ಕಾಂಗ್ರೆಸ್ ಅಧಿಕಾರಕ್ಕೆ ಬಂದರೆ ಮೂರು ಕೃಷಿ ಕಾಯ್ದೆಗಳು ರದ್ದು

ಲಖ್ನೌ, ಫೆ. 10 – ಕಾಂಗ್ರೆಸ್ ಪಕ್ಷ ಅಧಿಕಾರಕ್ಕೆ ಬಂದರೆ ಕೇಂದ್ರ ಸರ್ಕಾರ ಪ್ರಸಕ್ತ ಜಾರಿಗೆ ತಂದಿರುವ ಮೂರು ಕೃಷಿ ಕಾಯ್ದೆಗಳನ್ನು ರದ್ದುಗೊಳಿಸಲಾಗುವುದು ಎಂದು ಕಾಂಗ್ರೆಸ್ ನಾಯಕಿ ಪ್ರಿಯಾಂಕಾ ಗಾಂಧಿ ವಾದ್ರಾ ಹೇಳಿದ್ದಾರೆ.

ಉತ್ತರ ಪ್ರದೇಶದ ಸಹರಾನ್‌ಪುರದಲ್ಲಿ ಪಕ್ಷ ಆಯೋಜಿಸಿದ್ದ ಕಿಸಾನ್ ಪಂಚಾಯತ್‌ನಲ್ಲಿ ಪಾಲ್ಗೊಂಡು ಮಾತನಾಡುತ್ತಿದ್ದ ಅವರು, ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಹಾಗೂ ಬಿಜೆಪಿ ನಾಯಕರು ಪ್ರತಿಭಟನಾ ನಿರತ ರೈತರನ್ನು ಅವಮಾನಿಸುತ್ತಿದ್ದಾರೆ ಎಂದು ಹೇಳಿದ್ದಾರೆ. 

ಮೂರು ಕೃಷಿ ಕಾಯ್ದೆಗಳು ಕರಾಳವಾಗಿವೆ. ಕಾಂಗ್ರೆಸ್ ಅಧಿಕಾರಕ್ಕೆ ಬಂದರೆ ಈ ಕಾಯ್ದೆಗಳನ್ನು ರದ್ದುಗೊಳಿಸಲಿದೆ. ಈ ಕಾಯ್ದೆಗಳು ರದ್ದಾಗುವವರೆಗೂ ಪಕ್ಷ ಹೋರಾಟ ನಡೆಸುವುದನ್ನು ಮಂದುವರೆಸಲಿದೆ ಎಂದವರು ತಿಳಿಸಿದ್ದಾರೆ.

ರೈತರ ‘ಮನ್ ಕಿ ಬಾತ್’ ಆಲಿಸುತ್ತಿಲ್ಲ

ಕಾರ್ಪೊರೇಟ್‌ಗಳಿಗೆ ಗರಿಷ್ಠ ಬೆಲೆ ಕೊಟ್ಟರೂ, ರೈತರಿಗೆ ಕನಿಷ್ಠ ಬೆಲೆ ಇಲ್ಲ – ಕಾಂಗ್ರೆಸ್ ಆರೋಪ

ನವದೆಹಲಿ, ಫೆ. 19 – ದೆಹಲಿ ಗಡಿಗಳಲ್ಲಿ ಪ್ರತಿಭಟನೆ ನಡೆಸುತ್ತಿರುವ ರೈತರ ‘ಮನ್ ಕಿ ಬಾತ್’ ಅನ್ನು ಕೇಂದ್ರ ಸರ್ಕಾರ ಆಲಿಸುತ್ತಿಲ್ಲ ಎಂದು ರಾಜ್ಯಸಭೆಯಲ್ಲಿ ತರಾಟೆಗೆ ತೆಗೆದುಕೊಂಡಿರುವ ಕಾಂಗ್ರೆಸ್, ದೊಡ್ಡ ಕಾರ್ಪೊರೇಟ್‌ಗಳು ಗರಿಷ್ಠ ಬೆಲೆಯನ್ನು ಕೇಳುತ್ತಿವೆ. ರೈತರು ಕನಿಷ್ಠ ಬೆಲೆಯನ್ನು ಮಾತ್ರ ಕೇಳುತ್ತಿದ್ದಾರೆ ಎಂದು ಹೇಳಿದೆ.

