‘ಪಂಚವಟಿ’ ಈ ಹೆಸರನ್ನು ಬಹುಜನರು ಕೇಳಿರಬಹುದು. ಮಹಾಭಾರತ, ರಾಮಾಯಣದ ಪುರಾಣ ಪುಣ್ಯ ಕಥೆಗಳಲ್ಲಿ ಈ ಹೆಸರಿನ ಪ್ರಸ್ತಾಪವಿದೆ.
ಋಷಿ ಮುನಿಗಳು ಹೆಚ್ಚಿನ ದಿನಗಳ ಕಾಲ ನೀರು, ಆಹಾರವಿಲ್ಲದೆ ತಪಸ್ಸು ಮಾಡುತ್ತಿದ್ದುದು ಈ ಪಂಚವಟಿ ವನದ ಮಧ್ಯಭಾಗದಲ್ಲಿಯೇ. ತಪ್ಪಸ್ಸಿನ ವೇಳೆ ಋಷಿ ಮುನಿಗಳಿಗೆ ನೀರು-ಆಹಾರದ ಶಕ್ತಿ ತುಂಬುತ್ತಿದ್ದುದೂ ಸಹ ಈ ಪಂಚ ವೃಕ್ಷಗಳು ಎಂದು ಹೇಳಲಾಗುತ್ತದೆ.
ವೈಜ್ಞಾನಿಕ ದೃಷ್ಟಿಯಲ್ಲಿ ನೋಡಿದಾಗ ಪಂಚವಟಿ ವನದಲ್ಲಿ ಕಂಡು ಬರುವ ಬಿಲ್ವ, ಆಲ, ಹತ್ತಿ, ಅರಳಿ ಹಾಗೂ ಬನ್ನಿ ಮರಗಳು ಅತಿ ಹೆಚ್ಚು ಆಕ್ಸಿಜನ್ ನೀಡುತ್ತವೆ.
ಭೂಮಿಯ ಮೇಲೆ ಸುಮಾರು ಹತ್ತು ಮರಗಳು ಹೆಚ್ಚಿನ ಆಕ್ಸಿಜನ್ ಒದಿಗಿಸುತ್ತವೆ. ಅದರಲ್ಲಿ ಈ ಐದು ವೃಕ್ಷಗಳು ಅತಿ ಹೆಚ್ಚಿನ ಆಕ್ಸಿಜನ್ ನೀಡುತ್ತವೆ ಎಂಬುದು ವೈಜ್ಞಾನಿಕವಾಗಿ ದೃಢಪಟ್ಟ ವಿಷಯ. ಅಲ್ಲದೆ ಮೋಡಗಳನ್ನು ಆಕರ್ಷಿಸಿ ಮಳೆ ತರಿಸುವ ಶಕ್ತಿ ಈ ಪಂಚವಟಿ ವನಕ್ಕಿದೆ.
ಕಂದಗಲ್ಲು ಗ್ರಾಮದ ಪ್ರಗತಿ ಪರ ರೈತ ಕೆ.ಜಿ. ಈಶ್ವರಪ್ಪ ಅವರು, ಇದೀಗ ತಮ್ಮ ನಿವಾಸಕ್ಕೆ ಸನಿಹ ದೂರದಲ್ಲಿನ ಕೃಷಿ ಭೂಮಿಯಲ್ಲಿ ಈ `ಪಂಚವಟಿ’ ನಿರ್ಮಿಸಿ ರಾಜ್ಯದ ಗಮನ ಸೆಳೆದಿದ್ದಾರೆ.
ಏನಿದು ಪಂಚವಟಿ?
ಐದು ಪವಿತ್ರ ವೃಕ್ಷಗಳು, ಐದು ನಿರ್ದಿಷ್ಟ ದೂರ ಹಾಗೂ ನಿರ್ದಿಷ್ಟ ದಿಕ್ಕಿನಲ್ಲಿರುವ ಪ್ರದೇಶವೇ ಪಂಚವಟಿ.
