ವಾರ ಭವಿಷ್ಯ

Home ವಾರ ಭವಿಷ್ಯ

ದಿನಾಂಕ : 05.09.2021 ರಿಂದ 11.09.2021

ಜಯತೀರ್ಥಾಚಾರ್ ವಡೇರ್, ದಾವಣಗೆರೆ. 

ಮೇಷ (ಅಶ್ವಿನಿ, ಭರಣಿ, ಕೃತ್ತಿಕಾ)
(ಚೂ.ಚೇ.ಚೋ.ಲ.ಲಿ.ಉ.ಲೇ.ಲೊ.ಅ.)

ಸ್ಥಳ ಬದಲಾವಣೆ  ನಿರೀಕ್ಷಿಸಿದ್ದ ಸರ್ಕಾರಿ ನೌಕರರಿಗೆ ಯೋಗ  ಕೂಡಿ ಬರಲಿದೆ. ಆದರೆ, ಅಲ್ಲಿಗೆ ಹೊಂದಿಕೊಳ್ಳುವುದು ಕಷ್ಟ, ಹೊಸ ಯೋಜನೆಗಳು ಕಾರಣಾಂತರ ಗಳಿಂದ ಮುಂದೆ ಹೋಗಲಿವೆ. ವ್ಯವಹಾರಗಳ ಪೂರ್ವಾಪರ ಅರಿಯದೆ ಬಂಡವಾಳ ಹೂಡಲು ಹೋಗಬೇಡಿ. ಹಿತೈಷಿಗಳಿಂದ ಉತ್ತಮ ಸಲಹೆ ಸಿಗುವುದರಿಂದ ಅದನ್ನು ಕಡೆ ಗಣಿಸಬೇಡಿ. ನ್ಯಾಯಾಲಯದ ವ್ಯಾಜ್ಯಗಳು ನಿಮ್ಮಂತೆ ಆದರೂ ತೀರ್ಪು ತಡವಾಗಲಿದೆ. ನೆರವಿಗೆ ಧಾವಿಸಲಿರುವ ಬಂಧುಗಳನ್ನು ಅವಮಾನಿಸಬೇಡಿ. ಕೆಲಸಗಳಲ್ಲಿ ಆಗುವ ವಿಳಂಬಕ್ಕೆ ನಿಮ್ಮ ಉದಾಸೀನತೆಯು ಕಾರಣ. ಆರೋಗ್ಯದ ಕಡೆ ಗಮನವಿರಲಿ. ಕುಲದೇವತಾ ರಾಧನೆ ಮಾಡಿ. ವಿದ್ಯಾರ್ಥಿಗಳಿಗೆ ಉತ್ತಮ. ಸೋಮ – ಮಂಗಳ -ಬುಧ -ಶುಭ ದಿನಗಳು.


ವೃಷಭ (ಕೃತ್ತಿಕಾ, 2,3,4, ರೋಹಿಣಿ, ಮೃಗ 1,2)
(ಇ.ಉ.ಎ.ಒ.ವ.ವಿ.ವು.ವೆ.ವೋ)

ನಿಮ್ಮ ಮಿತಿಮೀರಿದ ಕೋಪ, ತಾಪಗಳಿಂದಾಗಿ ಕೆಲಸಗಾರರು ನಿಮ್ಮ ವಿರುದ್ಧ ತಿರುಗಿ ಬೀಳುವುದರಿಂದ ಉದ್ಯಮದ ಮೇಲೆ ಅಡ್ಡಪರಿಣಾಮ, ಹೊಸ ವಿಭಾಗವನ್ನು ತೆರೆಯಲು  ಸ್ನೇಹಿತರಿಂದ  ಉತ್ತಮ ಸಲಹೆ ಮತ್ತು ನೆರವು ದೊರೆಯಲಿದೆ. ನಿಧಾನಗತಿಯಲ್ಲಿ ಸಾಗಿದ್ದ ಮನೆ ಕಟ್ಟುವ ಕೆಲಸವು  ವೇಗ ಪಡೆಯಲಿದೆ. ರಾಸಾಯನಿಕ ಗೊಬ್ಬರ ಮುಂತಾದ ಮಾರಾಟಗಾರರು ಅಪರಿಚಿತರಿಂದ ಮೋಸ ಹೋಗುವ ಸಂಭವವಿದೆ. ಅನಾವಶ್ಯಕವಾಗಿ ಮಾಡುವ ಸಾಲಗಳು  ದುಂದುವೆಚ್ಚಕ್ಕೆ ದಾರಿಯಾದೀತು. ಆದಾಯದ ಮೂಲದಲ್ಲಿ ಹೆಚ್ಚಳ ಕಂಡುಬರಲಿದೆ. ಆದ್ದರಿಂದ  ಉಳಿತಾಯದ ಬಗ್ಗೆ ತುಸು ಯೋಚಿಸಬಹುದು.ಅಪರಿಚಿತರೊಂದಿಗೆ ವ್ಯವಹಾರ ಬೇಡ. ಬುಧ -ಗುರು -ಶುಕ್ರ -ಶುಭ ದಿನಗಳು.


