ಲಿಂಗಾಯತ ಮಠಗಳನ್ನು ಹಣ ನೀಡಿ ಖರೀದಿಸಲಾಗದು 

ಹರಿಹರ, ಜ. 28- ಕೂಡಲ ಸಂಗಮ ಶ್ರೀಗಳ ಪಾದಯಾತ್ರೆ ಬೆಂಗಳೂರಿಗೆ ಹೋಗುವುದರೊಳಗೆ 2ಎ ಮೀಸಲಾತಿ ನೀಡದಿದ್ದರೆ ನಿಮ್ಮ ಮುಖ್ಯಮಂತ್ರಿ ಕುರ್ಚಿ ಖಾಲಿಯಾ ಗುತ್ತದೆ ಎಂದು ಕೇಂದ್ರದ ಮಾಜಿ ಸಚಿವ, ವಿಜಯಪುರ ಶಾಸಕ ಬಸವನಗೌಡ ಪಾಟೀಲ ಯತ್ನಾಳ್ ಹೇಳಿದರು.

ಕೂಡಲ ಸಂಗಮ ಲಿಂಗಾಯತ ಪಂಚಮಸಾಲಿ ಜಗದ್ಗುರು ಶ್ರೀ ಬಸವ ಜಯಮೃತ್ಯುಂಜಯ ಸ್ವಾಮೀಜಿಯವರ ಪಾದಯಾತ್ರೆ ಸ್ವಾಗತಿಸಿ, ಹಮ್ಮಿಕೊಂಡಿದ್ದ ಬೃಹತ್ ಪಾದಯಾತ್ರೆಯನ್ನು ಸಸಿಗೆ ನೀರು ಎರೆಯುವ ಮೂಲಕ ಉದ್ಘಾಟಿಸಿ ಅವರ ಮಾತನಾಡಿದರು.

ಮಠಗಳಿಗೆ ಹಣ ನೀಡಿದರೆ ಸ್ವಾಮೀಜಿಗಳು ಏರ್ ಕಂಡೀಷನ್ ರೂಂ ಮಾಡಿಕೊಂಡು ಆರಾಮಾಗಿ ಮಲಗುತ್ತಾರೆ. ವೀರಶೈವ ಲಿಂಗಾಯತ ಮಠಗಳನ್ನು ಹಣ ನೀಡಿ ಖರೀದಿಸಲಾಗದು. ಮುಖ್ಯಂತ್ರಿಗಳೇ ನಿಮ್ಮ ಯಾವುದೇ ಕೋಟಿಗಳು ನಮಗೆ ಬೇಡ. ಹಿಂದುಳಿದ ವರ್ಗಕ್ಕೆ ನಮ್ಮ ಸಮಾಜವನ್ನು ಸೇರಿಸಿ. ನಮ್ಮ ಸಮಾಜದಿಂದ ನಾವೇ 50 ಕೋಟಿ ರೂ. ಕೊಡುತ್ತೇನೆ ಎಂದು ಮುಖ್ಯಂತ್ರಿಗಳಿಗೆ ಹೇಳಿದರು.

ರಾಜಕೀಯ ಮೀಸಲಾತಿ ಪಂಚಮಸಾಲಿಗರಿಗೆ ಬೇಕಿಲ್ಲ. ತಾಕತ್ ಇದ್ದರೆ ಗೆದ್ದು ಮಂತ್ರಿಯಾಗುತ್ತೇವೆ. ಮಠಾಧೀಶರು ಹೇಳಿ ಮಂತ್ರಿಗಿರಿ ಕೊಡಿಸುವ ಅಗತ್ಯವಿಲ್ಲ ಎಂದು ಹರಿಹರ ಪೀಠದ ಶ್ರೀಗಳ ಹೆಸರು ಹೇಳದೆ ತಿರುಗೇಟು ನೀಡಿದರು.

ಲಿಂಗಾಯತರ ಹೆಸರೇಳಿ ಬ್ಲಾಕ್ ಮೇಲ್ – ಮುಖ್ಯಮಂತ್ರಿ ಯಡಿಯೂರಪ್ಪನವರು ತಮ್ಮನ್ನು ಕೈ ಬಿಟ್ಟರೆ ವೀರಶೈವ ಲಿಂಗಾಯತರು ದೂರವಾಗುತ್ತಾರೆಂದು ಹೈಕಮಾಂಡ್ಗೆ ಹೆದರಿಸಿದ್ದಾರೆ. ಸಮಾಜದ ಹೆಸರನ್ನು, ಲಿಂಗಾಯತರ ಹೆಸರನ್ನು ಹೇಳಿ ಕೇಂದ್ರಕ್ಕೆ ಬ್ಲಾಕ್ ಮೇಲ್ ಮಾಡುತ್ತಿದ್ದಾರೆ ಎಂದು ಹೇಳಿದರು.