ದೇವರು ಎಂದು ಪೂಜಿಸಲ್ಪಡುವ ಬಿಲ್ವಪತ್ರೆ, ಬನ್ನಿ, ಬೇವು, ಅರಳಿ ಮತ್ತು ಅತ್ತಿ ಸೇರಿ ಐದು ಗಿಡಗಳ ಈ ಪಂಚವಟಿಗೆ ಜನ ಹಿತಕಾರಿ, ಪರಿಸರ ಮಾಲಿನ್ಯವನ್ನು ನಿವಾ ರಣೆ ಮಾಡುವ, ಹೆಚ್ಚು ಆಮ್ಲಜನಕ ಉತ್ಪಾ ದಿಸುವ ಹಾಗೂ ಮಾನವನ ರೋಗಗಳನ್ನು ಗುಣಪಡಿಸುವ ಶ್ರೇಷ್ಠ ಶಕ್ತಿ ಇರುತ್ತದೆ.
18 ವರ್ಷಗಳಿಂದ ‘ಅಗ್ನಿ ಹೋತ್ರ’
ಪಂಚವಟಿ ಮೂಲಕ ಗಮನ ಸೆಳೆದಿರುವ ಕೆ.ಜಿ ಈಶ್ವರಪ್ಪ ಕಳೆದ 18 ವರ್ಷದಿಂದಲೂ `ಅಗ್ನಿಹೋತ್ರ’ ನಡೆಸುತ್ತಿರುವುದು ಗಮನಾರ್ಹ. ಪರಿಸರದ ಶುಚಿತ್ವಕ್ಕಾಗಿ, ದೈಹಿಕ, ಮಾನಸಿಕ ರೋಗಗಳಿಗೆ ಮದ್ದಾಗಿ ಅಗ್ನಿ ಹೋತ್ರ ಕಾರ್ಯ ನಿರ್ವಹಿಸು ತ್ತದೆ. ಸೂರ್ಯೋದಯ ಹಾಗೂ ಸೂರ್ಯಾಸ್ತದ ವೇಳೆ ಈ ಅಗ್ನಿಹೋತ್ರ ನಡೆಸಲಾಗುತ್ತಿದೆ.
ಪೂರ್ವಜರ ಆಚರಣೆಗಳಲ್ಲಿತ್ತು ವಿಜ್ಞಾನ: ಅನಿತಾ
ಈಶ್ವರಪ್ಪನವರ ಪುತ್ರಿ ಅನಿತಾ, ಎಂ.ಟೆಕ್ ಪದವೀಧರೆ. ತಂದೆಯ ಪಂಚವಟಿ ಕನಸಿನ ಬಗ್ಗೆ ಹೆಮ್ಮೆಯಿಂದಲೇ `ಜನತಾವಾಣಿ’ ಯೊಂದಿಗೆ ಅನಿಸಿಕೆ ಹಂಚಿಕೊಂಡರು.
ಪೂರ್ವಜರ ಪ್ರತಿ ಆಚರಣೆಗಳಲ್ಲೂ ವಿಜ್ಞಾನವಿತ್ತು. ಅದು ಕೃಷಿಯಲ್ಲಿ ಬಳಕೆಯಾ ಗುತ್ತಿತ್ತು. ಅದನ್ನು ಈಗ ಮತ್ತಷ್ಟು ಬಳಸಿಕೊಂ ಡರೆ ಕೃಷಿ ಉತ್ಕೃಷ್ಟ ಮಟ್ಟಕ್ಕೆ ಏರುತ್ತದೆ ಎಂಬುದು ತಂದೆಯ ಬಯಕೆಯಾಗಿದೆ ಒಂದು ಪಂಚವಟಿ ಒಂದು ಎಕರೆ ಕಾಡಿಗೆ ಸಮಾನ. ಈ ಪ್ರದೇಶದ ಸುತ್ತ ನಡೆದಾಡಿ ದರೂ ಅನೇಕ ಕಾಯಿಲೆಗಳು ವಾಸಿಯಾ ಗುವ ಸಾಧ್ಯತೆ ಇದೆ ಎಂದರು ಅನಿತಾ.
ಪಂಚ ವೃಕ್ಷಗಳಲ್ಲಡಗಿದೆ ಶಕ್ತಿ
ಬಿಲ್ವ : ಪತ್ರಿ ಗಿಡದ ಸಂಸ್ಕೃತ ಹೆಸರು ಬಿಲ್ವ. ಬಿಲ್ವಪತ್ರೆಯ ಗಿಡಗಳಲ್ಲಿ ಶಿವನು ನೆಲೆಸಿರುವನೆಂಬ ನಂಬಿಕೆ ಇದೆ. ಎಲೆ, ಕಾಂಡ, ಬೇರು, ತೊಗಟೆ ಮತ್ತು ಹಣ್ಣುಗಳ ಬಳಕೆಯ ಉಪಯೋಗವನ್ನು ಪಡೆಯುತ್ತಾರೆ. ಪಂಚವಟಿ ನಿರ್ಮಾಣದಲ್ಲಿ ಮೊದಲ ಆದ್ಯತೆ ಬಿಲ್ವಕ್ಕಿದೆ.
