ದುಬಾರಿಯಾಗುತ್ತಿರುವ ಜೀವನ, ದುಬಾರಿ ಶಿಕ್ಷಣದಿಂದ ಮನೆಗೊಂದು ಮಗು ಸಾಕು ಎನ್ನುವವರ ಸಂಖ್ಯೆ ಹೆಚ್ಚಾಗುತ್ತಿದೆ. ಈಗ ಕೊರೊನಾದಿಂದ ಮಗುವೊಂದು ಹೊರೆ ಎನ್ನುವವರ ಸಂಖ್ಯೆ ಹೆಚ್ಚಾದರೆ ಅಚ್ಚರಿ ಪಡಬೇಕಿಲ್ಲ

ಕೊರೊನಾದ ಮೂರನೇ ಅಲೆ ಮಕ್ಕಳ ಮೇಲೆ ಪರಿಣಾಮ ಬೀರುತ್ತದೆ ಎಂದು ಕೆಲವರು ಆಧಾರ ರಹಿತವಾಗಿ ಬೊಬ್ಬೆ ಹಾಕುತ್ತಿದ್ದಾರೆ. ಆದರೆ, ವಾಸ್ತವಿಕವಾಗಿ ಮೂರನೇ ಅಲೆ ಬರುವುದಕ್ಕೆ ಮೊದಲೇ ಮಕ್ಕಳ ಮೇಲೆ ಪರಿಣಾಮವಾಗುತ್ತಿದೆ, ಅದೂ ಹುಟ್ಟದೇ ಇರುವ ಮಕ್ಕಳು!

ಇದೇನು ಎಡವಟ್ಟಿನ ಮಾತು ಎಂದಿರಾ? ಅದೇನೆಂದರೆ ಯುರೋಪ್‌ನಲ್ಲಿ ಕೊರೊನಾ ಅಲೆಯಿಂದ ಉಂಟಾದ ಆರ್ಥಿಕ ಹೊಡೆತದಿಂದ ತತ್ತರಿಸಿರುವ ಮಹಾಜನತೆ, ಮಕ್ಕಳನ್ನು ಮಾಡಿಕೊಳ್ಳುವುದಕ್ಕೆ ಮನಸ್ಸು ಮಾಡುತ್ತಿಲ್ಲವೆಂದು ವರದಿಗಳು ಬಂದಿವೆ.

ಕೊರೊನಾ ಬಂದಾಗ, ಲಾಕ್‌ಡೌನ್‌ನಿಂದ ಜನ ಮನೆಯಲ್ಲಿರುತ್ತಾರೆ. ಮಕ್ಕಳ ಜನನ ಹೆಚ್ಚಾಗುತ್ತದೆ ಎಂಬ ನಿರೀಕ್ಷೆ ಇತ್ತು. ಆದರೆ, ಉಲ್ಟಾ ಪರಿಸ್ಥಿತಿ ಆಗುತ್ತಿದೆ. ಅನಿಶ್ಚಿತತೆಯ ದಿನಗಳಲ್ಲಿ ಮಕ್ಕಳನ್ನು ಮಾಡಿಕೊಳ್ಳುವ ಗೊಡವೆ ಬೇಡ ಎಂದು ಯುರೋಪ್ ಜನತೆ ನಿರ್ಧರಿಸಿರುವಂತಿದೆ.

ಕೊರೊನಾಗೆ ಮೊದಲೇ ಯುರೋಪ್‌ ಜನಸಂಖ್ಯೆ ಇಳಿಮುಖವಾಗಿತ್ತು. ಜರ್ಮನಿಯಂತಹ ದೇಶಗಳು ಸಾಕಷ್ಟು ದಿನಗಳಿಂದ ಜನಸಂಖ್ಯೆ ಕುಸಿತದ ಸಮಸ್ಯೆ ಎದುರಿಸುತ್ತಿವೆ. ಕೊರೊನಾ ಈ ಸಮಸ್ಯೆ ಇನ್ನಷ್ಟು ಉಲ್ಬಣಿಸುವಂತೆ ಮಾಡಿದೆ. ಒಟ್ಟಾರೆ, ಕೊರೊನಾದಿಂದ ಉಂಟಾಗುವ ಸಾವುಗಳಿಗಿಂತಲೂ, ಕೊರೊನಾದ ಪರಿಣಾಮಗಳು ದೂರಗಾಮಿಯಾಗಿ ಕಾಡುವ ಲಕ್ಷಣಗಳು ಕಂಡು  ಬರುತ್ತಿವೆ.