ಮಿಥುನ (3,4, ಆರಿದ್ರಾ, ಪುನರ್ವಸು 1,2,3)
(ಕ.ಕಿ.ಕು.ಘ, ಔ, ಚ.ಕೆ.ಕೋ.ಹ.)

ಮಕ್ಕಳ ವಿದ್ಯಾಭ್ಯಾಸ ಯಾವ ಕಡೆ ಸಾಗುತ್ತಿದೆ ಎಂಬುದರ ಬಗ್ಗೆ ಹೆಚ್ಚಿನ ಗಮನವಿಡಿ.ವಿವಿಧ ಇಲಾಖೆಗಳಿಗೆ ವಸ್ತುಗಳನ್ನು ಸರಬರಾಜು ಮಾಡಿದವರಿಗೆ ಈ ವಾರ  ಸರ್ಕಾರದಿಂದ ಬಾಕಿ ಹಣ ಬಿಡುಗಡೆಯಾಗಲಿದೆ. ಅನಿರೀಕ್ಷಿತ ಮೂಲಗಳಿಂದ  ಹರಿದುಬರುವ ಧನ ಸಹಾಯವು ನಿಮ್ಮ ಎಲ್ಲಾ ಆರ್ಥಿಕ ಸಮಸ್ಯೆಗಳನ್ನು ಬಗೆಹರಿಸಲಿವೆ. ಹಳೇ ವಾಹನಗಳು ಮತ್ತೆ ಮತ್ತೆ ರಿಪೇರಿಗೆ ಬರಲಿದೆ. ವ್ಯಾಪಾರದ ವಿಸ್ತರಣೆಗೆ ಮೊದಲು ಅನುಭವಿಗಳಿಂದ ಸಲಹೆ ಪಡೆಯಿರಿ. ಮಡದಿಯ ಆರೋಗ್ಯದಲ್ಲಿ ತುಸು ವ್ಯತ್ಯಾಸವಾಗಲಿದೆ. ಪ್ರಯಾಣಗಳು ಸದ್ಯದ ಮಟ್ಟಿಗೆ ಸೂಕ್ತವಲ್ಲ. ಸೋದರನ ಉದ್ಯೋಗದಲ್ಲಿ ಬದಲಾವಣೆಯಾಗುವ ಸಂಭವವಿದೆ. ಅನಾವಶ್ಯಕ ವಸ್ತುಗಳ ಖರೀದಿ ಬೇಡ. ವೈದ್ಯ ವೃಂದದವರಿಗೆ ಆದಾಯ ಹೆಚ್ಚಲಿದೆ. ಭಾನು -ಸೋಮ -ಬುಧ -ಶುಭ ದಿನಗಳು.


ಕರ್ಕಾಟಕ (ಪುನ 4, ಪುಷ್ಯ, ಆಶ್ಲೇಷ)
(ಹಿ.ಹು.ಹೆ.ಹೂ.ಡ.ಡಿ.ಡು.ಡೆ.ಡೋ)

