ಆ ದೇವ ಈ ದೇವ
ಮಹದೇವನೆನಬೇಡ
ವಾಸುದೇವನೂ ಬೇಡ
ಏಸುದೇವನೂ ಬೇಡ
ಗುರುದೇವ ಬಳಿಯಿರಲು
ಬೇರೆ ದೇವರ ಹಂಗು ಬೇಡವೇ ಬೇಡ !
ಗುರುವಿನಾ ಒಲವಿದ್ದು
ಮಾಡಿದಾ ಕಾಯಕವು
ಗುರಿಯ ಸಾಧಿಸಲು ಹದವು
ಗುರು ತೋರದಾ ಪಾಠ
ಜಲದುದಿತ ಗುಳ್ಳೆಯ ತೆರದಿ
ತ್ವರಿತದಲಿ ನಶಿಸುವುದು ನೋಡಾ !
ಎಲ್ಲವನು ಸ್ವಂತದಲಿ
ತಾನೇ ಕಲಿತೆನೆಂಬ ಹಮ್ಮಿನಲಿ
ಬೀಗುವುದು ಅಹಂಭಾವ
ಎದ್ದು ತೋರುವಾ ತಾರಸಿಯು ತನ್ನನೆತ್ತಿರುವ ತಳಪಾಯವನು
ಹಳಿದಂತೆ ನೋಡಾ !
ಶುರುವಿನಲಿ ಗುರುವಿರಲು
ಹರುಷದಲಿ ಸಾಗುವುದು ಬದುಕು
ಗುರುವಿರದ ಇರುವು
ತಿರುಳಿರದ ಅರಿವು ಬೆರಳಿರದ ಕರವು
ಸರಳವಾಗದು ಬದುಕು ನೋಡಾ !
ಅಣ್ಣಾಪುರ್‌ ಶಿವಕುಮಾರ್, ಲಿಬರ್ಟಿವಿಲ್
ಇಲಿನಾಯ್, ಯುಎಸ್ಎ.
[email protected]