ಬಜೆಟ್ ಕುರಿತ ಚರ್ಚೆಯಲ್ಲಿ ಮಾತನಾಡಿದ ಕಾಂಗ್ರೆಸ್ ನಾಯಕ ಕಪಿಲ್ ಸಿಬಾಲ್, ಮೂರು ಕೃಷಿ ಸುಧಾರಣಾ ಕಾಯ್ದೆಗಳ ಮೂಲಕ ಸರ್ಕಾರ ನಡೆಸುತ್ತಿರುವ ಪ್ರಯೋಗವನ್ನು ಈಗಾಗಲೇ ಅಮೆರಿಕ ಹಾಗೂ ಯುರೋಪ್‌ಗಳಲ್ಲಿ ನಡೆಸಲಾಗಿದೆ. ಇದರಿಂದಾಗಿ ಕೃಷಿಯ ಕಾರ್ಪೊರೇಟೀಕರಣ ವಾಗಿದೆ ಎಂದರು.

ಖಾಸಗಿ ವ್ಯಾಪಾರಿಗಳ ಮೂಲಕ ರೈತರಿಗೆ ಹೆಚ್ಚಿನ ಕನಿಷ್ಠ ಬೆಂಬಲ ಬೆಲೆ ಸಿಗಲಿದೆ ಎಂದು ಸರ್ಕಾರ ಹೇಳುತ್ತಿದೆ. ಸರ್ಕಾರ 22 ಬೆಳೆಗಳಿಗೆ ಕನಿಷ್ಠ ಬೆಂಬಲ ಬೆಲೆ ನಿಗದಿ ಪಡಿಸಿದ್ದರೂ ಕೇವಲ ಗೋಧಿ, ಅಕ್ಕಿ ಹಾಗೂ ಕೆಲವು ಬೇಳೆಗಳನ್ನು ಮಾತ್ರ ಖರೀದಿಸುತ್ತಿದೆ ಎಂದವರು ಹೇಳಿದ್ದಾರೆ.

ಸರ್ಕಾರ ರೈತರ ಮನ್ ಕಿ ಬಾತ್ ಆಲಿಸುತ್ತಿಲ್ಲ. ನೀವು ಸದಾ ನಿಮ್ಮ ಮನ್ ಕಿ ಬಾತ್ ಮಾತನಾಡುತ್ತೀರಿ. ರೈತರು ಕನಿಷ್ಠ ಬೆಂಬಲ ಬೆಲೆ ಕಾಯ್ದೆ ಕೇಳುತ್ತಿದ್ದಾರೆ ಎಂದು ಸಿಬಾಲ್ ತಿಳಿಸಿದ್ದಾರೆ.

ಚೀನಾ, ಅಮೆರಿಕ ಹಾಗೂ ಯುರೋಪ್‌ಗಳಿಗೆ ಹೋಲಿಸಿದರೆ ಭಾರತದಲ್ಲಿ ರೈತರಿಗೆ ಸಿಗುತ್ತಿರುವ ಸಬ್ಸಿಡಿ ಕಡಿಮೆ ಇದೆ. ಅಮೆರಿಕದಲ್ಲಿ ಪ್ರತಿ ರೈತನಿಗೆ ಸರ್ಕಾರ ವರ್ಷಕ್ಕೆ 62 ಸಾವಿರ ಡಾಲರ್ ಸಬ್ಸಿಡಿ ನೀಡುತ್ತಿದೆ. ನೀವು ರೈತರಿಗೆ ಕನಿಷ್ಠ ಬೆಂಬಲ ಬೆಲೆಯನ್ನೂ ಕೊಡುತ್ತಿಲ್ಲ. ರೈತರು ಹೆಚ್ಚೇನೂ ಕೇಳುತ್ತಿಲ್ಲ, ನಿಮ್ಮ ಕಾರ್ಪೊರೇಟ್‌ಗಳು ಕೇಳುತ್ತಾರೆ. ಕಾರ್ಪೊರೇಟ್‌ಗಳು ತೆರಿಗೆ ಪರಿಹಾರ ಹಾಗೂ ವಿನಾಯಿತಿ ಕೇಳಿದಾಗ ಸರ್ಕಾರ ಕೊಡುತ್ತದೆ. ಆದರೆ, ರೈತರು ಕನಿಷ್ಠ ಬೆಂಬಲ ಬೆಲೆ ಕೇಳಿದಾಗ ನೀವು ಕೊಡಲು ಸಿದ್ಧರಿಲ್ಲ. ರೈತರು ಕನಿಷ್ಠ ಕೇಳುತ್ತಿದ್ದಾರೆ, ನೀವು ಕಾರ್ಪೊರೇಟ್‌ಗಳಿಗೆ ಗರಿಷ್ಠ ಕೊಡುತ್ತಿದ್ದೀರಿ ಎಂದವರು ಆರೋಪಿಸಿದರು.