ಬನ್ನಿ : ಬನ್ನಿ ಗಿಡವನ್ನು ಕಡಿಯುವುದು ಮತ್ತು ಸುಡುವುದು ವಿರಳ. ಪಾಂಡವರು ವನವಾಸದಲ್ಲಿದ್ದಾಗ ತಮ್ಮ ಶಸ್ತ್ರಾಸ್ತ್ರ-ಆಯುಧ ಅವರ ಅಜ್ಞಾತವಾಸ ಮುಗಿಯುವವರೆಗೂ ಈ ಮರದಲ್ಲಿ ಇಟ್ಟಿದ್ದರೆಂದು ಹೇಳಲಾಗುತ್ತದೆ. ಉತ್ತಮ ಆಮ್ಲಜನಿಕ ಕೊಡುವ ಮರಗಳಲ್ಲಿ ಇದೂ ಒಂದು.
ಆಲ: ಆಲದ ಮರದಲ್ಲಿ ಶಿವ ಮತ್ತು ವಿಷ್ಣುವಿನ ಶಕ್ತಿ ಇರುತ್ತದೆ ಎಂದು ನಂಬಲಾಗಿದೆ. ಈ ಮರದಿಂದ ಸಿಗುವ ಸಕಾರಾತ್ಮಕ ಶಕ್ತಿಯು ವ್ಯಕ್ತಿಯಲ್ಲಿ ಇರುವ ಭಯ, ಬೇಸರ, ಅಜ್ಞಾನವನ್ನು ಓಡಿಸುತ್ತದೆ. ಜ್ಞಾನ ಮತ್ತು ಧೈರ್ಯವನ್ನು ತುಂಬಿ ವ್ಯಕ್ತಿಗೆ ಆತ್ಮವಿಶ್ವಾದ ಜೀವನವನ್ನು ಹೊಂದಲು ಸಹಕಾರಿ ಎನ್ನಲಾಗುತ್ತಿದೆ.
ಅರಳಿ: ಅರಳಿ ವೃಕ್ಷದ ಬುಡದಲ್ಲಿ ಬ್ರಹ್ಮ, ಮಧ್ಯದಲ್ಲಿ ವಿಷ್ಣುವಿನ ವಾಸ, ಮೇಲ್ತುದಿಯಲ್ಲಿ ಶಿವನು ನೆಲೆಸಿದ್ದಾನೆ ಎಂದು ನಂಬಿಕೆ ಇದೆ. ಆದ್ದರಿಂದ ಅರಳಿ ವೃಕ್ಷವನ್ನು ಪೂಜೆಸಲಾಗುತ್ತದೆ ಅತೀ ಹೆಚ್ಚು ಆಮ್ಲಜನಿಕ ನೀಡುವ ವೃಕ್ಷವಿದು.
ಅತ್ತಿ: ಅತ್ತಿ ಮರಕ್ಕೆ ದತ್ತಾತ್ರೇಯ ವೃಕ್ಷವೆಂದು ಕರೆಯುತ್ತಾರೆ. ಅತ್ತಿಯ ಸಣ್ಣ ಕೊಂಬೆಗಳನ್ನು ಮದುವೆ ಸಮಾರಂಭದಲ್ಲಿ ಬಳಸುತ್ತಾರೆ. ಅತ್ತಿ ಹಣ್ಣಗಳು ಔಷಧಿ ಗುಣಗಳನ್ನು ಹೊಂದಿವೆ. ಅತ್ತಿ ಹಣ್ಣು ತಿಂದರೆ ಕಣ್ಣಿಗೆ ಯಾವುದೇ ರೋಗ ಬರುವುದಿಲ್ಲ ಎಂಬ ಮಾತಿದೆ.