ಹಿರಿಯರಿಂದ ಕೊಟ್ಟ ಜವಾಬ್ದಾರಿ ಅಚ್ಚುಕಟ್ಟಾಗಿ ನಿರ್ವಹಿಸಿ. ಕುಲುಮೆಯಲ್ಲಿ ಕೆಲಸ ಮಾಡುವವರು ಎಚ್ಚರದಿಂದಿರಿ. ಅತಿಯಾದ ಮೋಜು-ಮಸ್ತಿಗಳು ಉದರ ಸಂಬಂಧಿ ವ್ಯಾಧಿಗಳಿಗೆ ಕಾರಣವಾಗಬಹುದು. ಸಂಬಂಧಿಗಳಿಂದ ಉಂಟಾದ  ಕೌಟುಂಬಿಕ ಸಮಸ್ಯೆಗಳನ್ನು  ಜಾಣ್ಮೆಯಿಂದ  ಪರಿಹರಿಸುವಿರಿ. ವಿದ್ಯಾರ್ಥಿಗಳಿಗೆ  ಉತ್ತಮ ಅವಕಾಶಗಳು ಅರಸಿ ಬರಲಿವೆ. ಮತ್ತೊಬ್ಬರ ಹಣಕಾಸಿನ ಬಗ್ಗೆ ಜಾಮೀನಾಗುವುದರಿಂದ ನೀವು ತೊಂದರೆಗೆ ಸಿಕ್ಕಿಕೊಳ್ಳುವ ಸಂಭವವಿದೆ. ಸಿನಿಮಾ ಕಲಾವಿದರಿಗೆ  ಅವರ ಸಾಮರ್ಥ್ಯಕ್ಕೆ ತಕ್ಕ ಮತ್ತು ಹೆಚ್ಚಿನ ಸಂಭಾವನೆಯ ಅವಕಾಶಗಳು ಬರಲಿವೆ. ಚಿಕ್ಕಮಕ್ಕಳ ಆರೋಗ್ಯದ ಬಗ್ಗೆ ಉದಾಸೀನ ಬೇಡ. ಸೋಮ -ಬುಧ -ಗುರು -ಶುಭ ದಿನಗಳು.


ಸಿಂಹ ( ಮಘ, ಪುಬ್ಬ, ಉತ್ತರ 1)
(ಮ.ಮಿ.ಮು.ಮೋ.ವೆ.ಟ.ಟಿ.ಟು.ಟೆ)

ಬಹುದಿನಗಳಿಂದ ನಿರೀಕ್ಷಿಸಿದ್ದ  ಮಹತ್ತರ ಕೆಲಸವೊಂದು ಕಾಣದ ಕೈಯಿಂದಾಗಿ ಮತ್ತೆ ಮುಂದೆ ಹೋಗಿ ನಿಮಗೆ ನಿರಾಶೆಯಾಗಬಹುದು. ಕೃಷಿಕರ ಬೆಳೆಗಳಿಗೆ ಉತ್ತಮ ಬೆಲೆ ದೊರೆತು, ನೆಮ್ಮದಿ ಕಾಣುವರು. ಮಕ್ಕಳು ಹೆಚ್ಚಿನ ವಿದ್ಯಾಭ್ಯಾಸಕ್ಕಾಗಿ ವಿದೇಶಕ್ಕೆ ಹೋಗಬಯಸುವರು, ಆದರೆ  ಅದಕ್ಕೆ ಬೇಕಾದ ಆರ್ಥಿಕ ಕ್ರೋಢೀಕರಣಕ್ಕೆ ತುಸು ಕಷ್ಟಪಡಬೇಕಾದೀತು. ಸಹೋದ್ಯೋಗಿಗಳ ಅಸಹಕಾರ ನೆಮ್ಮದಿಯನ್ನು ಕೆಡಿಸಲಿದೆ. ಸಾಧ್ಯ ವಾದಷ್ಟು ತಾಳ್ಮೆಯಿಂದಿರಿ. ಕ್ರೀಡಾಪಟುಗಳು ಮಹೋನ್ನತಿಯನ್ನು ಪಡೆಯಲು ಉತ್ತಮ ತರಬೇತುದಾರರನ್ನು ಕಂಡುಕೊಳ್ಳುವರು. ಆದಾಯಕ್ಕೆ ತಕ್ಕಂತೆ ಖರ್ಚನ್ನು ರೂಢಿಸಿಕೊಳ್ಳಿ. ಸೈನ್ಯದಲ್ಲಿ ಸೇವೆ ಸಲ್ಲಿಸುವವರಿಗೆ ಉತ್ತಮ ದಿನ. ಭಾನು -ಬುಧ -ಗುರು -ಶುಭ ದಿನಗಳು.