ಕೊರೊನಾದಿಂದ ಸಾವುಗಳು ಹೆಚ್ಚಾಗಿವೆ. ಆದರೆ, ದೀರ್ಘಾವಧಿಯಲ್ಲಿ ಇದರ ಪರಿಣಾಮ ಹೆಚ್ಚೇನೂ ಅಲ್ಲ. ಆದರೆ, ಮಕ್ಕಳ ಜನನ ಕುಸಿತ ದೊಡ್ಡ ಸಮಸ್ಯೆಯಾಗಲಿದೆ. ಈ ಹಿಂದೆ 2008ರ ಹಣಕಾಸು ಬಿಕ್ಕಟ್ಟು ಸಮಯದಲ್ಲೂ ಮಕ್ಕಳ ಜನನ ಕಡಿಮೆಯಾಗಿತ್ತು ಎಂದು ಸ್ಟಾಕ್‌ಹೋಮ್‌ ವಿಶ್ವವಿದ್ಯಾನಿಲಯದ ಜನಸಂಖ್ಯಾ ವಿಭಾಗದ ಮುಖ್ಯಸ್ಥರಾಗಿರುವ ಪ್ರೊ. ಗುನ್ನಾರ್ ಆಂಡರ್‌ಸನ್‌ ಹೇಳಿದ್ದಾರೆ.

ಭವಿಷ್ಯದ ಅನಿಶ್ಚಿತತೆ ಕಾರ್ಮಿಕರ ಬೇಡಿಕೆ ಅಸ್ಥಿರಗೊಳಿಸಿದೆ. ಸರ್ಕಾರಗಳು ವೆಚ್ಚ ಕಡಿಮೆ ಮಾಡುತ್ತಿವೆ. ಇದರಿಂದಾಗಿ ಜನರು ಬಿಕ್ಕಟ್ಟಿನ ಸಮಯದಲ್ಲಿ ಮಕ್ಕಳನ್ನು ಹೊಂದುವಂತಹ ಗಂಭೀರ ನಿರ್ಧಾರ ತೆಗೆದುಕೊಳ್ಳಲು ಹಿಂಜರಿಯುತ್ತಿದ್ದಾರೆ.

ಆಸ್ಪತ್ರೆಗಳು ಕೊರೊನಾ ರೋಗಿಗಳಿಲ್ಲದೇ ಬಣಗುಟ್ಟುತ್ತಿವೆ. ಜನರು ಆರೋಗ್ಯವಾಗಿ ನೆಮ್ಮದಿಯಾಗಿದ್ದಾರೆ. ಕೆಲಸ ಕಾರ್ಯಗಳು ಸುಸೂತ್ರವಾಗಿ ನಡೆಯುತ್ತಿವೆ. ಎನ್ನುವಷ್ಟರಲ್ಲಿ ಓಮಿಕ್ರಾನ್ ರೂಪಾಂತರಿ ಭೂತ ಟಿವಿ ಮಾಧ್ಯಮ ಹಾಗೂ ಸಾಮಾಜಿಕ ಮಾಧ್ಯಮಗಳಲ್ಲಿ ಭುಗಿಲೆದ್ದಿದೆ. ಓಮಿಕ್ರಾನ್ ತೀವ್ರವೇ – ಅಲ್ಲವೇ ಎಂಬುದು ಸ್ಪಷ್ಟವಾಗಲು ವಾರಗಳು ಬೇಕು ಎಂದು ಪರಿಣಿತರು ಹೇಳುತ್ತಿದ್ದಾರಾದರೂ, ಟಿ.ವಿ. – ಸಾಮಾಜಿಕ ಮಾಧ್ಯಮಗಳಲ್ಲಿ ರೂಪಾಂತರಿ ಈಗಾಗಲೇ ರೌದ್ರಾವತಾರ ತಾಳಿದೆ. 