ಹೊಸತನದ ತುಡಿತ ಪಂಚವಟಿಗೆ ಪ್ರೇರಣೆ: ಕೆ.ಜಿ. ಈಶ್ವರಪ್ಪ
ನಾನು ಸಾವಯವ ಕೃಷಿಕ. ಜೊತೆಗೆ ಸಂಶೋಧನೆಯ ತುಡಿತ ಮೊದಲಿನಿಂದಲೂ ನನ್ನಲ್ಲಿದೆ. ಏನನ್ನಾದರೂ ಹೊಸದನ್ನು ಮಾಡಬೇಕೆಂಬ ಪರಿಕಲ್ಪನೆಯೇ ಪಂಚವಟಿ ವನ ನಿರ್ಮಾಣಕ್ಕೆ ಪ್ರೇರಣೆ.
ಪ್ರಕೃತಿ ನಮಗೆ ನೀಡಿದ್ದರಲ್ಲಿ ಒಂದಿಷ್ಟನ್ನಾದರೂ ಮರಳಿ ಪ್ರಕೃತಿಗೆ ನೀಡಬೇಕೆಂಬ ಉದ್ದೇಶದಿಂದ ಪಂಚವಟಿ ನಿರ್ಮಿಸಲಾಗಿದೆಯೇ ಹೊರತು, ನನ್ನ ವೈಯಕ್ತಿಕ ಲಾಭಕ್ಕಾಗಿ ಅಲ್ಲ.
ನನಗೆ ತಿಳಿದ ಮಟ್ಟಿಗೆ ರಾಜ್ಯದಲ್ಲಿ ಎಲ್ಲಿಯೂ ಪಂಚವಟಿ ಇಲ್ಲ. ಮೇಲುಕೋಟೆಯಲ್ಲಿ ಈ ರೀತಿ ಐದು ವೃಕ್ಷಗಳು ಇವೆ ಎಂದು ಹೇಳಲಾಗುತ್ತಿದೆಯಾದರೂ, ಅದು ಪಂಚವಟಿಯಲ್ಲ.
ಪಂಚವಟಿ ನಿರ್ಮಾಣದ ಬಯಕೆ ಬಂದಾಗ ರಾಜ್ಯದಲ್ಲಿ ಎಲ್ಲಿಯಾದರೂ ಇದ್ದರೆ ಅದನ್ನು ನೋಡಿ ತಿಳಿದುಕೊಳ್ಳಲು ಸಾಕಷ್ಟು ಪ್ರಯತ್ನಿಸಿದೆ. ಆದರೆ ಎಲ್ಲೂ ಸಿಗಲಿಲ್ಲ.
ಪಂಚವಟಿ ವನದಲ್ಲಿನ ಸಸಿಗಳು, ನಿರ್ದಿಷ್ಟ ದೂರ, ದಿಕ್ಕು ಇವೆಲ್ಲವೂ ಬ್ರಾಹ್ಮಣ್ಯದ ವೈಭವೀಕರಣವಲ್ಲ, ಇದು ಕೃಷಿ ವೈಭವೀಕರಣ ಎಂದು ಇದೇ ಸಂದರ್ಭದಲ್ಲಿ ಈಶ್ವರಪ್ಪ ಸ್ಪಷ್ಟಪಡಿಸಿದರು.
ಕೊರೊನಾ ಹಿನ್ನೆಲೆಯಲ್ಲಿ ಅನೇಕರನ್ನು ಭೇಟಿ ಮಾಡಲು ಸಾಧ್ಯವಾಗದಿದ್ದರೂ, ಕಳೆದ ಆರೇಳು ತಿಂಗಳಿನಿಂದ ಪಂಚ ಸಸಿಗಳಾಗಿ ಹುಡುಕಾಡಿ ಸಂಗ್ರಹಿಸಿದ್ದಾರೆ.
ಇವರ ಪಂಚವಟಿ ಸ್ಥಾಪನೆಗೆ ಖ್ಯಾತ ಪ್ರಾಧ್ಯಾಪಕ ಡಾ.ಸೆಲ್ವಪಿಳ್ಳೆ ಐಯ್ಯಂಗಾರ್ ಅವರು, ವಾರಣಾಸಿ ಮತ್ತು ಪಶ್ಚಿಮ ಬಂಗಾಳದಲ್ಲಿ ತಮಗೆ ಪರಿಚಯ ಇರುವ ಸ್ನೇಹಿತರೊಂದಿಗೆ ಚರ್ಚಿಸಿ ಯಾವ ಸಸಿ ಯಾವ ದಿಕ್ಕಿನಲ್ಲಿ ನೆಡಬೇಕೆಂಬ ಬಗ್ಗೆ ಸಲಹೆ, ಸೂಚನೆ ನೀಡಿದ್ದಾರೆ.
