ದಾವಣಗೆರೆ, ಜು.29- ಕಳವು ಮಾಡಿದ್ದ ಬೈಕ್ ಅನ್ನು ಮಾರಾಟ ಮಾಡಲೆತ್ನಿಸಿದ್ದ ಕಳ್ಳನೋರ್ವ ಪೊಲೀಸರ ಕೈಗೆ ಸಿಕ್ಕಿ ಬಿದ್ದಿದ್ದು, ಹೀಗೆ ಕಳವು ಮಾಡಿದ್ದ ಮೂರು ಬೈಕ್ ಗಳನ್ನು ವಶಪಡಿಸಿಕೊಳ್ಳುವಲ್ಲಿ ಬಿಳಿಚೋಡು ಪೊಲೀಸರು ಯಶಸ್ವಿಯಾಗಿದ್ದಾರೆ.
ಪಲ್ಲಾಗಟ್ಟೆ ಗ್ರಾಮದ ಅಭಿ ಅಲಿಯಾಸ್ ಅಭಿಷೇಕ್ ಬಂಧಿತ ಕಳ್ಳ. ಆರೋಪಿಯನ್ನು ವಿಚಾರಣೆ ಮಾಡಿದಾಗ 10 ದಿನಗಳ ಹಿಂದೆ ಬೈಕ್ ಅನ್ನು ಜಗಳೂರು ಪಟ್ಟಣದಲ್ಲಿ ಕಳ್ಳತನ ಮಾಡಿರುವುದಾಗಿ ಹೇಳಿದ್ದಾನೆ. ತನ್ನ ಬಳಿ ಚಿತ್ರದುರ್ಗದಲ್ಲಿ ಕಳವು ಮಾಡಿದ ಇನ್ನೆರಡು ಬೈಕ್ ಗಳು ಇರುವುದಾಗಿ ಒಪ್ಪಿಕೊಂಡಿದ್ದಾನೆ. ಆರೋಪಿತನಲ್ಲಿದ್ದ ಬೈಕ್ ಗಳನ್ನು ವಶಕ್ಕೆ ಪಡೆಯಲಾಗಿದೆ.
ಬಂಧಿತನು ಕೆಲ ತಿಂಗಳ ಹಿಂದೆ ಜಗಳೂರು ಪಟ್ಟಣ ಹಾಗೂ ಜಮ್ಮಾಪುರ ಗ್ರಾಮದಲ್ಲೂ ತಲಾ ಒಂದು ಬೈಕ್ ಕಳವು ಮಾಡಿ ಕೆಲ ದಿನಗಳ ನಂತರ ಒಂದೊಂದೇ ಮಾರಾಟಕ್ಕೆ ಯತ್ನಿಸಿದಾಗ ಪೊಲೀಸರಿಗೆ ಹೆದರಿ ಬೈಕ್‍ಗಳನ್ನು ಜಗಳೂರು ಪಟ್ಟಣದಲ್ಲಿ ಬಿಟ್ಟು ಬಂದಿದ್ದಾನೆ.
ಬಿಳಿಚೋಡು ಪೊಲೀಸ್ ಠಾಣೆಯ ಪಿಎಸ್‍ಐ ಶ್ರೀಧರ್‍ ಮತ್ತು ಸಿಬ್ಬಂದಿಯವರ ಕರ್ತವ್ಯ ಪ್ರಜ್ಞೆ ಹಾಗೂ ಜಗಳೂರು ಸಿಪಿಐ ದುರುಗಪ್ಪ ಮತ್ತು ದಾವಣಗೆರೆ ಗ್ರಾಮಾಂತರ ಉಪವಿಭಾಗದ ಡಿವೈಎಸ್ಪಿ ನರಸಿಂಹ ವಿ. ತಾಮ್ರಧ್ವಜ ಮಾರ್ಗದರ್ಶನದಲ್ಲಿ ಬೈಕ್ ಗಳ ಕಳವು ಪ್ರಕರಣ ಭೇದಿಸುವಲ್ಲಿ ಯಶಸ್ವಿಯಾಗಿದ್ದಕ್ಕೆ ಎಸ್ಪಿ ಹನುಮಂತರಾಯ ಪ್ರಶಂಸಿಸಿ ಬಹುಮಾನ ಘೋಷಿಸಿದ್ದಾರೆ.