ಕೆಲವು ಮಾಧ್ಯಮಗಳಂತೂ ತೆಗೆದುಕೊಳ್ಳಬೇಕಾದ ಲಾಕ್‌ಡೌನ್‌ ಶಂಕೆಗಳ ಕುರಿತು ಬಿತ್ತರಿಸುತ್ತಿವೆ. ದೇಶದಲ್ಲಿ ಕಂಡು ಬರುವ ದೈನಂದಿನ ಕೊರೊನಾ ಪ್ರಕರಣ ಸಂಖ್ಯೆ ಕೇವಲ 7 ಸಾವಿರಕ್ಕೆ ಕುಸಿದಿರುವ ಹಾಗೂ ದೇಶದಲ್ಲಿ ಓಮಿಕ್ರಾನ್ ರೂಪಾಂತರಿಯ ಒಂದೂ ಪ್ರಕರಣ ಕಂಡು ಬರದ ಸಮಯದಲ್ಲೇ, ಲಾಕ್‌ಡೌನ್‌ ಬಗ್ಗೆ ಮಾತನಾಡುತ್ತಿರುವುದು ಯಾವ ಜನ್ಮದ ಕರ್ಮವೋ ಗೊತ್ತಿಲ್ಲ.

ವೈರಸ್‌ಗಳು ರೂಪಾಂತರಿಯಾಗುವುದು ಸರ್ವೇ ಸಾಮಾನ್ಯ. ತಿಂಗಳಿಗೊಂದಿಷ್ಟು ಹುಟ್ಟಿಕೊಳ್ಳುವ ರೂಪಾಂತರಿಗಳು, ಅದೇ ವೇಗದಲ್ಲಿ ಹೇಳ ಹೆಸರಿಲ್ಲದಂತಾಗುತ್ತವೆ. ರೂಪಾಂತರಿಗಳು ನಿಜಕ್ಕೂ ಅಪಾಯಕಾರಿಯೇ ಎಂಬುದನ್ನು ಅರ್ಥ ಮಾಡಿಕೊಳ್ಳಲು ಕನಿಷ್ಠ ಮೂರ್ನಾಲ್ಕು ವಾರ ಬೇಕು ಎಂದು ಪರಿಣಿತರು ಹೇಳುತ್ತಾರೆ.

ಪ್ರತಿ ವಾರ ಶೇ.5ರಷ್ಟು ಮಕ್ಕಳನ್ನು ಕೊರೊನಾ ಪರೀಕ್ಷೆಗೆ ಗುರಿ ಪಡಿಸುವಂತೆ ತಜ್ಞರು ಶಿಫಾರಸ್ಸು ಮಾಡಿದ್ದಾರೆ ಎಂಬ ವರದಿಗಳು ಬಂದಿವೆ. (ಅಂದ ಹಾಗೆ, ಕೊರೊನಾ ಮೂರನೇ ಅಲೆ ಅಕ್ಟೋಬರ್‌ಗೆ ಬರುತ್ತದೆ ಎಂದು ಇದೇ ತಜ್ಞರು ಹೇಳಿದ್ದರು. ಆ ಅಲೆ ಎಲ್ಲಿ ಹೋಯಿತೋ ಗೊತ್ತಿಲ್ಲ) ಶಾಲೆಗಳಲ್ಲಿ ಪತ್ತೆಯಾದ ಸೋಂಕಿತರಲ್ಲಿ ಬಹುತೇಕರು ಲಕ್ಷಣ ರಹಿತರಾಗಿದ್ದಾರೆ. ಅದರಲ್ಲೂ, ಮಕ್ಕಳು ಕೊರೊನಾವನ್ನು ಚಿಟಿಕೆ ಹೊಡೆದಷ್ಟು ಸುಲಭವಾಗಿ ಎದುರಿಸುತ್ತಾರೆ ಎಂಬುದು ಈಗಾಗಲೇ ಸಾಬೀತಾಗಿದೆ. ಅಲ್ಲದೇ, ಕೊರೊನಾ ರೋಗಿಗಳಿಲ್ಲದೇ ಆಸ್ಪತ್ರೆಗಳೂ ಖಾಲಿ ಹೊಡೆಯುತ್ತಿವೆ. ಒಬ್ಬಿಬ್ಬರು ಮಕ್ಕಳಿಗೆ ಸೋಂಕು ತೀವ್ರವಾದರೂ, ಚಿಕಿತ್ಸೆ ಕೊಡಿಸಲು ತೊಂದರೆಯೇನೂ ಇಲ್ಲ.

