ದಾಹಕೋ, ಮೋಹಕೋ
ಹಸಿವಿಗೋ, ಕಸುವಿಗೋ;
ದುರಾಸೆಯುರಗ ತನ್ನ ಬಾಲವನ್ನು
ತಾನೇ ತಿಂದು ಸ್ವಾಹ…ಸ್ವಾಹ….!
ನಿಧಿಯಾಸೆಗೆ ಕರುಳ ಬಳ್ಳಿಯ
ಬಲಿ ಕೊಟ್ಟಂತೆ……?

ಮುಗಿಲೆತ್ತರದ ಮಹಲಿನಡಿ
ಕೂಲಿಗಳ ಹೆಣದ ಅಡಿಪಾಯ,
ನೆತ್ತರದ ನೆರಳಡಿ ಉಳಿದವರ
ಊಳಿಗದವರ ಉಸಿರಿಗೂ ಅಪಾಯ….

ನಮ್ಮೂರ ಗಡಿ ಸಾಲು, ಕೆರೆ-ಕುಂಟೆ,
ಗೋಮಾಳದ ಬಯಲಿಗೆ
ಉತ್ತರದ ತಕ್ಕಡಿಯ ತುಕಡಿಗಳ ಸಾಲು,
ಯಾಮಾರಿದರೆ ಭವಿಷ್ಯದ ಕೈಗೆ
ದಾಸ್ಯದ ಕಿಲುಬು ಹಿಡಿದ ಕೀಲು…..!?

ದುರಹಂಕಾರದಮಲಿನ
ಕತ್ತಲೆ ಬೆಳಕನ್ನೇ ನುಂಗಿ
ಬೆತ್ತಲೆಗೆ ಬೇಷರತ್ ಬೆಲೆ ಕಟ್ಟಿ;
ಹರಾಜು ರಾಜಾರೋಷ ತುಟ್ಟಿ!
ಕೆಂಪು ದೀಪವೂ ನಾಚಿ
ಕುಳಿತಿದೆ ಕೈ ಕಟ್ಟಿ….

ತೆರೆ-ಮರೆಯ ಮಾಯದ ಮೋಸದ
ಕೆಂಪು ಬಿಂದು ಮಹಾಸಿಂಧುವನೇ
ನುಂಗಲೆತ್ನಿಸಿದೆ ನೆಕ್ಕುತ ಮುಕ್ಕುತ….!
ಸಲುಗೆಯ ನೆಪದಿ ಬೇಲಿ ಬದಿಯ                           

ನಯ ವಂಚಕ ಹಾವು
ಕರಿ ಮೋಡದ ಮಿಂಚಿನಂಚಲಿ
ಸಂಚಿನ ಹಗ್ಗ ಹೊಸೆಯುತಿಹುದು,
ಹಿಂದೆ ಸರಿಯದೆ ಹೆಡೆಮುರಿ
ಕಟ್ಟುವುದೊಂದೇ ಬಾಕಿ ಉಳಿದಿಹುದು…..!?

---

ಮಹಾಂತೇಶ್ ಬಿ. ನಿಟ್ಟೂರ್
ದಾವಣಗೆರೆ.
mahanteshbnittur@gmail.com