ಜಿಲ್ಲೆಯಲ್ಲಿ ಪರೀಕ್ಷೆ ಎದುರಿಸಲಿರುವ 20,927 ವಿದ್ಯಾರ್ಥಿಗಳು, ವಿದ್ಯಾರ್ಥಿಗಳಿಗೆ ಪಠ್ಯದ ಪರೀಕ್ಷೆ, ಶಿಕ್ಷಣ ಇಲಾಖೆಗೆ ಕೊರೊನಾ ಪರೀಕ್ಷೆ
ರಾಜ್ಯ ಸರ್ಕಾರ ಜೂನ್ ಅಥವಾ ಜುಲೈ ತಿಂಗಳಲ್ಲಿ ಎಸ್ಸೆಸ್ಸೆಲ್ಸಿ ಪರೀಕ್ಷೆ ನಡೆಸಲಿದೆ ಎಂಬ ಆದೇಶ ಹೊರ ಬೀಳುತ್ತಿದ್ದಂತೆ ಮೊಬೈಲ್, ಆಟಿಕೆ, ಟಿವಿ ಎಲ್ಲವನ್ನೂ ಬಿಟ್ಟು ಇದೀಗ ಮಕ್ಕಳು ಪುಸ್ತಕ ಹಿಡಿದು ಕುಳಿತಿದ್ದಾರೆ. ಇತ್ತ ರಾಜ್ಯದ ಪಟ್ಟಿಯಲ್ಲಿ ಟಾಪ್ 10 ಒಳಗೆ ಜಿಲ್ಲೆಯನ್ನು ಕೊಂಡೊಯ್ಯ ಬೇಕೆಂದು ಟೊಂಕ ಕಟ್ಟಿದ್ದ ಶಿಕ್ಷಣ ಇಲಾಖೆಗೂ ಕೊರೊನಾ ಕಠಿಣ ಪರೀಕ್ಷೆ ತಂದೊಡ್ಡಿದೆ.
ಕೋವಿಡ್ ಸೋಂಕು ನಿಯಂತ್ರಣದಲ್ಲಿ ಮುಂಚೂಣಿಯಲ್ಲಿದ್ದು, ದೇಶದ ಗಮನ ಸೆಳೆದಿದ್ದ ದಾವಣಗೆರೆಯಲ್ಲಿ ದಿನದಿಂದ ದಿನಕ್ಕೆ ಸೋಂಕಿನ ಪ್ರಕರಣಗಳ ಸಂಖ್ಯೆ ಏರುತ್ತಿರುವುದು ನಗರವನ್ನು ತಲ್ಲಣಗೊಳಿ ಸಿದೆ. ಇದೀಗ ಪರೀಕ್ಷೆ ವಿಷಯ ತಿಳಿಯುತ್ತಿ ದ್ದಂತೆ ವಿದ್ಯಾರ್ಥಿಗಳು, ಪೋಷಕರು, ಶಿಕ್ಷಕರೂ ಆತಂಕಕ್ಕೊಳಗಾಗಿದ್ದಾರೆ.
ಸರ್ಕಾರ, ಜನಪ್ರತಿನಿಧಿಗಳು, ವೈದ್ಯರು ಸೋಂಕಿನ ಬಗ್ಗೆ ಭಯ ಬೇಡ. ಅದರೊಟ್ಟಿಗೆ ಜೀವಿಸುವುದನ್ನು ಕಲಿಯೋಣ ಎಂದು ಎಷ್ಟೇ ಹೇಳಿದರು, ಮಾಧ್ಯಮಗಳಲ್ಲಿ, ಸಾಮಾಜಿಕ ಜಾಲ ತಾಣಗಳಲ್ಲಿ ವರದಿ ಯಾಗುವ ಸೋಂಕಿನಿಂದ ಸಾವನ್ನಪ್ಪುವ ಪ್ರಕರಣಗಳು, ಯಾವುದೋ ದೂರದ ದೇಶದಲ್ಲಿನ ಶವಗಳ ರಾಶಿಯ ವೀಡಿಯೋಗಳು, ಸೋಂಕಿತ ವ್ಯಕ್ತಿಗೆ ಚಿಕಿತ್ಸೆ ನೀಡುವ ಕ್ರಮಗಳು, ಆ ಪ್ರದೇಶದಲ್ಲಿ ಸೀಲ್‌ಡೌನ್ ಮಾಡುವಂತಹ ಕ್ರಮಗಳು ವಿದ್ಯಾರ್ಥಿಗಳ ಮನಸ್ಸಿನಲ್ಲಿ ಭಯ ಹುಟ್ಟಿಸಿರುವುದಂತೂ ನಿಜ.
