ಅವರಿಗೆ ಎ.ಸಿ.ಯಲ್ಲಿ ವಿಶ್ರಾಂತಿ ನಾವು ಬೀದಿಯ ಬಿಸಿಲಿನಲ್ಲಿ…

ವೀರಶೈವ ಲಿಂಗಾಯತ ಪಂಚಮಸಾಲಿ ಪೀಠದ ಜಗದ್ಗುರು ಶ್ರೀ ವಚನಾನಂದ ಸ್ವಾಮೀಜಿ ಅವರು ಮೀಸಲಾತಿ ಹೋರಾಟದಲ್ಲಿ ಪಾಲ್ಗೊಳ್ಳುವ ಕುರಿತ ಪ್ರಶ್ನೆಗೆ ಉತ್ತರಿಸಿರುವ ವಿಜಯಾನಂದ ಕಾಶಪ್ಪನವರ್, ಅವರು ಎ.ಸಿ.ಯಲ್ಲಿ ವಿಶ್ರಾಂತಿ ಪಡೆಯುತ್ತಿದ್ದಾರೆ. ನಾವು ಬೀದಿಯ ಬಿಸಿಲಿನಲ್ಲಿ ತಿರುಗಾಡಿ ಹೋರಾಟ ನಡೆಸುತ್ತಿದ್ದೇವೆ ಎಂದರು.

ವಚನಾನಂದ ಶ್ರೀಗಳು ಹೋರಾಟಕ್ಕೆ ಬಂದರೆ ಸ್ವಾಗತಿಸುತ್ತೇವೆ, ಹೋದಾಗ ಬೀಳ್ಕೊಡುತ್ತೇವೆ. ಅವರು ಈ ಹಿಂದೆ ನಡೆದ ಪಾದಯಾತ್ರೆಯ ಹೋರಾಟದ ನಂತರ ವಿಶ್ರಾಂತಿ ಪಡೆಯುತ್ತಿದ್ದಾರೆ ಎಂದೂ ಅವರು ಹೇಳಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ಲಿಂಗಾಯತ ಪಂಚಮಸಾಲಿ ಜಗದ್ಗುರು ಶ್ರೀ ಬಸವ ಜಯಮೃತ್ಯುಂಜಯ ಸ್ವಾಮೀಜಿ, ಹೋರಾಟಗಳು ಬೇರೆ ಬೇರೆ ಮಗ್ಗಲುಗಳಲ್ಲಿ ನಡೆಯುತ್ತವೆ. ಕೆಲವರು ಬೀದಿಯಲ್ಲಿ ಹೋರಾಟ ನಡೆಸಿದರೆ, ಕೆಲವರು ಮನೆಯಲ್ಲಿ, ಇನ್ನು ಕೆಲವರು ಎ.ಸಿ. ಕೋಣೆಯಲ್ಲಿ ಹೋರಾಟ ನಡೆಸುತ್ತಾರೆ. ಎಲ್ಲರೂ ಮೀಸಲಾತಿಗೆ ಪ್ರಯತ್ನ ಪಡಲಿ ಎಂದರು.

ಮೀಸಲಾತಿಗೆ ಲಿಂಗಾಯತ ಬಿಡುವುದು ಬೇಡ

ಲಿಂಗಾಯತ ಸೋದರ ಸಮಾಜ 36 ಒಳಪಂಗಡವದರು ಮೀಸಲಾತಿ ಪಡೆದಿದ್ದಾರೆ. ಹಿಂದೂ ಗಾಣಿಗ, ಹಿಂದೂ ಹಡಪದ ಎಂದು ಬರೆಸಿದಾಗ ಮೀಸಲಾತಿ ಪಡೆಯುತ್ತಿದ್ದಾರೆ. ಆದರೂ, ಅವರು ಲಿಂಗಾಯತ ಸೋದರ ಸಮಾಜದವರು  ಎಂದು ಲಿಂಗಾಯತ ಪಂಚಮಸಾಲಿ ಜಗದ್ಗುರು ಶ್ರೀ ಬಸವ ಜಯಮೃತ್ಯುಂಜಯ ಸ್ವಾಮೀಜಿ ಹೇಳಿದ್ದಾರೆ.

ಮೀಸಲಾತಿಗಾಗಿ ಲಿಂಗಾಯತ ಸಂಸ್ಕಾರ, ಸಂಸ್ಕೃತಿ, ಸಮಾಜ ಬಿಟ್ಟು ಹೋಗಬಾರದು. ರಾಜ್ಯ ಸರ್ಕಾರ ಲಿಂಗಾಯತ ಒಳಪಂಗಡಗಳಿಗೆ ಸೇರಿದ ಎಲ್ಲರಿಗೂ 2ಎ ಮೀಸಲಾತಿ ಕಲ್ಪಿಸಬೇಕು ಎಂದು ಶ್ರೀಗಳು ಒತ್ತಾಯಿಸಿದರು.

