ಸಾಣೇಹಳ್ಳಿ ಸುತ್ತ-ಮುತ್ತ ತೆಂಗಿಗೆ ಬಿಳಿ ನೊಣಗಳ ಹಾವಳಿ ; ಕೃಷಿ ಸಚಿವರ ಗಮನ ಸೆಳೆದ ಶ್ರೀಗಳು

ಸಾಣೇಹಳ್ಳಿ ಸುತ್ತ-ಮುತ್ತ  ತೆಂಗಿಗೆ ಬಿಳಿ ನೊಣಗಳ ಹಾವಳಿ ; ಕೃಷಿ ಸಚಿವರ ಗಮನ ಸೆಳೆದ ಶ್ರೀಗಳು

ಸಾಣೇಹಳ್ಳಿ, ಜ.23- ಇಲ್ಲಿನ ಶ್ರೀಮಠಕ್ಕೆ ಸೇರಿದ ಮತ್ತು ಸುತ್ತಮುತ್ತಲಿನ ತೆಂಗಿನ ತೋಟ ಗಳಿಗೆ ಕಳೆದ ಒಂದು ತಿಂಗಳಿನಿಂದ ತೀವ್ರ ರೋಗಬಾಧೆ ಕಾಣಿಸಿಕೊಂಡಿದ್ದು, ಅನೇಕ ರೈತರು ಶ್ರೀ ಪಂಡಿತಾರಾಧ್ಯ ಶಿವಾಚಾರ್ಯ ಸ್ವಾಮೀಜಿಗಳ ಬಳಿ ತಮ್ಮ ಅಳಲನ್ನು ತೋಡಿ ಕೊಂಡಿದ್ದರು. ಸ್ವತಃ ಕೃಷಿಕರಾದ ಪೂಜ್ಯರು ಶ್ರೀಮಠಕ್ಕೆ ಸೇರಿದ ತೋಟಗಳನ್ನು ಪರೀಕ್ಷಿಸಿ ದಾಗ ರೋಗ ಇರುವುದನ್ನು ಗಮನಿಸಿ, ತಕ್ಷಣ ಕೃಷಿ ಸಚಿವ ಬಿ. ಸಿ. ಪಾಟೀಲರನ್ನು ಸಂಪರ್ಕಿಸಿ ಸಮಸ್ಯೆಯ  ಬಗ್ಗೆ  ಗಮನ ಸೆಳೆದಿದ್ದರು.

ಸಚಿವರು ತಮ್ಮ ಆಪ್ತ ಸಹಾಯಕ, ಕೃಷಿ ನಿರ್ದೇಶಕ ಎ. ಸಿ. ಮಂಜು ಅವರಿಗೆ ಕೂಡಲೇ ಈ ಬಗ್ಗೆ ಕೂಲಂಕುಶವಾಗಿ ಪರಿಶೀಲಿಸಿ ವರದಿ ಸಲ್ಲಿಸುವಂತೆ ಸೂಚಿಸಿದ್ದರು. ಚಿತ್ರದುರ್ಗದ ಬಬ್ಬೂರು ಫಾರಂನ ಕೃಷಿ ವಿಜ್ಞಾನಿ ಡಾ. ಓಂಕಾರಪ್ಪ ಮತ್ತು ಹೊಸದುರ್ಗ ತಾಲ್ಲೂಕು ಕೃಷಿ ಅಧಿಕಾರಿ ಈಶ ಅವರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದರು.

ಅಧಿಕಾರಿಗಳ ಜೊತೆಗೆ ಮಾತನಾಡಿದ ಪಂಡಿತಾರಾಧ್ಯ ಶ್ರೀಗಳು, ಈ ಭಾಗದ ಪ್ರಮುಖ ಬೆಳೆ ತೆಂಗು. ಕಳೆದ ಮೂರ್ನಾಲ್ಕು ವರ್ಷಗಳ ಹಿಂದೆ ತೀವ್ರ ಬರಗಾಲಕ್ಕೆ ತುತ್ತಾಗಿ ಅನೇಕ ಮರಗಳು ನೆಲಕ್ಕುರುಳಿದವು. ಅಳಿದುಳಿದ ಮರಗಳಿಗೂ ನುಸಿ ಪೀಡೆ ತಗುಲಿ ಇಳುವರಿಯಲ್ಲಿ ತೀವ್ರ ಕುಂಠಿತವಾಗಿತ್ತು.  ಈಗ ನಾಲ್ಕೈದು ವರ್ಷಗಳಿಂದ ಮಳೆ ಚೆನ್ನಾಗಿ ಬಂದಿದ್ದು, ತೆಂಗಿನ ತೋಟಗಳು ಮರಳಿ ಸಮೃದ್ಧವಾಗಿದ್ದವು. ಆದರೆ ಈಗ ಹೊಸ ರೋಗ ಕಾಣಿಸಿಕೊಂಡು ರೈತರಲ್ಲಿ ಆತಂಕ ಮೂಡುವಂತಾಗಿದೆ. ಈ ಬಗೆಗೆ ಸರಿಯಾದ ಅಧ್ಯಯನ ನಡೆಸಿ, ಸೂಕ್ತ ಪರಿಹಾರ ಸೂಚಿಸಬೇಕು ಎಂದರು.  