ಕನ್ಯಾ (ಉತ್ತರಾ 2,3,4, ಹಸ್ತಾ, ಚಿತ್ತಾ 1,2)
(ಟೋ.ಪ.ಪಿ.ಪು.ಷ.ಣ.ಠ.ಪೆ.ಪೋ)

ಮಕ್ಕಳಿಂದ ನಿರಾಶೆ, ಹಿರಿಯರ ಆರೋಗ್ಯದಲ್ಲಿ ಸುಧಾರಣೆ ಕಂಡರೂ, ವೈದ್ಯಕೀಯ ಮೇಲ್ವಿಚಾರಣೆ ಅತ್ಯಗತ್ಯ. ಮನೆ ಸದಸ್ಯರ ನಡಾವಳಿ ನಿಮ್ಮ ತಾಳ್ಮೆಯನ್ನು ಪರೀಕ್ಷೆಗೆ ಒಡ್ಡಲಿದೆ. ಸದ್ಯದ ಈ ಪರಿಸ್ಥಿತಿಯಲ್ಲಿ ತಾಳ್ಮೆ ಮತ್ತು ಮೌನ ಉತ್ತಮ. ಸರ್ಕಾರಿ ಮೇಲ್ದರ್ಜೆ ಗುತ್ತಿಗೆದಾರರಿಗೆ ಬಾಕಿ ಹಣ ಬರುವುದರೊಂದಿಗೆ ಹೊಸಗುತ್ತಿಗೆಯೂ ಸಿಗಲಿದೆ. ರೇಷ್ಮೆ ಸೀರೆ, ಬಟ್ಟೆ ಮಾರಾಟಗಾರರಿಗೆ ಭರ್ಜರಿ ವ್ಯಾಪಾರದಿಂದ ಲಾಭವಾಗಲಿದೆ. ಆದಾಯದಲ್ಲಿ ತುಸು ಹೆಚ್ಚು ಕಡಿಮೆಯಾದರೂ, ದೈನಂದಿನ ಜೀವನಕ್ಕೇನೂ ತೊಂದರೆಯಿಲ್ಲ. ಗುರುಗಳ ಸೇವೆ ಮಾಡಿ. ಮಂಗಳ -ಬುಧ -ಗುರು -ಶುಭ ದಿನಗಳು.


ತುಲಾ (ಚಿತ್ತಾ 3,4, ಸ್ವಾತಿ, ವಿಶಾಖ 1,2,3)
(ರ.ರಿ.ರು.ರೆ.ರೊ.ತ.ತಿ.ತು.ತೆ.)

ಶುಭ ಕಾರ್ಯಗಳಿಗೆ ಭಾಗವಹಿಸುವಿರಿ. ಆ ಸಂಭ್ರಮದ ಮಧ್ಯೆ ನಡೆಯಬಹುದಾದ ಘಟನೆಯೊಂದು ನಿಮ್ಮ ಸ್ವಾಭಿಮಾನವನ್ನು ಕೆಣಕಬಹುದು. ಗೃಹ ಸಾಲ, ಖರ್ಚು-ವೆಚ್ಚಗಳನ್ನು ಸರಿದೂಗಿಸಲು, ಆದಾಯದ ಮೂಲವನ್ನು ಹೆಚ್ಚಿಸಿಕೊಳ್ಳದೇ ವಿಧಿಯಿಲ್ಲ. ಸೋದರನು ಉದ್ಯೋಗ ಬದಲಾಯಿಸಲು ಹೋಗಿ ಅತಂತ್ರ ಪರಿಸ್ಥಿತಿ ಹೊಂದಬಹುದು. ಹಿರಿಯರ ಆರೋಗ್ಯ ಸಮಸ್ಯೆ ದಿನೇ ದಿನೇ ಬಿಗಡಾಯಿಸಲಿದ್ದು, ಹೈರಾಣಾಗುವಿರಿ. ವಿವೇಚನಾ ರಹಿತ ನಿರ್ಧಾರಗಳು ವ್ಯವಹಾರದಲ್ಲಿ ನಷ್ಟವನ್ನುಂಟು ಮಾಡಲಿದೆ. ವಿದ್ಯಾರ್ಥಿಗಳಿಗೆ  ನಿರೀಕ್ಷಿತ ಫಲಿತಾಂಶ ಬರದೇ ನಿರಾಶೆಯಾಗಲಿದೆ. ಹಾಗೆಂದ ಮಾತ್ರಕ್ಕೆ ಚಿಂತೆಬೇಡ. ಈ ಎಲ್ಲಾ ಸಮಸ್ಯೆಗಳಿಗೆ ವಾರಾಂತ್ಯದಲ್ಲಿ ಪರಿಹಾರ ಸಿಗಲಿದೆ. ಸೋಮ -ಶುಕ್ರ -ಶನಿ – ಶುಭ ದಿನಗಳು.