ಆನ್ಲೈನ್ ಮೂಲಕ ನಡೆಯುತ್ತಿದೆ ಗೃಹಾಧಾರಿತ ಪೂರ್ವಸಿದ್ಧತಾ ಪರೀಕ್ಷೆ
ಮನೆಯಲ್ಲಿರುವ ಎಸ್ಸೆಸ್ಸೆಲ್ಸಿ ವಿದ್ಯಾರ್ಥಿಗಳನ್ನು ಪುನಶ್ಚೇತನಗೊಳಿಸುವ ಪ್ರಯುಕ್ತ ಈಗಾಗಲೇ ಗೃಹಾಧಾರಿತ ಪೂರ್ವಸಿದ್ಧತಾ ಪರೀಕ್ಷೆಗಳು ಜಿಲ್ಲೆಯಲ್ಲಿ ಆರಂಭವಾಗಿದ್ದು, ಜೂನ್ 9ರವರೆಗೆ ನಡೆಯಲಿವೆ.
ಆನ್‌ ಲೈನ್ ಮೂಲಕ ನಡೆಯುವ ಈ ಪರೀಕ್ಷೆ ನಿಗದಿಯಾದ ದಿನದಂದು ಬೆಳಿಗ್ಗೆ 8.30ರ ವೇಳೆಗೆ ಶಾಲೆಗಳ ಮುಖ್ಯ ಶಿಕ್ಷಕರಿಗೆ ವಾಟ್ಸಾಪ್ ಮೂಲಕ ಪ್ರಶ್ನೆ ಪತ್ರಿಕೆ ಕಳುಹಿಸಿಕೊಡಲಾಗುತ್ತದೆ. ಅವರು ಸಂಬಂಧಿಸಿದ ವಿಷಯ ಶಿಕ್ಷಕರಿಗೆ ಪ್ರಶ್ನೆ ಪತ್ರಿಕೆ ಕಳುಹಿಸಿಕೊಡುತ್ತಾರೆ. ವಿಷಯ ಶಿಕ್ಷಕರು ತಮ್ಮ ವಿದ್ಯಾರ್ಥಿಗಳಿರುವ ಗ್ರೂಪ್‌ಗೆ ಕಳುಹಿಸಿಕೊಡುತ್ತಾರೆ. ಬೆಳಿಗ್ಗೆ 10 ರಿಂದ 12 ಗಂಟೆವರೆಗೆ ಮಕ್ಕಳು ಆ ಪ್ರಶ್ನೆ ಪತ್ರಿಕೆ ನೋಡಿ ಹಾಳೆಯಲ್ಲಿ ಉತ್ತರ ಬರೆದು ಶಿಕ್ಷಕರಿಗೆ ಕಳುಹಿಸಿಕೊಡಬೇಕಿದೆ. ಶಿಕ್ಷಕರು ಕೀ ಆನ್ಸರ್‌ ಪರಿಶೀಲಿಸಿ ಮಧ್ಯಾಹ್ನ 12 ರಿಂದ ಸಂಜೆ 6ರವರೆಗೆ ಮೌಲ್ಯಮಾಪನ ಮಾಡಿ, ಹಿಮ್ಮಾಹಿತಿ ನೀಡಬಹುದಾಗಿದೆ.
ಸಂಜೆ 6 ರಿಂದ 7ರವರೆಗೆ ಶಿಕ್ಷಕರು ವಿದ್ಯಾರ್ಥಿವಾರು ಫಲಿತಾಂಶ ಕ್ರೋಢೀಕರಿಸಿ ತಾಲ್ಲೂಕು ನೋಡಲ್ ಅಧಿಕಾರಿಗಳಿಗೆ ಮತ್ತು ಆಯಾ ವಿದ್ಯಾರ್ಥಿಗಳಿಗೆ ಸಲ್ಲಿಸಲಿದ್ದಾರೆ. ಸಂಜೆ 7ರಿಂದ 8ರ ಸಮಯದಲ್ಲಿ ನೋಡಲ್ ಅಧಿಕಾರಿಗಳು ಕ್ರೋಢೀಕೃತ ಮಾಹಿತಿಯನ್ನು ಜಿಲ್ಲಾ ಕಚೇರಿಗೆ ಕಳುಹಿಸಿಕೊಡಲಿದ್ದಾರೆ.