ಕೃಷಿ ವಿಜ್ಞಾನಿ ಡಾ. ಓಂಕಾರಪ್ಪ ಮಾತನಾಡಿ ಇದೊಂದು ಹೊಸ ರೋಗವಾಗಿದ್ದು, ಸುರುಳಿ ಸುತ್ತುವ ಬಿಳಿ ನೊಣಗಳು ಇದಕ್ಕೆ ಮೂಲ ಕಾರಣವಾಗಿವೆ. ಈ ಹುಳುಗಳು ಗಾತ್ರದಲ್ಲಿ ಚಿಕ್ಕವಾಗಿದ್ದು ಬೆಳಿಗ್ಗೆ-ಸಂಜೆ ಬಹಳ ಚಟುವಟಿಕೆಯಿಂದ ಕೂಡಿರುತ್ತವೆ. ತೆಂಗಿನ ಗರಿಗಳ ಹಿಂಬದಿಯಲ್ಲಿ ಅಡಗಿ ಕುಳಿತು ರಸ ಹೀರುತ್ತವೆ. ನಂತರ ಜೇನುತುಪ್ಪದಂತಹ ದ್ರವವನ್ನು ಹೊರಚೆಲ್ಲುತ್ತವೆ. ಈ ದ್ರವ ತೆಂಗಿನ ಗರಿಗಳ ಮೇಲೆ ಬೀಳುತ್ತದೆ. ಆ ದ್ರವದ ಮೇಲೆ ಬೂಸ್ಟ್ ಬೆಳೆದು ಗರಿಗಳು ಕಪ್ಪಾಗುತ್ತವೆ. ಇದರಿಂದ ತೆಂಗಿನ ಮರಗಳ ದ್ಯುತಿಸಂಸ್ಲೇಷಣೆ ಕ್ರಿಯೆಗೆ ತೊಂದರೆಯಾಗಿ ಅವು ಶಕ್ತಿಹೀನವಾಗುತ್ತವೆ. 

ಇದರಿಂದ ಇಳುವರಿಯ ಮೇಲೆ ಗಾಢ ಪರಿಣಾಮ ಬೀರುತ್ತದೆ. ಇದೊಂದು ಹೊಸ ರೋಗವಾಗಿದ್ದು ಇದಕ್ಕೆ ಸದ್ಯಕ್ಕೆ ನಿರ್ದಿಷ್ಟವಾದ ಯಾವುದೇ ಔಷಧೋಪಚಾರಗಳು ಇಲ್ಲ. ಆದರೂ ಪರಿಹಾರೋಪಯೋಗವಾಗಿ, ಕೀಟ ಗಳ ನಿಯಂತ್ರಣಕ್ಕಾಗಿ ಹಳದಿ ಅಂಟು ಬಲೆ ಗಳನ್ನು ಹಾಕಬಹುದು. ಶೇ. 5 ರಷ್ಟು ಬೇವಿನ ಎಣ್ಣೆಯನ್ನು ಸೋಪಿನ ದ್ರಾವಣದೊಂದಿಗೆ ಮಿಶ್ರಣ ಮಾಡಿ ಸಿಂಪಡಿಸಬಹುದು. ಕಣಜದಂತಹ ಪರಾವಲಂಬಿ ಕೀಟಗಳನ್ನು ತಂದು ಬಿಟ್ಟರೆ ಅವು ಆ ಕೀಟಗಳನ್ನು ತಿನ್ನುವು ದರಿಂದ ರೋಗ ತಹಬಂದಿಗೆ ಬರುವುದು. 

ಅಲ್ಲದೇ ಈ ಕ್ರಮಗಳನ್ನು ಸಾಮೂಹಿಕವಾಗಿ ಕೈಗೊಳ್ಳಬೇಕು. ತೆಂಗಿನ ಮರಗಳಿಗೆ ಬೇವಿನ ಹಿಂಡಿ, ಕೊಟ್ಟಿಗೆ ಗೊಬ್ಬರ, ಶಿಫಾರಸ್ಸು ಮಾಡಿದ ಅವರು,  ರಸಗೊಬ್ಬರಗಳ ಮೂಲಕ ಸೂಕ್ತ ಪೋಷಕಾಂಶಗಳನ್ನು ನೀಡಿ ಅವು ಶಕ್ತಿಗುಂದದಂತೆ ನೋಡಿಕೊಳ್ಳುವುದು ಬಹಳ ಅವಶ್ಯ. ನುಸಿ ಪೀಡೆಯಂತೆ ಇದೂ ಸಹ 2-3 ವರ್ಷಗಳ ಕಾಲ ಇದ್ದು, ನಂತರ ಪ್ರಕೃತಿದತ್ತವಾಗಿಯೇ ನಿಯಂತ್ರಣಕ್ಕೆ ಬರುವುದು ಎಂದು ತಿಳಿಸಿದರು.