ವೃಶ್ಚಿಕ (ವಿಶಾಖ 4, ಅನೂ, ಜೇಷ್ಠ)
(ತೊ.ನ.ನಿ.ನು.ನೆ.ನೋ.ಯ.ಯು.)

ಈಗ ಸದ್ಯಕ್ಕೆ ನಡೆಯುತ್ತಿರುವ ಉದ್ಯಮದಲ್ಲೇ ಸಾಕಷ್ಟು ಪ್ರಗತಿ, ಹೊಸ ಯೋಜನೆಗಳನ್ನು ಆರಂಭಿಸಬೇಡಿ. ಕೌಟುಂಬಿಕ  ಸಮಸ್ಯೆಗಳು ಒಂದರ ಹಿಂದೆ ಒಂದೆಂಬಂತೆ ಬರಲಿದ್ದು, ಜಾಣ್ಮೆ ತಾಳ್ಮೆಯಿಂದ ಅವುಗಳನ್ನು ನಿಭಾಯಿಸಿರಿ. ಆದರೆ ಮಕ್ಕಳ ಹುಚ್ಚಾಟಕ್ಕೊಂದು ಕಡಿವಾಣ ಹಾಕದ ಹೋದಲ್ಲಿ ಕಷ್ಟವಾದೀತು. ಅವರ ವಿದ್ಯಾಭ್ಯಾಸದಲ್ಲಿ ಭಾರೀ ಏರುಪೇರು ಕಂಡುಬರಲಿದ್ದು, ಚಿಂತೆಗೀಡಾಗುವಿರಿ. ಸ್ನೇಹಿತರ ಭರವಸೆಗಳು, ಭರವಸೆಗಳಾಗಿಯೇ ಉಳಿಯಲಿದೆ. ಖಾಸಗಿ ಕಂಪನಿ ನೌಕರರು ಮೇಲಾಧಿಕಾರಿಗಳೊಂದಿಗೆ ಗೌರವದಿಂದ ನಡೆದುಕೊಳ್ಳಿ, ಜಾಹೀರಾತು ಕಂಪನಿಗಳ ನೆರವಿನಿಂದ ಉದ್ಯಮದಾರರ ವಹಿವಾಟು ಹೆಚ್ಚಲಿದೆ. ಭಾನು -ಮಂಗಳ -ಬುಧ -ಶುಭ ದಿನಗಳು.


ಧನಸ್ಸು (ಮೂಲ, ಪೂರ್ವಾಷಾಡ, ಉತ್ತರಾಷಾಡ)
(ಯೆ.ಯೋ. ಬ.ಬಿ.ಬು.ಧ.ಫ.ಡ.ಬೆ.)

ಅರ್ಥವಿಲ್ಲದ ಯೋಜನೆಗಳ ಆರಂಭದಿಂದ ಹೂಡಿದ ಬಂಡವಾಳದ ಜೊತೆಗೆ ಸರ್ಕಾರದಿಂದ ಬರಲಿರುವ ಆರ್ಥಿಕ ನೆರವೂ ಕೂಡ ಪ್ರಯೋಜನಕ್ಕೆ ಬರದೇ ಹೋಗಬಹುದು. ಆದ್ದರಿಂದ ತುಸು ವಿವೇಚನೆಯಿಂದ ವರ್ತಿಸಿ. ಕೆಳದರ್ಜೆ ನೌಕರರು ತುಸು ಜವಾಬ್ದಾರಿಯಿಂದ ಕೆಲಸ ಮಾಡುವುದು ಲೇಸು. ಅನಪೇಕ್ಷಿತ ಪ್ರಯಾಣಗಳು ಅನಿವಾರ್ಯವಾಗಲಿದೆ. ಕೊಟ್ಟ ಸಾಲಕ್ಕೆ ಭರವಸೆ ಮಾತ್ರ ದೊರೆಯಲಿದೆ. ಹಿರಿಯರೊಂದಿಗೆ ಆಡುವ ನಿಷ್ಠೂರದ ಮಾತುಗಳು ಮನಸ್ತಾಪಕ್ಕೆ ಕಾರಣವಾದೀತು. ವಿದೇಶದಲ್ಲಿ ಓದಬೇಕೆಂಬುವವರು  ಮೊದಲು ಅಲ್ಲಿಯ ಸ್ಥಿತಿಗತಿಗಳ ಅರಿವಿರುವುದು ಉತ್ತಮ. ಮಿತಿಮೀರುವ ಖರ್ಚು-ವೆಚ್ಚಗಳನ್ನು ನಿಯಂತ್ರಿಸಲು ಪ್ರಯತ್ನಿಸಿ. ಕುಲದೇವತಾರಾಧನೆ ಮಾಡಿ, ಗುರು  -ಶುಕ್ರ -ಶನಿ -ಶುಭ ದಿನಗಳು.