ಲಿಂಗಾಯತರ ಓಟು ಬಯಸುವ ಯಡಿಯೂರಪ್ಪ, ಬಿಜೆಪಿ ಶಾಸಕರು ಹೋಗಿ ಕ್ಷೇತ್ರದ ಅಭಿವೃದ್ಧಿಗೆ ಹಣ ಕೇಳಿದರೆ ಇಲ್ಲವೆಂದು ಹೇಳುತ್ತಾರೆ. ವೀರಶೈವ ಲಿಂಗಾಯತ ಅಭಿವೃದ್ಧಿ ಪ್ರಾಧಿಕಾರ ಮಾಡಿ ಹಣ ನೀಡುವುದಾಗಿ ಹೇಳಿದ್ದಾರೆ. ಆದರೆ ಖಜಾನೆಯಲ್ಲಿ ಹಣವೆಲ್ಲಿದೆ ಎಂದು ಪ್ರಶ್ನಿಸಿದರು.

ಸ್ವಾಮೀಜಿಗಳು ರಾಜಕೀಯ ರಾಯಭಾರಿಗಳಾಗುವ ಅಗತ್ಯವಿಲ್ಲ

ಸ್ವಾಮೀಜಿಗಳು ರಾಜಕೀಯ ರಾಯಭಾರಿ ಗಳಾಗುವ ಅಗತ್ಯವಿಲ್ಲ. ಸಮಾಜದ ಕಣ್ತೆರೆಸುವ ಹೋರಾಟದ ಹುಲಿಯಾಗಬೇಕು.  ಆ ಮೂಲಕ ಸಮಾಜದ ರಾಯಭಾರಿಯಾಗ ಬೇಕು ಎಂದು ಹರಿಹರ ಮಾಜಿ ಶಾಸಕ ಹೆಚ್.ಎಸ್. ಶಿವಶಂಕರ್ ಹೇಳಿದರು. ಆರಂಭದಲ್ಲಿ ಅತಿಥಿಗಳನ್ನು ಸ್ವಾಗತಿಸಿ ಮಾತನಾಡಿದ ಅವರು, ಪಾದಯಾತ್ರೆ ಬಗ್ಗೆ ಅನೇಕರು ಅಣಕಿಸಿ ಮಾತಾಡಿದ್ದಾರೆ. ಹುಲಿ ಸುಮ್ಮನಿದ್ದರೆ ಹೋರಾಟಕ್ಕೆ ಸಜ್ಜು ಗೊಳ್ಳುತ್ತಿದೆ ಎಂದು ತಿಳಿಯಬೇಕು.  ನಾವು ಹೋರಾಟಕ್ಕೆಸಜ್ಜುಗೊಂಡಿದ್ದೇವೆ . ಸರ್ಕಾರದ ಮನ ಗೆದ್ದು ಮೀಸಲಾತಿ ಪಡೆಯುತ್ತೇವೆ ಎಂದರು.

ಸಮಾಜದ ಋಣ ತೀರಿಸುವ ಪರ್ವ ಕಾಲ ಇಂದು ನಮಗೆ ಬಂದಿದೆ. ನಮ್ಮ ಸಮಾಜದ ಹಕ್ಕು ಪಡೆಯಲು ನಾನು ಶ್ರೀಗಳ ಹೋರಾಟಕ್ಕೆ ಅಳಿಲು ಸೇವೆ ಮಾಡುತ್ತಿದ್ದೇನೆ. ಹರಿಹರ ಹೋರಾಟದ ನೆಲ. ಇಲ್ಲಿಗೆ ಪಾದಾರ್ಪಣೆ ಮಾಡಿದ ಶ್ರೀಗಳ ಹೋರಾಟಕ್ಕೆ ಖಂಡಿತ  ಜಯ ಸಿಗುತ್ತದೆ ಎಂದು ಹೇಳಿದರು.

