ಓಂಕಾರ ಶಿವಾಚಾರ್ಯ ಶ್ರೀಗಳು
ದಾವಣಗೆರೆ, ಜ. 29 – ಉಜ್ಜಯಿನಿ ಸಿದ್ದಲಿಂಗೇಶ್ವರ ಮಹಾಸ್ವಾಮಿಗಳು ಮಹಾನ್‌ ತಪಸ್ವಿಗಳಾಗಿದ್ದರು ಎಂದು ಆವರಗೊಳ್ಳ ಓಂಕಾರ ಶಿವಾಚಾರ್ಯ ಶ್ರೀಗಳು ಹೇಳಿದರು.
ಜಗದ್ಗುರು, ಮಹಾತಪಸ್ವಿ ಸಿದ್ದಲಿಂಗೇಶ್ವರ ಪುಣ್ಯಾಶ್ರಮ ಸೇವಾ ಟ್ರಸ್ಟ್ ವತಿಯಿಂದ ಸಮೀಪದ ದೊಡ್ಡಬಾತಿಯಲ್ಲಿ ಭಾನುವಾರ ನಡೆದ ಉಜ್ಜಯಿನಿ ಸಿದ್ದಲಿಂಗೇಶ್ವರ ಮಹಾಸ್ವಾಮಿಗಳ 89ನೇ ಪುಣ್ಯಸ್ಮರಣೋತ್ಸವ ಸಮಾರಂಭದ ಸಾನ್ನಿಧ್ಯ ವಹಿಸಿ ಮಾತನಾಡಿದರು.
ಬುಕ್ಕಾಂಬುದಿ ಬೆಟ್ಟದ ಮೇಲಿನ ಗುಹೆಯಲ್ಲಿ ಸಿದ್ದಲಿಂಗೇಶ್ವರ ಮಹಾಸ್ವಾಮಿಗಳು ಲೋಕ ಕಲ್ಯಾಣಕ್ಕಾಗಿ ಘೋರ ತಪಸ್ಸು ಮಾಡಿದ್ದರು. ಇಂದು ಈ ಸ್ಥಳ ಪವಿತ್ರ ಕ್ಷೇತ್ರವಾಗಿದೆ ಎಂದು ತಿಳಿಸಿದರು.
ಪವಾಡ ಪುರುಷ ಸಿದ್ದಲಿಂಗೇಶ್ವರ ಸ್ವಾಮಿಗಳು ಭಕ್ತರ ಅಭಿಲಾಷೆಯನ್ನು ಈಡೇರಿಸುತ್ತಿದ್ದರು ಎಂದು ಸ್ವಾಮಿಗಳ ಶಕ್ತಿಯನ್ನು ಭಕ್ತರಿಗೆ ವಿವರಿಸಿದರು.
ಕಾರ್ಯಕ್ರಮದ ಅಂಗವಾಗಿ ನಡೆದ ರುದ್ರಾಭಿಷೇಕ, ದೀಕ್ಷಾ ರುದ್ರಹೋಮ, ಮೃತ್ಯುಂಜಯ ಹೋಮ, ನವಗ್ರಹ ಹೋಮವನ್ನು ಕಡೇ ನಂದಿಹಳ್ಳಿಯ ರೇವಣಸಿದ್ದೇಶ್ವರ ಶ್ರೀಗಳು ನೆರವೇರಿಸಿದರು.
ಉದಯ ಶಂಕರ ಸ್ವಾಮಿಗಳ ನೇತೃತ್ವದಲ್ಲಿ ಕಾರ್ಯಕ್ರಮ ನಡೆಯಿತು.
ಕಾರ್ಯಕ್ರಮದಲ್ಲಿ ದೊಡ್ಡ ಬಾತಿ ಗ್ರಾ.ಪಂ. ಸದಸ್ಯರಾದ ಕುಂಬಾರ ನಾಗಣ್ಣ, ಗೌಡರ ನಾಗಣ್ಣ, ಉಜ್ಜಿನಿ ಮಠದ ರಾಜಣ್ಣ, ಸೋಮಯ್ಯ, ಕೆ. ಶಿವಮೂರ್ತಯ್ಯ, ಎಸ್. ವೀರೇಶ್, ಕಸ್ತೂರಮ್ಮ ಹೊಳಗುಂದಿ, ಯು.ಎಂ. ಸುರೇಶ್, ಬಿ.ವಿ ಜಯಣ್ಣ ಮತ್ತಿತರರಿದ್ದರು.