ಒಂದು ವೇಳೆ ಕೆಲವು ಮಕ್ಕಳ ವಾಟ್ಸಾಪ್ ಗ್ರೂಪ್ ಇಲ್ಲದಿದ್ದರೆ ಅದೇ ಊರಿನಲ್ಲಿ ಇರುವ ತಮ್ಮ ಗೆಳೆಯರ ಮನೆಗೆ ಹೋಗಿ ಉತ್ತರಿಸಲು ತಿಳಿಸಲಾಗಿದೆ. ಈ ವೇಳೆ ಮಾಸ್ಕ್ ಧರಿಸುವಂತೆಯೂ, ಸಾಮಾಜಿಕ ಅಂತರ ಕಾಪಾಡಿಕೊಳ್ಳು ವಂತೆಯೂ ಸಲಹೆ ನೀಡಲಾಗಿದೆ.
ಕೊರೊನಾ ಹಿನ್ನೆಲೆಯಲ್ಲಿ ಜಿಲ್ಲೆಯಲ್ಲಿ ಅಗತ್ಯ ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಂಡು ಪರೀಕ್ಷೆಗಳನ್ನು ಸುಸೂತ್ರವಾಗಿ ನಡೆಸಲು ಅಗತ್ಯ ಕ್ರಮ ಕೈಗೊಳ್ಳಲಾಗುತ್ತಿದೆ. ಈಗಾಗಲೇ
ಆನ್ಲೈನ್ ಕ್ಲಾಸ್‌ಗಳ ಮೂಲಕ ಪಾಠ ಮಾಡಲಾಗಿದೆ. ಗೃಹಾಧಾರಿತ ಪೂರ್ವ ಸಿದ್ಧತಾ ಪರೀಕ್ಷೆ ಆರಂಭಗೊಂಡಿದ್ದು ಜೂನ್ 9ರವರೆಗೆ ನಡೆಯಲಿವೆ.
– ಸಿ.ಆರ್. ಪರಮೇಶ್ವರಪ್ಪ, ಡಿಡಿಪಿಐ.
ಆನ್ಲೈನ್ ಪಾಠ ಸದ್ಭಳಕೆ ಮಾಡಿಕೊಳ್ಳಿ : ಚಂದನ ವಾಹಿನಿಯಲ್ಲಿ ಕನ್ನಡ ಮತ್ತು ಇಂಗ್ಲಿಷ್ ಮೀಡಿಯಂ ಎಸ್ಸೆಸ್ಸೆಲ್ಸಿ ಮಕ್ಕಳಿಗೆ ಆನ್ಲೈನ್ ಪಾಠ ಮಾಡಲಾಗುತ್ತಿದೆ. ಕನ್ನಡ ಮಾಧ್ಯಮದವರಿಗೆ ನಿತ್ಯ ಮಧ್ಯಾಹ್ನ 3 ರಿಂದ 4.30 ಹಾಗೂ ಸಂಜೆ ಮರು ಪ್ರಸಾರ 6 ರಿಂದ 7.30 ಮತ್ತು ಇಂಗ್ಲಿಷ್ ಮಾಧ್ಯಮದ ಮಕ್ಕಳಿಗೆ ಬೆಳಿಗ್ಗೆ 9.30 ರಿಂದ 11 ಮತ್ತು ಮರುಪ್ರಸಾರ 11 ರಿಂದ 12.30ರವರೆಗೆ ನಡೆಯಲಿದೆ. ವಿದ್ಯಾರ್ಥಿಗಳು ಸದ್ಭಳಕೆ ಮಾಡಿಕೊಳ್ಳುವಂತೆ ಡಿಡಿಪಿಐ ಸಿ.ಆರ್. ಪರಮೇಶ್ವರಪ್ಪ ಸಲಹೆ ನೀಡಿದ್ದಾರೆ.