ಇಷ್ಟಾದರೂ, ಮಕ್ಕಳಿಗಷ್ಟೇ ಶಾಲೆಗಳಲ್ಲಿ ಕಡ್ಡಾಯ ಟೆಸ್ಟ್‌ ಮಾಡಿಸಬೇಕಂತೆ. ಶಾಲೆಗಳಲ್ಲಿ ಸಮಾರಂಭ ಮಾಡಬಾರದಂತೆ. ಚುನಾವಣಾ ಪ್ರಚಾರದ ಮೇಲೆ ನಿರ್ಬಂಧವಿಲ್ಲ, ಚುನಾವಣಾ ಪ್ರಚಾರಕ್ಕೆ ಗುಂಪು ಗೂಡುವವರನ್ನು ಪರೀಕ್ಷೆಗೆ ಒಳಪಡಿಸಬೇಕಿಲ್ಲ! ಎರಡು ವರ್ಷಗಳಿಂದ ಮಕ್ಕಳು ಶಿಕ್ಷಣದಿಂದ ವಂಚಿತರಾಗಿದ್ದಾರೆ. ಮೂರನೇ ಅಲೆ ಮಕ್ಕಳಿಗೆ ಎಂದ ಕೆಲವು ಮಹಾಮೂರ್ಖರು, ಶಾಲೆ ತೆರೆಯುವುದನ್ನು ವಿಳಂಬ ಮಾಡಲು ಕಾರಣರಾಗಿದ್ದರು. ಮಕ್ಕಳ ಭವಿಷ್ಯದ ದಾರಿ ತಪ್ಪಿಸಲು ಅಗತ್ಯವಾದ ಖೆಡ್ಡಾಗಳನ್ನು ಈಗಾಗಲೇ ತೋಡಿಯಾಗಿದೆ. ಇನ್ನೊಮ್ಮೆ ಶಾಲಾ – ಕಾಲೇಜುಗಳನ್ನು ಬಂದ್ ಮಾಡುವುದು ಎಂದರೆ ಮಕ್ಕಳನ್ನು ಖೆಡ್ಡದಲ್ಲಿ ದಬ್ಬಿ ಅವರ ಮೇಲೆ ಮಣ್ಣು ಮುಚ್ಚಿ ಸಮಾಧಿ ಮಾಡಿದಂತೆ. 

 

ಸರ್ಕಾರಕ್ಕೆ ಕೊರೊನಾ ತಡೆಯುವ ಕಳಕಳಿ ಇದ್ದರೆ, ಮೊದಲು ಬಾರ್ – ರೆಸ್ಟೋರೆಂಟ್‌ಗಳಲ್ಲಿ ಸಾಮೂಹಿಕ ಟೆಸ್ಟ್‌ ಮಾಡಿಸಲಿ. ಪರಿಷತ್ ಚುನಾವಣಾ ಪ್ರಚಾರ ಸಭೆಗಳಲ್ಲಿ ಟೆಸ್ಟ್ ಕಡ್ಡಾಯಗೊಳಿಸಲಿ. ಸಿನೆಮಾ ಸೇರಿದಂತೆ ಮೋಜಿನ ತಾಣಗಳಿಗೆ ಬರುವವರು ಟೆಸ್ಟ್‌ಗೆ ಒಳಗಾಗಲು ಹೇಳಲಿ. ಅದನ್ನೆಲ್ಲ ಬಿಟ್ಟು, ಕೊರೊನಾದ ಅತಿ ಕಡಿಮೆ ಅಪಾಯ ಇರುವ ಮಕ್ಕಳಲ್ಲಿ ಸೋಂಕು ಹುಡುಕುವ ಚಟ ಬಿಡಲಿ.