ಮತ್ತೋರ್ವ ಸ್ನೇಹಿತರಾದ ಬೆಳಗಾವಿಯ ಅಭಯ್ ಮುತಾಲಿಕ್ ಅವರು ಬ್ರಹ್ಮಪುರಾಣದಲ್ಲಿ ಪಂಚವಟಿ ಬಗ್ಗೆ ಉಲ್ಲೇಖವಾಗಿರುವ ಬಹಳಷ್ಟು ವಿಷಯ ಗ್ರಹಿಸಿಕೊಂಡು ಸಸಿ ನೆಡಬೇಕಾದ ದೂರವನ್ನು ನಿಖರವಾಗಿ ತಿಳಿಸಿದ್ದಾರೆ. ಅಲ್ಲದೆ ಪ್ರದೀಪ್ ತಾಪಸ್ವಿ ಅವರೂ ಸಹ ಅನೇಕ ಸಲಹೆಗಳನ್ನು ನೀಡಿದ್ದಾಗಿ ಈಶ್ವರಪ್ಪ ನೆನೆದರು.
ಬಹುತೇಕ ಎಲ್ಲಾ ಗ್ರಾಮಗಳಲ್ಲಿ ಈ ಐದು ವೃಕ್ಷಗಳು ಕಾಣ ಸಿಗುತ್ತವೆ. ಆದರೆ ಅದು ಪಂಚವಟಿಯಾಗದು, ಅದಕ್ಕೆ ನಿರ್ದಿಷ್ಟ ದೂರ, ದಿಕ್ಕಿನಲ್ಲಿದ್ದಾಗ ಮಾತ್ರ ಅದರ ಉಪಯೋಗ ಪಡೆಯಲು ಸಾಧ್ಯ ಎಂಬುದು ಅವರ ಅಭಿಪ್ರಾಯ. ಸದ್ಯ ಮೇಲುಕೋಟೆಯಲ್ಲೂ ಈ ರೀತಿ ಪಂಚ ಮರಗಳಿವೆ. ಆದರೆ ನಿರ್ದಿಷ್ಟ ದಿಕ್ಕು, ದೂರ ಇಲ್ಲದ ಕಾರಣ ಅದು ಪಂಚವಟಿ ಅಲ್ಲ ಎನ್ನುತ್ತಾರೆ ಈಶ್ವರಪ್ಪ.
ಆಲ, ಅತ್ತಿ ಹಾಗೂ ಅರಳಿ ಸಸಿಗಳು ಅರಣ್ಯ ಇಲಾಖೆಯಲ್ಲಿ ಸುಲಭವಾಗಿ ದೊರೆತವು. ಆದರೆ ಬಿಲ್ವ ಹಾಗೂ ಬನ್ನಿ ಗಿಡಗಳಿಗಾಗಿ ಸಾಕಷ್ಟು ಶ್ರಮ ಪಡಬೇಕಾಯಿತು. ಈ ಎರಡೂ ಪೂಜ್ಯನೀಯ ಮರಗಳ ಎಲ್ಲೆಂದರಲ್ಲಿ ಬೆಳೆಯುವುದೂ ಇಲ್ಲ, ಬೆಳೆಸುವುದೂ ಇಲ್ಲ. ಇವನ್ನು ಸಾಕಿದ ಮೇಲೆ ಎಲ್ಲಿ ಬೇಕೆಂದರಲ್ಲಿ ನೆಡಲೂ ಆಗದು ಈ ಕಾರಣಕ್ಕಾಗಿಯೇ ಸಸಿ ಸಿಗುವುದು ಕಷ್ಟವಾಗಿತ್ತು ಎಂದು ಅಭಿಪ್ರಾಯಿಸಿದರು.
ಆಗಸ್ಟ್ ತಿಂಗಳ ಮೊದಲ ವಾರದಲ್ಲಿ ಪಂಚವಟಿ ನಿರ್ಮಿಸಿದ್ದೇನೆ. ಇದರ ಉಪಯೋಗ ಪಡೆಯಲು ಇನ್ನೂ ಐದಾರು ವರ್ಷಗಳಾದರು ಬೇಕು. ಪ್ರಕೃತಿ ದಿಢೀರ್ ಕೊಡುಗೆ ನೀಡುವುದಿಲ್ಲ ಎಂದರು.
ಕೆ.ಎನ್. ಮಲ್ಲಿಕಾರ್ಜುನ ಮೂರ್ತಿ,
[email protected]