಗಳು ಹೇಳಿದರು.

ಇಷ್ಟಾದರೂ ನ್ಯಾಯಾಲಯದಲ್ಲಿ ತಮ್ಮ ವಿರುದ್ಧ ದಾಖಲಿಸಿರುವ ಪ್ರಕರಣಗಳಲ್ಲಿ ಎಸ್.ಎಸ್. ಪಾಟೀಲ್ ಅವರು ಮಾಜಿ ಸ್ವಾಮೀಜಿ – ಕೇರ್‌ಟೇಕರ್‌ ಸ್ವಾಮೀಜಿ ಎಂಬೆಲ್ಲ ಪದಗಳನ್ನು ಬಳಸಿರುವುದು ಸರಿಯಲ್ಲ ಎಂದರು.

ಶಿವಕುಮಾರ ಶಿವಾಚಾರ್ಯ ಸ್ವಾಮೀಜಿಗಳು ನಾಲ್ಕೈದು ಜನರನ್ನು ಮಠಕ್ಕೆ ಕರೆತಂದು ಸ್ವಾಮೀಜಿಗಳಾಗಲು ತರಬೇತಿ ನೀಡುವ ಪ್ರಯತ್ನ ನಡೆಸಿದ್ದು, ಹಾಗೂ ಅದರಲ್ಲಿ ವಿಫಲವಾಗಿದ್ದನ್ನು ತಿಳಿಸಿದ್ದಾರೆ. ಪೀಠಕ್ಕೆ ಬರುವವರಿಗೆ ಉನ್ನತ ಮಟ್ಟದ ಅರ್ಹತೆ ಇರಬೇಕು ಎಂದು ಹಿರಿಯ ಗುರುಗಳು ತಿಳಿಸಿದ್ದರು. ಈ ಎಲ್ಲ ಅಂಶಗಳನ್ನು ಗಮನದಲ್ಲಿಟ್ಟುಕೊಳ್ಳಬೇಕು ಎಂದವರು ಹೇಳಿದರು.