ಪಂಚಮಸಾಲಿ ಸಮಾಜದ ಮುಖಂಡರೆಲ್ಲರೂ ಸೇರಿ ಹರಿಹರ ಕ್ಷೇತ್ರದಲ್ಲಿರುವ ಎಲ್ಲಾ ಶ್ರೀಗಳನ್ನು ಆಹ್ವಾನಿಸಬೇಕೆಂಬ ತೀರ್ಮಾನ ಮಾಡಿ ಎಲ್ಲರಂತೆ ವಚನಾನಂದ ಸ್ವಾಮೀಜಿ ಅವರನ್ನೂ ಕಾರ್ಯಕ್ರಮಕ್ಕೆ ಆಹ್ವಾನಿಸಲಾಗಿದೆ. ಕಾರ್ಯಕ್ರಮದಲ್ಲಿ ಯಾವ ಗೊಂದಲವೂ ಇಲ್ಲ, ಬರಬೇಡಿ ಎಂದು ಯಾರಿಗೂ ಹೇಳಿಲ್ಲ. ಬಂದವರೆಲ್ಲರನ್ನೂ ಸ್ವಾಗತ ಮಾಡುತ್ತೇವೆ ಎಂದು ಇದೇ ಸಂದರ್ಭದಲ್ಲಿ ಶಿವಶಂಕರ್ ಸ್ಪಷ್ಟಪಡಿಸಿದರು.

ಫೆ.15ಕ್ಕೆ ವಿಧಾಸನೌಧಕ್ಕೆ ಮುತ್ತಿಗೆ

ಬರುವ ಫೆಬ್ರವರಿ 15ರ ಸೋಮವಾರ ಪಂಚಮಸಾಲಿ ಸಮಾಜಕ್ಕೆ 2ಎ ಮಿಸಲಾತಿಗಾಗಿ ಆಗ್ರಹಿಸಿ ವಿಧಾನಸೌಧಕ್ಕೆ ಮುತ್ತಿಗೆ ಹಾಕುವುದಾಗಿ  ಹುನಗುಂದ ಮಾಜಿ ಶಾಸಕ, ಪಂಚಮಸಾಲಿ ಸಮಾಜದ ರಾಷ್ಟ್ರೀಯ ಅಧ್ಯಕ್ಷ ವಿಜಯಾನಂದ ಕಾಶಪ್ಪನವರ್ ಘೋಷಿಸಿದರು.

ಕೂಡಲ ಸಂಗಮ ಶ್ರೀಗಳು ಪ್ರಥಮವಾಗಿ 72 ಲಿಂಗಾಯತ ಒಳ ಪಂಗಡಗಳಗೆ ಒಬಿಸಿ ಮೀಸಲಾತಿ ನೀಡುವಂತೆಯೂ, ಪಂಚಮಸಾಲಿಗರಿಗೆ 2ಎ ಮೀಸಲಾತಿ ನೀಡುವಂತೆಯೂ ಶ್ರೀಗಳು ಬೇಡಿಕೆ ಇಟ್ಟಿದ್ದಾರೆ. ನಾವು ಶಿಕ್ಷಣ, ಉದ್ಯೋಗಕ್ಕಾಗಿ ಮೀಸಲಾತಿ ಕೇಳಿದ್ದೇವೆಯೇ ಹೊರತು, ರಾಜಕೀಯಕ್ಕಾಗಿ ಅಲ್ಲ.  ಆದ್ದರಿಂದ ಎಲ್ಲಾ ಒಳ ಪಂಗಡಗಳೂ ಪಾದಯಾತ್ರೆಗೆ ಬೆಂಬಲಿಸಬೇಕು ಎಂದು ಹೇಳಿದರು.

ಇಲ್ಲಿವರೆಗೆ ನಡೆಯುತ್ತಿದ್ದ ಶಾಂತಿಯುತ ಪ್ರತಿಭಟನೆ, ದಾವಣಗೆರೆಯಲ್ಲಿ ಕ್ರಾಂತಿ ರೂಪ ಪಡೆಯುತ್ತದೆ. ಶೀಘ್ರವೇ ಸಭೆ ಕರೆದು ಆಯೋಗಕ್ಕೆ ಹೇಳಿ, ಮೀಸಲಾತಿ ಆದೇಶ ಹೊರಡಿಸದಿದ್ದರೆ ದಾವಣಗೆರೆಯಲ್ಲಿ ಕ್ರಾಂತಿಯಾಗುತ್ತದೆ ಎಂದು ಎಚ್ಚರಿಸಿದರು.