ಸರ್ಕಾರವಂತೂ ನಿರ್ಧಾರ ತಿಳಿಸಿದೆ. ಇನ್ನೇನಿದ್ದರೂ ಕೊರೊನಾ ಹಾಗೂ ಎಸ್ಸೆಸ್ಸೆಲ್ಸಿ ಎರಡೂ ಪರೀಕ್ಷೆಗಳನ್ನು ಒಟ್ಟೊಟ್ಟಿಗೆ ಎದುರಿಸಬೇಕಾಗಿರುವುದು ವಿದ್ಯಾರ್ಥಿಗಳಷ್ಟೇ ಅಲ್ಲ, ಪೋಷಕರು, ಶಿಕ್ಷಕರು ಹಾಗೂ ಶಿಕ್ಷಣ ಇಲಾಖೆಯೂ ಸಹ. ಈ ನಿಟ್ಟಿನಲ್ಲಿ ಶಿಕ್ಷಣ ಇಲಾಖೆ ಈಗಾಗಲೇ ಸರ್ಕಾರದ ಸೂಚನೆಯಂತೆ ಹಲವು ಕ್ರಮಗಳಿಗೆ ಮುಂದಾಗಿದೆ.
ಶಿಕ್ಷಣ ಇಲಾಖೆ ಸನ್ನದ್ಧ: ಜಿಲ್ಲೆಯಲ್ಲಿ 10311 ಬಾಲಕರು, 10616 ಬಾಲಕಿಯರು ಸೇರಿ ಒಟ್ಟು 20927 ವಿದ್ಯಾರ್ಥಿಗಳು ಪರೀಕ್ಷೆ ಎದುರಿಸಲಿದ್ದಾರೆ. ಪರೀಕ್ಷಾ ಮಂಡಳಿಯ ಸೂಚನೆಗಳಂತೆ ಪರೀಕ್ಷೆ ನಡೆಸಲು ಶಿಕ್ಷಣ ಇಲಾಖೆ ತಯಾರಾಗುತ್ತಿದೆ. ಜಿಲ್ಲೆಯಲ್ಲಿ ಒಟ್ಟು 79 ಪರೀಕ್ಷಾ ಕೇಂದ್ರಗಳ 872 ಕೊಠಡಿಗಳನ್ನು ಸಿದ್ಧಪಡಿಸಲಾಗಿತ್ತು. ಆದರೆ ಕೊರೊನಾ ಹಿನ್ನೆಲೆಯಲ್ಲಿ ಸಾಮಾಜಿಕ ಅಂತರ ಕಾಪಾಡುವ ಉದ್ದೇಶದಿಂದ ಒಂದು ಕೊಠಡಿಯಲ್ಲಿ ಗರಿಷ್ಠ 20 ಮಕ್ಕಳಿಗೆ ಮಾತ್ರ ಕುಳಿತುಕೊಳ್ಳುವಂತೆ ಕ್ರಮ ವಹಿಸುವ ಅಗತ್ಯವಿದೆ. ಒಂದು ಕೊಠಡಿ ದೊಡ್ಡದಿದ್ದರೆ, ವಿಸ್ತ್ರೀರ್ಣ ಗಮನಿಸಿ ಹೆಚ್ಚುವರಿ ಮಕ್ಕಳನ್ನು ಪರೀಕ್ಷೆಗೆ ಕೂರಿಸಲು ಅವಕಾಶವಿದೆ.
ಪರೀಕ್ಷಾ ಕೇಂದ್ರಕ್ಕೆ ಬರುವ ವಿದ್ಯಾರ್ಥಿಗಳು ಹಾಗೂ ಮೇಲ್ವಿಚಾರಕರಿಗೆ ಥರ್ಮಲ್ ಸ್ಕ್ರೀನಿಂಗ್ ಮಾಡುವುದು. ಅವರ ಕೈಗಳಿಗೆ ನಿತ್ಯ ಸ್ಯಾನಿಟೈಸರ್ ಹಾಕುವುದು. ಮಾಸ್ಕ್ ನೀಡುವ ಬಗ್ಗೆ ಚರ್ಚೆ ನಡೆದಿದೆ. ಸ್ಕೌಟ್‌ ಗೈಡ್ಸ್ ಸಂಸ್ಥೆ ತಯಾರಿಸಿದ 22 ಸಾವಿರ ಮಾಸ್ಕ್ ಕೊಡುವುದಾಗಿ ಹೇಳಿದೆ. ಇದನ್ನು ಬಳಸಬೇಕೋ ಅಥವಾ ಸರ್ಕಾರವೇ ನೀಡಲಿದೆಯೋ ಎಂಬ ಮಾಹಿತಿ ಪಡೆಯಲಿದ್ದೇವೆ ಎಂದು ಹೇಳಿದರು.
ಕೆ.ಎನ್. ಮಲ್ಲಿಕಾರ್ಜುನ್
9964930983
[email protected]