ಭಾರತ ರೈತರಿಗೆ 11 ಶತಕೋಟಿ ಡಾಲರ್ ಸಬ್ಸಿಡಿ ಕೊಡುತ್ತಿದೆ. ಚೀನಾದಲ್ಲಿ ಸಬ್ಸಿಡಿ 185.9 ಶತಕೋಟಿ ಡಾಲರ್, ಯುರೋಪ್‌ನಲ್ಲಿ 101.2 ಶತಕೋಟಿ ಡಾಲರ್ ಹಾಗೂ ಅಮೆರಿಕದಲ್ಲಿ 48.9 ಶತಕೋಟಿ ಡಾಲರ್ ಎಂದವರು ಹೇಳಿದರು.

ನೂತನ ಕೃಷಿ ಕಾಯ್ದೆಗಳಿಂದ ಭಾರತೀಯ ಕೃಷಿಯ ಕಾರ್ಪೊರೇಟೀಕರಣವಾಗಲಿದೆ ಎಂದು ಕಳವಳ ವ್ಯಕ್ತಪಡಿಸಿದ ಸಿಬಾಲ್, ಕಾರ್ಪೊರೇಟೀಕರಣದಿಂದ ಅಮೆರಿಕದ ಜನರಲ್ಲಿ ಶೇ.1.5ರಷ್ಟು ಜನರು ಮಾತ್ರ ಕೃಷಿಯಲ್ಲಿ ಉಳಿದಿದ್ದಾರೆ. ಭಾರತದಲ್ಲಿ ಶೇ.50ರಷ್ಟು ಜನ ಕೃಷಿಯಲ್ಲಿದ್ದಾರೆ ಎಂದು ಹೇಳಿದ್ದಾರೆ.

2020ರಲ್ಲಿ ಅಮೆರಿಕದ ರೈತರು 425 ಶತಕೋಟಿ ಡಾಲರ್‌ಗಳಿಗೂ ಹೆಚ್ಚಿನ ದಿವಾಳಿಗೆ ಗುರಿಯಾಗಿದ್ದಾರೆ. ಇದು ಕಾರ್ಪೊರೇಟೀಕರಣದ ಪರಿಣಾಮ. ಅಮೆರಿಕದಲ್ಲಿ ನಗರ ಪ್ರದೇಶಗಳಿಗಿಂತ ಗ್ರಾಮೀಣ ಭಾಗದಲ್ಲಿ ಆತ್ಮಹತ್ಯೆ ಪ್ರಮಾಣ ಶೇ.45ರಷ್ಟು ಹೆಚ್ಚಾಗಿದೆ. ಅಲ್ಲಿ ಸಣ್ಣ ಜಮೀನು ಕಣ್ಮರೆಯಾಗಿವೆ ಎಂದವರು ಹೇಳಿದರು.