ಮಠ ಕಟ್ಟುವುದಾದರೆ ಬಂಗಾರದ ಮಠವನ್ನೇ ಕಟ್ಟುತ್ತಿದ್ದೆ

ನಾವು ಮಠ ಕಟ್ಟುವ ಪ್ರಯತ್ನ ಮಾಡಿದ್ದರೆ  ಬಂಗಾರದ ಮಠವನ್ನೇ ಕಟ್ಟಬಹುದಿತ್ತು. ಬಂಗಾರದ ಮಠ ಕಟ್ಟಿದವರು ಇತಿಹಾಸದಲ್ಲಿ ಉಳಿದಿಲ್ಲ. ಒಡೆದು ಹೋದ ಪಂಚಮಸಾಲಿಗರ ಮನಸ್ಸು ಕಟ್ಟಿದರೆ ಸಮಾಜ ನನ್ನ ಕಷ್ಟಕಾಲಕ್ಕೆ ಬರುತ್ತೆ ಎಂಬುದನ್ನು ಪಾದಯಾತ್ರೆ ಮೂಲಕ ತೋರಿಸಿಕೊಟ್ಟಿದೆ. ಪಂಚಮಸಾಲಿಗರು ಕಟ್ಟಿದ ಮಠಕ್ಕೆ ಹೋಗಿ ಸ್ವಾಮಿಗಳಾಗುವುದು ಇತಿಹಾಸವಲ್ಲ. ಬಯಲಾದ ಜಾಗಕ್ಕೆ ತೆರಳಿ ಒಡೆದ ಮನಸ್ಸುಗಳನ್ನು  ಕಟ್ಟುವುದು ಇತಿಹಾಸ.ಅದನ್ನು ಮಾಡಿ ತೋರಿಸಿದ್ದೇವೆ ಎಂದು ಶ್ರೀಗಳು ಹೇಳಿದರು.

ಶ್ರೀಗಳ ವಾಸ್ತವ್ಯ ಎಲ್ಲಿ…….!  

ಕೂಡಲ ಸಂಗಮದ ಶ್ರೀ ಜಯಮೃತ್ಯುಂಜಯ ಶ್ರೀಗಳು ಹರಿಹರದಲ್ಲಿನ ಸಮಾವೇಶದ ನಂತರ ರಾತ್ರಿ ಎಲ್ಲಿ ವಾಸ್ತವ್ಯ ಮಾಡಲಿದ್ದಾರೆ ಎಂಬುದು ಭಕ್ತರ ಕುತೂಹಲಕ್ಕೆ ಕಾರಣವಾಗಿತ್ತು.

ಹರಿಹರ ವೀರಶೈವ ಲಿಂಗಾಯತ ಪಂಚಮಸಾಲಿ ಪೀಠದಲ್ಲಿ ವಾಸ್ತವ್ಯ ಮಾಡುವಂತೆ ಮನವಿ ಮಾಡಿದ್ದಾರೆ ಎನ್ನಲಾಗಿತ್ತು. ಇತ್ತ ಮಾಜಿ ಶಾಸಕ ಹೆಚ್.ಎಸ್. ಶಿವಶಂಕರ್ ಅವರು ಶ್ರೀ ರಾಘವೇಂದ್ರ ಸ್ವಾಮಿ ಮಠದಲ್ಲಿ ವಾಸ್ತವ್ಯಕ್ಕೆ ಅನುವು ಮಾಡಿದ್ದರು. ಆದರೆ ಶ್ರೀಗಳು ಈ ಎರಡೂ ಆಹ್ವಾನ ನಿರಾಕರಿಸಿ, ಸಿಂದಗಿ ಕ್ಷೇತ್ರದ ಶಾಸಕ ಎಂ.ಸಿ. ಮನಗೊಳಿ ಅವರು ದೈವಾಧೀನರಾಗಿದ್ದು, ಅಲ್ಲಿಗೆ ತೆರಳಿ, ಕುಟುಂಬ ವರ್ಗಕ್ಕೆ ಸಾಂತ್ವನ ಹೇಳಿ ಮತ್ತೆ ಪಾದಯಾತ್ರೆಗೆ ಮರಳುವುದಾಗಿ ಹೇಳಿದರು. ಆ ಮೂಲಕ ಭಕ್ತರಲ್ಲಿದ್ದ ಕುತೂಹಲಕ್ಕೆ ತೆರೆ ಎಳೆದರು.

