ದಾವಣಗೆರೆ, ಮೇ 10- ಜಿಲ್ಲೆಯಲ್ಲಿ ಶಾಂತಿಯುತ ಮತದಾನ ನಡೆದಿದ್ದು, ಶೇ. 77.20 ರಷ್ಟು ಮತದಾರರು ತಮ್ಮ ಹಕ್ಕು ಚಲಾಯಿಸಿದ್ದಾರೆ. ಕಳೆದ ಬಾರಿ ಶೇ.75.59 ರಷ್ಟು ಮತದಾನವಾಗಿದ್ದರೆ, 2013ರ ವಿಧಾನಸಭಾ ಚುನಾವಣೆಯಲ್ಲಿ ಶೇ.75.98ರಷ್ಟು ಮತದಾನವಾಗಿತ್ತು.

ಬೆಳಿಗ್ಗೆ 7 ಗಂಟೆಗೆ ಮತದಾನ ಆರಂಭವಾಯಿತು. ಇದಕ್ಕೂ ಮುನ್ನ ಮತಗಟ್ಟೆಗಳಲ್ಲಿ ಅಣಕು ಮತದಾನ ನಡೆಯಿತು. ಬೆಳಿಗ್ಗೆಯಿಂದಲೇ ಮತದಾರರು ಸರದಿ ಸಾಲಿನಲ್ಲಿ ನಿಂತು ಹುರುಪಿನಿಂದ ಮತ ಚಲಾಯಿಸಿದರು.  ಕೆಲವರು ಕಾರ್ಡ್ ಇದ್ದರೂ ಮತದಾರರ ಪಟ್ಟಿಯಲ್ಲಿ ಹೆಸರಿಲ್ಲ ಎಂಬ ಕಾರಣಕ್ಕೆ ನಿರಾಶೆಯಿಂದ ಮನೆ ಕಡೆ ಹೆಜ್ಜೆ ಹಾಕಿದ್ದಾರೆ.

ಒಟ್ಟಾರೆ  ಜಿಲ್ಲೆಯಲ್ಲಿ 7,21,964 ಪುರುಷ, 7,20,004 ಮಹಿಳೆಯರು, 118 ಇತರೆ ಸೇರಿ 14,42,086 ಮತದಾರರಲ್ಲಿ 5,64,256 ಪುರುಷ, 5,49,115 ಮಹಿಳೆಯರು ಹಾಗೂ 23 ಇತರೆ ಮತದಾರರು ಸೇರಿ ಒಟ್ಟು 11,13,394 ಜನರು ಮತದಾನ ಮಾಡಿದ್ದಾರೆ. 

ಜಗಳೂರು ಕ್ಷೇತ್ರದಲ್ಲಿ ಶೇ.80.17, ಹರಿಹರ  ಶೇ.79.78, ದಾವಣಗೆರೆ ಉತ್ತರ ಶೇ.67.49, ದಾವಣಗೆರೆ ದಕ್ಷಿಣ ಶೇ. 66.32, ಮಾಯಕೊಂಡ ಶೇ.83.89, ಚನ್ನಗಿರಿ ಶೇ. 81.94 ಹಾಗೂ ಹೊನ್ನಾಳಿ ಕ್ಷೇತ್ರದಲ್ಲಿ  ಶೇ 83.78 ರಷ್ಟು ಮತದಾನವಾಗಿದೆ.

ಬೆಳಗ್ಗೆ 9 ಗಂಟೆಯ ವೇಳೆಗೆ ದಾವಣಗೆರೆ ಜಿಲ್ಲೆಯ 7 ಕ್ಷೇತ್ರಗಳಿಂದ 100792 ಮತದಾರರು ಮತದಾನ ಮಾಡಿ ಶೇ 6.99 ಮತದಾನವಾಗಿತ್ತು.

ಮತದಾನ ದಿನ ಎಲ್ಲಾ ಸರ್ಕಾರಿ ಕಚೇರಿಗಳಿಗೆ, ಶಾಲಾ, ಕಾಲೇಜುಗಳಿಗೆ ರಜೆ ಮತ್ತು ಸಾರ್ವಜನಿಕ, ಖಾಸಗಿ ಕೈಗಾರಿಕೆಗಳಿಗೆ ಹಾಗೂ ಎಲ್ಲಾ ಅಂಗಡಿ ಮುಂಗಟ್ಟುಗಳಿಗೆ ರಜೆ ನೀಡಿದ್ದರಿಂದ ಕುಟುಂಬ ಸಮೇತರಾಗಿ ಬೆಳಗಿನ ಉಪಹಾರ ಮುಗಿಸಿ ಮತದಾನ ಕೇಂದ್ರದತ್ತ ಹೆಜ್ಜೆ ಹಾಕಿದರು.

ಮಧ್ಯಾಹ್ನ 11 ಗಂಟೆಯ ವೇಳೆಗೆ 2,99,670 ಜನರು ಮತದಾನ ಮಾಡಿ ಶೇ20.78 ಕ್ಕೆ ತಲುಪಿತು. ಮಧ್ಯಾಹ್ನ 1 ಗಂಟೆಯ ವೇಳೆ 5,57,261 ಜನರು ಮತದಾನ ಮಾಡಿ ಶೇ.38.64 ಕ್ಕೆ ತಲುಪಿತು.

ಸಂಜೆ 5 ಗಂಟೆಯ ವೇಳೆಗೆ 10,18,309 ಮತದಾರರು ಮತದಾನ ಮಾಡಿದ್ದರು. ಪ್ರಮಾಣ ಶೇ.70.61 ಕ್ಕೆ ತಲು ಪಿತು. ಅಂತಿಮವಾಗಿ ಶೇ.77.20ರಷ್ಟು ಮತದಾನವಾಯಿತು.