ಮಕರ (ಉತ್ತರಾಷಾಢ 2,3,4, ಶ್ರವಣ, ಧನಿಷ್ಠಾ 1,2)
(ಜೊ.ಜ.ಜಿ.ಜೆ.ಶಿ.ಶು.ಶೇ.ಶೋ.ಗ.ಗಿ)

ಹೊಸ ಮನೆಕಟ್ಟುವ ವಿಚಾರವಿದ್ದಲ್ಲಿ ಹಣಕಾಸಿನ ವ್ಯವಸ್ಥೆ ಮಾಡಿಕೊಂಡೇ ಮುಂದುವರೆಯಿರಿ, ಔಷಧಿ ತಯಾರಕರಿಗೆ ವಿಶೇಷ ಬೇಡಿಕೆ ಬರಲಿದ್ದು, ಕಂಪನಿಯು ಲಾಭದತ್ತ ಸಾಗಲಿದೆ. ಕೆಲವು ಸಮಸ್ಯೆಗಳಿಗೆ ಅನುಭವಿಗಳಾದ ಹಿರಿಯರಿಂದ ಪರಿಹಾರ ಸಿಗಲಿದೆ. ಲೇವಾದೇವಿ ವ್ಯವಹಾರಸ್ಥರಿಗೆ ಬಾಕಿ ಹಣ ವಸೂಲಾಗಲಿದ್ದು, ತುಸು ನೆಮ್ಮದಿ ಕಾಣುವರು. ಅಪರಿಚಿತ ಮಹಿಳೆಯರೊಂದಿಗೆ ಅತಿ ಸಲಿಗೆ ಬೇಡ. ಪ್ರಯಾಣಗಳನ್ನು ಸಾಧ್ಯವಾದಷ್ಟು ಸುರಕ್ಷತೆಯೊಂದಿಗೆ ಮಾಡಿ. ನೆರೆಹೊರೆಯವರೊಂದಿಗೆ  ಸೌಹಾರ್ದತೆ ಬೆಳೆಸುವಿರಿ. ಆದಾಯ ಅಷ್ಟಕ್ಕಷ್ಟೆಯಿರುವುದರಿಂದ ಹೆಚ್ಚಿನ ನಿರೀಕ್ಷೆಬೇಡ.  ಅತಿಥಿಗಳ ಆಗಮನ ಸಂತಸ ತರಲಿದೆ. ಸೋಮ -ಬುಧ -ಶನಿ -ಶುಭ ದಿನಗಳು.


ಕುಂಭ (ಧನಿಷ್ಠಾ, ಶತಭಿಷಾ, ಪೂರ್ವಾಭಾದ್ರ 1,2,3)
(ಗು.ಗೆ.ಗೊ.ಸ.ಸಿ.ಸು.ಸೆ.ಸೋ.ದ)