ಬೆಂಬಲ ಸೂಚಿಸಿದ ಶ್ರೀಗಳ ನಿರೀಕ್ಷೆಯಲ್ಲಿದ್ದೇನೆ…

ಹರಿಹರ ವೀರಶೈವ ಲಿಂಗಾಯತ ಪಂಚಮಸಾಲಿ ಪೀಠದ ಶ್ರೀ ವಚನಾನಂದ ಸ್ವಾಮೀಜಿಯವರು ಹರಪನಹಳ್ಳಿಗೆ  ಬಂದು ನಮ್ಮ ಪಾದಯಾತ್ರೆಗೆ ಬೆಂಬಲ ಸೂಚಿಸಿದರು. ನನಗೆ ಸಂತೋಷವಾಯಿತು. ಮತ್ತೆ ಬೆಳಿಗ್ಗೆ ಗುರುಗಳು ನನ್ನ ಜೊತೆ ಪಾದಯಾತ್ರೆಯಲ್ಲಿ ಭಾಗವಹಿಸುತ್ತಾರೆ ಎಂದು ಕೊಂಡಿದ್ದೆ ಆದರೆ ಬರಲಿಲ್ಲ. ಕೊನೆ ಪಕ್ಷ ಹರಿಹರದ ಗಡಿ ಭಾಗಕ್ಕಾದರೂ ಬಂದು ಕರೆದುಕೊಂಡು ಹೋಗುತ್ತಾರೆಂದು ಭಾವಿಸಿದ್ದೆ. ಆದರೂ ಬರಲಿಲ್ಲ. ಇನ್ನೂ ಕಾಯುತ್ತಿದ್ದೇನೆ. ಬಂದರೆ ಮತ್ತಷ್ಟು ಸಂತೋಷವಾಗುತ್ತದೆ. ಅವರು ಬಹುತೇಕ ಬರುವ ನಿರೀಕ್ಷೆಯಲ್ಲಿದ್ದೇನೆ ಎಂದು ಶ್ರೀ ಜಯಮೃತ್ಯುಂಜಯ ಸ್ವಾಮೀಜಿ ಹೇಳಿದರು.

ಗುರುಗಳ ಬರುತ್ತಾರೋ ಬಿಡುತ್ತಾರೋ. ನಿಮ್ಮ ಕನಸು ಹಾಗೂ ಗುರಿ ಬೆಂಗಳೂರಿನತ್ತ ಸಾಗುವುದಾಗಿರಲಿ. ಪೀಠಗಳು ಕೂಡಲಿ, ಬಿಡಲಿ ನೀವು ತಲೆಕೆಡಿಸಿಕೊಳ್ಳಬೇಡಿ. ಪೀಠಕ್ಕಿಂತ ಸಮಾಜ ದೊಡ್ಡದು. ಆದ್ದರಿಂದ ಲಕ್ಷಾಂತರ ಸಂಖ್ಯೆಯಲ್ಲಿ ವಿಧಾನಸೌಧಕ್ಕೆ ಮುತ್ತಿಗೆ ಹಾಕಲು ಸನ್ನದ್ಧರಾಗಿ ಎಂದು ಸಮಾಜದ ಜನತೆಗೆ ಶ್ರೀಗಳು ಕರೆ ನೀಡಿದರು.

ಪಾದಯಾತ್ರೆಗೆ ಅಭೂತವೂರ್ವ ಬೆಂಬಲ

ಸಂಜೆ 6.40ರ ಸುಮಾರಿಗೆ ಹರಿಹರದ ಶಿವಮೊಗ್ಗ ವೃತ್ತಕ್ಕೆ ಕೂಡಲ ಸಂಗಮ ಶ್ರೀಗಳ ಪಾದಯಾತ್ರೆ ಆಗಮಿಸಿತು. 

ಇದಕ್ಕೂ ಮುನ್ನ ಗುತ್ತೂರಿನ ಭಕ್ತರ ಮನೆಯಿಂದ ಪೂರ್ಣಕುಂಭ ಮೇಳಗಳು, ಸಮಾಳ, ನಂದಿಕೋಲು ಸೇರಿದಂತೆ ಜನಪದ ಕಲಾತಂಡಗಳೊಂದಿಗೆ ಪಾದಯಾತ್ರೆಯನ್ನು ಸ್ವಾಗತಿಸಿ, ಗಾಂಧೀ ಮೈದಾನಕ್ಕೆ ಕರೆತರಲಾಯಿತು.

ಬಿಗಿ  ಬಂದೋಬಸ್ತ್ – ಗ್ರಾಮಾಂತರ ಪಿಎಸ್ ಐ
ಡಿ.ರವಿಕುಮಾರ್, ಸಿಪಿಐ ಸತೀಶ್ ಕುಮಾರ್, ಮಲೇಬೆನ್ನೂರು ಪಿಎಸ್ಐ ವೀರಬಸಪ್ಪ, ನಗರಠಾಣೆ ಪಿಎಸ್ಐ ಸುನಿಲ್  ಬಸವರಾಜ್, ಶೈಲಶ್ರೀ ನೇತೃತ್ವದಲ್ಲಿ ಸೂಕ್ತ ಬಂದೋ ಬಸ್ತ್ ಏರ್ಪಡಿಸಲಾಗಿತ್ತು.