ದಾವಣಗೆರೆಯಲ್ಲಿ ಕಾರ್ಯಕೇಂದ್ರ

ನಗರದಲ್ಲಿ ಲಿಂಗಾಯತ ಪಂಚಮಸಾಲಿ ಜಗದ್ಗುರು ಮಹಾಪೀಠದ ಕಾರ್ಯಕೇಂದ್ರ ಸ್ಥಾಪಿಸಲಾಗುವುದು ಎಂದು ಲಿಂಗಾಯತ ಪಂಚಮಸಾಲಿ ಪೀಠದ ಜಗದ್ಗುರು ಶ್ರೀ ಬಸವ ಜಯಮೃತ್ಯುಂಜಯ ಸ್ವಾಮೀಜಿ ತಿಳಿಸಿದ್ದಾರೆ. ಚಿಂದೋಡಿ ಲೀಲಾ ಅವರು ದಾವಣಗೆರೆಯಲ್ಲೇ ಪೀಠ ಸ್ಥಾಪಿಸಬೇಕೆಂದು ಒಂದು ಎಕರೆ ಜಮೀನು ನೀಡಿದ್ದರು. ಆದರೆ, ಕೂಡಲಸಂಗಮದಲ್ಲಿ ಪೀಠ ಸ್ಥಾಪಿಸಲು ನಂತರದಲ್ಲಿ ನಿರ್ಧರಿಸಲಾಗಿತ್ತು. ದಾವಣಗೆರೆಯಲ್ಲಿ ನೀಡಲಾದ ಜಾಗದಲ್ಲಿ ಕಾರ್ಯಕೇಂದ್ರ ನಿರ್ಮಿಸಲು ಮುಂದಿನ ದಿನಗಳಲ್ಲಿ ಕ್ರಮ ತೆಗೆದುಕೊಳ್ಳಲಾಗುವುದು ಎಂದು ಶ್ರೀಗಳು ಹೇಳಿದ್ದಾರೆ.

ಇದಕ್ಕೂ ಮುಂಚೆ ಮಾತನಾಡಿದ್ದ ಮಾಜಿ ಶಾಸಕ ಹೆಚ್.ಎಸ್. ಶಿವಶಂಕರ್, ನಗರದಲ್ಲಿ ಧರ್ಮಸಂಸ್ಕಾರ ಹಾಗೂ ಸಮಾಜದ ಒಳಿತಿಗೆ ಪೀಠದ ಕಾರ್ಯಕೇಂದ್ರ ಮಾಡುವಂತೆ ಮನವಿ ಮಾಡಿಕೊಂಡಿದ್ದರು.

ಇಂದು ಮೀಸಲಾತಿ ನಿರ್ಧಾರವಾಗದು

ನಾಳೆ ಶುಕ್ರವಾರ ಲಿಂಗಾಯತ ಪಂಚಮಸಾಲಿ ಸಮಾಜಕ್ಕೆ 2ಎ ಮೀಸಲಾತಿ ನೀಡುವ ಸ್ಪಷ್ಟ ಭರವಸೆ ಸಾಧ್ಯವಾಗದೇ ಇರಬಹುದು. ಮೀಸಲಾತಿಗೆ ಕುಲಶಾಸ್ತ್ರೀಯ ಅಧ್ಯಯನ ನಡೆಸಿದ ನಂತರ ಹಿಂದುಳಿದ ವರ್ಗಗಳ ಆಯೋಗ ವರದಿ ಸಲ್ಲಿಸಬೇಕಿದೆ ಎಂದು ಶಾಸಕ ಅರವಿಂದ ಬೆಲ್ಲದ್ ಹೇಳಿದ್ದಾರೆ. ಮರಾಠ, ಅಂಬಿಗರು, ಕುರುಬರು ಹಾಗೂ ವಾಲ್ಮೀಕಿ ಸೇರಿದಂತೆ ಹಲವಾರು ಸಮಾಜಗಳ ಮೀಸಲಾತಿ ಬೇಡಿಕಗಳಿವೆ. ಇವೆಲ್ಲವನ್ನೂ ಪರಿಶೀಲಿಸಿ ಆಯೋಗ ವರದಿ ಸಲ್ಲಿಸಬೇಕಿದೆ ಎಂದವರು ತಿಳಿಸಿದ್ದಾರೆ.

ಶೇ.50ರ ಮಿತಿ ಮೀರದಂತೆ ಪಂಚಮಸಾಲಿ ಸಮಾಜಕ್ಕೆ ಮೀಸಲಾತಿ ಕಲ್ಪಿಸುವುದಕ್ಕೆ ಮಾರ್ಗೋಪಾಯಗಳನ್ನು ಕಂಡುಕೊಂಡಿದ್ದೇವೆ. ಈ ಬಗ್ಗೆ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಸೇರಿದಂತೆ ಸಂಬಂಧಿಸಿದವರ ಜೊತೆ ಚರ್ಚಿಸಲಾಗಿದ್ದು, ಮೀಸಲಾತಿ ದೊರೆಯುವ ಭರವಸೆ ಇದೆ ಎಂದಿದ್ದಾರೆ.