ಕೈಗಾರಿಕೋದ್ಯಮಿಗಳು ತಮ್ಮ ವ್ಯವಹಾರವನ್ನು ವಿಸ್ತರಿಸಲು ಸಾಕಷ್ಟು ತಯಾರಿ ನಡೆಸುವರು. ವಿದೇಶದಲ್ಲೂ ವಿಫುಲ ಅವಕಾಶ, ಅನುಮತಿ ದೊರೆಯುವುದು. ವಾಹನ ಖರೀದಿಸುವ ಮೊದಲು ಅದರ ಮೂಲ ಸ್ವರೂಪದ ಅರಿವಿರಲಿ. ಕಾಲ ಮತ್ತು  ಸಮಯದ ಅರಿವಿನೊಂದಿಗೆ ಕೆಲಸ ಮಾಡಿದಲ್ಲಿ ಯಶಸ್ಸು ಕಾಣುವಿರಿ. ರೈತಾಪಿ ಜನರಿಗೆ ಸರ್ಕಾರದಿಂದ ದೊರೆಯಬಹುದಾದ ನೆರವು ದುರುಪಯೋಗವಾಗುವ ಸಂಭವವಿದೆ. ಮಧ್ಯವರ್ತಿಗಳ ಹಾವಳಿಯಿಂದಾಗಿ ತುಸು ನಷ್ಟವುಂಟಾಗಲಿದೆ. ಹಣದ ಹರಿವು ಸಾಧಾರಣ, ಮಹಿಳೆಯರು ಆರೋಗ್ಯದ ಕಡೆ ಲಕ್ಷವಿಡಲಿ. ಭಾನು -ಶುಕ್ರ -ಶನಿ -ಶುಭ ದಿನಗಳು.


ಮೀನ (ಪೂರ್ವಾಭಾದ್ರ 4, ಉತ್ತರಾಭಾದ್ರ, ರೇವತಿ)

(ದಿ.ದು.ಖ.ಝ.ಥ.ದೆ.ದೋ.ಖ.ಚ.ಚಿ.)

ಪ್ರಭಾವೀ ವ್ಯಕ್ತಿಗಳೊಂದಿಗೆ ಒಡನಾಟದಿಂದ ನಿಮ್ಮ ವ್ಯಕ್ತಿತ್ವ ಹೆಚ್ಚಲಿದೆ. ಆದರೆ ಅದರಿಂದಾಗಬಹುದಾದ  ಋಣಾತ್ಮಕಗಳ ಪರಿಣಾಮಗಳ ಅರಿವಿರುವುದು ಉತ್ತಮ.ಸರ್ಕಾರಿ ನೌಕರರಿಗೆ ಅನಿರೀಕ್ಷಿತವಾಗಿ ಪದೋನ್ನತಿಯಾಗಲಿದ್ದು, ವೇತನದಲ್ಲೂ ಹೆಚ್ಚಳವಾಗಲಿದೆ. ಮಕ್ಕಳ ವಿದೇಶ ಅಧ್ಯಯನಕ್ಕೆ ಹಣಕಾಸು ಹೊಂದಿಸಲು ಹರಸಾಹಸ ಪಡುವಿರಿ. ಈ ವಿಚಾರದಲ್ಲಿ ಬಂಧುಗಳ ನೆರವನ್ನು ಪಡೆಯಿರಿ. ಆದಾಯದ ಮೂಲವನ್ನು ಹುಡುಕಿಕೊಂಡು ಹೋಗುವ ನಿಮಗೆ ಸಾಧಾರಣ ಯಶಸ್ಸಾಗಲಿದೆ. ವ್ಯವಹಾರಸ್ಥರಿಗೆ ಲೆಕ್ಕಾಧಿಕಾರಿಗಳಿಂದ ಕಿರಿಕಿರಿ ಅನುಭವಿಸಬೇಕಾದೀತು. ಸಾಧ್ಯವಾದಷ್ಟು ಆರೋಗ್ಯದ ಕಡೆ ಗಮನವಿರಲಿ. ಮಂಗಳ -ಬುಧ -ಗುರು – ಶುಭ ದಿನಗಳು.


ವಿಶೇಷ ದಿನಗಳು : ದಿನಾಂಕ 6.9.2021 ಸೋಮವಾರ ಅಮಾವಾಸ್ಯೆ. ದಿ.:9.9.2021 ಗುರುವಾರ ಸ್ವರ್ಣಗೌರಿ ವ್ರತ. ದಿ.: 10.9.2021 ಶುಕ್ರವಾರ ವರಸಿದ್ಧಿವಿನಾಯಕ ವ್ರತ. ದಿ.:11.9.2021 ಶನಿವಾರ ಋಷಿಪಂಚಮೀ ವ್ರತ.