ಕೃಷಿ ಕಾಯ್ದೆಗಳ ವಿರುದ್ಧ 18ರಂದು ರೈಲು ತಡೆ

ನವದೆಹಲಿ, ಫೆ. 10 – ಬರುವ ಫೆಬ್ರವರಿ 18ರಂದು ದೇಶಾದ್ಯಂತ ನಾಲ್ಕು ಗಂಟೆ ರಸ್ತೆ ತಡೆ ನಡೆಸುವುದಾಗಿ ಹಾಗೂ ಫೆ.14ರಂದು ಪುಲ್ವಾಮಾ ದಾಳಿಯಲ್ಲಿ ಹತರಾದ ಸೈನಿಕರಿಗೆ ಮೇಣದ ಬತ್ತಿ ಬೆಳಕಿನ ಮೂಲಕ ನಮನ ಸಲ್ಲಿಸುವುದಾಗಿ ಪ್ರತಿಭಟ ನಾ ನಿರತ ರೈತ ಸಂಘಟನೆಗಳು ತಿಳಿಸಿವೆ.

ಈ ಬಗ್ಗೆ ಹೇಳಿಕೆ ನೀಡಿರುವ ರೈತ ಸಂಘಟನೆಗಳ ಒಕ್ಕೂಟವಾದ ಸಂಯುಕ್ತ ಕಿಸಾನ್ ಮೋರ್ಚಾ, ಫೆಬ್ರವರಿ 12ರಿಂದ ರಾಜಸ್ತಾನದಲ್ಲಿ ಟೋಲ್ ಸಂಗ್ರಹಕ್ಕೆ ಅವಕಾಶ ಕೊಡುವುದಿಲ್ಲ ಎಂದು ತಿಳಿಸಿದೆ.

ಬುಧವಾರ ಸಭೆ ನಡೆಸಿದ ರೈತ ಸಂಘಟನೆಗಳು ಪ್ರತಿಭಟನೆ ತೀವ್ರಗೊ ಳಿಸಲು ನಿರ್ಧರಿಸಿವೆ. ಫೆಬ್ರವರಿ 18ರ ಮಧ್ಯಾಹ್ನ 12ರಿಂದ ಸಂಜೆ 4ರವರೆಗೆ ರೈಲು ತಡೆ ನಡೆಸಲಾಗುವುದು ಎಂದು ಸಂಘ ಟನೆಯ ಹೇಳಿಕೆಯಲ್ಲಿ ತಿಳಿಸಲಾಗಿದೆ.

ಕಾಶ್ಮೀರದ ಪುಲ್ವಾಮಾ ಉಗ್ರವಾದಿ ದಾಳಿಯಲ್ಲಿ ಫೆಬ್ರವರಿ 14, 2019ರಂದು ಹುತಾತ್ಮರಾದ 40 ಸಿ.ಆರ್.ಪಿ.ಎಫ್. ಸಿಬ್ಬಂದಿಯ ಬಲಿದಾನಕ್ಕೆ ನಮಿಸಲು ಫೆ.14ರಂದು ಮೇಣದ ದೀಪಗಳ ಮೆರವಣಿಗೆ ಹಾಗೂ ಪಂಜಿನ ಮೆರವಣಿಗೆ ಸೇರಿದಂತೆ ಹಲವು ಕಾರ್ಯಕ್ರಮ ಹಮ್ಮಿಕೊಳ್ಳಲಾಗುವುದು ಎಂದು ಸಂಘಟನೆಯ ನಾಯಕ ದರ್ಶನ್ ಪಾಲ್ ತಿಳಿಸಿದ್ದಾರೆ.

ಸ್ವಾತಂತ್ರ್ಯ ಪೂರ್ವದಲ್ಲಿ ಹಿರಿಯ ರೈತ ನಾಯಕರಾಗಿದ್ದ ಸರ್ ಛೋಟು ರಾಮ್ ಅವರ ಜನ್ಮದಿನಾಚರಣೆಯಾದ ಫೆಬ್ರವರಿ 16ರಂದು ಕಾರ್ಯಕ್ರಮಗಳನ್ನು ಆಯೋಜಿಸಲಾಗುವುದು ಎಂದೂ ಅವರು ತಿಳಿಸಿದ್ದಾರೆ.